ಬೈದುಕೊಳ್ಳುತ್ತಲೇ ಬಿಗ್​ಬಾಸ್​ ನಂ.1 ಸ್ಥಾನಕ್ಕೇರಿಸಿದ ಪ್ರೇಕ್ಷಕರು: ಕಿಚ್ಚ ಸುದೀಪ್​ ಪೋಸ್ಟ್​ ವೈರಲ್​!

ಬಿಗ್​ಬಾಸ್​ ಕನ್ನಡ 10 ಟಿಆರ್​ಪಿಯಲ್ಲಿ ನಂಬರ್​ 1 ಸ್ಥಾನ ಪಡೆದಿದೆ. ಈ ಖುಷಿಯಲ್ಲಿ ಕಿಚ್ಚ ಸುದೀಪ್​ ಇನ್​ಸ್ಟಾಗ್ರಾಮ್​ನಲ್ಲಿ ತಿಳಿಸಿದ್ದಾರೆ.   

ಬಿಗ್​ಬಾಸ್​ ಕನ್ನಡ ಶುರುವಾಗಿ ಎರಡನೆಯ ತಿಂಗಳಿಗೆ ಕಾಲಿಟ್ಟಿದೆ. ಬಿಗ್​ ಬಾಸ್​ ಎಂದ ಮೇಲೆ ಭಾಷೆ ಯಾವುದೇ ಆಗಿರಲಿ, ಅಲ್ಲಿ ಪ್ರೀತಿ-ಪ್ರೇಮ ಒಂದಿಷ್ಟು ಅಶ್ಲೀಲ ಎಲ್ಲವೂ ಕಾಮನ್​ ಆಗಿವೆ. ಕೆಲವೊಮ್ಮೆ ಇದು ಸ್ಕ್ರಿಪ್ಟೆಡ್​ ಎಂದೂ ಬಿಗ್​ಬಾಸ್​ ಮನೆಯಿಂದ ಹೊರಕ್ಕೆ ಬಂದವರು ಹೇಳುವುದು ಇದೆ. ಪ್ರೀತಿ ಪ್ರೇಮ ಎಲ್ಲಾ ಇಲ್ಲದೇ ಹೋದರೆ ಬಿಗ್​ಬಾಸ್​ ವೀಕ್ಷಕರನ್ನು ಹಿಡಿದಿಟ್ಟುಕೊಳ್ಳುವುದು ಸಹಜ ಎನ್ನುವ ಕಾರಣಕ್ಕೆ ಲವ್​, ಜಗಳ, ಒಂದಿಷ್ಟು ವಿವಾದ, ಮನೆಯವರನ್ನು ನೆನೆದು ಕಣ್ಣೀರು ಹಾಕುವುದು... ಎಲ್ಲವನ್ನೂ ಮೊದಲೇ ಸ್ಕ್ರಿಪ್ಟ್​ ಮಾಡಿ ಕೊಡಲಾಗುತ್ತದೆ ಎಂದೂ ಹೇಳಲಾಗುತ್ತದೆ.  ಆರೋಪಗಳು ಏನೇ ಇರಲಿ, ಒಟ್ಟಿನಲ್ಲಿ ಬೈದುಕೊಳ್ಳುತ್ತಲೇ ಇವುಗಳನ್ನು ಎಂಜಾಯ್​ ಮಾಡುವ ದೊಡ್ಡ ವರ್ಗವೇ ಇದೆ.  ಸಾಮಾಜಿಕ ಜಾಲತಾಣದಲ್ಲಿ ಈ ರಿಯಾಲಿಟಿ ಷೋ ಬಗ್ಗೆ ಅಸಹ್ಯ ಎಂದು ಕಮೆಂಟ್​  ಮಾಡುವವರಿಗೇನೂ ಕಮ್ಮಿ ಇಲ್ಲ. ಇದರ ವಿರುದ್ಧ ದಿನವೂ ಸಾಕಷ್ಟು ಪೋಸ್ಟ್​ಗಳು ಶೇರ್​ ಆಗುತ್ತಲೇ ಇರುತ್ತವೆ. ಇದೊಂದು ಅತ್ಯಂತ ಕಳಪೆ ಷೋ ಎಂದು ಬೈಯುವ ದೊಡ್ಡ ವರ್ಗವೇ ಇದೆ. ಆದರೆ ಅಸಲಿಯತ್ತು ಏನೆಂದರೆ ಹೀಗೆ ಬೈದುಕೊಳ್ಳಲಾದರೂ ಇವರಿಗೆ ಈ ಷೋ ನೋಡಬೇಕು!

ಹೌದು. ಅದು ಈಗ ಮತ್ತೊಮ್ಮೆ ಸಾಬೀತಾಗಿದೆ. ಸಾಮಾನ್ಯವಾಗಿ ಧಾರಾವಾಹಿ ಪ್ರಿಯರು ದಿನವೂ ಅದನ್ನು ಬೈಯುತ್ತಲೇ ಇರುತ್ತದೆ. ಚ್ಯೂಯಿಂಗ್​ ಗಮ್​ನಂತೆ ಎಳೆಯುತ್ತಾರೆ. ಅಕ್ರಮ ಸಂಬಂಧ, ಅತಿಯಾದ ನಡವಳಿಕೆ... ಇತ್ಯಾದಿ ಇತ್ಯಾದಿ ಆರೋಪ ಮಾಡುತ್ತಲೇ ಒಂದು ದಿನವೂ ಮಿಸ್​ ಮಾಡಿಕೊಳ್ಳದೇ ನೋಡುತ್ತಾರೆ. ಒಂದು ದಿನ ಅಕಸ್ಮಾತ್ತಾಗಿ ಯಾವುದೋ ಕಾರಣಕ್ಕೆ ಧಾರಾವಾಹಿ ಮಿಸ್​ ಆಗಿಬಿಟ್ಟರೆ ಏನನ್ನೋ ಕಳೆದುಕೊಂಡ ಅನುಭವ. ಅದೇ ರೀತಿ ಬಿಗ್​ಬಾಸ್ ಕೂಡ. ಇಲ್ಲಿನ ಹುಚ್ಚಾಟಗಳನ್ನು ನೋಡಿ ಅದರಲ್ಲಿ ಮುಳುಗಿ ಹೋಗಿ ಖುಷಿ ಪಡುವವರೇ ಹೆಚ್ಚಿನವರು. ಇದೇ ಕಾರಣಕ್ಕೆ ದಿನದಿಂದ ದಿನಕ್ಕೆ ಬಿಗ್​ಬಾಸ್​ ಕನ್ನಡದ TRP ಜಾಸ್ತಿಯಾಗುತ್ತಲೇ ಸಾಗಿದೆ.

ಇದರ ಬಗ್ಗೆ ಇದೀಗ ಬಿಗ್​ಬಾಸ್​ ನಡೆಸಿಕೊಡುತ್ತಿರುವ ಕಿಚ್ಚ ಸುದೀಪ್​ ಪೋಸ್ಟ್​ ಮಾಡಿದ್ದು, ಅದು ವೈರಲ್​ ಆಗಿದೆ. ಬಿಗ್ ಬಾಸ್ ಮನೆಯಲ್ಲಿ ಕೇಳಿಸ್ತಿರೋ ಮಾತಿನ ಪಟಾಕಿಗಿಂತ ನಿಮ್ಮ ಚಪ್ಪಾಳೆ ಸೌಂಡೇ ಜೋರು ಎಂದು ಕಲರ್ಸ್​ ವಾಹಿನಿ ಇನ್​ಸ್ಟಾಗ್ರಾಮ್​ನಲ್ಲಿ ಫೋಟೋ ಶೇರ್​ ಮಾಡಿದೆ. ಇದರಲ್ಲಿ ಸುದೀಪ್​ ಅವರು ನಂ.1 ಪೋಸ್ಟ್​ ಹಿಡಿದು ನಿಂತಿದ್ದಾರೆ. ಅದರಲ್ಲಿ TVR 7.6 ಎಂದು ನಮೂದಿಸಲಾಗಿದೆ.  ಪ್ರೋಗ್ರಾಂ/ಚಾನೆಲ್‌ನ ಜನಪ್ರಿಯತೆಯನ್ನು ಅಳೆಯಲು TRP ಅನ್ನು ಬಳಸಲಾಗುತ್ತದೆ.  TVR  ಅನ್ನು ಜಾಹೀರಾತುದಾರರು ಹೆಚ್ಚು ವ್ಯಾಪಕವಾಗಿ ವೀಕ್ಷಿಸುವ  ಕಾರ್ಯಕ್ರಮವನ್ನು ಶೋಧಿಸಿ ಹೆಚ್ಚು ವೀಕ್ಷಿಸುವ ಕಾರ್ಯಕ್ರಮಗಳಿಗೆ ನೀಡುವ ಜಾಹೀರಾತಿನ ರೇಟ್​ ಫಿಕ್ಸ್​ ಮಾಡುತ್ತಾರೆ. ಇದರಲ್ಲಿ ಬಿಗ್​ಬಾಸ್​ ನಂಬರ್​ 1 ಆಗಿದೆ. 

ಅಷ್ಟಕ್ಕೂ ಬಹುತೇಕ ಎಲ್ಲಾ ಭಾಷೆಗಳಲ್ಲಿಯೂ ಬಿಗ್​ಬಾಸ್​ ನೋಡುವ ದೊಡ್ಡ ವರ್ಗವೇ ಇದೆ. ಇದೇ ಕಾರಣಕ್ಕೆ ಪ್ರತಿ ಸೀಸನ್​ನಲ್ಲಿಯೂ ಹೊಸತನವನ್ನು ಮಾಡುತ್ತಾರೆ. ಅದೇ ರೀತಿ ಕನ್ನಡದ ಬಿಗ್​ಬಾಸ್​ 10 ನಲ್ಲಿ ಕೂಡ ಹೊಸತನ ಇರಲಿದೆ ಎಂದು ಕಲರ್ಸ್​ ವಾಹಿನಿ ತಂಡ ಮತ್ತು ಸುದೀಪ್​ ಹೇಳಿದ್ದರು. ಹೊಸತನದ ಬಗ್ಗೆ ಆಯಾ ಪ್ರೇಕ್ಷಕರು ಬೇರೆ ಬೇರೆ ರೀತಿಯಲ್ಲಿ ಕಲ್ಪನೆ  ಮಾಡಿಕೊಳ್ಳಬಹುದಾದರೂ ಇದನ್ನು ನೋಡುವವರ ಸಂಖ್ಯೆ ಹೆಚ್ಚುತ್ತಿದೆ ಎನ್ನುವುದಕ್ಕೆ ಈ ಟಿಆರ್​ಪಿ ರೇಟ್​ ಸಾಕ್ಷಿಯಾಗಿದೆ.