ಸನ್ನಿ ಡಿಯೋಲ್ ವಿರುದ್ಧ ನಿರ್ಮಾಪಕ ಸುನೀಲ್ ದರ್ಶನ್ ಗಂಭೀರ ಆರೋಪ ಮಾಡಿದ್ದು, ಸನ್ನಿ ಅವರು 2 ಕೋಟಿ ರೂಪಾಯಿ ವಂಚಿಸಿರುವುದಾಗಿ ಹೇಳಿದ್ದಾರೆ. ಏನಿದು ಘಟನೆ?
ನಟ ಸನ್ನಿ ಡಿಯೋಲ್ (Sunny Deol) ಸದ್ಯ ಗದರ್-2 ಖುಷಿಯಲ್ಲಿದ್ದಾರೆ. ಹಲವು ಫ್ಲಾಪ್ ಚಿತ್ರಗಳ ಬಳಿಕ ಗದರ್ ಬ್ಲಾಕ್ಬಸ್ಟರ್ ಎಂದು ಸಾಬೀತಾಗಿದೆ. ಆದರೆ ಇದರ ಬೆನ್ನಲ್ಲೇ ಬಾಲಿವುಡ್ನ ಖ್ಯಾತ ಚಿತ್ರ ನಿರ್ಮಾಪಕ ಸುನೀಲ್ ದರ್ಶನ್ ಅವರು ಸನ್ನಿ ಡಿಯೋಲ್ ಎರಡು ಕೋಟಿ ರೂಪಾಯಿ ವಂಚಿಸಿದ್ದಾರೆ ಎಂದು ಆರೋಪಿಸಿದ್ದಾರೆ. ತಾವು ಈ ಪ್ರಕರಣಕ್ಕಾಗಿ ಕಳೆದ 27 ವರ್ಷಗಳಿಂದ ಹೋರಾಟ ನಡೆಸುತ್ತಿರುವುದಾಗಿ ಅವರು ಹೇಳಿದ್ದಾರೆ. 1996ರ ಪ್ರಕರಣ ಇದಾಗಿದ್ದು, ಅಲ್ಲಿಂದ ಇಲ್ಲಿಯವರೆಗೂ ಹೋರಾಟ ಮಾಡುತ್ತಿರುವುದಾಗಿ ಹೇಳಿದ್ದಾರೆ. ಈ ಕುರಿತು ಮಾಹಿತಿ ನೀಡಿರುವ ಸುನೀಲ್ ದರ್ಶನ್, ಇದು ಸುಮಾರು 1996 ರ ಸಮಯ, ಸನ್ನಿ ಅಂತರರಾಷ್ಟ್ರೀಯ ಚಲನಚಿತ್ರ ವಿತರಣಾ ಕಂಪನಿಯನ್ನು ತೆರೆಯಲು ಬಯಸಿದ್ದರು. ಇದಕ್ಕೆ ನಾನು ಸಹಾಯ ಮಾಡಿದ್ದೆ. ಸಮಯ ಕಳೆದರೂ ಸನ್ನಿ ಹಣ ಹಿಂತಿರುಗಿಸಿರಲಿಲ್ಲ. ಸನ್ನಿ ತಮಗಾಗಿ ಸಾಕಷ್ಟು ಆಸ್ತಿ ಮಾಡಿದ್ದಾರೆ, ಆದರೆ ನನಗೆ ಹಣ ನೀಡಲು ಮರೆತಿದ್ದಾರೆ ಎಂದು ಸುನಿಲ್ ಆರೋಪಿಸಿದ್ದಾರೆ. ದೈನಿಕ್ ಭಾಸ್ಕರ್ ಪತ್ರಿಕೆಗೆ ಅವರು ಈ ವಿಶೇಷ ಸಂದರ್ಶನ ನೀಡಿದ್ದಾರೆ. ಘಟನೆಯನ್ನು ವಿವರಿಸಿದ ಸುನೀಲ್ ಅವರು, 1996 ರಲ್ಲಿ, 'ಅಜಯ್' ಚಿತ್ರದ ಶೂಟಿಂಗ್ ಮುಗಿಯುವ ಹಂತದಲ್ಲಿದ್ದಾಗ, ಸನ್ನಿ ಡಿಯೋಲ್ ಅವರ ಹುಟ್ಟುಹಬ್ಬದಂದು ನನ್ನಲ್ಲಿ ವಿನಂತಿಯನ್ನು ಮಾಡಿದರು. ಆ ಸಮಯದಲ್ಲಿ ಅವರು ಅಂತರರಾಷ್ಟ್ರೀಯ ಚಲನಚಿತ್ರ ವಿತರಣಾ ಕಂಪನಿಯನ್ನು ತೆರೆಯಲು ಬಯಸಿದ್ದರು. ‘ಅಜಯ್’ ಚಿತ್ರದ ವಿದೇಶೀ ವಿತರಣೆ ಹಕ್ಕುಗಳನ್ನು ನನ್ನ ಬಳಿ ಕೇಳಿದ್ದರು ಎಂದಿದ್ದಾರೆ.
ಮತ್ತಷ್ಟು ಈ ಬಗ್ಗೆ ವಿವರಿಸಿದ ಸುನೀಲ್ ಅವರು, ಹಣವನ್ನು ನನ್ನ ಬಳಿ ಪಡೆದ ಬಳಿಕ ಪೂರ್ಣ ಹಣ ನೀಡುವುದಾಗಿ ಭರವಸೆ ನೀಡಿದ್ದರು. ಚಿತ್ರ ಪೂರ್ಣಗೊಂಡಿತು. ಕೆಲವು ದಿನಗಳ ನಂತರ ಸನ್ನಿ ಹಣ ಹೊಂದಿಸಲು ಲಂಡನ್‌ಗೆ ಹೋಗುವುದಾಗಿ ಹೇಳಿದರು. ಹಣ ಹೊಂದಿಸಿಕೊಟ್ಟ ತಕ್ಷಣ ನನ್ನಿಂದಲೇ ಚಿತ್ರದ ಪ್ರಿಂಟ್ ಖರೀದಿಸಿದರು. ಅವರು ನೋಂದಣಿಗಾಗಿ ಕೆಲವು ಕಾಗದ ಪತ್ರಗಳನ್ನು ಕೇಳಿದರು. ಅವರನ್ನು ನಂಬಿ ನಾನು ಸಹಿ ಮಾಡಿ ಆ ಕಾಗದಗಳನ್ನು ಕೊಟ್ಟೆ. ಅವರ ವ್ಯಕ್ತಿ ಪ್ರಿಂಟ್ ಡೆಲಿವರಿ ತೆಗೆದುಕೊಳ್ಳಲು ಬಂದರು. ಆದರೆ ಹಣವನ್ನು ತಂದಿರಲಿಲ್ಲ. ನಾನು ಗಾಬರಿಯಾದೆ. ಕ್ರಿಸ್‌ಮಸ್ ರಜೆಯಲ್ಲಿ ಲಂಡನ್‌ನಲ್ಲಿ ಬ್ಯಾಂಕ್‌ಗಳು ಮುಚ್ಚಿರುವುದರಿಂದ ಹಣ ಹೊಂದಿಸಲು ಸಾಧ್ಯವಾಗುತ್ತಿಲ್ಲ ಎಂದು ಸನ್ನಿ ಫೋನ್‌ನಲ್ಲಿ ಹೇಳಿದರು. ನಾನು ಅವರನ್ನು ನಂಬಿ ಪ್ರಿಂಟ್ ಕೊಟ್ಟೆ. ಇದಾದ ನಂತರ ಸನ್ನಿ ತಮ್ಮ ನೈಜ ಮುಖವನ್ನು ತೋರಿಸತೊಡಗಿದರು ಎಂದು ಅವರು ಆರೋಪಿಸಿದ್ದಾರೆ.
ಕೆಜಿಎಫ್-2 ದಾಖಲೆಯನ್ನೂ ಪುಡಿ ಮಾಡ್ತು ಪಾಕ್ ಕಹಾನಿ ಗದರ್-2: ಕಲೆಕ್ಷನ್ ಎಷ್ಟು ಗೊತ್ತಾ?
'ನಾನು ಹಲವು ತಿಂಗಳುಗಳಿಂದ ಸನ್ನಿಯಿಂದ ಹಣ ಕೇಳುತ್ತಿದ್ದೆ. ಕೆಲವೊಮ್ಮೆ ಅವರು ನನ್ನನ್ನು ಹೈದರಾಬಾದ್‌ಗೆ ಮತ್ತು ಕೆಲವೊಮ್ಮೆ ಜೈಪುರಕ್ಕೆ ಕರೆದರು. ಮುಂಬೈನ ಫಿಲ್ಮ್ ಸಿಟಿಯಲ್ಲಿ ಅವರು ತಮ್ಮ ಒಂದು ಚಿತ್ರದ ಚಿತ್ರೀಕರಣದಲ್ಲಿದ್ದರು. ನಾನು ಪ್ರತಿದಿನ ಅವನ ಸೆಟ್‌ಗೆ ಹೋಗುತ್ತಿದ್ದೆ. ಆದರೆ ಅವರು ಅಲ್ಲಿಯೂ ತಪ್ಪಿಸಿಕೊಳ್ಳುತ್ತಿದ್ದರು. ಅವರು ಜೈಪುರಕ್ಕೆ ಹೋದಾಗ, ಅವರು ತಮ್ಮ ವೈಯಕ್ತಿಕ ಸಮಸ್ಯೆಗಳನ್ನು ಉಲ್ಲೇಖಿಸಿ ಹಣವನ್ನು ಪಾವತಿಸುವುದನ್ನು ತಪ್ಪಿಸಿದರು. ನಂತರ ಒಂದು ದಿನ ಅವರು ನನ್ನೊಂದಿಗೆ ಮಾತನಾಡಿದರು. ಸದ್ಯ ಚಿತ್ರದ ಚಿತ್ರೀಕರಣದಲ್ಲಿ ತೊಡಗಿದ್ದು, ಅದರ ನಿರ್ಮಾಣಕ್ಕೆ ನನ್ನ ಸಹಾಯ ಬಯಸುವುದಾಗಿ ಸನ್ನಿ ಹೇಳಿದರು. ಈ ಚಿತ್ರ ಮುಗಿದ ತಕ್ಷಣ ನನ್ನ ಜೊತೆ ಸಿನಿಮಾ ಮಾಡ್ತೀನಿ, ಅದರಲ್ಲಿ ಹಣ ಅಡ್ಜಸ್ಟ್ ಆಗುತ್ತೆ ಎಂದರು. ಅವರ ಜೊತೆ ಎರಡು ಸಿನಿಮಾ ಮಾಡಿದ್ದೆ, ಇದನ್ನೂ ನಂಬಿದ್ದೆ. ಆರು ತಿಂಗಳು ಕಳೆದರೂ ಆ ವ್ಯಕ್ತಿ ಹಿಂತಿರುಗಲೇ ಇಲ್ಲ. ಸಿನಿಮಾ ಮಾಡಿಲ್ಲ, ಹಣವನ್ನೂ ಕೊಟ್ಟಿಲ್ಲ ಎಂದು ಸುನೀಲ್ ಆರೋಪಿಸಿದ್ದಾರೆ.
ಸುಮಾರು ನಾಲ್ಕು ವರ್ಷಗಳ ಕಾಲ ಸನ್ನಿ ಹಿಂದೆ ಓಡುತ್ತಲೇ ಇದ್ದೆ ಎಂದು ಸುನೀಲ್ ದರ್ಶನ್ (Sunil Darshan) ಹೇಳಿದ್ದಾರೆ. ಈ ಸಮಯದಲ್ಲಿ, ಸನ್ನಿ ಅವರ ಕೆಲವು ಚಿತ್ರಗಳು ವಿಫಲವಾದವು ಮತ್ತು ಕೆಲವು ಹಿಟ್ ಆಗಿದ್ದವು. ನಾನು ನನ್ನ ಹಕ್ಕುಗಳಿಗಾಗಿ ನ್ಯಾಯಾಲಯವನ್ನು ಸಂಪರ್ಕಿಸಿದೆ. ಕೋರ್ಟ್ ನಲ್ಲಿ ಸನ್ನಿ ವಾಪಸ್ ಕೊಡಲು ನನ್ನ ಬಳಿ ಹಣವಿಲ್ಲ ಎಂದರು. ಹಾಗಾಗಿ ನನ್ನ ಜೊತೆ ಸಿನಿಮಾ ಮಾಡುವ ಬಗ್ಗೆ ಮಾತನಾಡಿದ್ದಾರೆ. ಒಟ್ಟಾರೆ, ಮೊದಲ ದಿನದಿಂದ ಅವರ ಉದ್ದೇಶ ನನ್ನ ಹಣವನ್ನು ಹಿಂದಿರುಗಿಸುವುದಲ್ಲ ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಸುಮಾರು 27 ವರ್ಷಗಳಿಂದ ಹಣಕ್ಕಾಗಿ ನಾನು ಇನ್ನೂ ನ್ಯಾಯಾಲಯವನ್ನು ಸುತ್ತುತ್ತಿದ್ದೇನೆ. ಈ ವಿಷಯವನ್ನು ನಮ್ಮ ನಮ್ಮಲ್ಲೇ ಇತ್ಯರ್ಥಪಡಿಸಲು ನಾನು ಸಾಕಷ್ಟು ಪ್ರಯತ್ನಿಸಿದೆ, ಆದರೆ ಈ ವ್ಯಕ್ತಿ ನ್ಯಾಯಾಲಯದ ತೀರ್ಪನ್ನು ಸಹ ಒಪ್ಪಿಕೊಳ್ಳುತ್ತಿಲ್ಲ. ಹಣ ನೀಡುವ ಉದ್ದೇಶವಿಲ್ಲ ಎಂದಿದ್ದಾರೆ. ನಮ್ಮ ಸ್ಥಾಪಿತ ಮೊತ್ತ ಒಂದು ಕೋಟಿ 77 ಲಕ್ಷ 25 ಸಾವಿರ ರೂಪಾಯಿ. ಆದರೆ ಸನ್ನಿ ಅವರೇ ಈಗ ಸಾಕಷ್ಟು ಆಸ್ತಿ ಮಾಡಿದ್ದಾರೆ, ಆದರೆ ಜನರ ಹಣ ವಾಪಸ್ ಕೊಡುವುದನ್ನು ಮರೆತಿದ್ದಾರೆ. ಆದರೆ, ನನಗೆ ಕಾನೂನಿನ ಮೇಲೆ ನಂಬಿಕೆ ಇದೆ ಮತ್ತು ನನ್ನ ಹಣ ಖಂಡಿತಾ ಸಿಗುತ್ತದೆ ಎಂಬ ಭರವಸೆ ಇದೆ ಎಂದಿದ್ದಾರೆ.
ಎರಡು ಟಿಕೆಟ್ ಖರೀದಿಗೆ 'ಗದರ್-2' ತಂಡದಿಂದ ಭರ್ಜರಿ ಆಫರ್: ಡಿಟೇಲ್ಸ್ ಇಲ್ಲಿದೆ