ಕ್ಲಿಕ್ ಆಯ್ತು ಸುದೀಪ್‌- ಆಶಿಕಾ‌ ಜೋಡಿ: ಕೋಟಿಗೊಬ್ಬ 3 ಪಟ್ಟಾಕಿ ಪೋರಿಯೋ ಹಾಡಿಗೆ ಭಾರಿ ಮೆಚ್ಚುಗೆ

ಆಶಿಕಾ ರಂಗನಾಥ್‌ ಹಾಗೂ ಸುದೀಪ್‌ ಕಾಂಬಿನೇಷನ್‌ನಲ್ಲಿ ಬಂದಿರುವ ಈ ಹಾಡಿಗೆ ನೋಡುಗರಿಂದ ದೊಡ್ಡ ಮಟ್ಟದಲ್ಲಿ ಯಶಸ್ಸು ಸಿಕ್ಕಿದೆ. ಆನಂದ್‌ ಆಡಿಯೋ ಯೂಟ್ಯೂಬ್‌ನಲ್ಲಿ 2.5 ಮಿಲಿಯನ್‌ ಹಿಟ್ಸ್‌ ದಾಟಿದೆ.

ನಟ ಸುದೀಪ್‌ ಅಭಿಮಾನಿಗಳಿಗೆ ಈ ಬಾರಿ ದೀಪಾವಳಿ ಹಬ್ಬ ಭರ್ಜರಿಯಾಗಿಯೇ ಇತ್ತು. ಅದಕ್ಕೆ ಕಾರಣ ‘ಕೋಟಿಗೊಬ್ಬ 3’ ಚಿತ್ರದ ಹಾಡು. ಆಶಿಕಾ ರಂಗನಾಥ್‌ ಹಾಗೂ ಸುದೀಪ್‌ ಕಾಂಬಿನೇಷನ್‌ನಲ್ಲಿ ಬಂದಿರುವ ಈ ಹಾಡಿಗೆ ನೋಡುಗರಿಂದ ದೊಡ್ಡ ಮಟ್ಟದಲ್ಲಿ ಯಶಸ್ಸು ಸಿಕ್ಕಿದೆ.

ಆನಂದ್‌ ಆಡಿಯೋ ಯೂಟ್ಯೂಬ್‌ನಲ್ಲಿ 2.5 ಮಿಲಿಯನ್‌ ಹಿಟ್ಸ್‌ ದಾಟಿದೆ. ಹಾಡು ಬಿಡುಗಡೆಯಾದ 20 ಗಂಟೆಯಲ್ಲಿ 25 ಲಕ್ಷ ಹಿಟ್ಸ್‌ ಬಂದಿರುವುದು ಚಿತ್ರತಂಡದ ಉತ್ಸಾಹಕ್ಕೆ ಕಾರಣವಾಗಿದೆ.

‘ಹಲ್ಲೋ ಹಲ್ಲೋ ಮಿಟುಕಲಾಡಿ.. ಮಿಟುಕತೈತೆ ನಿನ್ನ ಬಾಡಿ.. ಟಚ್ಚಾಗೋದ್ರೆ ಬೈಯ್ಕೋಬೇಡಿ ಸಾರಿ.... ಪಟ್ಟಾಕಿ ಪೋರಿಯೋ’ ಎಂದು ಸಾಗುವ ಈ ಹಾಡಿನ ಪದಗಳನ್ನು ಜೋಡಿಸಿರುವುದು ನಿರ್ದೇಶಕ ಅನೂಪ್‌ ಭಂಡಾರಿ. ಅರ್ಜುನ್‌ ಜನ್ಯಾ ಸಂಗೀತ, ವಿಜಯ್‌ ಪ್ರಕಾಶ್‌ ಹಾಗೂ ಅನುರಾಧ ಭಟ್‌ ಧ್ವನಿ ಹಾಡಿನ ಸೊಗಸು ಹೆಚ್ಚಿಸಿದೆ.

ಶಿವಕಾರ್ತಿಕ್‌ ನಿರ್ದೇಶಿಸಿ, ಸೂರಪ್ಪ ಬಾಬು ನಿರ್ಮಿಸಿರುವ ಈ ಚಿತ್ರದ ಟೀಸರ್‌ ಹಾಗೂ ಒಂದು ಹಾಡು ಈಗಾಗಲೇ ಬಂದಿದ್ದು, ಮೊದಲ ಹಾಡಿಗೆ 12 ಮಿಲಿಯನ್‌ ಹಿಟ್ಸ್‌ ದಾಟಿದೆ. ‘ಫಾಸ್ಟ್‌ ನಂಬರ್‌ ಹಾಡಿನ ರೀತಿ ಮಾಡಿದ್ದೇವೆ. ಪಡ್ಡೆ ಹುಡುಗರಿಗೆ ಹೆಚ್ಚು ಇಷ್ಟವಾಗುತ್ತದೆ.

ಎಲ್ಲೂ ನಿಮಗೆ ವಲ್ಗರ್‌ ಅನಿಸುವುದಿಲ್ಲ. ಹೀಗಾಗಿಯೇ ಎಲ್ಲರು ಹಾಡನ್ನು ನೋಡುತ್ತಿದ್ದಾರೆ. ನಮ್ಮ ನಾಯಕ ನಟ ಸುದೀಪ್‌ ಹಾಗೂ ಆಶಿಕಾ ರಂಗನಾಥ್‌ ಜೋಡಿ ಈ ಹಾಡಿನಲ್ಲಿ ಮುದ್ದಾಗಿ ಕಾಣಿಸಿಕೊಂಡಿದೆ.

ಕಂಠೀರವ ಸ್ಟುಡಿಯೋದಲ್ಲಿ ದೊಡ್ಡ ಮಟ್ಟದಲ್ಲಿ ಕಲರ್‌ಫುಲ್‌ ಸೆಟ್‌ ಹಾಕಬೇಕು ಎಂದಾಗ ಇಲ್ಲ ಎನ್ನದೆ ಬೆಂಬಲವಾಗಿ ನಿಂತ ಚಿತ್ರದ ನಿರ್ಮಾಪಕ ಸೂರಪ್ಪ ಬಾಬು ಅವರಿಗೆ ಧನ್ಯವಾದ’ ಎಂಬುದು ಚಿತ್ರದ ನಿರ್ದೇಶಕ ಶಿವಕಾರ್ತಿಕ್‌ ಮಾತು.