ನಾನು ಸೀರೆ ಉಟ್ಟು ಸ್ವಿಮ್ಮಿಂಗ್ ಪೂಲ್‌ಗೆ ಜಿಗಿಬೇಕಿತ್ತಾ? ಚಿಕ್ಕಪ್ಪನಿಗೇ ಸವಾಲೆಸೆದ ಕರಿಷ್ಮಾಕಪೂರ್!

ಚಿತ್ರದ ಯಶಸ್ಸಿನ ಶ್ರೇಯವೆಲ್ಲ ತನಗೇ ಸಿಕ್ಕಿದ್ದಕ್ಕೆ ಸಹನಟ ಹರೀಶ್ ಅಸಮಾಧಾನಗೊಂಡಿದ್ದಾರೆ ಎಂಬ ವರದಿಗಳ ಬಗ್ಗೆಯೂ ಕರಿಷ್ಮಾ ಮಾತನಾಡಿದ್ದರು. ಅವರು ಪ್ರತಿಕ್ರಿಯಿಸಿದ್ದು..

ಅದು ಬಾಲಿವುಡ್‌ನ ಪ್ರತಿಷ್ಠಿತ ಕಪೂರ್ ಕುಟುಂಬ... ಇಲ್ಲಿ ಹುಡುಗಿಯರು ಬೆಳ್ಳಿತೆರೆಗೆ ಬರುವುದು ಒಂದು ಕಾಲದಲ್ಲಿ ನಿಷಿದ್ಧವಾಗಿತ್ತು. ಆದರೆ, ಈ ಕಟ್ಟುಪಾಡಿನ ಕೋಟೆಯನ್ನು ಭೇದಿಸಿ, ಹೊಸ ಇತಿಹಾಸ ಬರೆದವರೇ ಕರಿಷ್ಮಾ ಕಪೂರ್. ಚಿತ್ರರಂಗಕ್ಕೆ ಕಾಲಿಟ್ಟಿದ್ದಷ್ಟೇ ಅಲ್ಲ, ತಮ್ಮ ಮೊದಲ ಚಿತ್ರದಲ್ಲೇ ಈಜುಡುಗೆ (ಸ್ವಿಮ್‌ಸೂಟ್) ತೊಟ್ಟು ಸಂಪ್ರದಾಯವಾದಿಗಳ ಹುಬ್ಬೇರುವಂತೆ ಮಾಡಿದರು. ಈ ದಿಟ್ಟ ಹೆಜ್ಜೆ, ಮುಂದೆ ಅವರ ಸಹೋದರಿ ಕರೀನಾ ಕಪೂರ್‌ಗೆ ಚಿತ್ರರಂಗ ಪ್ರವೇಶಿಸಲು ದಾರಿ ಸುಗಮಗೊಳಿಸಿತು ಎಂದರೆ ತಪ್ಪಾಗಲಾರದು.

ಆದರೆ, ಕರಿಷ್ಮಾ ಅವರ ಈ ಬೋಲ್ಡ್ ನಡೆ ಎಲ್ಲರಿಗೂ ಇಷ್ಟವಾಗಿರಲಿಲ್ಲ ಎಂಬ ಮಾತುಗಳೂ ಇವೆ. ಇತ್ತೀಚೆಗೆ ರೆಡ್ಡಿಟ್‌ನಲ್ಲಿ ವೈರಲ್ ಆದ ಪೋಸ್ಟ್ ಒಂದರ ಪ್ರಕಾರ, ಕರಿಷ್ಮಾ ಅವರ ಚಿಕ್ಕಪ್ಪ, ಖ್ಯಾತ ನಟ ರಿಷಿ ಕಪೂರ್ ಅವರಿಗೆ, ತಮ್ಮ ಸೋದರ ಸೊಸೆ ಚೊಚ್ಚಲ ಚಿತ್ರ 'ಪ್ರೇಮ್ ಖೈದಿ'ಯಲ್ಲಿ ಸ್ವಿಮ್‌ಸೂಟ್ ಧರಿಸಿದ್ದು ಅಷ್ಟಾಗಿ ಸರಿ ಕಂಡಿರಲಿಲ್ಲವಂತೆ. ಈ ಬಗ್ಗೆ ಹಳೆಯ ಸಂದರ್ಶನವೊಂದರಲ್ಲಿ (ಸ್ಟಾರ್‌ಡಸ್ಟ್) ಕರಿಷ್ಮಾ ಖಾರವಾಗಿಯೇ ಪ್ರತಿಕ್ರಿಯಿಸಿದ್ದರು.

ರೆಡ್ಡಿಟ್ ಪೋಸ್ಟ್ ಉಲ್ಲೇಖಿಸಿರುವಂತೆ ಅವರು ಹೇಳಿದ್ದು ಹೀಗೆ:

'ಜನರು 'ಪ್ರೇಮ್ ಖೈದಿ' ನೋಡಿ ಥಿಯೇಟರ್‌ನಿಂದ ಹೊರಬಂದಾಗ ಯಾರಿಗೂ ಆ ಸ್ವಿಮ್ಮಿಂಗ್ ಕಾಸ್ಟ್ಯೂಮ್ ನೆನಪಿರಲಿಲ್ಲ. ಎಲ್ಲರೂ ನನ್ನ ನಟನೆಯ ಬಗ್ಗೆಯೇ ಮಾತನಾಡುತ್ತಿದ್ದರು. ನಿಜ ಹೇಳಬೇಕೆಂದರೆ, ನನ್ನ ಪೋಷಕರು ಏನು ಯೋಚಿಸುತ್ತಾರೆ ಎಂಬುದು ಮಾತ್ರ ನನಗೆ ಮುಖ್ಯ. ಅವರಿಗೇ ಆಕ್ಷೇಪಣೆ ಇಲ್ಲದಿದ್ದಾಗ, ಬೇರೆಯವರಿಗೇಕೆ ಇರಬೇಕು? ನಾನು ಸೀರೆ ಉಟ್ಟುಕೊಂಡು ಈಜುಕೊಳಕ್ಕೆ ಹಾರಬೇಕೆಂದು ಜನರು ಬಯಸಿದ್ದರೇ? ಅದೆಷ್ಟು ಮೂರ್ಖತನ.. ಅಲ್ಲದೆ, ಸ್ವಿಮ್‌ಸೂಟ್ ಧರಿಸುವುದರಲ್ಲಿ ತಪ್ಪೇನಿದೆ? ಬೇರೆ ಸಾಮಾನ್ಯ ಹದಿಹರೆಯದ ಹುಡುಗಿಯರು ಅದನ್ನು ಧರಿಸುವುದಿಲ್ಲವೇ?'

ಇದೇ ಸಂದರ್ಶನದಲ್ಲಿ, ಚಿತ್ರದ ಯಶಸ್ಸಿನ ಶ್ರೇಯವೆಲ್ಲ ತನಗೇ ಸಿಕ್ಕಿದ್ದಕ್ಕೆ ಸಹನಟ ಹರೀಶ್ ಅಸಮಾಧಾನಗೊಂಡಿದ್ದಾರೆ ಎಂಬ ವರದಿಗಳ ಬಗ್ಗೆಯೂ ಕರಿಷ್ಮಾ ಮಾತನಾಡಿದ್ದರು. ಅವರು ಪ್ರತಿಕ್ರಿಯಿಸಿದ್ದು ಹೀಗೆ:

'ಪ್ರೇಮ್ ಖೈದಿ' ನಿರ್ಮಾಪಕರಾದ ಡಿ. ರಾಮಾನಾಯ್ಡು ಅವರೇ, ಕರಿಷ್ಮಾ ಕಪೂರ್ ಈ ಚಿತ್ರದ ಹೀರೋ ಮತ್ತು ಹೀರೋಯಿನ್ ಎಂದು ಹೇಳಿದ್ದರು. ಅವರು ಹಾಗೆ ಹೇಳಿದರೆ ಅದು ನನ್ನ ತಪ್ಪೇ? ಎಲ್ಲಾ ಕ್ರೆಡಿಟ್ ನನಗೇ ಸಿಕ್ಕರೆ ಅದು ನನ್ನ ತಪ್ಪೇ? 'ಪ್ರೇಮ್ ಖೈದಿ' ಇಡೀ ತಂಡದ ಪರಿಶ್ರಮದ ಫಲ. ಹರೀಶ್ ಯಾಕೆ ಅಸಮಾಧಾನಗೊಳ್ಳಬೇಕು? ನನಗೆ ಹೆಚ್ಚು ಮೆಚ್ಚುಗೆ ಸಿಕ್ಕರೆ ನಾನೇನು ಮಾಡಲು ಸಾಧ್ಯ? ಹೌದು, 'ಪ್ರೇಮ್ ಖೈದಿ' ನನ್ನಿಂದಲೇ ಹಿಟ್ ಆಯಿತು ಎಂದು ನಾನು ಹೇಳಿದ್ದೆ. ಆದರೆ ಅದು ತಮಾಷೆಯಾಗಿ ಹೇಳಿದ ಮಾತು. ಜೊತೆಗೆ, ಚಿತ್ರರಂಗದ ಬೇರೆಯವರೂ ನನಗೆ ಹಾಗೆಯೇ ಹೇಳುತ್ತಿದ್ದರು. ಹಾಗಾಗಿ ಅದರಲ್ಲಿ ತಪ್ಪೇನಿದೆ?' ಎಂದು ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದರು.

ಎಲ್ಲಾ ವಿವಾದಗಳ ನಡುವೆಯೂ, 'ಪ್ರೇಮ್ ಖೈದಿ' ನಂತರ ಕರಿಷ್ಮಾ ಕಪೂರ್ ಹಿಂದಿರುಗಿ ನೋಡಿದ್ದೇ ಇಲ್ಲ. ತಮ್ಮ ಪ್ರತಿಭೆ, ಸೌಂದರ್ಯ ಮತ್ತು ದಿಟ್ಟತನದಿಂದ ಸಾಲು ಸಾಲು ಹಿಟ್ ಚಿತ್ರಗಳನ್ನು ನೀಡುತ್ತಾ, 90ರ ದಶಕದ ಅತ್ಯಂತ ಯಶಸ್ವಿ ಮತ್ತು ಬೇಡಿಕೆಯ ನಟಿಯರಲ್ಲಿ ಒಬ್ಬರಾಗಿ ಬಾಲಿವುಡ್‌ನಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದರು.