ದಿ ಕೇರಳ ಸ್ಟೋರಿಯ ಬಳಿಕವೀಗ ಕೇರಳ ಫೈಲ್ಸ್​: ವೇಶ್ಯೆ ಸುತ್ತ ಸುತ್ತುತ್ತೆ ಈ ಸಿನಿಮಾ...

ದಿ ಕೇರಳ ಫೈಲ್ಸ್ ಎಂಬ ಹೊಸ ವೆಬ್​ ಸೀರೀಸ್ ಶುರುವಾಗಿದ್ದು, ವೇಶ್ಯೆಯ ಕೊಲೆಯ ಸುತ್ತ ಇದೆ ಇದರ ಸ್ಟೋರಿ. ಏನಿದು ಹೊಸ ಸ್ಟೋರಿ?  

ಇಸ್ಲಾಂ ಯುವತಿಯನ್ನು ತನ್ನ ರೂಮ್​ಮೇಟ್ಸ್​ಗಳನ್ನು ಹೇಗೆ ಮತಾಂತರದ ಕುರಿತು ಬ್ರೇನ್​ವಾಷ್​ ಮಾಡಿ ಅವರ ಮನಸ್ಸನ್ನು ಪರಿವರ್ತನೆ ಮಾಡುತ್ತಾಳೆ ಎನ್ನುವ ನೈಜ ಘಟನೆಯುಳ್ಳ ದಿ ಕೇರಳ ಸ್ಟೋರಿ ಸಿನಿಮಾ ಸೃಷ್ಟಿಸಿದ ವಿವಾದ ಎಲ್ಲರಿಗೂ ತಿಳಿದದ್ದೇ. ಆಸೀಫಾ  ಎಂಬ ಯುವತಿ ರೂಮ್​ಮೇಟ್ಸ್​ ನರ್ಸಿಂಗ್​ ಕಲಿಯಲು ಪ್ರತಿಷ್ಠಿತ ಕಾಲೇಜಿಗೆ ಸೇರಿಕೊಂಡಿರೋ  ಶಾಲಿನಿ ಉನ್ನಿಕೃಷ್ಣನ್ (Shalini Unnikrishnan), ಗೀತಾಂಜಲಿ, ನಿಮ್ಹಾ ಮ್ಯಾಥ್ಯುಸ್. ಆಸೀಫಾ  ಈ  ಮೂವರು ಹುಡುಗಿಯರ ಬ್ರೇನ್ ವಾಷ್ ಹೇಗೆ ಮಾಡುತ್ತಾಳೆ, ಅವರ ಬದುಕನ್ನು  ವ್ಯವಸ್ಥಿತವಾಗಿ ಪ್ಲ್ಯಾನ್ ಮಾಡಿ ನಾಶ ಮಾಡುತ್ತಾಳೆ, ಐಸಿಸ್​ ಉಗ್ರ ಸಂಘಟನೆಗೆ ಸೇರಿಸುತ್ತಾಳೆ ಎಂಬ ಸತ್ಯ ಘಟನೆಯನ್ನು ಈ ಚಿತ್ರ ಒಳಗೊಂಡಿದ್ದರೆ, ಈಗ ಅದೇ ಹೆಸರಿನ ಇನ್ನೊಂದು ವೆಬ್​ಸೀರೀಸ್​ ಶೀಘ್ರದಲ್ಲಿ ಶುರುವಾಗಲಿದೆ. ಆದರೆ ಇದು ದಿ ಕೇರಳ ಸ್ಟೋರಿಯ ರೀತಿಯ ಕಥೆಯಲ್ಲ, ಇದರ ಹೆಸರು ದಿ ಕೇರಳ ಫೈಲ್ಸ್​. ಇದು ವೇಶ್ಯೆಯೊಬ್ಬಳ ಸುತ್ತ ಸುತ್ತುವ ಕಥೆಯಾಗಿದೆ.

ಹೌದು. ದಿ ಕೇರಳ ಎಂದಾಕ್ಷಣ ಕೇರಳ ಸ್ಟೋರಿಯೇ (The Kerala Story) ನೆನಪಾಗುತ್ತದೆ. ಅದೇ ರೀತಿ ಫೈಲ್ಸ್​ ಎಂದಾಕ್ಷಣ ಕಾಶ್ಮೀರಿ ಪಂಡಿತರನ್ನು ಹತ್ಯೆಗೈದಿದ್ದ ಅಮಾನುಷ ಕೃತ್ಯವನ್ನು ಬಿಂಬಿಸುವ ದಿ ಕಾಶ್ಮೀರಿ ಫೈಲ್ಸ್​ ನೆನಪಾಗುತ್ತದೆ. ಇವೆರಡು ಹೆಸರುಗಳ ಸಮ್ಮಿಶ್ರಣವುಳ್ಳ ವೆಬ್​ಸೀರೀಸ್​ ಒಂದು ಈಗ ಬಹಳ ಸದ್ದು ಮಾಡುತ್ತಿದೆ. ಅದೇ ದಿ ಕೇರಳ ಫೈಲ್ಸ್​.  ಆದರೆ ಇದು ದಿ ಕೇರಳ ಸ್ಟೋರಿಯ ಕಥಾಹಂದರವನ್ನೂ ಹೊಂದಿಲ್ಲ, ಕಾಶ್ಮೀರಿ ಫೈಲ್ಸ್​ ಕಥೆಯೂ ಇದರಲ್ಲಿ ಇಲ್ಲ. ಇದರಲ್ಲಿ ಇರುವ ಅಂಶವೇ ಬೇರೆ.

ಅದೇನೆಂದರೆ, ದಿ ಕೇರಳ ಫೈಲ್ಸ್​ (Kerala Crime Files) ಸುತ್ತುವುದು ವೇಶ್ಯೆಯ ಸುತ್ತ. ಆಕೆಯ ಕೊಲೆಯ ಸುತ್ತ. ಹೌದು. ಲಾಡ್ಜ್ ಒಂದರಲ್ಲಿ ವೇಶ್ಯೆ ಒಬ್ಬಳ ಕೊಲೆ ಆಗುತ್ತದೆ. ಆ ಲಾಡ್ಜ್​ನ ಬಾತ್​ರೂಂನಲ್ಲಿ ಆಕೆಯ ಹೆಣ ಸಿಗುತ್ತದೆ. ಯಾರು ಈ ವೇಶ್ಯೆ, ಆಕೆಯ ಕೊಲೆ ಆದದ್ದು ಹೇಗೆ ಎಂಬ ಕಥಾ ಹಂದರವನ್ನು ದಿ ಕೇರಳ ಫೈಲ್ಸ್​ ಹೊಂದಿದೆ. ಆರಂಭದಲ್ಲಿ ವೇಶ್ಯೆಯ ಕೊಲೆ ಆಗುವುದರಿಂದಲೇ  ಕಥೆ ಆರಂಭಗೊಳ್ಳುತ್ತದೆ. ಇದನ್ನು ನೋಡಿದ ಲಾಡ್ಜ್​ ರಿಸೆಪ್ಶನಿಸ್ಟ್ ಪೊಲೀಸರಿಗೆ ಮಾಹಿತಿ ನೀಡುತ್ತಾನೆ.  ಈ ಕೊಲೆಯ ಹಿಂದಿನ ಕಾರಣ ಏನು? ಕೊಲೆಗಾರ ಹೇಗೆ ತಪ್ಪಿಸಿಕೊಳ್ಳುತ್ತಾನೆ? ಪೊಲೀಸರು ಹೇಗೆಲ್ಲ ಕಷ್ಟಪಡುತ್ತಾರೆ ಅನ್ನೋದು ಈ ಸೀರಿಸ್​ನಲ್ಲಿದೆ.  ಈ ಕೊಲೆಯ ಹಿಂದಿನ ಕಾರಣದ ಬಗ್ಗೆ ವಿವರವಾಗಿ ಇದರಲ್ಲಿ ತೋರಿಸಲಾಗಿದ್ದು, ಈ ವೆಬ್​ಸೀರಿಸ್​ ಥ್ರಿಲ್ಲರ್​ ಎನಿಸುತ್ತದೆ.

ಸಾಮಾನ್ಯವಾಗಿ ವೆಬ್ ಸೀರಿಸ್ ಎಂದಾಗ ಹತ್ತಾರು ಎಪಿಸೋಡ್ ಇರುತ್ತವೆ. ಪ್ರತಿ ಎಪಿಸೋಡ್ ಅವಧಿ ಮುಕ್ಕಾಲು ಗಂಟೆ ಅಥವಾ ಒಂದು ಗಂಟೆಯನ್ನೂ ಮೀರಿರುತ್ತದೆ. ಆದರೆ, ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್​ನಲ್ಲಿ (Disney plus Hot Star) ಕಾಣಿಸಿಕೊಳ್ಳಲಿರುವ ‘ದಿ ಕೇರಳ ಫೈಲ್ಸ್’  ಹಾಗಲ್ಲ. ಇಲ್ಲಿ ಇರೋದು  ಆರು ಎಪಿಸೋಡ್​ಗಳು ಮಾತ್ರ. ಪ್ರತೀ ಎಪಿಸೋಡ್​ನ ಅವಧಿ ಅರ್ಧ ಗಂಟೆ.  ಸಸ್ಪೆನ್ಸ್ ಜೊತೆ ಭಾವನಾತ್ಮಕ ವಿಚಾರಗಳನ್ನು ಕೂಡ ಸೇರಿಸಲಾಗಿದೆ ಎಂದಿದೆ ಚಿತ್ರ ತಂಡ.  

ಅಂದಹಾಗೆ ಇದು ಮೂಲ ಮಲಯಾಳ (Malayalam) ಭಾಷೆಯ ವೆಬ್ ಸೀರಿಸ್ ಆಗಿದೆ. ಉಳಿದ ಭಾಷೆಗಳಿಗೆ ಹೋಲಿಕೆ ಮಾಡಿದರೆ ಮಲಯಾಳಂನಲ್ಲಿ ವೆಬ್ ಸೀರಿಸ್​​ಗಳು ಕಡಿಮೆಯೇ. ಆದರೂ ಇದೀಗ ಭಾರಿ ಸದ್ದು ಮಾಡುತ್ತಿದೆ. ಈ ಸೀರಿಸ್ ಜೂನ್​ 23ರಂದು ರಿಲೀಸ್ ಆಗಿದ್ದು,  ಇದೀಗ  ಕನ್ನಡ, ತೆಲುಗು ಮೊದಲಾದ ಭಾಷೆಗಳಲ್ಲೂ ಡಬ್​ ಮಾಡಲಾಗಿದೆ.  ‘ಕೇರಳ ಕ್ರೈಮ್ ಫೈಲ್ಸ್​’ ಸೀರಿಸ್​ನಲ್ಲಿ ಅಜು ವರ್ಗೀಸ್ ಅವರು ಮುಖ್ಯ ಪಾತ್ರದಲ್ಲಿ  ಕಾಣಿಸಿಕೊಂಡಿದ್ದಾರೆ. ಇತರ ತಾರಾ ಬಳಗವೆಂದರೆ, ಲಾಲ್, ಶ್ರೀಜಿತ್ ಮಹದೇವನ್ ಮುಂತಾದವರು. ಹೇಷಮ್ ಅಬ್ದುಲ್ ವಹಾಬ್ ಅವರು ಈ ಸೀರಿಸ್​ಗೆ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಹಿನ್ನೆಲೆ ಸಂಗೀತದ ಮೂಲಕ ಅವರು ಹೆಚ್ಚು ಅಂಕ ಗಿಟ್ಟಿಸಿಕೊಳ್ಳುತ್ತಾರೆ.  ಅಹ್ಮದ್ ಕಬೀರ್ ಅವರು ಇದನ್ನು ನಿರ್ದೇಶನ ಮಾಡಿದ್ದಾರೆ. ಯಾವುದೇ ಹೆಚ್ಚಿನ ಡ್ರಾಮಾಗೆ ಜಾಗ ನೀಡದೇ ಸೀರಿಸ್ ರಚಿಸಿದ್ದಾರೆ.