ಹೆಣ್ಣಿಗಿಂತ ಪ್ರೆಷರ್​ ಕುಕ್ಕರೇ ಬೆಸ್ಟ್​ ಎಂದು ಅದನ್ನೇ ಮದ್ವೆಯಾದ ಭೂಪ! ಮುಂದಾಗಿದ್ದೇ ಬೇರೆ...

ಮದುವೆ ಒತ್ತಡ ತಾಳಲಾರದ ಇಂಡೋನೇಷ್ಯಾದ ಖೋಯಿರುಲ್ ಅನಮ್ ಎಂಬಾತ ರೈಸ್ ಕುಕ್ಕರ್‌ ಜೊತೆ ಮದುವೆಯಾಗಿ, ಮತ್ತೆ ವಿಚ್ಛೇದನ ನೀಡಿದ್ದಾನೆ. ಪ್ರಚಾರಕ್ಕಾಗಿ ಈ ನಾಟಕವಾಡಿ, ಕುಕ್ಕರ್ ಅಡುಗೆ ಮಾಡುತ್ತದೆಯೇ ಹೊರತು ತನಗೆ ಬೇಕಾದುದನ್ನು ಕೊಡುವುದಿಲ್ಲ ಎಂದು ತಮಾಷೆ ಮಾಡಿದ್ದಾನೆ. ಈ ವಿಚಿತ್ರ ಕೃತ್ಯ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಮದುವೆಯಾಗದವರಿಗೆ ಮದುವೆಯಾಗಿಲ್ಲ ಎನ್ನುವ ಕೊರಗು, ಮದ್ವೆಯಾದವರಿಗೆ ನೂರೊಂದು ಕೊರಗು ಎನ್ನುವ ಮಾತಿದೆ. ಮದ್ವೆಯಾಗುವ ಮನಸ್ಸು ಮಾಡುವ ಹೆಣ್ಣುಮಕ್ಕಳಿಗೆ ಗಂಡ, ಅವನ ಮನೆಯವರು, ಅತ್ತೆ-ಮಾವನ ಮನೆಯ ಚಿಂತೆಯಾದರೆ, ಗಂಡಿಗೆ ಹೆಣ್ಣು ಹೊಂದಿಕೊಂಡು ಹೋಗುತ್ತಾಳೋ ಇಲ್ಲವೋ ಚಿಂತೆ. ಅದೇ ಕಾರಣಕ್ಕೆ ಕೆಲವು ಹೆಣ್ಣು ಮತ್ತು ಗಂಡು ಇಬ್ಬರೂ ಮದುವೆಯ ಉಸಾಬರಿಯೇ ಬೇಡ ಎನ್ನುತ್ತಾರೆ. ಅದೇನೇ ಇರಲಿ, ಇಲ್ಲೊಬ್ಬ ಮಾತ್ರ ಹೆಣ್ಣಿಗಿಂತ ಪ್ರೆಷರ್​ ಕುಕ್ಕರೇ ಬೆಸ್ಟ್​ ಎಂದುಕೊಂಡು ಅದನ್ನೇ  ಮದುವೆಯಾಗಿರುವ ಘಟನೆ ನಡೆದಿದೆ. 

ಇಂಡೋನೇಷ್ಯಾದ ವ್ಯಕ್ತಿ ಖೋಯಿರುಲ್ ಅನಮ್ ತನ್ನ ರೈಸ್ ಕುಕ್ಕರ್‌ನೊಂದಿಗೆ ಮದುವೆಯಾಗಿ ಸುದ್ದಿಯಾಗಿದ್ದಾನೆ. ಈ ಹಿಂದೆ ಇಂಥದ್ದೇ ಘಟನೆಗಳು ನಡೆದದ್ದು ಇವೆ. ಪ್ರಾಣಿಗಳ ಜೊತೆ ಮದುವೆಯಾದವರು ಇದ್ದಾರೆ. ಇನ್ನೂ ಮುಂದಕ್ಕೆ ಹೋಗಿರುವ ಇಬ್ಬರು ಹುಡುಗಿಯರು ಹುಡುಗರ ಸಹವಾಸವೇ ಬೇಡ ಎಂದು ತಮ್ಮನ್ನು ತಾವೇ ಮದುವೆಯಾಗಿರುವ ಘಟನೆಗಳೂ ನಡೆದಿವೆ. ಜೊತೆಗೆ ಹನಿಮೂನ್​ಗೆ ಕೂಡ ತಾವೊಬ್ಬರೇ ಹೋಗಿದ್ದಾರೆ. ಇನ್ನು ಈ ಕುಕ್ಕರ್​ವಾಲನ ವಿಷಯಕ್ಕೆ ಬರುವುದಾದರೆ, ಇವನೇನೂ ನಿಜವಾಗಿ ಕುಕ್ಕರ್​ ಜೊತೆ ಮದುವೆಯಾಗಿಲ್ಲ, ಬದಲಿಗೆ ಎಲ್ಲವೂ ಲೈಕ್​ಗೋಸ್ಕರ ಅಷ್ಟೇ. ಕುಕ್ಕರ್​ಗೆ ಶೃಂಗಾರ ಮಾಡಿ ಅದರ ಜೊತೆ ಮದುವೆಯಾಗಿ ಸಕತ್​ ಸದ್ದು ಮಾಡುತ್ತಿದ್ದಾನೆ. ಹೆಣ್ಣಿನ ಜೊತೆ  ಮದುವೆಯಾದರೆ ಆಕೆ ಉಲ್ಟಾ ಉತ್ತರ ಕೊಡುತ್ತಾಳೆ, ನನಗೆ ಅನ್ನ ಬೇಯಿಸಿ ಹಾಕ್ತಾಳೋ ಇಲ್ಲವೋ ಗೊತ್ತಿಲ್ಲ. ಅದೇ ಕಾರಣಕ್ಕೆ ಅನ್ನ ಮಾಡುವ ಪ್ರೆಷರ್​ ಕುಕ್ಕರನ್ನೇ ಮದ್ವೆಯಾಗುತ್ತೇನೆ ಎಂದು ಹೇಳಿ ಸಾಕಷ್ಟು ವೈರಲ್​ ಆದ.

ಅವನ ಆಸೆ ಈಡೇರಿತು. ಸಕತ್​ ಸುದ್ದಿಯಾಗಿ ತಣ್ಣಗಾಗುತ್ತಿದ್ದಂತೆಯೇ ಮತ್ತೊಮ್ಮೆ ಸದ್ದು ಮಾಡಬೇಕಲ್ಲ, ಅದೇ ಕಾರಣಕ್ಕೆ ಕುಕ್ಕರ್​ಗೆ ಡಿವೋರ್ಸ್​ ಕೊಟ್ಟೂ ಸುದ್ದಿಯಾದ! ಮೊದಲಿಗೆ  ವಿವಾಹ ಸಮಾರಂಭವನ್ನು ನಡೆಸಿ, ತಾನು ಮತ್ತು ಕುಕ್ಕರ್​ ಅನ್ನು  ಸಾಂಪ್ರದಾಯಿಕ ಮದುವೆಯ ಉಡುಪಿನಲ್ಲಿ ಅಲಂಕರಿಸಿ ಅದರ ಫೋಟೋ ಹಾಕಿದ್ದ ಯುವಕ, ಕೊನೆಗೆ ಡಿವೋರ್ಸ್​ ಸುದ್ದಿ ಕೊಟ್ಟಿದ್ದಾನೆ.  ಈ ಕುಕ್ಕರ್​ ನಿಜಕ್ಕೂ ನ್ಯಾಯಯುತ, ವಿಧೇಯ, ಪ್ರೀತಿಯ ಮತ್ತು ಅಡುಗೆಯಲ್ಲಿ ಉತ್ತಮ ಆಗಿದ್ದುದು ನನ್ನ ಭಾಗ್ಯ. ಇಂಥ ಹೆಣ್ಣು ಎಲ್ಲಿಯೂ ಸಿಗುವುದಿಲ್ಲ ಎನ್ನುವುದು ತಿಳಿಯಿತು ಎಂದಿದ್ದಾನೆ ಈ ಪತಿರಾಯ!

ಕೊನೆಗೆ ಡಿವೋರ್ಸ್​ಗೆ ಕಾರಣಕ್ಕೂ ನೀಡಿರುವ ಆತ,  ಇದು ಅನ್ನ ಮಾಡುವಲ್ಲಿ ಫೇಮಸ್​, ಅಡುಗೆನೂ ಮಾಡುತ್ತೆ. ಆದರೆ ಮದುವೆಯಾದ ಮೇಲೆ ನನಗೆ ಏನು ಮುಖ್ಯವಾಗಿ ಬೇಕೋ ಅದನ್ನು ಕೊಡುವುದಿಲ್ಲ. ಅದಕ್ಕಾಗಿ ಡಿವೋರ್ಸ್​ ಕೊಡುತ್ತಿದ್ದೇನೆ ಎಂದಿದ್ದಾನೆ. ಒಟ್ಟಿನಲ್ಲಿ  ಹಾಸ್ಯಮಯ ಸನ್ನಿವೇಶ ಎಲ್ಲರನ್ನೂ ನಗಿಸುವ ಜೊತೆಗೆ, ಈತ ಸಕತ್​ ಫೇಮಸ್​ ಕೂಡ ಆಗಿದ್ದಾನೆ. ಹಲವಾರು ವಿವಾಹಿತರು ಕಮೆಂಟ್​ ಮಾಡಿದ್ದು, ನಮಗೆ ಈ ಯೋಚನೆ ಮೊದಲೇ ಬಂದಿದ್ದರೆ, ನಾವೂ ಅದರ ಜೊತೆನೇ ಮದ್ವೆಯಾಗ್ತಿದ್ವಿ ಎಂದು ತಮಾಷೆ ಮಾಡಿದ್ದಾರೆ.