ಬಾದಾಮಿ ನಮ್ಮ ಆರೋಗ್ಯಕ್ಕೆ ಒಳ್ಳೆಯ ಒಣ ಹಣ್ಣು. ಬಾದಾಮಿಯಲ್ಲಿರುವ ವಿವಿಧ ಪ್ರೋಟೀನ್‌ಗಳು, ವಿಟಮಿನ್‌ಗಳು, ಖನಿಜಗಳು ಮತ್ತು ಉತ್ಕರ್ಷಣ ನಿರೋಧಕಗಳು ನಮ್ಮನ್ನು ಆರೋಗ್ಯವಾಗಿಡಲು ಸಹಾಯ ಮಾಡುತ್ತವೆ. ಆದರೆ ಕೆಲವು ಜನರು ಬಾದಾಮಿ ತಿನ್ನುವುದನ್ನು ತಪ್ಪಿಸಬೇಕು. ಯಾರು ಬಾದಾಮಿ ತಿನ್ಬಾರ್ದು ಎಂಬ ಬಗ್ಗೆ ಈ ಲೇಖನದಲ್ಲಿದೆ ಮಾಹಿತಿ.
ಬಾದಾಮಿ ಬೀಜಗಳು ಹಲವಾರು ಆರೋಗ್ಯ ಪ್ರಯೋಜನಗಳನ್ನು ನೀಡುತ್ತವೆ. ಹೀಗಾಗಿ ಅನೇಕ ಜನರು ಅದನ್ನು ಹೆಚ್ಚಿನ ಪ್ರಮಾಣದಲ್ಲಿ ತಿನ್ನುತ್ತಾರೆ. ಅನೇಕರು ರಾತ್ರಿ ನೆನೆಸಿ ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಮಕ್ಕಳಿಗೆ ಅದನ್ನು ತಿನ್ನಲು ನೀಡುತ್ತಾರೆ. ಆದರೆ ಕೆಲವು ಆರೋಗ್ಯ ಸಮಸ್ಯೆ ಇರುವವರು ಬಾದಾಮಿ ತಿನ್ನದಿರೋದೆ ಒಳಿತು.
ಬಾದಾಮಿ ಪೋಷಕಾಂಶಗಳಿಂದ ತುಂಬಿದೆ ಮತ್ತು ಫೈಬರ್, ಪ್ರೋಟೀನ್, ವಿಟಮಿನ್ ಇ, ಮೆಗ್ನೀಸಿಯಮ್, ಮ್ಯಾಂಗನೀಸ್, ತಾಮ್ರ ಮತ್ತು ರಂಜಕದ ಅತ್ಯುತ್ತಮ ಮೂಲವಾಗಿದೆ. ಹಲವಾರು ಆರೋಗ್ಯ ಅಧ್ಯಯನಗಳು ಬಾದಾಮಿಯ ಹಲವು ಪ್ರಯೋಜನಗಳನ್ನು ದೃಢಪಡಿಸಿವೆ, ತೂಕ ನಷ್ಟಕ್ಕೆ, ಉತ್ತಮ ಮೂಳೆ ಆರೋಗ್ಯಕ್ಕೆ, ಮನಸ್ಥಿತಿಯ ಸುಧಾರಣೆಗೆ ಬಾದಾಮಿ ಒಳ್ಳೆಯದು ಮತ್ತು ಹೃದ್ರೋಗ, ಕ್ಯಾನ್ಸರ್ ಮತ್ತು ಮಧುಮೇಹದ ಅಪಾಯವನ್ನು ಕಡಿಮೆ ಮಾಡುವುದು. ಒಂದು ಅಧ್ಯಯನದ ಪ್ರಕಾರ, ಬಾದಾಮಿ ಸ್ತನ ಕ್ಯಾನ್ಸರ್ ಅಪಾಯವನ್ನುಕೂಡ ಕಡಿಮೆ ಮಾಡುತ್ತದೆಯಂತೆ. ಅಂದರೆ, ಹೆಚ್ಚಿನ ಪ್ರಮಾಣದಲ್ಲಿ ಕಡಲೆಕಾಯಿ ಮತ್ತು ವಾಲ್‌ನಟ್‌ಗಳನ್ನು ತಿನ್ನುವವರಿಗಿಂತ ಬಾದಾಮಿ ತಿನ್ನುವವರಲ್ಲಿ ಸ್ತನ ಕ್ಯಾನ್ಸರ್ ಅಪಾಯ ಕಡಿಮೆ ಎಂಬ ಅಧ್ಯಯನ ವರದಿ ಇದೆ.
ಮತ್ತೊಂದು ಅಧ್ಯಯನದಲ್ಲಿ ಬಾದಾಮಿ ದೇಹದ ರಕ್ತಪ್ರವಾಹದಲ್ಲಿ ಉತ್ಕರ್ಷಣ ನಿರೋಧಕ ಮಟ್ಟವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ, ರಕ್ತದೊತ್ತಡವನ್ನು ಕಡಿಮೆ ಮಾಡುತ್ತದೆ ಮತ್ತು ರಕ್ತದ ಹರಿವನ್ನು ಸುಧಾರಿಸುತ್ತದೆ ಎಂದು ಸಾಬೀತುಪಡಿಸುತ್ತದೆ. ಟೈಪ್ 2 ಮಧುಮೇಹ ಹೊಂದಿರುವ ಜನರು ಸಹ ಬಾದಾಮಿ ಸೇವಿಸುವುದರಿಂದ ಪ್ರಯೋಜನ ಪಡೆಯುತ್ತಾರೆ, ಏಕೆಂದರೆ ಮೆಗ್ನೀಸಿಯಮ್ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿರ್ವಹಿಸಲು ಸಹಾಯ ಮಾಡುತ್ತದೆ.
ಆದರೆ ಪೌಷ್ಟಿಕಾಂಶಗಳಿಂದ ಸಮೃದ್ಧವಾಗಿರುವ ಬಾದಾಮಿಯನ್ನು ಕೆಲವು ಜನರು ತಿನ್ನುವುದನ್ನು ತಪ್ಪಿಸಬೇಕು ಎಂದು ತಜ್ಞರು ಎಚ್ಚರಿಸುತ್ತಾರೆ. ಮೂತ್ರಪಿಂಡದಲ್ಲಿ ಕಲ್ಲು ಇರುವವರು ಬಾದಾಮಿ ತಿನ್ನಬಾರದು. ಬೊಜ್ಜು ಸಮಸ್ಯೆ ಇರುವವರು ಬಾದಾಮಿ ತಿನ್ನಬಾರದು. ಶೀತ ಮತ್ತು ಕೆಮ್ಮಿನ ಸಮಸ್ಯೆ ಇರುವವರು ಬಾದಾಮಿ ತಿನ್ನಬಾರದು ಎಂದೂ ಅವರು ಶಿಫಾರಸು ಮಾಡುತ್ತಾರೆ.
ಮೇಲೆ ತಿಳಿಸಿದ ಸಮಸ್ಯೆಗಳಿರುವ ಜನರು ಬಾದಾಮಿ ತಿಂದರೆ ಕೆಲವು ಅಡ್ಡಪರಿಣಾಮಗಳನ್ನು ಅನುಭವಿಸಬಹುದು. ಈ ಸಮಸ್ಯೆ ಇರುವವರು ಬಾದಾಮಿ ತಿನ್ನುವ ಮೊದಲು ವೈದ್ಯರನ್ನು ಸಂಪರ್ಕಿಸುವುದು ಸಹ ಅತ್ಯಗತ್ಯ.