'ಅರ್ಧಕ್ಕೆ ಕೈಕೊಡುವವಳಲ್ಲ' ಅಂದಿದ್ದ ನಟಿ ಸಂಜನಾ ಬುರ್ಲಿ ಸೀರಿಯಲ್​ ಬಿಟ್ಟಿದ್ಯಾಕೆ? ಕುತೂಹಲದ ಪೋಸ್ಟ್​!

'ಪುಟ್ಟಕ್ಕನ ಮಕ್ಕಳು' ಸೀರಿಯಲ್​ನಿಂದ ಪೂರ್ವಸೂಚನೆ ನೀಡಿ ಹೊರಬಂದಿದ್ದ ನಟಿ ಸಂಜನಾ ಬುರ್ಲಿ, ಇದೀಗ 'ಗಂಧದ ಗುಡಿ' ಧಾರಾವಾಹಿಯಿಂದ ದಿಢೀರ್ ನಿರ್ಗಮಿಸಿದ್ದಾರೆ. ಅವರ ಮದುವೆ ಕಾರಣ ಎನ್ನಲಾಗುತ್ತಿದ್ದರೂ, ಅವರು ಹಂಚಿಕೊಂಡಿರುವ ಒಂದು ನಿಗೂಢ ಪೋಸ್ಟ್​ನಿಂದಾಗಿ ಅವರ ನಿರ್ಧಾರದ ಬಗ್ಗೆ  ಅನುಮಾನಗಳು ಮೂಡಿವೆ.

ಸ್ನೇಹಾ ಸಾವು

ಪುಟ್ಟಕ್ಕನ ಮಕ್ಕಳು ಸೀರಿಯಲ್​ನಲ್ಲಿ ಸ್ನೇಹಾ ಆಗಿ ಎಲ್ಲರನ್ನೂ ರಂಜಿಸಿದ್ದ ನಟಿ ಸಂಜನಾ ಬುರ್ಲಿ ಪಾತ್ರವನ್ನು ಸಾಯಿಸಿದಾಗ ರೊಚ್ಚಿಗೆದ್ದವರೇ ಹೆಚ್ಚು. ಆದರೆ ಅಸಲಿಗೆ ಸಂಜನಾ ಬುರ್ಲಿ ಆ ಪಾತ್ರದಿಂದ ನಿರ್ಗಮಿಸುವ ಬಗ್ಗೆ ಹೇಳಿದ್ದರಿಂದ, ಆ ಪಾತ್ರಕ್ಕೆ ಬೇರೆಯವರನ್ನು ತಂದರೆ ಚೆನ್ನಾಗಿರಲಿಲ್ಲ ಎಂದು ಪಾತ್ರವನ್ನು ಸಾಯಿಸಲಾಗಿತ್ತು. ಈ ಬಗ್ಗೆ ಖುದ್ದು ನಟಿ ಹಾಗೂ ನಿರ್ದೇಶಕರೂ ಹೇಳಿದ್ದರು.

ಸಂಜನಾ ಹೇಳಿದ್ದೇನು?

ಆ ಸಮಯದಲ್ಲಿ ಸಂಜನಾ ಅವರು, ನಾನು ಮೂರು ತಿಂಗಳು ಮೊದಲೇ ಈ ವಿಷಯ ತಿಳಿಸಿದ್ದೆ. ಆದ್ದರಿಂದ ಪಾತ್ರವನ್ನು ಸಾಯಿಸಿದರು. ಇದ್ದಕ್ಕಿದ್ದಂತೆ ಮಾಡಿದ ನಿರ್ಧಾರವಲ್ಲ. ಮಧ್ಯೆ ಕೈಕೊಟ್ಟು ಹೋಗುವವಳು ಅಲ್ಲ. ಹಿಡಿದ ಕಾರ್ಯವನ್ನು, ಒಪ್ಪಿಕೊಂಡ ಸೀರಿಯಲ್​ಗಳನ್ನು ಮುಗಿಸಿಯೇ ಹೋಗುವವಳು ನಾನು. ಇಲ್ಲದಿದ್ದರೆ ಅದು ಇಡೀ ತಂಡಕ್ಕೆ ಎಷ್ಟು ಸಮಸ್ಯೆ ಆಗುತ್ತದೆ ಎನ್ನುವ ಅರಿವು ನನಗೆ ಇದೆ ಎಂದು ಸಂದರ್ಶನದಲ್ಲಿ ಮಾತನಾಡಿದ್ದರು.

ಮೊದಲೇ ಗೊತ್ತಿದ್ದರೆ?

ಆದರೆ, ಇದೀಗ ದಿಢೀರ್​ ಎಂದು ನಟಿ, ಗಂಧದ ಗುಡಿ ಸೀರಿಯಲ್​ನಲ್ಲಿ ಹೊರಕ್ಕೆ ಬಂದಿದ್ದಾರೆ. ಅದು ಕೂಡ ಲೀಡ್​ ರೋಲ್​. ಅವರ ಮದುವೆ ನಿಶ್ಚಯವಾಗಿದ್ದರಿಂದ ಹೀಗೆ ಮಾಡಿದ್ದಾರೆ ಎನ್ನುವ ಮಾತು ಕೇಳಿಬರುತ್ತಿದೆ. ಒಂದು ವೇಳೆ ಹಿಂದೆ ಹೇಳಿದಂತೆ ಶಿಕ್ಷಣದ ಕಾರಣವೇ ಆಗಿದ್ದರೆ ನಟಿ, ಈ ಸೀರಿಯಲ್​​ ಒಪ್ಪಿಕೊಳ್ಳುತ್ತಲೇ ಇರಲಿಲ್ಲ. ಮದುವೆಯ ವಿಷಯವೂ ಆಗಿದ್ದರೆ ಅದು ಕೂಡ ಮೊದಲೇ ಗೊತ್ತಿರುವಂತಿದೆ. ಒಂದು ವೇಳೆ ಅಕಸ್ಮಾತ್​ ಮದುವೆ ನಿಶ್ಚಯ ಆಗಿದ್ದರೂ, ಎಷ್ಟೋ ಮಂದಿ ಸೀರಿಯಲ್​ ನಡುವೆ ಮದುವೆ ಮಾಡಿಕೊಂಡೇ ಅದನ್ನು ಮುಂದುವರೆಸಿದ್ದಾರೆ.

ಏಕೀ ನಿರ್ಧಾರ?

ಹಾಗಿದ್ದರೆ ನಟಿ ಈ ನಿರ್ಧಾರ ತೆಗೆದುಕೊಂಡಿದ್ಯಾಕೆ ಎನ್ನುವ ಬಗ್ಗೆ ಇನ್ನೂ ಕುತೂಹಲ ಇದ್ದದ್ದೇ. ಈ ಬಗ್ಗೆ ಮದುವೆ, ಶಿಕ್ಷಣ ಏನೇ ಇದ್ದರೂ ಸಂಜನಾ ಅದನ್ನು ಸೋಷಿಯಲ್​ ಮೀಡಿಯಾದಲ್ಲಿ ಆದರೂ ಬಹಿರಂಗಪಡಿಸುತ್ತಿದ್ದರು. ಆದರೆ ಹಾಗೆ ಮಾಡಿಲ್ಲದ್ದಕ್ಕೆ ಕಾರಣ ಏನು ಎನ್ನುವ ಬಗ್ಗೆ ಅವರ ಫ್ಯಾನ್ಸ್​ ಸಿಕ್ಕಾಪಟ್ಟೆ ಬೇಸರ ಪಟ್ಟುಕೊಂಡಿದ್ದಾರೆ.

ಕುತೂಹಲದ ಪೋಸ್ಟ್​

ಅದರ ನಡುವೆಯೇ ಇದೀಗ ಕುತೂಹಲ ಎನ್ನುವ ಪೋಸ್ಟ್​ ಒಂದನ್ನು ಸಂಜನಾ ಬುರ್ಲಿ (Sanjana Burli) ಶೇರ್​ ಮಾಡಿದ್ದಾರೆ. ಅದರಲ್ಲಿ ಅವರು, Biggest lesson I’ve learnt- “Accept what is, as it is.” Life becomes so much simpler and beautiful ಎಂದು ಇಂಗ್ಲಿಷ್​ನಲ್ಲಿಯೂ, ನಾನು ಕಲಿತ ದೊಡ್ಡ ಪಾಠ- “ಇರುವುದನ್ನು ಹಾಗೆಯೇ ಸ್ವೀಕರಿಸಿ. ಜೀವನವು ತುಂಬಾ ಸರಳ ಮತ್ತು ಸುಂದರವಾಗುತ್ತದೆ ಎಂದು ಕನ್ನಡದಲ್ಲಿಯೂ ಬರೆದುಕೊಂಡಿದ್ದಾರೆ.

ಫ್ಯಾನ್ಸ್​ಗೆ ಸಂದೇಹ

ಇದು ಹಲವಾರು ಅರ್ಥಗಳನ್ನು ನೀಡುತ್ತದೆ. ಈ ಕ್ಯಾಪ್ಷನ್​ ಓದಿದ ಮೇಲೆ ಅವರ ಅಭಿಮಾನಿಗಳಿಗೆ ಸೀರಿಯಲ್​ ಸೆಟ್​ನಲ್ಲಿ ಏನಾದರೂ ಸಂಭವಿಸಿತಾ ಎನ್ನುವ ಸಂದೇಹ ಕಾಡುತ್ತಿದೆ. ಒಟ್ಟಿನಲ್ಲಿ ನಟಿ ಬಾಯಿಯಿಂದ ಇದು ಬರುವವರೆಗೂ ಅಭಿಮಾನಿಗಳು ತಮ್ಮದೇ ಊಹೆಗಳನ್ನು ಹೊರಹಾಕುತ್ತಲೇ ಇರುತ್ತಾರೆ.