ಬಿಗ್ಬಾಸ್ ಮನೆಯಲ್ಲೂ ಹಾರದ ಡ್ರೋನ್: ಪ್ರತಾಪನ ಅವಸ್ಥೆ ಕಂಡು ಅಯ್ಯೋ ಅಂತಿದ್ದಾರೆ ಫ್ಯಾನ್ಸ್!
ಸಾರಾಂಶ
ಬಿಗ್ಬಾಸ್ ಮನೆಯಲ್ಲಿ ಡ್ರೋನ್ ಪ್ರತಾಪ್ಗೆ ಸ್ಪರ್ಧಿಗಳು ಹಲವಾರು ರೀತಿ ಪ್ರಶ್ನೆ ಕೇಳಿ ತಲೆ ತಿನ್ನುತ್ತಿದ್ದಾರೆ. ಆದರೂ ಡ್ರೋನ್ ತಯಾರಿಕೆ ಕುರಿತು ಸಮರ್ಥಿಸಿಕೊಳ್ತಿರೋ ಪ್ರತಾಪನನ್ನು ನೋಡಿ ಪ್ರೇಕ್ಷಕರು ನಗುತ್ತಿದ್ದಾರೆ.
ಕೆಲ ವರ್ಷಗಳ ಹಿಂದೆ ಡ್ರೋನ್ ಪ್ರತಾಪ್ ಎನ್ನುವ ಯುವಕ ಎಲ್ಲರಿಗೂ ಮಾದರಿಯಾಗಿದ್ದರು. ಇವರ ಹೆಸರು ಹೇಳಿಕೊಂಡು ತಮ್ಮ ಮನೆಯ ಮಕ್ಕಳನ್ನು ಬೈದವರು ಅದೆಷ್ಟೋ ಮಂದಿ. ಇವನನ್ನು ನೋಡಿ ಸ್ವಲ್ಪನಾದರೂ ಬುದ್ಧಿ ಕಲಿ ಎಂದು ಹೇಳಿಸಿಕೊಂಡ ಮಕ್ಕಳು ಇನ್ನೆಷ್ಟೋ. ಹೋದಲ್ಲಿ, ಬಂದಲ್ಲಿ ಈ ಯುವಕನ ಮಾತೇ ಮಾತು. ಪ್ರತಾಪ್ ಅವರ ಮಾತಿನ ಪ್ರತಾಪಕ್ಕೆ ಮೋಡಿಯಾಗದವೇ ಇಲ್ಲ. ವಿಭಿನ್ನ ಕ್ಷೇತ್ರಗಳ ನುರಿತರು, ಮೇಧಾವಿಗಳು ಎನಿಸಿಕೊಂಡವರೂ ಪ್ರತಾಪ್ ಮಾತಿಗೆ ತಲೆದೂಗಿದರು. ಎಷ್ಟೋ ವೇದಿಕೆಗಳಲ್ಲಿ ಇವರು ಮಾಡುತ್ತಿದ್ದ ಪ್ರೇರಣಾತ್ಮಕ ಭಾಷಣಕ್ಕೆ ತಲೆದೂಗಿದರು. ಕೇಳುವ ಪ್ರಶ್ನೆಗಳಿಗೆ ಅಷ್ಟೇ ಚೆನ್ನಾಗಿ ಉತ್ತರಿಸುವ ಮೇಧಾವಿ ಎನಿಸಿಕೊಂಡವರು ಡ್ರೋನ್. ಡ್ರೋನ್ ತಯಾರಿಸಲು ತಾನು ಪಟ್ಟಿರುವ ಕಷ್ಟಗಳನ್ನು, ಬೀದಿ ಬದಿಯಲ್ಲಿ ಮಲಗಿ ತುತ್ತು ಅನ್ನಕ್ಕಾಗಿ ಪರದಾಡಿದ ದಿನಗಳನ್ನು ಕಣ್ಣಿಗೆ ಕಟ್ಟುವಂತೆ ಹೇಳುತ್ತಾ ಕೇಳುಗರ ಕಣ್ಣಲ್ಲಿ ನೀರು ತರಿಸಿದ್ದ ಪ್ರತಾಪ್ ನಿಜ ಬಣ್ಣ ಬದಲಾಗಲು ಹಲವಾರು ವರ್ಷಗಳೇ ಬೇಕಾದವು. ಕೊನೆಗೂ ಇಷ್ಟು ವರ್ಷ ಹೇಳಿದ್ದು, ಮಾತನಾಡಿದ್ದು, ತಮ್ಮ ಬಗ್ಗೆ ಹೇಳಿಕೊಂಡಿದ್ದು, ಡ್ರೋನ್ ತಯಾರಿಕೆ ಕುರಿತು ವಿವರಣೆ ನೀಡಿದ್ದು ಎಲ್ಲವೂ ಹಸಿಹಸಿ ಸುಳ್ಳು ಎಂದು ತಿಳಿದು ಹಲವು ಕೇಸ್ಗಳು ದಾಖಲಾದವು. ಸ್ವಲ್ಪ ಸಮಯ ತಲೆ ಮರೆಸಿಕೊಂಡು ಮತ್ತೆ ಈಗ ಕಾಣಿಸಿಕೊಂಡಿದ್ದಾರೆ ಪ್ರತಾಪ್.
ಇಂಥ ಕಾಂಟ್ರವರ್ಸಿ ಮಾಡಿಕೊಳ್ಳುವವರಿಗೆ ಬಿಗ್ಬಾಸ್ ತೆರೆದ ಮನಸ್ಸಿನಿಂದ ಸ್ವಾಗತ ನೀಡುವುದು ಎಲ್ಲರಿಗೂ ತಿಳಿದಿರುವ ವಿಷಯವೇ. ಪ್ರತಾಪ್ ನಿಜವಾಗಿಯೂ ಡ್ರೋನ್ ಮಾಡಿ ಸಕ್ಸಸ್ ಆಗಿದ್ದರೆ ಈ ವೇದಿಕೆ ಸಿಗುತ್ತಿರಲಿಲ್ಲವೇನೋ. ಆದರೆ ಗಲಾಟೆ ಮಾಡಿ ನೆಗೆಟಿವ್ ಕಮೆಂಟ್ಗಳಿಂದ ಭರ್ಜರಿ ಸುದ್ದಿಯಾಗಿದ್ದರಿಂದ ಸಹಜವಾಗಿ ಬಿಗ್ಬಾಸ್ನಲ್ಲಿ ಹೋಗಿದ್ದಾರೆ. ಸದ್ಯ ಬಿಗ್ಬಾಸ್ ಮನೆಯಲ್ಲಿ ಭರ್ಜರಿ ಚಟುವಟಿಕೆಗಳು ಶುರುವಾಗಿದೆ. ಇದರಲ್ಲಿ ಈಗ ಹೈಲೈಟ್ ಆಗ್ತಿರೋದು ಡ್ರೋನ್ ಪ್ರತಾಪ್.
ಇವರು ಯಾವುದೇ ಡ್ರೋನ್ ಹಾರಿಸಿಯೇ ಇಲ್ಲ. ರೆಡಿ ಮಾಡಿಟ್ಟಿದ್ದ ಡ್ರೋನ್ ಪಾರ್ಟ್ ತಂದು ಅದರ ಬಗ್ಗೆ ಒಂದಿಷ್ಟು ಮಾಹಿತಿ ಕಲೆ ಹಾಕಿ ತಾವೇ ಡ್ರೋನ್ ಮಾಡಿದಂತೆ ಎಲ್ಲರ ಮುಂದೆ ಪೋಸ್ ಕೊಡುತ್ತಿರುವ ಗಂಭೀರ ಆರೋಪ ಪ್ರತಾಪ್ ಮೇಲಿದೆ. ಡ್ರೋನ್ನ ಬಿಡಿ ಭಾಗಗಳನ್ನು ತಂದು ಅದನ್ನು ತಾವೇ ತಯಾರು ಮಾಡಿರುವುದಾಗಿ ಹೇಳುತ್ತಾರೆ ಎನ್ನಲಾಗಿದೆ. ಹೀಗೆ ರೆಡಿ ಮಾಡಿದ ಡ್ರೋನ್ ಅನ್ನು ತಾವೇ ಸಂಪೂರ್ಣವಾಗಿ ತಯಾರು ಮಾಡಿರುವುದಾಗಿ ಹೇಳುತ್ತಲೇ ವರ್ಷಾನುಗಟ್ಟಲೆ ಎಲ್ಲರ ಕಣ್ಣಿಗೆ ಮಣ್ಣೆರೆಚುತ್ತಲೇ ಬಂದಿರುವ ಆರೋಪ ಇವರ ಮೇಲಿದೆ. ನಟ ಜಗ್ಗೇಶ್ ಸೇರಿದಂತೆ ಹಲವು ಕ್ಷೇತ್ರಗಳ ಗಣ್ಯರೂ ಪ್ರತಾಪ್ಗೆ ಧನ ಸಹಾಯ ಮಾಡಿದ್ದಿದೆ. ಹಲವು ಸಂಘ ಸಂಸ್ಥೆಗಳು ಕರೆದು ಸಹಾಯ ಮಾಡಿದ್ದಲ್ಲದೇ ಬಿರುದು ಸನ್ಮಾನ ನೀಡಿದ್ದಿದೆ. ಕೊನೆಗೆ ಈತನ ಬಂಡವಾಳ ಬಯಲಾಗುತ್ತಿದ್ದಂತೆಯೇ ಖುದ್ದು ಜಗ್ಗೇಶ್ ಅವರು ಮೀಡಿಯಾದ ಮುಂದೆ ಬಂದು ನೋವು ತೋಡಿಕೊಂಡಿದ್ದರು. ಎಂಥವನಿಗೆ ನಾನು ಸಹಾಯ ಮಾಡಿಬಿಟ್ಟೆ ಎಂದಿದ್ದರು.
ಬಿಗ್ಬಾಸ್ ವೇದಿಕೆಯಲ್ಲಿ ಡ್ರೋಣ್ ಪ್ರತಾಪ್ ಪ್ರತ್ಯಕ್ಷ! ಕಾಗೆ ಹಾರಿಸೋಕೆ ರೆಡಿನಾ ಅಂತಿದ್ದಾರೆ ನೆಟ್ಟಿಗರು
ಇದೀಗ ಬಿಗ್ಬಾಸ್ ಮನೆಯಲ್ಲಿಯೂ ಡ್ರೋನ್ ಪ್ರತಾಪ್ ವಿರುದ್ಧ ವಾಗ್ದಾಳಿ ನಿಂತಿಲ್ಲ. ಸ್ಪರ್ಧಿಗಳು ಪರಸ್ಪರ ಮಾತಾಡಿಕೊಂಡಿದ್ದರು, ಇವರು ಮಾಡಿರೋ ಡ್ರೋನ್ ನೀವು ನೋಡಿದ್ದೀರಾ ಎಂದು ಪ್ರಶ್ನಿಸಿದ್ದಾರೆ. ಇನ್ನೊಬ್ಬರು ಹಾಗಿದ್ರೆ ಇವ್ರು ಡ್ರೋನ್ ಮಾಡೇ ಇಲ್ವಾ ಎಂದು ಪ್ರಶ್ನಿಸಿದ್ದರೆ, ಮತ್ತೋರ್ವ ಸ್ಪರ್ಧಿ, ಇಲ್ಲ, ಇವ್ರು ಡ್ರೋನ್ ಅನ್ನು ಮಾರಾಟಕ್ಕೆ ತಂದು ತಾವೇ ಮಾಡಿದ್ದು ಹೇಳಿಕೊಂಡು ಹಾರಿಸ್ತಾ ಇದ್ರು ಎಂದಿದ್ದಾರೆ. ಆ ಸಮಯದಲ್ಲಿ ಡ್ರೋನ್ ಪ್ರತಾಪ್ ತಾಳ್ಮೆಯನ್ನೂ ಕಳೆದುಕೊಂಡು ಅವರು ಹೇಳುತ್ತಿದ್ದುದೆಲ್ಲಾ ಸುಳ್ಳು ಎಂದಿದ್ದಾರೆ. ನಮ್ಮ ಆಫೀಸ್ಗೆ ಬಂದು ನೋಡಿ, ಎಲ್ಲವೂ ತಿಳಿಯುತ್ತದೆ ಎಂದಿದ್ದಾರೆ. ಅಸಲಿಗೆ ಇದೇ ಮಾತನ್ನು ಹಲವಾರು ವೇದಿಕೆಯಲ್ಲಿಯೂ ಪ್ರತಾಪ್ ಹೇಳಿದ್ದರು. ಆದರೆ ಅವರ ಕಚೇರಿಯಲ್ಲಿ ಇವರೇ ಖುದ್ದು ಡ್ರೋನ್ ತಯಾರಿಸಿ ತೋರಿಸಲೇ ಇಲ್ಲ. ಇದೇ ಬಿಗ್ಬಾಸ್ ಮನೆಯಲ್ಲಿಯೂ ಪ್ರಸ್ತಾಪ ಆಗಿದೆ. ನನಗೆ ಒಂದಿಷ್ಟು ರೈತರು ಗೊತ್ತು. ಅವರು ಡ್ರೋನ್ ತಯಾರಿಸಿ ಕೊಟ್ಟಿಲ್ಲ ಎಂದು ಓರ್ವ ಸ್ಪರ್ಧಿ ಹೇಳಿದ್ದು, ಇದನ್ನು ನೋಡಿ ಪ್ರೇಕ್ಷಕರು ಪಾಪ ಇಲ್ಲೂ ಪ್ರತಾಪನ ಡ್ರೋನ್ ಹಾರಲೇ ಇಲ್ಲ ಅಂತಿದ್ದಾರೆ.
ಬಿಗ್ಬಾಸ್ ಮನೆಯಿಂದ ಹೊರಬಂದ ಶಾಸಕ ಪ್ರದೀಪ್ ಈಶ್ವರ್: ಕೊಟ್ಟ ಕಾರಣ ಕೇಳಿ ಟ್ರೋಲ್ಗಳ ಸುರಿಮಳೆ!
ಕನ್ನಡ ಸಿನಿಮಾ (Kannada Cinema News), ಟಿವಿ ಕಾರ್ಯಕ್ರಮಗಳು (Kannada TV Shows), ಸೆಲೆಬ್ರಿಟಿ ಸುದ್ದಿಗಳು ಮತ್ತು ಇತ್ತೀಚಿನ ಸುದ್ದಿಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ನಲ್ಲಿ ಮನರಂಜನಾ ವಿಭಾಗ ನೋಡಿ. ಸಿನಿಮಾ ವಿಮರ್ಶೆಗಳು (Kannada Movies Review), ತಾರೆಯರ ಸಂದರ್ಶನಗಳು, ಧಾರಾವಾಹಿ ಅಪ್ಡೇಟ್ಸ್, ತೆರೆಮರೆಯ ಕಥೆಗಳು, OTT ರಿಲೀಸ್ಗಳ ಬಗ್ಗೆ ಮಾಹಿತಿಯೂ ಇಲ್ಲಿದೆ.