ಧಾರಾವಾಹಿಗಳಲ್ಲಿ ನಟಿಸೋ ಆಸೆ ಇದ್ರೆ ಎಂಟ್ರಿ ಆಗೋದು ಹೇಗೆ? 'ಸೀತಾರಾಮ' ಪ್ರಿಯಾ ಮಾತು ಕೇಳಿ...

ಧಾರಾವಾಹಿಗಳಲ್ಲಿ ನಟಿಸುವ ಆಸೆ ಹಲವರಿಗಿದೆ, ಆದರೆ ಅವಕಾಶ ಸಿಗುವುದು ಕೆಲವೇ ಮಂದಿಗೆ. ನಟನೆಯನ್ನು ಕಲಿತುಕೊಂಡು ಬರುವುದು ಮುಖ್ಯ. ವಾಹಿನಿಗಳು ಮತ್ತು ಪ್ರೊಡಕ್ಷನ್ ಹೌಸ್​ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಜಾಹೀರಾತು ನೀಡುತ್ತವೆ. ಆಡಿಷನ್​ನಲ್ಲಿ ಅರ್ಹತೆ ಇದ್ದವರಿಗೆ ಅವಕಾಶ ಸಿಗುತ್ತದೆ. ಆದರೆ, ಜಾಹೀರಾತುಗಳ ಬಗ್ಗೆ ಎಚ್ಚರಿಕೆ ವಹಿಸಿ. ದುಡ್ಡು ಕೇಳುವವರನ್ನು ನಂಬಬೇಡಿ ಎಂದು ನಟಿ ಮೇಘನಾ ಶಂಕರಪ್ಪ ಸಲಹೆ ನೀಡಿದ್ದಾರೆ.

ಸೀರಿಯಲ್​ಗಳಲ್ಲಿ ನಟಿಸುವ ಆಸೆಯನ್ನು ಹೊತ್ತವರು ಲಕ್ಷಾಂತರ ಮಂದಿ ಇದ್ದಾರೆ. ಕೆಲವು ವಾಹಿನಿಗಳಲ್ಲಿ ಆಡಿಷನ್​ಗೆ ಕರೆದಾಗ ಬರುವ ಯುವಕ-ಯುವತಿಯರ ಸಂಖ್ಯೆ ನೋಡಿದರೆ ಎಷ್ಟು ಮಂದಿ ಈ ಆಸೆ ಹೊತ್ತುಕೊಂಡಿದ್ದಾರೆ ಎನ್ನುವುದು ತಿಳಿಯುತ್ತದೆ. ಆದರೆ ಎಲ್ಲರಿಗೂ ಈ ಅದೃಷ್ಟ ಸಿಗುವುದಿಲ್ಲ. ಸಿನಿಮಾ ಆಗಲೀ, ಕಿರುತೆರೆ ಆಗಲೀ, ಅಲ್ಲಿಗೆ ಹೋಗುವ ಕನಸು ಹೊತ್ತವರ ಪೈಕಿ ಅದೃಷ್ಟ ಇದ್ದವರಿಗೆ ಮಾತ್ರ ಅವಕಾಶ ಸಿಗುವುದು. ಕೆಲವೊಮ್ಮೆ ಸ್ಟಾರ್​ ಕಿಡ್​ ಆಗಿದ್ದರೂ ಅವಕಾಶ ಸಿಗದ ಘಟನೆಗಳೂ ಸಾಕಷ್ಟಿವೆ. ಇನ್ನು ಗಾಡ್​ಫಾದರ್​ಗಳು ಬೇಕು ಎನ್ನುವುದು ನಿಜವಾದರೂ, ಇನ್​ಫ್ಲುಯೆನ್ಸ್ ಮಾಡಿ ಹೋದವರು ಒಂದೆರಡು ಸೀರಿಯಲ್​ ಅಥವಾ ಸಿನಿಮಾಗಳಲ್ಲಿ ನಟಿಸಿ ಕೊನೆಗೆ ಕೆಲಸ ಕಳೆದುಕೊಳ್ಳುವವರೂ ಇದ್ದಾರೆ.  ಮತ್ತೆ ಹಲವರಲ್ಲಿ ತುಂಬಾ ಟ್ಯಾಲೆಂಟ್​ ಇದ್ದರೂ ಅವರಿಗೆ ಕಿರುತೆರೆಗೆ ಹೋಗುವ ದಾರಿ ಗೊತ್ತಿರುವುದಿಲ್ಲ.

ಈ ಬಗ್ಗೆ ಮಾತನಾಡಿದ್ದಾರೆ ನಟಿ ಮೇಘನಾ ಶಂಕರಪ್ಪ. ಮೇಘನಾ ಎಂದರೆ ಹಲವರಿಗೆ ತಿಳಿಯಲಿಕ್ಕಿಲ್ಲ. ಸೀತಾರಾಮ ಸೀರಿಯಲ್​ ಪ್ರಿಯಾ ಇವರು. ಈಚೆಗಷ್ಟೇ ಮದುವೆಯಾಗಿರುವ ನಟಿ ಮೇಘನಾ, ಮದುವೆ, ಹನಿಮೂನ್ ಎಲ್ಲಾ ಮುಗಿಸಿ ಮತ್ತೆ ಶೂಟಿಂಗ್​ಗೆ ಬಂದಿದ್ದಾರೆ. ಇದೀಗ ಅವರು, ರೆಡ್​ಎಫ್​ಎಂ ಯೂಟ್ಯೂಬ್​ ಚಾನೆಲ್​ ಜೊತೆ  ಮಾತನಾಡುತ್ತಾ ಕೆಲವೊಂದು ವಿಷಯಗಳನ್ನು ಶೇರ್​ ಮಾಡಿಕೊಂಡಿದ್ದಾರೆ.  ನಟನೆಯ ಬಗ್ಗೆ ತುಂಬಾ ಮಂದಿ ಕನಸು ಕಂಡಿರುತ್ತಾರೆ ನಿಜ. ಆದರೆ, ಕಿರುತೆರೆಗೆ ಪ್ರವೇಶಿಸುವ ಮೊದಲು ನಟನೆಯನ್ನು ಕಲಿತುಕೊಂಡು ಬನ್ನಿ, ಅಷ್ಟಕ್ಕೂ ನಟನೆ ಎನ್ನುವುದು ಒಳಗಿನಿಂದ ಬರಬೇಕು, ನಿಮಗೆ ಯಾರೂ ತರಬೇತಿ ಕೊಡುವುದು ಕಷ್ಟ. ಕ್ಯಾಮೆರಾ ಹೇಗೆ ಫೇಸ್​ ಮಾಡಬೇಕು ಎನ್ನುವ ಟ್ರೇನಿಂಗ್​  ಕೊಡಬಹುದು. ಆದರೆ ಬೇಸಿಕ್​ ನಟನೆಯೇ ಗೊತ್ತಿಲ್ಲದಿದ್ದರೆ ಕಲಿಸುವುದು ತುಂಬಾ ಕಷ್ಟವಾಗುತ್ತದೆ, ಅದು ಒಳಗಿನಿಂದ ಬರುವ ಫೀಲ್​ ಆಗಿರಬೇಕು ಎಂದಿದ್ದಾರೆಕಿರುತೆರೆಗೆ ಪ್ರವೇಶ ಪಡೆಯುವುದು ಕಷ್ಟವಲ್ಲವಾದರೂ ಸುಲಭವಲ್ಲ. ಹೇಗೆ ಎಂಟ್ರಿ ಕೊಡಬೇಕು ಎನ್ನುವ ಪ್ರಶ್ನೆಗೆ ಸರಿಯಾದ ಉತ್ತರ ಇಲ್ಲ. ಆದರೆ ಈಗ ಹಿಂದಿನ ಹಾಗಲ್ಲ. ವಾಹಿನಿಗಳೇ ಇಲ್ಲವೇ ಪ್ರೊಡಕ್ಷನ್​ ಹೌಸ್​ಗಳವರೇ ಸೋಷಿಯಲ್​ ಮೀಡಿಯಾದಲ್ಲಿ ಜಾಹೀರಾತು ನೀಡುತ್ತಾರೆ. ಇದಾಗಲೇ ಕೆಲವು ವಾಹಿನಿಗಳು ಈ ರೀತಿ ಜಾಹೀರಾತು ನೀಡಿವೆ. ಆಡಿಷನ್​ಗೆ ಕರೆಯುತ್ತಾರೆ. ಆಗ ಬಂದು ಆಡಿಷನ್​ ಮಾಡಿದರೆ ಅರ್ಹರು ಕೆಲಸ ಪಡೆದುಕೊಳ್ಳಬಹುದಾಗಿದೆ ಎಂದಿದ್ದಾರೆ. 

ಇದೇ ವೇಳೆ ನಟಿ ಎಚ್ಚರಿಕೆಯನ್ನೂ ಕೊಟ್ಟಿದ್ದಾರೆ. ಪ್ರೊಡಕ್ಷನ್​ ಹೌಸ್​ಗಳು ಜಾಹೀರಾತು ಕೊಟ್ಟಾಗ ಮೈಯೆಲ್ಲಾ ಕಣ್ಣಾಗಿರಿ. ಎಷ್ಟೋ ಮಂದಿ ಮೋಸ ಮಾಡುತ್ತಾರೆ. ಅದರಲ್ಲಿಯೂ ಹೆಣ್ಣುಮಕ್ಕಳು ಹಿಂದೆ ಮುಂದೆ ಯೋಚನೆ ಮಾಡದೇ ಅಲ್ಲಿ ಹೋಗಬೇಡಿ. ಸರಿಯಾದ ಜಾಹೀರಾತು ಹೌದೋ ಅಲ್ಲವೋ ನೋಡಿಕೊಳ್ಳಿ ಎಂದಿದ್ದಾರೆ. ವಾಹಿನಿಗಳಾಗಲೀ, ನಿಜವಾದ ಪ್ರೊಡಕ್ಷನ್​ ಹೌಸ್​ಗಳಾಗಲೀ ಆಡಿಷನ್​ಗೆ ಕರೆದಾಗ ದುಡ್ಡು ಕೇಳುವುದಿಲ್ಲ ಎನ್ನುವುದನ್ನು ನೆನಪಿನಲ್ಲಿ ಇಟ್ಟುಕೊಳ್ಳಿ. ಯಾರಾದರೂ ನಟಿ ಮಾಡ್ತೇನೆ, ಇಷ್ಟು ದುಡ್ಡು ಕೊಡಿ ಎಂದು ಯಾವುದಾದರೂ ವಾಹಿನಿ ಅಥವಾ ಪ್ರೊಡಕ್ಷನ್​ ಹೌಸ್​ ಹೆಸರಿನಲ್ಲಿ ಜಾಹೀರಾತು ಕೊಟ್ಟರೆ ಅದನ್ನು ನಂಬಬೇಡಿ. ಅದರ ಸುಳಿಯಲ್ಲಿ ಸಿಲುಕಿ ಮೋಸ ಹೋಗಬೇಡಿ ಎಂದೂ ಎಚ್ಚರಿಕೆ ಕೊಟ್ಟಿದ್ದಾರೆ ಮೇಘನಾ.