ಜೇನು ನೊಣದಿಂದ ಮೃತಪಟ್ಟ ಸಂಜಯ್ ಕಪೂರ್‌ಗೆ ಫ್ಯಾಷನ್ ಜಗತ್ತಿನ 3 ಪತ್ನಿಯರು, ಕರೀಷ್ಮಾ ಎರಡನೇ ಪತ್ನಿ!

ಖ್ಯಾತ ಉದ್ಯಮಿ ಸಂಜಯ್ ಕಪೂರ್ ಅವರ ಅಕಾಲಿಕ ಮರಣವು ಅವರ ವೈಯಕ್ತಿಕ ಜೀವನದ ಬಗ್ಗೆ ಕುತೂಹಲ ಮೂಡಿಸಿದೆ. ನಂದಿತಾ ಮಹ್ತಾನಿ, ಕರಿಷ್ಮಾ ಕಪೂರ್ ಮತ್ತು ಪ್ರಿಯಾ ಸಚ್‌ದೇವ್ ಅವರೊಂದಿಗಿನ ಅವರ ಮೂರು ಮದುವೆಗಳು ಸುದ್ದಿಯಲ್ಲಿದ್ದವು.

53ನೇ ವಯಸ್ಸಿನಲ್ಲಿ ಖ್ಯಾತ ಉದ್ಯಮಿ ಸಂಜಯ್ ಕಪೂರ್ ಅವರ ಅಕಸ್ಮಿಕ ನಿಧನವು ಕಾರ್ಪೊರೇಟ್ ಮತ್ತು ಮನರಂಜನಾ ವಲಯಗಳಲ್ಲಿ ಭಾರೀ ಆಘಾತ ಉಂಟುಮಾಡಿದೆ. ಲಂಡನ್‌ನಲ್ಲಿ ಪೋಲೋ ಪಂದ್ಯವೊಂದರ ನಂತರ, ಆಕಸ್ಮಿಕವಾಗಿ ಜೇನುನೊಣವನ್ನು ನುಂಗಿ  ಕೆಲವು ಗಂಟೆಗಳ ನಂತರ ಹೃದಯಾಘಾತವಾಗಿದ್ದು,  ಕೊನೆಯುಸಿರೆಳೆದರು ಎಂದು ವ್ಯವಹಾರ ಸಲಹೆಗಾರ ಸುಹೇಲ್ ಸೇಠ್ ANI ಗೆ ತಿಳಿಸಿದ್ದಾರೆ. ಸಂಜಯ್ ಕಪೂರ್ ಅವರ ವೈಯಕ್ತಿಕ ಜೀವನವು ಸದಾ ಸಾರ್ವಜನಿಕರ ಕುತೂಹಲಕ್ಕೆ ಕಾರಣವಾಗಿತ್ತು. ಅವರು ಮೂರು ಬಾರಿ ವಿವಾಹವಾದರು ಮತ್ತು ಪ್ರತಿಸಾರಿ ಮನರಂಜನೆ ಅಥವಾ ಫ್ಯಾಷನ್ ಜಗತ್ತಿಗೆ ಸೇರಿದ ಮಹಿಳೆಯರನ್ನೇ ವಿವಾಹವಾಗಿದ್ದರು. ಅವರ ಮೂರು ಮದುವೆಯಲ್ಲಿ ಹೆಚ್ಚು ಗಮನ ಸೆಳೆದದ್ದು, ಅತ್ಯಂತ ಪ್ರಖ್ಯಾತ ಮದುವೆಗಳು ಬಾಲಿವುಡ್ ನಟಿ ಕರಿಷ್ಮಾ ಕಪೂರ್ ಹಾಗೂ ರೂಪದರ್ಶಿ ಪ್ರಿಯಾ ಸಚ್‌ದೇವ್ ಅವರೊಂದಿಗೆ ನಡೆದವು. ಆದರೆ ಅವರ ಮೊದಲ ಪತ್ನಿ ನಂದಿತಾ ಮಹ್ತಾನಿ ಎಂಬುದನ್ನು ಬಹುಪಾಲು ಜನರಿಗೆ ತಿಳಿದಿರಲಿಲ್ಲ.

ಮೊದಲ ಪತ್ನಿ-ನಂದಿತಾ ಮಹ್ತಾನಿ

1996ರಲ್ಲಿ, ಸಂಜಯ್ ಕಪೂರ್ ಅವರ ಮೊದಲ ವಿವಾಹ ದೆಹಲಿ ಮೂಲದ ಪ್ರಸಿದ್ಧ ಫ್ಯಾಷನ್ ಡಿಸೈನರ್ ಹಾಗೂ ಸಮಾಜಸೇವಕಿ ನಂದಿತಾ ಮಹ್ತಾನಿ ಅವರೊಂದಿಗೆ ನಡೆಯಿತು. ವ್ಯಾಪಾರ ಹಿನ್ನೆಲೆಯುಳ್ಳ ಕುಟುಂಬದಿಂದ ಬಂದ ನಂದಿತಾ ಅವರ ಸಹೋದರ ಭರತ್ ಮಹ್ತಾನಿ ಪ್ರಸಿದ್ದ ಉದ್ಯಮಿ ಆಗಿದ್ದಾರೆ. ಸಹೋದರಿ ಅನು ಮಹ್ತಾನಿ ಬಿಲಿಯನೇರ್ ಸಂಜಯ್ ಹಿಂದೂಜಾ ಅವರನ್ನು ವಿವಾಹವಾಗಿದ್ದರು. ಆದರೆ ನಂದಿತಾ ಮತ್ತು ಸಂಜಯ್ ದಾಂಪತ್ಯ ಜೀವನ ಕೇವಲ ನಾಲ್ಕು ವರ್ಷ ಮಾತ್ರ ಮುಂದುವರಿದು, 2000ರಲ್ಲಿ ಇವರಿಬ್ಬರೂ ವಿಚ್ಛೇದನ ಪಡೆದುಕೊಂಡರು. ಈಗ ನಂದಿತಾಗೆ 55 ವರ್ಷವಾಗಿದೆ.

ನಂದಿತಾ ಮಹ್ತಾನಿಯ ಬಾಲಿವುಡ್ ಸಂಪರ್ಕಗಳು

ಸಂಜಯ್ ಕಪೂರ್ ಅವರ ಪತ್ನಿಯಾಗಿ ಮಾತ್ರವಲ್ಲ, ನಂದಿತಾ ಅವರು ಬಾಲಿವುಡ್ ಜಗತ್ತಿನ ಹಲವು ಸಂಬಂಧಗಳ ಮೂಲಕವೂ ಪ್ರಸಿದ್ಧರಾದರು. 2000ರ ದಶಕದಲ್ಲಿ, ನಟ ಡಿನೋ ಮೋರಿಯಾ ಅವರೊಂದಿಗೆ ಅವರ ಸಂಬಂಧವಿತ್ತು. ಅಲ್ಲದೆ, ಕರಿಷ್ಮಾ ಕಪೂರ್ ಅವರ ಸಂಬಂಧಿ ರಣಬೀರ್ ಕಪೂರ್ ಅವರೊಂದಿಗೆ ಸ್ವಲ್ಪ ಕಾಲ ಡೇಟಿಂಗ್ ಮಾಡಿದ್ದರು ಎನ್ನಲಾಗಿದೆ. ರಣಬೀರ್ ಒಮ್ಮೆ ನಂದಿತಾರ ಬಗ್ಗೆ ಮಾತನಾಡುತ್ತಾ, ಅವರು "ಸುಂದರ, ಸರಳ ಮತ್ತು ಹೃದಯ ಸ್ಪರ್ಶಿ ವ್ಯಕ್ತಿ" ಎಂದು ವಿವರಿಸಿದ್ದರು. 2017ರಲ್ಲಿ, ನಂದಿತಾ ಅವರು ನಟ ವಿದ್ಯುತ್ ಜಮ್ವಾಲ್ ಅವರೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡರು ಆದರೆ ಮದುವೆ ತನಕ ಈ ಸಂಬಂಧ ಮುಂದುವರೆಯಲಿಲ್ಲ

ಫ್ಯಾಷನ್ ಮತ್ತು ಸೆಲೆಬ್ರಿಟಿ ಸ್ಟೈಲಿಸ್ಟ್

ನಂದಿತಾ ಮಹ್ತಾನಿ ಅವರು ಖ್ಯಾತ ಫ್ಯಾಷನ್ ಡಿಸೈನರ್ ಆಗಿದ್ದು, ಡಿನೋ ಮೋರಿಯಾ ಅವರೊಂದಿಗೆ 'ಪ್ಲೇಗ್ರೌಂಡ್' ಬ್ರ್ಯಾಂಡ್‌ನ ಸಹಮಾಲಕಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. 2012ರಿಂದ, ಅವರು ಬಾಲಿವುಡ್ ತಾರೆಯರಿಗೆ ಸ್ಟೈಲಿಸ್ಟ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ವಿಶೇಷವಾಗಿ, ಭಾರತೀಯ ಕ್ರಿಕೆಟ್ ನಾಯಕ ವಿರಾಟ್ ಕೊಹ್ಲಿ ಅವರಿಗಾಗಿ ಫ್ಯಾಷನ್ ಕನ್‌ಸಲ್ಟೆಂಟ್ ಆಗಿ ಹೆಸರು ಗಳಿಸಿದ್ದಾರೆ. 2019ರ ಸಂದರ್ಶನವೊಂದರಲ್ಲಿ, ವಿರಾಟ್ ಕೊಹ್ಲಿಯ "ಕನಿಷ್ಠತೆಯ ಫ್ಯಾಷನ್ ಅಭಿರುಚಿ ಮತ್ತು ಸ್ಪೋರ್ಟಿವ್ ಶೈಲಿಯನ್ನು" ಅವರು ಪ್ರಶಂಸಿಸಿದ್ದರು.

ಸಂಜಯ್ ಕಪೂರ್ ಎರಡನೇ ಪತ್ನಿ ಬಾಲಿವುಡ್‌ ನಟಿ ಕರಿಷ್ಮಾ ಕಪೂರ್

ಸೆಪ್ಟೆಂಬರ್ 29, 2003 ರಂದು ನಡೆದ ಹೈಪ್ರೊಫೈಲ್ ಸಿಖ್ ಮದುವೆ ಸಮಾರಂಭದಲ್ಲಿ ಕೈಗಾರಿಕೋದ್ಯಮಿ ಮತ್ತು ಸಿಕ್ಸ್‌ಟ್ ಇಂಡಿಯಾ ಕಂಪನಿಯ ಸಿಇಒ ಸಂಜಯ್ ಕಪೂರ್ ಅವರನ್ನು ಕರಿಷ್ಮಾ ವಿವಾಹವಾದರು. ಈ ದಂಪತಿಗೆ 2005ರ ಮಾರ್ಚ್ 11 ರಂದು ಸಮೈರಾ ಎಂಬ ಮಗಳು ಮತ್ತು 2011ರ ಮಾರ್ಚ್ 12 ರಂದು ಕಿಯಾನ್ ಎಂಬ ಮಗ ಜನಿಸಿದ. 2014ರಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದರು. ನವೆಂಬರ್ 2015ರಲ್ಲಿ, ಇಬ್ಬರೂ ತಮ್ಮ ಅರ್ಜಿಯನ್ನು ಹಿಂತೆಗೆದುಕೊಳ್ಳಲು ಪ್ರತ್ಯೇಕ ಅರ್ಜಿ ಸಲ್ಲಿಸಿದರು. ಅಂತಿಮವಾಗಿ ಮಾತುಕತೆ ಮೂಲಕ 2016ರಲ್ಲಿ ವಿಚ್ಛೇದನ ಪ್ರಕ್ರಿಯೆ ಅಧಿಕೃತವಾಗಿ ಅಂತಿಮಗೊಂಡಿತು. ನಟಿಗೆ ಬೃಹತ್ ಮಟ್ಟದಲ್ಲಿ ಜೀವನಾಂಶ ಸಿಕ್ಕಿತು. 2016 ರಲ್ಲಿ ನಟಿಯಿಂದ ವಿಚ್ಛೇದನ ಪಡೆದ ನಂತರ ತಮ್ಮ ಮಕ್ಕಳಿಗಾಗಿ ಸಂಜಯ್ 14 ಕೋಟಿ ರೂ. ಮೌಲ್ಯದ ಬಾಂಡ್‌ಗಳನ್ನು ಖರೀದಿಸಿದರು. ಇದು ತಿಂಗಳಿಗೆ 10 ಲಕ್ಷ ರೂ ಬಡ್ಡಿ ತಂದು ಕೊಡುತ್ತದೆ ಎನ್ನಲಾಗಿದೆ.  ವಿಚ್ಚೇದನದ ನಂತ ಇಬ್ಬರೂ ಗೌರವಯುತವಾಗಿ ಇದ್ದರು. 2023ರಲ್ಲಿ ತಮ್ಮ ಮಕ್ಕಳೊಂದಿಗೆ ಡಿನ್ನರ್ ಗೆ ಹೋಗಿದ್ದಾಗ ಸುದ್ದಿಯಾಗಿತ್ತು. ಕರೀಷ್ಮಾಗೆ ಈಗ 50 ವರ್ಷ.

ಸಂಜಯ್ ಕಪೂರ್ 3 ನೇ ಪತ್ನಿ ಪ್ರಿಯಾ ಸಚ್‌ದೇವ್

ಎರಡನೇ ಪತ್ನಿ ಕರಿಷ್ಮಾಳಿಂದ ವಿಚ್ಚೇದನ ಪಡೆದ ನಂತರ ಸಂಜಯ್ ದೆಹಲಿ ಮೂಲದ ಮಾಡೆಲ್ ಪ್ರಿಯಾ ಸಚ್‌ದೇವ್ ಅವರನ್ನು ಮತ್ತೆ ಪ್ರೀತಿಸುತ್ತಿದ್ದರು. 2017ರಲ್ಲಿ ಈ ಜೋಡಿ ವಿವಾಹವಾದರು ಮತ್ತು ನಂತರ ಅವರ ಮಗ ಅಜಾರಿಯಾಸ್ ಅವರನ್ನು ಸ್ವಾಗತಿಸಿದರು. ಪ್ರಿಯಾ ಸಚ್‌ದೇವ್ ದೆಹಲಿಯ ಸೊಸೈಟಿ ವಲಯದಲ್ಲಿ ಜನಪ್ರಿಯ ವ್ಯಕ್ತಿಯಾಗಿದ್ದಾರೆ. ಪ್ರಸಿದ್ಧ ಕಾರು ವ್ಯಾಪಾರಿ ಅಶೋಕ್ ಸಚ್‌ದೇವ್ ಅವರ ಪುತ್ರಿಯಾದ ಪ್ರಿಯಾ, ಲಂಡನ್ ಸ್ಕೂಲ್ ಆಫ್ ಎಕನಾಮಿಕ್ಸ್‌ನಲ್ಲಿ ಬಿಸಿನೆಸ್ ಅಧ್ಯಯನ ಮಾಡಿದ್ದಾರೆ. ಸದ್ಯ ಅವರಿಗೆ 49 ವರ್ಷ.

2000ರ ದಶಕದ ಆರಂಭದಲ್ಲಿ, ಪ್ರಿಯಾ ಹಲವಾರು ಜಾಹೀರಾತುಗಳಲ್ಲಿ ಕಾಣಿಸಿಕೊಂಡು ಗ್ಲಾಮರ್ ಜಗತ್ತಿನಲ್ಲಿ ತಮ್ಮ ವೃತ್ತಿಗೆ ಚಾಲನೆ ನೀಡಿದ್ದರು. ವಿಶೇಷವಾಗಿ, ಅವರು ಫೋರಾ ಬಾಡಿ ವಾಶ್ ಜಾಹೀರಾತಿನಲ್ಲಿ ಕರೀನಾ ಕಪೂರ್ ಅವರೊಂದಿಗೆ ಕಾಣಿಸಿಕೊಂಡಿದ್ದರು. ಮಾಡೆಲಿಂಗ್‌ನಲ್ಲಿ ಭರವಸೆಯ ಪ್ರಾರಂಭವಿದ್ದರೂ, ಅವರ ಬಾಲಿವುಡ್ ವೃತ್ತಿ ಬಹಳ ತಕ್ಷಣವೇ ಮುಗಿಯಿತು. 2005ರಲ್ಲಿ ಬಿಡುಗಡೆಯಾದ 'ನೀಲ್ 'ಎನ್' ನಿಕ್ಕಿ' ಎಂಬ ಚಿತ್ರದಲ್ಲಿ ಉದಯ್ ಚೋಪ್ರಾಗೆ ಜೋಡಿಯಾಗಿ ನಟಿಸಿದ್ದರು. ಈ ಚಿತ್ರದಲ್ಲಿ ತನಿಶಾ ಮುಖರ್ಜಿ ಕೂಡ ಇದ್ದರೂ, ಅದು ಬಾಕ್ಸ್ ಆಫೀಸ್‌ನಲ್ಲಿ ವಿಫಲವಾಯಿತು.

ವಿಕ್ರಮ್ ಚತ್ವಾಲ್ ಜೊತೆ ಹಿಂದಿನ ವೈವಾಹಿಕ ಜೀವನ

ಸಂಜಯ್ ಅವರನ್ನು ಭೇಟಿಯಾಗುವ ಮೊದಲು, ಪ್ರಿಯಾ ಅಮೆರಿಕದ ಹೋಟೆಲ್ ಉದ್ಯಮಿ ಮತ್ತು ನಟ ವಿಕ್ರಮ್ ಚತ್ವಾಲ್ ಅವರನ್ನು ವಿವಾಹವಾಗಿದ್ದರು. ಈ ವಿವಾಹ 2006ರಲ್ಲಿ ನಡೆದಿತ್ತು ಮತ್ತು ಅವರಿಗೆ ಸಫಿರಾ ಚತ್ವಾಲ್ ಎಂಬ ಮಗಳು ಇದ್ದಾಳೆ. ಆದರೆ ಈ ದಾಂಪತ್ಯ 2011ರಲ್ಲಿ ವಿಚ್ಛೇದನದೊಂದಿಗೆ ಕೊನೆಗೊಂಡಿತು. ಸಂಜಯ್ ಕಪೂರ್ ಮತ್ತು ಕರಿಷ್ಮಾ ಕಪೂರ್ ವಿಭಜನೆಗೊಂಡಿದ್ದರೂ, ಪ್ರಿಯಾ ಸಚ್‌ದೇವ್ ಎಂದಿಗೂ ಗೌರವಯುತ ಅಂತರ ಕಾಯ್ದುಕೊಂಡು, ಸಂಜಯ್‌ನ ಮೂರನೇ ಪತ್ನಿಯಾಗಿ ಹಳೆಯ ಕುಟುಂಬದೊಂದಿಗೆ ಸ್ನೇಹಭರಿತ ಸಂಬಂಧ ಕಾಯ್ದುಕೊಂಡಿದ್ದರು. ಅವರು ತಮ್ಮ ಮಗ ಅಜಾರಿಯಾಸ್ ಮತ್ತು ಸಂಜಯ್‌ ಹಿಂದಿನ ಮದುವೆಯ ಮಕ್ಕಳಾದ ಸಮೈರಾ ಮತ್ತು ಕಿಯಾನ್ ಅವರೊಂದಿಗಿನ ಆತ್ಮೀಯ ಕ್ಷಣಗಳನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳುತ್ತಿದ್ದರು. ವಿಶೇಷವಾಗಿ, 2023ರ ಮಾರ್ಚ್ 11 ರಂದು ಸಮೈರಾ ಅವರ 18ನೇ ಹುಟ್ಟುಹಬ್ಬದ ವೇಳೆ, ಸಂಜಯ್ ಮತ್ತು ಕರಿಷ್ಮಾ ಸಮ್ಮುಖದಲ್ಲಿ ಆ ಮಹತ್ವದ ಕ್ಷಣವನ್ನು ಒಟ್ಟಿಗೆ ಆಚರಿಸಿದರು. ಅಂದು ಸಂಜಯ್ ಕೇವಲ ತಂದೆಯಾಗಿ ಅಲ್ಲ, ಪ್ರಿಯಾ ಮತ್ತು ತಮ್ಮ ಪುತ್ರ ಅಜಾರಿಯಾಸ್‌ನೊಂದಿಗೆ ಕುಟುಂಬ ಸಮೇತರಾಗಿ ಹಾಜರಾಗಿದ್ದ ದೃಶ್ಯ, ಎಲ್ಲರ ಮನಸನ್ನು ಗೆದ್ದಿತ್ತು.