ಮೊನ್ನೆ ಮೊನ್ನೆ ಗಂಡನ ಜೊತೆ ಫೋಟೋ ಹಾಕಿದ್ದೀನಿ ಆಗ್ಲೇ ಡಿವೋರ್ಸ್‌ ಅಂತೀರಾ?; ನೆಟ್ಟಿಗರ ಮೇಲೆ ನಮಿತಾ ಗರಂ

ಪದೇ ಪದೇ ಡಿವೋರ್ಸ್ ಸುದ್ದಿ ಕ್ರಿಯೇಟ್ ಮಾಡುತ್ತಿರುವ ನೆಟ್ಟಿಗರ ಮೇಲೆ ನಟಿ ನಮಿತಾ ಫುಲ್ ಗರಂ... 

ನೀಲಕಂಠ, ಇಂದ್ರ, ಹೂ, ನಮಿತಾ ಐ ಲವ್ ಯು ಹಾಗೂ ಬೆಂಕಿ ಬಿರಗಾಳಿ ಕನ್ನಡ ಸಿನಿಮಾಗಳಲ್ಲಿ ನಟಿಸಿರುವ ನಟಿ ನಮಿತಾ ವೈವಾಹಿಕ ಜೀವನ ಆಗಾಗ ಸುದ್ದಿಯಲ್ಲಿರುತ್ತದೆ. 2017ರಲ್ಲಿ ನಮಿತಾ ಮತ್ತು ವೀರೇಂದ್ರ ಚೌಧರಿ ತಿರುಪತಿಯಲ್ಲಿ ಸರಳವಾಗಿ ಮದುವೆ ಮಾಡಿಕೊಂಡರು. ಎರಡು ವರ್ಷಗಳ ಹಿಂದೆ ಅವಳಿ ಗಂಡು ಮಕ್ಕಳಿಗೆ ಜನ್ಮ ನೀಡಿದ ನಟಿ ಆಗಾಗ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಾರೆ. 

ಆದರೆ ಪದೇ ಪದೇ ಸುದ್ದಿಯಾಗುವುದು ನಮಿತಾ ಮತ್ತು ವೀರೇಂದ್ರ ಡಿವೋರ್ಸ್‌. ಹೌದು! ನಮಿತಾ ಒಂದು ತಿಂಗಳಿಗೂ ಹೆಚ್ಚಿಗೆ ಪತಿ ಜೊತೆ ಫೋಟೋ ಹಾಕಿಲ್ಲ ಅಂದ್ರೆ ಎಲ್ಲರೂ ಡಿವೋರ್ಸ್‌ ಪಡೆಯುತ್ತಿದ್ದಾರೆ ಎಂದು ಸುದ್ದಿ ಮಾಡಿ ಬಿಡುತ್ತಾರೆ. ಈ ವಿಚಾರದ ಬಗ್ಗೆ ನಮಿತಾ ಆಗಾಗ ಸ್ಪಷ್ಟನೆ ಕೊಡುತ್ತಾರೆ. ಆದರೆ ಈ ಸಲ ಫುಲ್ ಗರಂ ಆಗಿದ್ದಾರೆ. 

'ಮೊನ್ನೆ ಮೊನ್ನೆ ನನ್ನ ಪತಿಯ ಜೊತೆಗಿರುವ ಫೋಟೋ ಶೇರ್ ಮಾಡಿದ್ದೀನಿ. ಮರು ದಿನವೇ ಡಿವೋರ್ಸ್‌ ಎನ್ನುವ ಸುದ್ದಿ ಹಾಕುತ್ತಿದ್ದಾರೆ ಆನ್‌ಲೈನ್‌ನಲ್ಲಿ. ಯಾವುದೇ ಆಧಾರವಿಲ್ಲದೆ ನಾವು ದೂರಾಗುತ್ತೇವೆ ಅಂತ ಹೇಗೆ ಪ್ರಚಾರ ಮಾಡುತ್ತೀರಾ?'ಎಂದು ನಮಿತಾ ಮಾತನಾಡಿದ್ದಾರೆ. 

'ಒಬ್ಬ ನಟಿಯಾಗಿ ನಾನು ಸಾಕಷ್ಟು ವದಂತಿಗಳನ್ನು ಕೇಳಿದ್ದೇನೆ. ಈ ಡಿವೋರ್ಸ್ ವಿಚಾರದ ಬಗ್ಗೆ ನಾನು ಮತ್ತು ನನ್ನ ಪತಿ ಹೆಚ್ಚಿಗೆ ತಲೆ ಕೆಡಿಸಿಕೊಳ್ಳುವುದಿಲ್ಲ. ಆದರೆ ನಮ್ಮ ಸ್ನೇಹಿತರು ಮತ್ತು ಆಪ್ತರು ಆಗಾಗ ಕರೆ ಮಾಡಿ ಕೇಳುತ್ತಾರೆ. ಏನಿದು ಸುದ್ದಿ ಆಗಿದೆ ನಿಜಾನಾ ಅಂತ. ನನಗೂ ಸ್ಪಷ್ಟನೆ ಕೊಟ್ಟು ಕೊಟ್ಟು ಸಾಕಾಗಿದೆ. ನಾನು ಬೇರೆ ಕೆಲಸಗಳಲ್ಲಿ ತುಂಬಾ ಬ್ಯುಸಿಯಾಗಿ ಇರುತ್ತೀನಿ. ಕೆಲವೊಮ್ಮೆ ಯಾರಿಗೂ ಯಾವುದಕ್ಕೂ ಪ್ರತಿಕ್ರಿಯೆ ನೀಡಲು ಆಗುವುದಿಲ್ಲ. ಆದರೆ ಈ ಸುದ್ದಿ ನೋಡಿ ಜನರು ಕರೆ ಮಾಡುವುದನ್ನು ಕೇಳಿ ನನ್ನ ಪತಿ ಮತ್ತು ನಾನು ಬಿದ್ದು ಬಿದ್ದು ನಗ್ತೀವಿ ಅಷ್ಟೇ ಎಂದು ನಮಿತಾ ಹೇಳಿದ್ದಾರೆ.