ಯಶ್ Toxic ಟೀಸರ್​ನಲ್ಲಿ ಕಾರೊಳಗಿನ ಆ ದೃಶ್ಯ ಯಾಕೆ ಬಂತು? ನಿರ್ದೇಶಕ ತರುಣ್​ ಸುಧೀರ್​ ಹೇಳಿದ್ದೇನು?

ಯಶ್ ಅವರ 'ಟಾಕ್ಸಿಕ್' ಚಿತ್ರದ ಟೀಸರ್‌ನಲ್ಲಿನ ವಿವಾದಾತ್ಮಕ ದೃಶ್ಯವು ಟೀಕೆಗೆ ಗುರಿಯಾಗಿದೆ. ಈ ಬಗ್ಗೆ ನಿರ್ದೇಶಕ ತರುಣ್ ಸುಧೀರ್ ಪ್ರತಿಕ್ರಿಯಿಸಿದ್ದು, ಯಶ್ ಅವರು  ಮುಜುಗರವಾಗುವ ದೃಶ್ಯಗಳನ್ನು ಮಾಡುವುದಿಲ್ಲ ಮತ್ತು ಆ ದೃಶ್ಯದ ಹಿಂದೆ ಒಂದು ಸೂಕ್ಷ್ಮ ಕಾರಣವಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಟಾಕ್ಸಿಕ್​ ಟೀಸರ್​ ಗಲಾಟೆ

ಯಶ್​ ಅವರ ಬಹು ನಿರೀಕ್ಷಿತ ಟಾಕ್ಸಿಕ್​ (Yash's Toxic Movie) ಚಿತ್ರದ ಟೀಸರ್​ ಹೊರಬರುತ್ತಲೇ ಇದರ ಬಗ್ಗೆ ಸಾಕಷ್ಟು ಟೀಕೆಗಳು ವ್ಯಕ್ತವಾಗಿದ್ದು ಗೊತ್ತೇ ಇದೆ. ಕಾರಿನ ಒಳಗೆ ಗಂಡು-ಹೆಣ್ಣು ಲೈಂ*ಗಿಕ ಕ್ರಿಯೆಯಲ್ಲಿ ತೊಡಗಿಕೊಂಡಿರುವುದು, ಆ ಕಾರು ಡಾನ್ಸ್​ ಮಾಡುತ್ತಿರುವಂತೆ ತೋರಿಸಿರುವುದು ಈ ಟೀಕೆಗೆ ಕಾರಣ, ಯಶ್​ ಅಂಥ ನಟ ಈ ರೀತಿ ಮಾಡಲು ಸಾಧ್ಯವೇ ಇಲ್ಲ, ಯಾಕೆ ಹಾಗೆ ಮಾಡಿದ್ರು ಎನ್ನುವುದು ಬಹುತೇಕ ಮಂದಿಯ ಕಳಕಳಿಯೂ ಹೌದು.

ತರುಣ್​ ಸುಧೀರ್​ ಹೇಳಿದ್ದೇನು?

ಅದರ ಬಗ್ಗೆ ಇದೀಗ ನಿರ್ದೇಶಕ ತರುಣ್​ ಸುಧೀರ್​ (Director Tharun Sudhir) ಕೆಲವೊಂದು ವಿಷಯಗಳನ್ನು, ಅನಿಸಿಕೆಯನ್ನು ಹಂಚಿಕೊಂಡಿದ್ದಾರೆ.. ಮಾಧ್ಯಮವೊಂದರ ಜೊತೆಗಿನ ಸಂದರ್ಶನದಲ್ಲಿ ಅವರು ಈ ವಿಷಯವಾಗಿ ಮಾತನಾಡಿದ್ದಾರೆ.

ತೀರಾ ವೈಯಕ್ತಿಕವಾಗಿ ಬಲ್ಲೆ

ನಾನು ಯಶ್​ ಅವರನ್ನು ತೀರಾ ವೈಯಕ್ತಿಕವಾಗಿ ಬಲ್ಲೆ. ಸಿನಿಮಾಗಳ ಕ್ರಿಯೇಟಿವ್​ ಡಿಸ್​ಕಷನ್​ನಲ್ಲಿ ನಾನು ಅವರ ಜೊತೆ ಇದ್ದೇನೆ. ಅವರ ಮೈಂಡ್​ಸೆಟ್​ ನನಗೆ ತುಂಬಾ ಚೆನ್ನಾಗಿ ಗೊತ್ತಿದೆ. ಅವರು ಯಾವತ್ತಿಗೂ ಕುಟುಂಬ ಸಹಿತವಾಗಿ ವೀಕ್ಷಕರು ನೋಡುವಾಗ ಅವರಿಗೆ ಮುಜುಗರ ಆಗುವಂಥ ದೃಶ್ಯಗಳನ್ನು ಮಾಡುವುದಿಲ್ಲ. ಟಾಕ್ಸಿಕ್​ ಚಿತ್ರದಲ್ಲಿಯೂ ಆ ರೀತಿ ಇರಲ್ಲ ಎಂದೇ ಹೇಳಿದ್ದಾರೆ.

ಯಶ್​ ತುಂಬಾ ಸೂಕ್ಷ್ಮ ಮನಸ್ಸಿನ ವ್ಯಕ್ತಿ

ಯಶ್​ ತುಂಬಾ ಸೂಕ್ಷ್ಮ ಮನಸ್ಸಿನ ವ್ಯಕ್ತಿ. ತುಂಬಾ ಸೆನ್ಸಿಬಲ್​. ಅವರು ಏನೋ ಒಂದು ದೃಶ್ಯ ತೋರಿಸಿದ್ದಾರೆ ಎಂದರೆ ಅಲ್ಲೊಂದು ಸೆನ್ಸಿಬಲ್​ ಕಾರಣ ಇದ್ದೇ ಇರುತ್ತದೆ. ಇದರ ಹಿಂದೆ ಮಾರ್ಕೆಟಿಂಗ್​ ಅಥವಾ ಪ್ರಮೋಷನ್​ಗೆ ಖಂಡಿತಾ ಇರುವುದಿಲ್ಲ. ಅಲ್ಲೊಂದು ಸ್ಟ್ರಾಂಗ್​ ರೀಸನ್​ ಇರುತ್ತದೆ ಎಂದಿದ್ದಾರೆ.

ಚಿಕ್ಕ ದೃಶ್ಯ ಇರಬಹುದು

ಯಶ್​ ಅವರು ಯಾವುದೇ ದೃಶ್ಯ ತೋರಿಸುವಾಗಲೂ ತುಂಬಾ ರಿಸರ್ಚ್​ ಮಾಡುತ್ತಾರೆ. ವೀಕ್ಷಕರ ಮನಸ್ಸನ್ನು ಸೆಟ್​ ಮಾಡಲು ಈ ದೃಶ್ಯ ತೋರಿಸಿರಬಹುದು. ಇದರ ಅರ್ಥ ಸಿನಿಮಾದಲ್ಲಿ ಯಾವುದೋ ಒಂದು ಚಿಕ್ಕ ಸನ್ನಿವೇಶದಲ್ಲಿ ಇದು ಕೂಡ ಇದೆ. ನೀವು ಚಿತ್ರ ನೋಡುವಾಗ ಬಂದು ಶಾಕ್​ ಆಗುವುದು ಬೇಡ ಎಂದು ಟೀಸರ್​ನಲ್ಲಿ ಅದನ್ನು ತೋರಿಸಿರಬಹುದು ಎಂದು ನನ್ನ ಭಾವನೆ ಎಂದಿದ್ದಾರೆ.

ಅದು ತಪ್ಪು ಗ್ರಹಿಕೆ

ಸಿನಿಮಾದಲ್ಲಿ ಇಂಥ ದೃಶ್ಯಗಳು ತುಂಬಾ ಇರಲು ಸಾಧ್ಯವೇ ಇಲ್ಲ. ಯಶ್​ ಅವರು ಹಾಗೆಲ್ಲಾ ಮಾಡುವುದಿಲ್ಲ. ಟೀಸರ್​ನಲ್ಲಿ ಅದನ್ನು ತೋರಿಸಲು ಕೂಡ ಅವರದ್ದೇ ಒಂದು ಬೇರೆಯದ್ದೇ ಕಾರಣ ಇದೆ. ಹಾಗೆಂದು ಚಿತ್ರದ ತುಂಬಾ ಅದೇ ಇರುತ್ತದೆ, ಕುಟುಂಬಕ್ಕೆ ಮುಜುಗರ ಆಗುವಂಥ ದೃಶ್ಯ ಇರುತ್ತದೆ ಎನ್ನುವುದು ತಪ್ಪು ಗ್ರಹಿಕೆ ಎಂದಿದ್ದಾರೆ ತರುಣ್​ ಸುಧೀರ್​.