ನಿಮಗೆ ಗೊತ್ತಾಗದೆ ಮಕ್ಕಳು ಹೇಳಿಕೊಡುವ ತಿನ್ನೋ ಪಾಠ!

ಮಕ್ಕಳು ಅತ್ತರೆ ಸಾಕು, ಇಲ್ಲವಾದರೆ ತುಸು ತುಸು ಕಿರಿ ಕಿರಿ ಮಾಡಿದರೂ ಹಸಿವೆಂದು ಬಾಯಿಗೆ ತುರುಕುತ್ತೇವೆ. ಅವು ಏನೇ ಕಾರಣಕ್ಕೂ ಅತ್ತರೂ ಹಸಿವೆಗೆ ರಗಳೆ ಎಂದು ತಿನ್ನಲು ಒತ್ತಾಯಿಸುತ್ತೇವೆ. ಆದರೆ, ಆ ಮುಗ್ಧ ಮಕ್ಕಳಿಂದ ನಾವು ಕಲಿಯುವಂಥದ್ದೂ ಇವೆ. ಏನವು?

ಕಲಿಯುವ ಮನಸ್ಸಿದ್ದರೆ ಮಕ್ಕಳಿಂದಲೂ ಕಲಿಯಬಹುದು. ಅದರಲ್ಲಿಯೂ ತಿನ್ನುವ ವಿಚಾರದಲ್ಲಿ ಮಕ್ಕಳಿಂದ ಕಲಿಯುವಂತದ್ದು ತುಂಬಾ ವಿಷಯಗಳಿವೆ. ಟಿವಿ ನೋಡುವಾಗ, ಹೋಯಿತು, ಬಂತು ಬಾಯಿಯಲ್ಲಿ ಸದಾ ಏನಾದರೂ  ಮುಕ್ಕುತ್ತಲೇ ಇರುವವರಿಗೆ ಮಕ್ಕಳು ಕಲಿಸುವ ಪಾಠವಿದು...

• ಹಸಿವಾದಾಗ ಮಾತ್ರ ತಿನ್ನಬೇಕು. ಪದೇ ಪದೇ ತಿಂದರೆ ಅನಾರೋಗ್ಯ ಕಟ್ಟಿಟ್ಟ ಬುತ್ತಿ.
• ಪೋಷಕಾಂಶವಿರುವ ಆಹಾರವನ್ನು ಮಾತ್ರ ತಿನ್ನಬೇಕು, ದೊಡ್ಡವರು ಕೆಲಸದ ಒತ್ತಡ ಹಾಗು ಖಿನ್ನತೆಗೆ ಹೆಚ್ಚು ಫ್ಯಾಟ್ ಇರುವ ಆಹಾರ ಪದಾರ್ಥಗಳನ್ನೇ ತಿನ್ನುವ ಅಭ್ಯಾಸ ಮಾಡಿಕೊಂಡಿರುತ್ತಾರೆ. ಇದು ಒಳ್ಳೆಯದಲ್ಲ. 
• ತಿನ್ನುವ ಆಹಾರವನ್ನು ಅನುಭವಿಸಿಕೊಂಡು ತಿನ್ನಬೇಕು. ಗಡಿ-ಬಿಡಿ ಮಾಡಿಕೊಂಡು ಅಥವಾ ಫೋನ್, ಟಿವಿ ನೋಡಿಕೊಂಡು ತಿಂದರೆ ದೆಹಕ್ಕೆ ಒಗ್ಗಲ್ಲ. 
• ಹೊಸ ತಿನಿಸನ್ನು ನಿರಾಯಾಸವಾಗಿ ಟೇಸ್ಟ್ ಮಾಡುತ್ತಾರೆ. ನಾಲಿಗೆಗೆ ರುಚಿಸಿದರೆ ತಿನ್ನುತ್ತಾರೆ. ಇಲ್ಲವೇ ಬಿಟ್ಟು ಬಿಡುತ್ತಾರೆ. ಆದರೆ, ಸ್ವಲ್ಪ ದೊಡ್ಡವರಾದ ಮೇಲೆ ನೋಡಿಯೇ ತಿನ್ನಬೇಕೋ, ಬೇಡವೋ ಎಂಬುದನ್ನು ನಿರ್ಧರಿಸುತ್ತಾರೆ. ಇದು ತಪ್ಪು.
• ನಿಧಾನವಾಗಿ ತಿನ್ನುವುದರಿಂದ ಆಹಾರ ರುಚಿಸುವುದಲ್ಲದೇ, ಸುಲಭವಾಗಿಯೂ ಜೀರ್ಣವಾಗುತ್ತದೆ. 

ಅದಕ್ಕೆ ಮಕ್ಕಳಿಗೆ ತಾವಾಗಿಯೇ ತಿನ್ನೋ ಅಭ್ಯಾಸ ಮಾಡಿಸಬೇಕು. ಎಷ್ಟು ಬೇಕೋ ಅಷ್ಟು ತಿಂದು ಸುಮ್ಮನಾಗುತ್ತವೆ. ಒತ್ತಾಯವಾಗಿ ತಿನಿಸಿದರೆ ವಾಂತಿ, ಬೇಧಿಯಂಥ ಅನಾರೋಗ್ಯ ಸದಾ ಕಾಡುತ್ತದೆ. ಅಲ್ಲದೇ ಆರೋಗ್ಯವಾಗಿರಲು ಒಳ್ಳೊಳ್ಳೆ ಅಭ್ಯಾಸಗಳನ್ನು ಕಲಿಸಬೇಕು.