Mounjaro Brides: ಅಪಾಯಕಾರಿ ಶಾರ್ಟ್‌ಕಟ್ ಹಿಡಿದ ಹುಡ್ಗೀರು.. ಮದುವೆಗೆ ಮುನ್ನ ಈ ಇಂಜೆಕ್ಷನ್ ಪಡಿತಿರೋದ್ಯಾಕೆ?

Mounjaro Brides India: ಭಾರತದಲ್ಲಿ ಈಗ ಮದುವೆ ಸಮೀಪಿಸುತ್ತಿದ್ದಂತೆ 'ಮೌನ್ಜಾರೋ' ನಂತಹ ಇಂಜೆಕ್ಷನ್‌ಗಳನ್ನು ಬಳಸುವ ಕ್ರೇಜ್ ಹೆಚ್ಚಾಗಿದೆ. ಬೆಂಗಳೂರು, ದೆಹಲಿಯಂತಹ ನಗರಗಳ ಕ್ಲಿನಿಕ್‌ಗಳಲ್ಲಿ ಇವು ಪ್ರೀ-ವೆಡ್ಡಿಂಗ್ ಪ್ಯಾಕೇಜ್‌ನ ಭಾಗವಾಗಿದ್ದು, ತಜ್ಞರು ಆರೋಗ್ಯದ ಅಪಾಯದ ಬಗ್ಗೆ ಎಚ್ಚರಿಕೆ ನೀಡುತ್ತಿದ್ದಾರೆ. ಹೆಚ್ಚಿನ ವಿವರಗಳಿಗಾಗಿ ಮುಂದೆ ಓದಿ..

ಭಾರತದಲ್ಲಿ ಈಗ ಮದುವೆ ಎಂದರೆ ಕೇವಲ ಸಂಭ್ರಮ, ಹಬ್ಬದ ಊಟವಲ್ಲ. ಅದೊಂದು ದೊಡ್ಡ ಮಟ್ಟದ 'ಟ್ರಾನ್ಸ್ ಫರ್ಮೇಷನ್' ಪ್ರಾಜೆಕ್ಟ್ ಆಗಿ ಬದಲಾಗಿದೆ. ಮದುವೆಯ ದಿನ ಸಿನಿಮಾ ತಾರೆಯರಂತೆ ಸಪೂರವಾಗಿ ಮತ್ತು ಸುಂದರವಾಗಿ ಕಾಣಿಸಿಕೊಳ್ಳಲು ಇಂದಿನ ಯುವಜನತೆ ಜಿಮ್‌ನಲ್ಲಿ ಬೆವರು ಹರಿಸುವ ಬದಲು ಅಪಾಯಕಾರಿ ಶಾರ್ಟ್‌ಕಟ್ ಮೊರೆ ಹೋಗುತ್ತಿದ್ದಾರೆ. ಇದನ್ನು ಸಾಮಾಜಿಕ ಜಾಲತಾಣಗಳಲ್ಲಿ 'ಮೌನ್ಜಾರೋ ಬ್ರೈಡ್ಸ್' (Mounjaro Brides) ಎಂದು ಕರೆಯಲಾಗುತ್ತಿದ್ದು, ಇದು ಈಗ ಆತಂಕಕಾರಿ ಟ್ರೆಂಡ್ ಆಗಿ ಬೆಳೆಯುತ್ತಿದೆ.

ಏನಿದು ಹೊಸ ಟ್ರೆಂಡ್?

ಮದುವೆ ಸಮೀಪಿಸುತ್ತಿದ್ದಂತೆ ವಧು-ವರರಲ್ಲಿ ತೂಕ ಇಳಿಸುವ ತರಾತುರಿ ಶುರುವಾಗುತ್ತದೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಬೆಂಗಳೂರು, ಹೈದರಾಬಾದ್ ಮತ್ತು ದೆಹಲಿಯಂತಹ ಮೆಟ್ರೋ ನಗರಗಳ ವೆಲ್ನೆಸ್ ಕ್ಲಿನಿಕ್‌ಗಳು ಈಗ ವಿಶೇಷ ಆಫರ್ ನೀಡುತ್ತಿವೆ. ಈ ಕ್ಲಿನಿಕ್‌ಗಳು ಕೇವಲ ಚರ್ಮದ ಆರೈಕೆ (Skincare) ಮಾತ್ರವಲ್ಲದೆ, 'ವೇಟ್ ಲಾಸ್ ಇಂಜೆಕ್ಷನ್'ಗಳನ್ನು ತಮ್ಮ 'ಪ್ರೀ-ವೆಡ್ಡಿಂಗ್ ಪ್ಯಾಕೇಜ್'ನಲ್ಲೇ ಅಧಿಕೃತವಾಗಿ ಸೇರಿಸುತ್ತಿವೆ. ಫೋಟೋಗಳಲ್ಲಿ ಪರ್ಫೆಕ್ಟ್ ಆಗಿ ಕಾಣಿಸಿಕೊಳ್ಳಲು ಆರೋಗ್ಯದ ಹಂಗಿಲ್ಲದೆ ಇಂತಹ ಔಷಧಿಗಳನ್ನು ಬಳಸಲಾಗುತ್ತಿದೆ.

ಈ ಟ್ರೆಂಡ್ ಹೆಚ್ಚಾಗಲು ಕಾರಣಗಳೇನು?

ಸಾಮಾಜಿಕ ಒತ್ತಡ ಮತ್ತು ಬಾಡಿ ಶೇಮಿಂಗ್: ದಪ್ಪಗಿದ್ದರೆ ಮದುವೆ ಸಂಬಂಧಗಳು ತಿರಸ್ಕೃತಗೊಳ್ಳುತ್ತವೆ ಎಂಬ ಭಯ ಮತ್ತು ಸಮಾಜದ ಟೀಕೆಗಳಿಗೆ ಹೆದರಿ ಅನೇಕ ಯುವತಿಯರು ಈ ಹಾದಿ ಹಿಡಿಯುತ್ತಿದ್ದಾರೆ.
ತ್ವರಿತ ಫಲಿತಾಂಶದ ಹಪಾಹಪಿ: ಕಠಿಣ ಡಯಟ್ ಅಥವಾ ದೈಹಿಕ ಕಸರತ್ತು ಮಾಡಲು ಸಮಯವಿಲ್ಲದವರು, ಕೇವಲ 2-3 ತಿಂಗಳಲ್ಲಿ ಸಪೂರವಾಗಲು ಇಂತಹ ಔಷಧಿಗಳನ್ನು ಮ್ಯಾಜಿಕ್‌ನಂತೆ ಬಳಸುತ್ತಿದ್ದಾರೆ.
ಆಕರ್ಷಕ ಮಾರ್ಕೆಟಿಂಗ್: ಸೋಶಿಯಲ್ ಮೀಡಿಯಾ ಪ್ರಭಾವಿಗಳು ಇವುಗಳನ್ನು ಸುಲಭವಾದ ಫಿಟ್ನೆಸ್ ಮಂತ್ರದಂತೆ ಪ್ರಚಾರ ಮಾಡುತ್ತಿರುವುದು ಯುವಜನರನ್ನು ದಾರಿ ತಪ್ಪಿಸುತ್ತಿದೆ.

ಗಮನಿಸಬೇಕಾದ ಗಂಭೀರ ಅಂಶಗಳು
ದುರುಪಯೋಗ: ಮೌನ್ಜಾರೋ ಮತ್ತು ವೇಗೋವಿಯಂತಹ ಔಷಧಿಗಳನ್ನು ಮೂಲತಃ ಬೊಜ್ಜು (Obesity) ಮತ್ತು ಟೈಪ್ 2 ಡಯಾಬಿಟಿಸ್ ರೋಗಿಗಳ ಚಿಕಿತ್ಸೆಗಾಗಿ ತಯಾರಿಸಲಾಗಿದೆ. ಆದರೆ ಇಂದು ಇದನ್ನು ಕೇವಲ ಸೌಂದರ್ಯವರ್ಧಕದಂತೆ ಬಳಸಲಾಗುತ್ತಿದೆ.
ಭಾರೀ ವೆಚ್ಚ: ಈ ಇಂಜೆಕ್ಷನ್‌ಗಳ ಒಂದು ತಿಂಗಳ ಚಿಕಿತ್ಸೆಗೆ ಸುಮಾರು 13,000 ದಿಂದ 25,000 ರೂಪಾಯಿಗಳವರೆಗೂ ಖರ್ಚಾಗುತ್ತದೆ.
ಆರೋಗ್ಯದ ಮೇಲೆ ದುಷ್ಪರಿಣಾಮ: ವೈದ್ಯರ ಕಟ್ಟುನಿಟ್ಟಿನ ಸಲಹೆ ಇಲ್ಲದೆ ಇವುಗಳನ್ನು ಬಳಸುವುದರಿಂದ ವಾಕರಿಕೆ, ಜೀರ್ಣಕ್ರಿಯೆಯ ತೊಂದರೆ ಮತ್ತು ದೀರ್ಘಕಾಲದ ಆರೋಗ್ಯ ಸಮಸ್ಯೆಗಳು ಎದುರಾಗಬಹುದು.
ತಾತ್ಕಾಲಿಕ ಸುಖ: ಈ ಇಂಜೆಕ್ಷನ್ ನಿಲ್ಲಿಸಿದ ಕೆಲವೇ ದಿನಗಳಲ್ಲಿ ತೂಕ ಮತ್ತೆ ಮೊದಲಿನ ಸ್ಥಿತಿಗೆ ಬರುತ್ತದೆ ಅಥವಾ ಹಾರ್ಮೋನ್ ಬದಲಾವಣೆಯಿಂದಾಗಿ ತೂಕ ಇನ್ನು ದುಪ್ಪಟ್ಟಾಗುವ ಸಾಧ್ಯತೆ ಇರುತ್ತದೆ.

ವೈದ್ಯರ ಕಿವಿಮಾತು 
ಖ್ಯಾತ ವೈದ್ಯರಾದ ಡಾ. ಸಂದೀಪ್ ಖರ್ಬ್ ಅವರ ಪ್ರಕಾರ, "ನಿಜವಾದ ಮತ್ತು ಸುಸ್ಥಿರ ತೂಕ ಇಳಿಕೆ ಜೀವನಶೈಲಿಯ ಬದಲಾವಣೆಯಿಂದ ಮಾತ್ರ ಸಾಧ್ಯ. ಮದುವೆಯ ಫೋಟೋಗಳಲ್ಲಿ ಸುಂದರವಾಗಿ ಕಾಣುವುದು ಮುಖ್ಯವೇ, ಆದರೆ ಅದಕ್ಕಾಗಿ ನಿಮ್ಮ ಜೀವವನ್ನೇ ಪಣಕ್ಕಿಡುವುದು ಜಾಣತನವಲ್ಲ."

ಪ್ರಮುಖ ಅಂಕಿ-ಅಂಶಗಳು 
*2030ರ ವೇಳೆಗೆ ಭಾರತದಲ್ಲಿ ತೂಕ ಇಳಿಸುವ ಔಷಧಿಗಳ ಮಾರುಕಟ್ಟೆ ಸುಮಾರು 8,000 ಕೋಟಿ ರೂಪಾಯಿ ದಾಟುವ ಅಂದಾಜಿದೆ.
*ಇತ್ತೀಚಿನ ವರದಿಗಳ ಪ್ರಕಾರ, ಕ್ಲಿನಿಕ್‌ಗಳಿಗೆ ಬರುತ್ತಿರುವ ಪ್ರತಿ ಐವರಲ್ಲಿ ಒಬ್ಬರದು ಮದುವೆಗಾಗಿ ತೂಕ ಇಳಿಸುವ ಶಾರ್ಟ್‌ಕಟ್ ಬಗ್ಗೆಯೇ ವಿಚಾರಣೆ ಇರುತ್ತಿದೆ.

ಸೂಚನೆ: ಯಾವುದೇ ಔಷಧಿಗಳನ್ನು ತೆಗೆದುಕೊಳ್ಳುವ ಮೊದಲು ತಜ್ಞ ವೈದ್ಯರ ಸಲಹೆ ಪಡೆಯುವುದು ಕಡ್ಡಾಯ.