Bhagyalakshmi Serial ವಿದಾಯ: ಮೇಘನಾ ರಾಜ್​ ಜೊತೆ ನಟಿ ಸುಷ್ಮಾ ರಾವ್​ ಹೊಸ ಪಯಣ

ಕಲರ್ಸ್ ಕನ್ನಡದ ಜನಪ್ರಿಯ 'ಭಾಗ್ಯಲಕ್ಷ್ಮಿ' ಧಾರಾವಾಹಿ ಅಂತ್ಯಗೊಳ್ಳುತ್ತಿದ್ದು, ಅದರ ನಾಯಕಿ ಸುಷ್ಮಾ ಕೆ. ರಾವ್ ಅವರು 'ಕ್ವಾಟ್ಲೆ ಕಿಚನ್' ಎಂಬ ಹೊಸ ರಿಯಾಲಿಟಿ ಶೋನ ನಿರೂಪಕಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಹೊಸ ಸೀಸನ್‌ನಲ್ಲಿ ನಟಿ ಮೇಘನಾ ರಾಜ್ ತೀರ್ಪುಗಾರರಾಗಿ ಆಗಮಿಸುತ್ತಿರುವುದು ಮತ್ತೊಂದು ವಿಶೇಷ.

ಭಾಗ್ಯಲಕ್ಷ್ಮಿ ಅಂತ್ಯ

2022ರ ಅಕ್ಟೋಬರ್​ 10ರಿಂದ ಕಲರ್ಸ್​ ಕನ್ನಡದಲ್ಲಿ ಆರಂಭವಾಗಿದ್ದ ಭಾಗ್ಯಲಕ್ಷ್ಮಿ ಸೀರಿಯಲ್​ (Bhagyalakshmi Serial)ಗೆ ಈಗ ಮೂರೂವರೆ ವರ್ಷ ಕಳೆದಿವೆ. ಆಗ ಮುಗಿಯತ್ತೆ, ಈಗ ಮುಗಿಯತ್ತೆ ಎಂದುಕೊಂಡಿದ್ದ ಸೀರಿಯಲ್​ ಕೊನೆಗೂ ಮುಗಿಯುವ ಹಂತಕ್ಕೆ ಬಂದಿದೆ. ಇದಾಗಲೇ ಅಂತಿಮ ಸಂಚಿಕೆಗಳು ಆರಂಭವಾಗಿದ್ದು, ಇದೇ 7 ಅರ್ಥಾತ್​ ಜೂನ್​ 7ರಂದು ಸೀರಿಯಲ್​ ಮುಗಿಯಲಿದೆ ಎನ್ನಲಾಗುತ್ತಿದೆ.

ಸುಷ್ಮಾ ಹೊಸ ಪ್ರಾಜೆಕ್ಟ್​

ಇದರ ನಡುವೆಯೇ, ಭಾಗ್ಯ ಪಾತ್ರಧಾರಿ ಸುಷ್ಮಾ ಕೆ. ರಾವ್​ (Sushma K. Rao) ಅವರು ಹೊಸ ಪ್ರಾಜೆಕ್ಟ್​ ಒಂದಕ್ಕೆ ಸಹಿ ಹಾಕಿರುವುದಾಗಿ ತಿಳಿಸಲಾಗಿದೆ. ಎಲ್ಲರಿಗೂ ತಿಳಿದಿರುವಂತೆ ಸುಷ್ಮಾ ಅವರು ಕೇವಲ ನಟಿ ಮಾತ್ರವಲ್ಲದೇ ಖ್ಯಾತ ಆ್ಯಂಕರ್​ ಕೂಡ ಹೌದು. ಇದಾಗಲೇ ಅವರು, ‘ಸೀರಿಯಲ್‌ ಸಂತೆ’, ‘ಅನುಬಂಧ ಅವಾರ್ಡ್ಸ್‌’ ಸೇರಿದಂತೆ ಕೆಲವು ರಿಯಾಲಿಟಿ ಷೋ, ಫಂಕ್ಷನ್​ಗಳಲ್ಲಿ ಆ್ಯಂಕರಿಂಗ್​ ಮಾಡಿದ್ದಾರೆ.

ಕ್ವಾಟ್ಲೆ ಕಿಚನ್' ನಿರೂಪಕಿ

ಅದೇ ರೀತಿ ಇದೀಗ ಅವರು, ಇನ್ನೊಂದು ರಿಯಾಲಿಟಿ ಷೋನಲ್ಲಿ ನಿರೂಪಕಿಯಾಗಲಿರುವುದಾಗಿ ತಿಳಿಸಿದ್ದಾರೆ. ಅದು 'ಕ್ವಾಟ್ಲೆ ಕಿಚನ್'(Kwatle Kitchen) ಷೋ. ಈ ಬಗ್ಗೆ ಅವರು, ಕಳೆದ ವಾರದ ‘ಗಿಚ್ಚಿ-ಗಿಲಿಗಿಲಿ ಜ್ಯೂನಿಯರ್ಸ್‌’ ಗ್ರ್ಯಾಂಡ್‌ ಫಿನಾಲೆಯಲ್ಲಿ ಅನೌನ್ಸ್‌ ಮಾಡಿದ್ದಾರೆ. ಇದರ ಪ್ರೊಮೋ ಕೂಡ ರಿಲೀಸ್​ ಆಗಿದೆ.

ಯಾರು ಬದಲಾದ್ರು?

ಅಂದಹಾಗೆ ಇಲ್ಲಿಯವರೆಗೆ ಈ ಷೋ ಅನ್ನು ಅನುಪಮಾ ಗೌಡ ಮತ್ತು ಕುರಿ ಪ್ರತಾಪ್​ ಅವರು ನಡೆಸಿಕೊಡುತ್ತಿದ್ದರು. ಈ ಬಾರಿ ಸುಷ್ಮಾ ಕೆ.ರಾವ್​ ಅವರು ಬರಲಿರುವ ಹಿನ್ನೆಲೆಯಲ್ಲಿ ಅನುಪಮಾ ಗೌಡ ಅವರು ಬೇರೆ ಪ್ರಾಜೆಕ್ಟ್​ಗೆ ಹೋಗ್ತಿರಬಹುದಾ ಎನ್ನುವ ಸಂದೇಹವಿದೆ. ಅಥವಾ ಕುರಿ ಪ್ರತಾಪ್​ ಇರುವುದಿಲ್ಲವೆ ಎನ್ನುವುದು ಕೆಲವರ ಪ್ರಶ್ನೆ. ಅದಕ್ಕೆ ಶೀಘ್ರದಲ್ಲಿಯೇ ಉತ್ತರ ಸಿಗಲಿದೆ.

ತೀರ್ಪುಗಾರರ ಬದಲು

ಅಷ್ಟಕ್ಕೂ, ಈ ಷೋನಲ್ಲಿ, ನಟಿ ಶ್ರುತಿ ಮತ್ತು ಖ್ಯಾತ ಶೆಫ್ ಕೌಶಿಕ್ ಅವರು ಇಲ್ಲಿಯವರೆಗೆ ತೀರ್ಪುಗಾರರಾಗಿದ್ದರು. ಈ ಬಾರಿ ನಟಿ ಮೇಘನಾ ರಾಜ್‌ ಅವರು ತೀರ್ಪುಗಾರರಾಗಲಿದ್ದಾರೆ. ಇದಕ್ಕೆ ಕಾರಣ ಕಲರ್ಸ್ ಕನ್ನಡ ಈಚೆಗೆ ಪ್ರೊಮೋ ರಿಲೀಸ್ ಮಾಡಿತ್ತು. ಅದರಲ್ಲಿ, ಕ್ವಾಟ್ಲೆ - ಕುಕ್‌ಗಳ ಮನದಲ್ಲಿ ಕಿಚ್ಚು ಹಚ್ಚೋಕೆ ಬರ್ತಿರೋ ಜಡ್ಜ್ ಯಾರು ಗೆಸ್ ಮಾಡಿ ಎಂದು ಮೇಘನಾ ಅವರ ಲುಕ್​ ಇರುವ ವಿಡಿಯೋ ಶೇರ್​ ಮಾಡಲಾಗಿತ್ತು. ಬಳಿಕ ಇನ್ನೊಂದು ಪ್ರೊಮೋದಲ್ಲಿ ಮೇಘನಾ ರಾಜ್​ ಅವರನ್ನು ನೋಡಬಹುದು.

ಯಾವಾಗ ಷೋ?

ಕ್ವಾಟ್ಲೆ ಕಿಚನ್​-2 ಷೋ ಶೀಘ್ರದಲ್ಲಿ ಬರಲಿರುವುದಾಗಿ ವಾಹಿನಿ ಅನೌನ್ಸ್​ ಮಾಡಿದೆ. ಪ್ರತಿ ಶನಿವಾರ ಮತ್ತು ಭಾನುವಾರ ಇದು ಪ್ರಸಾರ ಆಗಲಿದೆ. ಇದರ ಕೆಲವು ಪ್ರೊಮೋಗಳನ್ನು ಇದಾಗಲೇ ವಾಹಿನಿ ಶೇರ್​ ಮಾಡಿದೆ.