ಪ್ರತಿದಿನ ಅನ್ನದ ತಳ ಸುಟ್ಟುಹೋಗುತ್ತಾ? ಹಾಗಿದ್ರೆ ಅಡುಗೆ ಮಾಡುವಾಗ ಈ ಟ್ರಿಕ್ಸ್ ಟ್ರೈ ಮಾಡಿ

Cooking Tricks: ಅನ್ನ ಮಾಡುವಾಗ ಪದೇ ಪದೇ ತಳ ಸುಟ್ಟು ಹೋಗುತ್ತಾ? ಇದರಿಂದ ಅನ್ನದ ರುಚಿ ಹಾಳಾಗುತ್ತಿದ್ಯಾ? ಹಾಗಿದ್ರೆ ನೀವು ಇನ್ನು ಮುಂದೆ ಅನ್ನ ಮಾಡುವಾಗ ಕೆಲವು ನಿಯಮಗಳನ್ನು ಪಾಲಿಸಿ. ಇದರಿಂದ ಅನ್ನ ತಳ ಸುಟ್ಟು ಹೋಗದೇ, ಉದುರು ಉದುರಾದ ಅನ್ನ ತಯಾರಾಗುತ್ತದೆ.

ಪದೇ ಪದೇ ಅನ್ನದ ತಳ ಸುಡುತ್ತಾ?

ಅನ್ನ ಮಾಡುವಾಗ ಪ್ರತಿಬಾರಿಯೂ ಪಾತ್ರೆಯ ತಳದಲ್ಲಿ ಅನ್ನ ಸುಟ್ಟುಹೋಗುತ್ತಿದ್ದರೆ, ಅನ್ನದ ರುಚಿಯೇ ಹಾಳಾಗುತ್ತದೆ. ಮೇಲಿನ ಅನ್ನ ಸರಿಯಾಗಿ ಬೆಂದಿದ್ದರೂ, ಪಾತ್ರೆಯ ತಳಕ್ಕೆ ಅಂಟಿಕೊಂಡು ಸುಟ್ಟ ಅನ್ನದಿಂದಾಗಿ ಇಡೀ ಅಡುಗೆಯ ಶ್ರಮ ವ್ಯರ್ಥವಾಗುತ್ತದೆ. ಕೆಲವೊಮ್ಮೆ ಅನ್ನ ಸುಟ್ಟ ಕಾರಣದಿಂದ ಇಡೀ ಅನ್ನಕ್ಕೆ ವಿಚಿತ್ರವಾದ ವಾಸನೆಯೂ ಬರಬಹುದು. ನಿಮಗೂ ಇಂತಹ ಸಮಸ್ಯೆ ಎದುರಾಗುತ್ತಿದ್ದರೆ, ಪ್ರತಿಬಾರಿಯೂ ಪಾತ್ರೆ ಅಥವಾ ಅಕ್ಕಿಯನ್ನೇ ದೂಷಿಸುವ ಅಗತ್ಯವಿಲ್ಲ. ಅನ್ನ ಬೇಯಿಸುವ ವಿಧಾನದಲ್ಲಿನ ಕೆಲವು ಸಣ್ಣ ತಪ್ಪುಗಳೂ ಇದಕ್ಕೆ ಕಾರಣವಾಗಿರಬಹುದು.

ಅನ್ನ ತಳದಲ್ಲಿ ಸುಟ್ಟುಹೋಗಲು ಮುಖ್ಯ ಕಾರಣವೇನು?

ಅನ್ನ ಪಾತ್ರೆಯ ತಳದಲ್ಲಿ ಸುಟ್ಟುಹೋಗಲು ಪ್ರಮುಖ ಕಾರಣ ಅತಿಯಾದ ಉರಿ. ಅನ್ನ ಬೇಗ ಬೇಯಲಿ ಎಂಬ ಉದ್ದೇಶದಿಂದ ಅನೇಕರು ಆರಂಭದಿಂದಲೇ ಹೆಚ್ಚಿನ ಉರಿಯಲ್ಲಿ ಗ್ಯಾಸ್ ಮೇಲೆ ಇಡುತ್ತಾರೆ. ನೀರು ಕುದಿದ ನಂತರವೂ ಉರಿಯನ್ನು ಕಡಿಮೆ ಮಾಡದಿದ್ದರೆ, ಪಾತ್ರೆಯ ತಳದಲ್ಲಿರುವ ನೀರು ವೇಗವಾಗಿ ಆವಿಯಾಗುತ್ತದೆ. ಅಕ್ಕಿಯ ಕಾಳುಗಳು ನೀರನ್ನು ಸಂಪೂರ್ಣವಾಗಿ ಹೀರಿಕೊಳ್ಳುವ ಮೊದಲೇ ಪಾತ್ರೆಯ ತಳವು ಅತಿಯಾಗಿ ಬಿಸಿಯಾಗುತ್ತದೆ. ಇದರಿಂದ ಅಕ್ಕಿ ಪಾತ್ರೆಗೆ ಅಂಟಿಕೊಂಡು ಸುಡಲು ಆರಂಭಿಸುತ್ತದೆ.

ಹೀಗಾಗಿ ಅನ್ನ ಬೇಯಿಸುವಾಗ ಮೊದಲು ಗಮನಿಸಬೇಕಾದದ್ದು ಉರಿಯ ಪ್ರಮಾಣ. ನೀರು ಕುದಿಯಲು ಆರಂಭಿಸಿದ ತಕ್ಷಣ ಗ್ಯಾಸ್ ಉರಿಯನ್ನು ಕಡಿಮೆ ಮಾಡಿ. ಅನ್ನವನ್ನು ನಿರಂತರವಾಗಿ ಹೆಚ್ಚಿನ ಉರಿಯಲ್ಲಿ ಬೇಯಿಸುವ ಬದಲು ಕಡಿಮೆ ಉರಿಯಲ್ಲಿ ಬೇಯಿಸುವುದು ಉತ್ತಮ. ಪಾತ್ರೆಗೆ ಮುಚ್ಚಳ ಹಾಕಿ ಅನ್ನವನ್ನು ಅದರದೇ ಹಬೆಯಲ್ಲಿ ಬೇಯಲು ಬಿಡಿ. ಇದರಿಂದ ಮೇಲಿನ ಮತ್ತು ಕೆಳಗಿನ ಅನ್ನ ಹೆಚ್ಚು ಸಮಾನವಾಗಿ ಬೇಯುತ್ತದೆ.

ಸರಿಯಾದ ಪಾತ್ರೆಯನ್ನು ಆಯ್ಕೆ

ನೀವು ತುಂಬಾ ತೆಳುವಾದ ತಳವಿರುವ ಪಾತ್ರೆಯಲ್ಲಿ ಅನ್ನ ಮಾಡಿದರೆ, ಅದು ಕೆಳಭಾಗದಲ್ಲಿ ಸುಟ್ಟುಹೋಗುವ ಸಾಧ್ಯತೆ ಹೆಚ್ಚಿರುತ್ತದೆ. ತೆಳುವಾದ ಪಾತ್ರೆಯ ತಳದ ಒಂದು ಭಾಗಕ್ಕೆ ಗ್ಯಾಸ್‌ನ ಶಾಖ ನೇರವಾಗಿ ಹೆಚ್ಚು ತಾಗಬಹುದು. ಇದರಿಂದ ಕೆಲವು ಕಡೆ ಅತಿಯಾದ ಉಷ್ಣತೆ ಉಂಟಾಗಿ, ಅನ್ನ ಪಾತ್ರೆಗೆ ಅಂಟಿಕೊಳ್ಳಲು ಆರಂಭಿಸುತ್ತದೆ. ಆದ್ದರಿಂದ ಅನ್ನ ಮಾಡಲು ದಪ್ಪ ತಳವಿರುವ ಪಾತ್ರೆಯನ್ನು ಬಳಸಿ.

ನೀರು ಕಡಿಮೆ ಹಾಕಿದರೂ ಅನ್ನ ಸುಡಬಹುದು!

ಅಕ್ಕಿ ಮತ್ತು ನೀರಿನ ಸರಿಯಾದ ಪ್ರಮಾಣವೂ ಬಹಳ ಮುಖ್ಯ. ನೀರು ಕಡಿಮೆ ಹಾಕಿದರೆ, ಅನ್ನ ಸಂಪೂರ್ಣವಾಗಿ ಬೇಯುವ ಮೊದಲೇ ನೀರು ಖಾಲಿಯಾಗಬಹುದು. ನಂತರ ಪಾತ್ರೆಯ ಬಿಸಿಯಾದ ತಳಕ್ಕೆ ಅಕ್ಕಿಯ ಕಾಳುಗಳು ನೇರವಾಗಿ ತಾಗುವುದರಿಂದ ಅವು ಸುಡಲು ಆರಂಭಿಸುತ್ತವೆ. ನೀವು ಯಾವ ಅಕ್ಕಿ ಬಳಸಿದ್ದೀರಿ, ಅದಕ್ಕೆ ಸರಿಯಾಗಿ ನೀರು ಬಳಸಿ, ಅನ್ನ ಬೇಯಿಸಿ.

ಅನ್ನ ಬೇಯಿಸುವಾಗ ಪದೇಪದೇ ಮುಚ್ಚಳ ತೆಗೆಯಬೇಡಿ

ಅನ್ನ ಬೇಯುತ್ತಿರುವಾಗ ಪದೇಪದೇ ಮುಚ್ಚಳ ತೆಗೆದು ನೋಡುವುದು ಸರಿಯಲ್ಲ. ಮುಚ್ಚಳ ತೆರೆದಾಗ ಪಾತ್ರೆಯೊಳಗೆ ಸಂಗ್ರಹವಾಗಿರುವ ಹಬೆ ಹೊರಹೋಗುತ್ತದೆ. ಇದರಿಂದ ಅನ್ನ ಮೇಲ್ಭಾಗದಲ್ಲಿ ಸಂಪೂರ್ಣವಾಗಿ ಬೇಯದಿರಬಹುದು. ಆಗ ಅನ್ನವನ್ನು ಇನ್ನಷ್ಟು ಸಮಯ ಗ್ಯಾಸ್ ಮೇಲಿಡಬೇಕಾಗುತ್ತದೆ. ಇದರಿಂದ ಪಾತ್ರೆಯ ತಳವು ಅಗತ್ಯಕ್ಕಿಂತ ಹೆಚ್ಚು ಬಿಸಿಯಾಗಿ ಅನ್ನ ಸುಡುವ ಸಾಧ್ಯತೆ ಹೆಚ್ಚುತ್ತದೆ.

ಅಕ್ಕಿಯನ್ನು ತೊಳೆದು ಬೇಯಿಸಿ

ಅನ್ನ ಮಾಡುವ ಮೊದಲು ಅಕ್ಕಿಯನ್ನು ಚೆನ್ನಾಗಿ ತೊಳೆಯುವುದು ಕೂಡ ಮುಖ್ಯ. ಹಸಿ ಅಕ್ಕಿಯ ಮೇಲ್ಮೈಯಲ್ಲಿ ಹೆಚ್ಚುವರಿ ಸ್ಟಾರ್ಚ್ ಇರುತ್ತದೆ. ಇದನ್ನು ತೊಳೆಯದೆ ಬೇಯಿಸಿದರೆ, ನೀರು ಹೆಚ್ಚು ಗಟ್ಟಿಯಾಗಿ ಅಂಟಂಟಾಗಬಹುದು. ಇದರಿಂದ ಅಕ್ಕಿಯ ಕಾಳುಗಳು ಒಂದಕ್ಕೊಂದು ಅಂಟಿಕೊಳ್ಳುವುದರ ಜೊತೆಗೆ ಪಾತ್ರೆಯ ತಳಕ್ಕೂ ಸುಲಭವಾಗಿ ಅಂಟಿಕೊಳ್ಳಬಹುದು.