ಒಂದು ಸಲ ಗಂಡ ತರುಣ್ ಬರೋದು ಮತ್ತೊಂದ ಸಲ ಹೆಂಡ್ತಿ ಸೋನಲ್‌ ಬರೋದು, ಏನ್ ಸಂಸಾರನೇ ಮಾಡ್ಬಾರ್ದಾ: ಕುರಿ ಪ್ರತಾಪ್

ಮಜಾ ಟಾಕೀಸ್‌ನ ಹೊಸ ಎಪಿಸೋಡ್‌ನಲ್ಲಿ ದೇವರಾಜ್ ಕುಟುಂಬ ಮತ್ತು ನಟಿ ಸೋನಲ್ ಭಾಗವಹಿಸಿದ್ದಾರೆ. ಸೃಜನ್ ಲೋಕೇಶ್ ನಿರೂಪಣೆಯಲ್ಲಿ ನಡೆಯುವ ಈ ಕಾರ್ಯಕ್ರಮದಲ್ಲಿ ಕುರಿ ಪ್ರತಾಪ್ ಹಾಸ್ಯ ಪ್ರಧಾನವಾಗಿ ಗಮನ ಸೆಳೆದಿದ್ದಾರೆ. ರಾಗಿಣಿ ಅಭಿನಯದ 'ಶ್ಯಾಣಭೋಗರ ಮಗಳು' ಚಿತ್ರದ ಪ್ರಚಾರ ಸಹ ನಡೆಯಿತು. ಈ ಸೀಸನ್‌ನಲ್ಲಿ ಯೋಗರಾಜ್ ಭಟ್ ಸೇರಿದಂತೆ ಹಲವು ಕಲಾವಿದರು ಇದ್ದಾರೆ. ಕುರಿ ಪ್ರತಾಪ್ ಅವರ ಕಾಮಿಡಿ ಪ್ರೇಕ್ಷಕರಿಗೆ ಇಷ್ಟವಾಗಿದೆ.

ಬಿಗ್ ಬಾಸ್ ರಿಯಾಲಿಟಿ ಶೋ ಮುಗಿಯುತ್ತಿದ್ದಂತೆ ಮಜಾ ಟಾಕೀಸ್ ಆರಂಭವಾಗಿದೆ. ಅತಿ ಹೆಚ್ಚು ಟಿಆರ್‌ಪಿ ಪಡೆಯುವ ಈ ಶೋ ಸೃಜನ್ ಲೋಕೇಶ್ ನಿರೂಪಣೆಯಲ್ಲಿ ನಡೆಯುತ್ತದೆ. ಇಷ್ಟು ದಿನ ಬರುತ್ತಿದ್ದ ರೀತಿಗೂ ಈಗ ಬರುತ್ತಿರುವ ರೀತಿಗೂ ಕೊಂಚ ಬದಲಾವಣೆ ಇದೆ. ಪ್ರತಿ ಎಪಿಸೋಡ್‌ನಲ್ಲಿ ವಿಭಿನ್ನತೆ ಕಾಣಬಹುದು. ಕಳೆದ ವಾರ ನಟ ಶರಣ್ ಮತ್ತು ತರುಣ್ ಸುಧೀರ್ ವಿಶೇಷ ಅತಿಥಿಯಾಗಿ ಆಗಮಿಸಿದ್ದರು. ಈ ವಾರ ಸೋನಲ್ ಆಗಮಿಸಿದ್ದಾರೆ.

ಹೌದು! ಈ ವಾರ ಡೈನಾಮಿಕ್ ಸ್ಟಾರ್ ದೇವರಾಜ್‌ ಫ್ಯಾಮಿಲಿ ಮಜಾ ಮನೆಗೆ ಆಗಮಿಸಿದ್ದಾರೆ. ಕಾಮಿಡಿ ಮಾಡಿಕೊಂಡು ಸಖತ್ ಜಾಲಿ ಮಾಡಿದ್ದಾರೆ. ಇದೇ ಸಮಯದಲ್ಲಿ ನಟಿ ಸೋನಲ್ ಮೊಂಥೆರೋ ಕೂಡ ಆಗಮಿಸಿದ್ದಾರೆ. ಇದನ್ನು ನೋಡಿದ ಕುರಿ ಪ್ರತಾಪ್ 'ಒಂದು ಎಪಿಸೋಡ್‌ನಲ್ಲಿ ಗಂಡನ ಕರ್ಸ್ಕೊಂಡು ಬಂದು ಕೂರಿಸಿಕೊಳ್ಳುತ್ತೀಯಾ ಇನ್ನೊಂದು ಎಪಿಸೋಡ್‌ನಲ್ಲಿ ಹೆಂಡತಿನ ಕರ್ಕೊಂಡು ಬಂದು ಕೂರಿಸೋದು...ಅವರೇನು ಸಂಸಾರನೇ ಮಾಡೋದು ಬೇಡವಾ?' ಎಂದು ಕುರಿ ಪ್ರತಾಪ್ ಪಂಚ್ ಕೊಟ್ಟಿದ್ದಾರೆ.

ಈ ವೇಳೆ ಕಾಮಿಡಿ ಡಬಲ್ ಮಾಡಲು ಕುರಿ ಪ್ರತಾಪ್ ಸೀರೆ ವ್ಯಾಪಾರ ಶುರು ಮಾಡಿದ್ದಾರೆ. ಬ್ಲೌಸ್‌ ಪೀಸ್‌ನ ತರಕಾರಿ ಗಾಡಿ ಮೇಲೆ ಹಾಕಿ ಮಾರಾಟ ಮಾಡಿದ್ದಾರೆ. 50% ರಿಯಾಯಿತಿ ಎಂದು ಹೇಳಿಕೊಂಡು ಬ್ಲೌಸ್ ಪೀಸ್‌ನ ಮಾರಲು ಬಂದು ಸಿಕ್ಕಾಕೊಂಡಿದ್ದಾರೆ. ಇದೊಂದು ಫನ್ ಕಾಮಿಡಿ ಎಪಿಸೋಡ್ ಆಗಿರಲಿದೆ. ಡೈನಾಮಿಕ್ ಪ್ರಿನ್ಸ್‌ ಪ್ರಜ್ವಲ್ ದೇವರಾಜ್‌ ಮತ್ತು ಪತ್ನಿ ರಾಗಿಣಿ ಕೂಡ ಭಾಗಿಯಾಗಿದ್ದರು. ರಾಗಿಣಿ ನಟಿಸಿರುವ ಶ್ಯಾನಭೋಗರ ಮಗಳು ಸಿನಿಮಾ ರಿಲೀಸ್ ಆಗಿದೆ ಹೀಗಾಗಿ ಮಜಾ ಟಾಕೀಸ್‌ನಲ್ಲಿ ಪ್ರಮೋಷನ್‌ ಕೂಡ ಭರ್ಜರಿಯಾಗಿ ನಡೆದಿದೆ. 'ಕುರಿ ಪ್ರತಾಪ್ ಇರುವುದಕ್ಕೆ ಕಾಮಿಡಿ ಮಸ್ತ್ ಆಗಿದೆ' ಎಂದು ಸಖತ್ ಪಾಸಿಟಿವ್ ಕಾಮೆಂಟ್ ಬರುತ್ತಿದೆ. ಈ ಸೀಸನ್‌ನಲ್ಲಿ ಯೋಗರಾಜ್‌ ಭಟ್, ತುಕಾಲಿ ಸಂತೋಷ್, ಶಿವು, ವಿನೋದ್ ಗೊಬ್ಬರಗಾಲ, ಪ್ರಿಯಾಂಕಾ, ಕುರಿ ಪ್ರತಾಪ್ ಹಾಗೂ ಚಂದ್ರಪ್ರಭಾ ಇದ್ದಾರೆ.