Men Psychology: ಗಂಡಸರಿಗೆ ನಿಜವಾಗ್ಲೂ ಏನು ಇಷ್ಟ? ಸೈಕಾಲಜಿ ಹೇಳೋದೇನು?

Male Psychology Guide: ಸಾಮಾನ್ಯವಾಗಿ ಹೆಣ್ಣುಮಕ್ಕಳು ಬಟ್ಟೆ, ಬಂಗಾರ, ಮೇಕಪ್ ಅಂತ ಇಷ್ಟಪಡೋದು ಹೆಚ್ಚು. ಹಾಗಿದ್ರೆ ಗಂಡಸರು ಏನನ್ನ ಹೆಚ್ಚು ಇಷ್ಟಪಡ್ತಾರೆ? ಅವರಿಗೆ ನಿಜವಾಗ್ಲೂ ಏನು ಬೇಕು? ನಿಮಗೂ ಈ ಡೌಟ್ ಇದ್ಯಾ? ಹಾಗಿದ್ರೆ ಬನ್ನಿ, ಈ ಬಗ್ಗೆ ಸೈಕಾಲಜಿ ತಜ್ಞರು ಏನು ಹೇಳ್ತಾರೆ ಅಂತ ತಿಳಿದುಕೊಳ್ಳೋಣ. 

ಪ್ರೀತಿಯ ಜೊತೆಗೆ ಗೌರವ

ಸೈಕಾಲಜಿ ಪ್ರಕಾರ ಗಂಡಸರಿಗೆ ಪ್ರೀತಿಯ ಜೊತೆಗೆ ಗೌರವ ಕೂಡ ಅಷ್ಟೇ ಮುಖ್ಯ. "ನೀನು ತುಂಬಾ ಮೌಲ್ಯಯುತ ವ್ಯಕ್ತಿ", "ನಿನ್ನ ಅಭಿಪ್ರಾಯಕ್ಕೆ ಬೆಲೆ ಇದೆ" ಅನ್ನೋ ಭಾವನೆ ಅವರಿಗೆ ಭದ್ರತೆ ನೀಡುತ್ತದೆ. ಇದೇ ಕಾರಣಕ್ಕೆ ಕೆಲ ಗಂಡಸರು ದುಬಾರಿ ವಸ್ತುಗಳಿಗಿಂತ, ತಮ್ಮ ಮಾತಿಗೆ ಮತ್ತು ನಿರ್ಧಾರಗಳಿಗೆ ಗೌರವ ಸಿಗುವ ವಾತಾವರಣವನ್ನು ಹೆಚ್ಚು ಇಷ್ಟಪಡುತ್ತಾರೆ. 

ಸ್ವಾತಂತ್ರ್ಯ

ಅದೇ ರೀತಿ ಗಂಡಸರಲ್ಲಿ ಸ್ವಾತಂತ್ರ್ಯದ ಬಗ್ಗೆ ಹೆಚ್ಚು ಆಸಕ್ತಿ ಇರುತ್ತದೆ. ತಮ್ಮ ಸಮಸ್ಯೆಗಳನ್ನು ತಾವೇ ಬಗೆಹರಿಸಿಕೊಳ್ಳುವುದು, ತಮ್ಮ ದಾರಿಯನ್ನು ತಾವೇ ಆರಿಸಿಕೊಳ್ಳುವುದು ಅವರಿಗೆ ಮಾನಸಿಕ ಶಕ್ತಿ ನೀಡುತ್ತದೆ. ಸೈಕಾಲಜಿ ಪ್ರಕಾರ, ಇದು ಅವರ ಗುರುತಿನೊಂದಿಗೆ ಬೆಸೆದುಕೊಂಡಿರುತ್ತದೆ. ಅದಕ್ಕಾಗಿಯೇ ಕೆಲವರು ಟ್ರಾವೆಲ್, ಸ್ಪೋರ್ಟ್ಸ್, ವಾಹನಗಳು ಅಥವಾ ಟೆಕ್ನಾಲಜಿ ಕಡೆಗೆ ಹೆಚ್ಚು ಆಕರ್ಷಿತರಾಗುತ್ತಾರೆ. ಇವು ಅವರಿಗೆ ಸ್ವಾತಂತ್ರ್ಯ ಮತ್ತು ಉತ್ಸಾಹದ ಅನುಭವ ನೀಡುತ್ತವೆ.

ಅಂಗೀಕಾರಕ್ಕಾಗಿ ಹಂಬಲ

ಇನ್ನೊಂದು ಕುತೂಹಲಕಾರಿ ವಿಷಯವೆಂದರೆ, ಹೆಚ್ಚಿನ ಗಂಡಸರು ತಮ್ಮ ಭಾವನೆಗಳನ್ನು ನೇರವಾಗಿ ಹೇಳಿಕೊಳ್ಳದಿದ್ದರೂ, ಅಂಗೀಕಾರ ಮತ್ತು ಮನ್ನಣೆಗಾಗಿ ಒಳಗೊಳಗೆ ಹಂಬಲಿಸುತ್ತಾರೆ. "ನಾನು ಹೇಗಿದ್ದೇನೋ ಹಾಗೆ ನನ್ನನ್ನು ಅರ್ಥಮಾಡಿಕೊಳ್ಳುವವರು ಇದ್ದಾರಾ?" ಎಂಬ ಪ್ರಶ್ನೆ ಅವರ ಮನಸ್ಸಿನಲ್ಲಿ ಇದ್ದೇ ಇರುತ್ತದೆ. ಸೈಕಾಲಜಿ ತಜ್ಞರ ಪ್ರಕಾರ, ಗಂಡಸರು ಪ್ರೀತಿಯನ್ನು ಮಾತಿಗಿಂತ ಕೃತಿಯ ಮೂಲಕ ಹೆಚ್ಚು ತೋರಿಸುತ್ತಾರೆ. ಆದರೆ, ಆ ಪ್ರಯತ್ನಗಳನ್ನು ಎದುರಿಗಿರುವವರು ಗುರುತಿಸಿದರೆ ಅವರು ಮಾನಸಿಕವಾಗಿ ಮತ್ತಷ್ಟು ಬಲಗೊಳ್ಳುತ್ತಾರೆ.

ಅರ್ಥಮಾಡಿಕೊಳ್ಳುವುದು ಮುಖ್ಯ

ಸೈಕಾಲಜಿ ತಜ್ಞರ ಪ್ರಕಾರ, ವ್ಯಕ್ತಿಯ ಸ್ವಭಾವ, ಬೆಳೆದ ರೀತಿ ಮತ್ತು ಅನುಭವಗಳ ಮೇಲೆ ಅವರ ಇಷ್ಟಗಳು ಬದಲಾಗುತ್ತವೆ. ಕೆಲವು ಗಂಡಸರು ಕೂಡ ಬಟ್ಟೆ, ಆಭರಣ ಮತ್ತು ಐಷಾರಾಮಿ ಜೀವನವನ್ನು ಇಷ್ಟಪಡಬಹುದು. ಇದನ್ನು ಸರಿಯಾಗಿ ಅರ್ಥಮಾಡಿಕೊಂಡರೆ, ಗಂಡು-ಹೆಣ್ಣಿನ ನಡುವಿನ ತಪ್ಪು ತಿಳುವಳಿಕೆಗಳು ಕಡಿಮೆಯಾಗಿ, ಸಂಬಂಧಗಳು ಇನ್ನಷ್ಟು ಗಟ್ಟಿಯಾಗುತ್ತವೆ.