‌Singer Adnan Sami: ತಂದೆ ಹೇಳಿದ ಅದೊಂದು ಮಾತು ಕೇಳಿ, 6 ತಿಂಗಳಲ್ಲಿ 120 ಕೆಜಿ ತೂಕ ಇಳಿಸಿಕೊಂಡ ಗಾಯಕ ಅದ್ನಾನ್ ಸಾಮಿ; ಹೇಗೆ?

ಒಂದು ಕಾಲದಲ್ಲಿ ಹೆಚ್ಚು ತೂಕ ಹೊಂದಿದ್ದ ಗಾಯಕ ಅದ್ನಾನ್‌ ಸಾಮಿ, 6 ತಿಂಗಳಲ್ಲಿ 120 ಕೆಜಿ ತೂಕ ಇಳಿಸಿಕೊಂಡಿದ್ದಾರೆ ಎಂದು ಒಂದು ಸಂದರ್ಶನದಲ್ಲಿ ಹೇಳಿದ್ದಾರೆ.

ವಿಶ್ವಾದ್ಯಂತ ಅಸಂಖ್ಯಾತ ಅಭಿಮಾನಿಗಳನ್ನು ಹೊಂದಿರುವವರು ಗಾಯಕ ಅದ್ನಾನ್‌ ಸಾಮಿ. ಒಂದು ಕಾಲದಲ್ಲಿ ಯುವಜನರಲ್ಲಿ ಅವರ ಹಾಡುಗಳು ಬಹಳ ಜನಪ್ರಿಯವಾಗಿದ್ದವು. ಪ್ರೀತಿ, ವಿರಹ, ದುಃಖ, ಸಂತೋಷ ಹೀಗೆ ಯಾವುದೇ ಮನಸ್ಥಿತಿಯಲ್ಲೂ ಅವರ ಧ್ವನಿಯಲ್ಲಿ ಹಾಡುಗಳನ್ನು ಕೇಳುವುದು ಒಂದು ವಿಶಿಷ್ಟ ಅನುಭವ ಎಂದು ಎಲ್ಲರೂ ಹೇಳುತ್ತಾರೆ. ಆಗ ಅವರು ಹಾಡಿದ ಮತ್ತು ನಟಿಸಿದ ಹಾಡುಗಳು ಬಹಳ ಜನಪ್ರಿಯವಾದವು. ಇಂದಿಗೂ ಆ ಖ್ಯಾತಿಗೆ ಕೊರತೆಯಿಲ್ಲ.

ಸಿಕ್ಕಾಪಟ್ಟೆ ದಪ್ಪ ಇದ್ದ ಅದ್ನಾನ್‌ ಸಾಮಿ ಅವರನ್ನು ಹಲವು ಬಾರಿ ಬೊಜ್ಜುತನಕ್ಕಾಗಿ ಟೀಕಿಸಲಾಗಿತ್ತು. 230 ಕೆಜಿ ತೂಕ ಹೊಂದಿದ್ದ ಅವರು ಹೇಗೆ ತೂಕ ಇಳಿಸಿಕೊಂಡರು ಎಂಬುದನ್ನು ಅವರೇ ಒಂದು ಸಂದರ್ಶನದಲ್ಲಿ ಹೇಳಿದ್ದಾರೆ. 'ಆಪ್ ಕಿ ಅದಾಲತ್' ಎಂಬ ಟಿವಿ ಕಾರ್ಯಕ್ರಮದಲ್ಲಿ ಅವರು ಇದರ ಬಗ್ಗೆ ಮಾತನಾಡಿದ್ದಾರೆ. 2006 ರಲ್ಲಿ ತಮ್ಮ ತೂಕವನ್ನು ಕಡಿಮೆ ಮಾಡಲು ಸಿದ್ಧರಾದಾಗ ತಮ್ಮ ತಂದೆಗೆ ಪ್ಯಾಂಕ್ರಿಯಾಟಿಕ್ ಕ್ಯಾನ್ಸರ್ ಇತ್ತು ಎಂದು ಅದ್ನಾನ್‌ ಸಾಮಿ ನೆನಪಿಸಿಕೊಂಡರು.

ಅಡ್ನಾನ್ ಸಾಮಿ ತೂಕ ಇಳಿಸಿದ್ದು ಹೇಗೆ?

'ಒಮ್ಮೆ ಅವರು ನನ್ನನ್ನು ಲಂಡನ್‌ನಲ್ಲಿರುವ ಆಸ್ಪತ್ರೆಗೆ ಕರೆದೊಯ್ದರು. ನಿಮ್ಮ ಪರೀಕ್ಷೆಯ ಫಲಿತಾಂಶಗಳು ಎಲ್ಲವೂ ಬಾರ್ಡರ್‌ ಲೈನ್‌ನಲ್ಲಿವೆ. ಈ ಜೀವನಶೈಲಿಯನ್ನು ಮುಂದುವರಿಸಿದರೆ, ಆರು ತಿಂಗಳ ನಂತರ ನಿಮ್ಮ ಹೆತ್ತವರು ಹೋಟೆಲ್ ಕೋಣೆಯಲ್ಲಿ ನಿಮ್ಮನ್ನು ಸತ್ತ ಸ್ಥಿತಿಯಲ್ಲಿ ಕಾಣುತ್ತಾರೆ' ಎಂದು ವೈದ್ಯರು ಹೇಳಿದರು. ವೈದ್ಯರ ಆ ಮಾತುಗಳು ತಮಗೆ ಆಘಾತ ತಂದವು ಎಂದು ಅವರು ಹೇಳಿದ್ದಾರೆ.

"ಆ ದಿನ ಸಂಜೆ ನೇರವಾಗಿ ಬೇಕರಿಗೆ ಹೋದೆ. ಪೇಸ್ಟ್ರಿಗಳನ್ನು ಖರೀದಿಸಿದೆ. ಅಪ್ಪನಿಗೆ ಕೋಪ ಬಂತು. ಅಳು ಕೂಡ ಬಂತು. ಆ ರಾತ್ರಿ ಅಪ್ಪ, 'ಮಗನೇ.. ನಿನ್ನ ದೇಹವನ್ನು ನಾನೇ ಸಮಾಧಿಯಲ್ಲಿ ಇಡುವಂತೆ ಮಾಡಬೇಡ. ನೀನು ನನ್ನ ದೇಹವನ್ನು ಸಮಾಧಿಯಲ್ಲಿ ಇಡಬೇಕು' ಎಂದು ಅಳುತ್ತಾ ಹೇಳಿದರು. ಆ ಕ್ಷಣದಿಂದ ತೂಕ ಇಳಿಸಿಕೊಳ್ಳಲು ನಿರ್ಧರಿಸಿದೆ. ಆರು ತಿಂಗಳಲ್ಲಿ 120 ಕೆಜಿ ತೂಕ ಇಳಿಸಿಕೊಂಡೆ. ಯಾವುದೇ ಶಸ್ತ್ರಚಿಕಿತ್ಸೆ ಮಾಡಿಸಿಕೊಂಡಿಲ್ಲ. ಬದಲಾಗಿ, ಪೌಷ್ಟಿಕತಜ್ಞರು ನನಗಾಗಿ ಆಹಾರ ಪಟ್ಟಿಯನ್ನು ತಯಾರಿಸಿದರು. ನಾನು ತೂಕ ಇಳಿಸಿಕೊಳ್ಳಲು ಪ್ರಾರಂಭಿಸಿದೆ. ಸಕ್ಕರೆ, ಮದ್ಯ, ಅಕ್ಕಿ, ರೊಟ್ಟಿ, ಎಣ್ಣೆಯನ್ನು ತ್ಯಜಿಸಿದೆ", ಎಂದು ಅದ್ನಾನ್‌ ಸಾಮಿ ಹೇಳಿದರು.

ಅವರ ಈ ಸಂದರ್ಶನ ಇಂಟರ್ನೆಟ್‌ನಲ್ಲಿ ವೈರಲ್ ಆಗುತ್ತಿದೆ. ಅವರು ನೈಸರ್ಗಿಕವಾಗಿ ತೂಕ ಇಳಿಸಿಕೊಂಡಿದ್ದಾರೆ ಎಂದು ಹೇಳುವುದನ್ನು ಅನೇಕರು ನಿರಾಕರಿಸುತ್ತಾರೆ. 6 ತಿಂಗಳಲ್ಲಿ 120 ಕೆಜಿ ತೂಕ ಇಳಿಸಿಕೊಳ್ಳಲು ಸಾಧ್ಯವಿಲ್ಲ, ಅವರು ಬೇರೆ ಯಾವುದಾದರೂ ಚಿಕಿತ್ಸೆ ಪಡೆದಿರಬಹುದು ಅಥವಾ ಔಷಧಿಗಳನ್ನು ಸೇವಿಸಿರಬಹುದು ಎಂದು ಹೇಳುತ್ತಿದ್ದಾರೆ.