ಏಷ್ಯನ್‌ ಈಜು ಕೂಟ: ರಾವತ್‌ ಮುಡಿಗೆ 4ನೇ ಚಿನ್ನ

ಬೆಂಗಳೂರಿನಲ್ಲಿ ನಡೆಯುತ್ತಿರುವ ಏಷ್ಯನ್ ಈಜುಕೂಟದ ಮೂರನೇ ದಿನವೂ ಭಾರತದ ಈಜುಪಟುಗಳು ಕಮಾಲ್ ಮಾಡಿದ್ದಾರೆ. ಭಾರತದ ತಾರಾ ಈಜುಪಟು ಕುಶಾಗ್ರ ರಾವತ್‌ 4 ಚಿನ್ನದ ಪದಕಗಳಿಗೆ ಕೊರಳೊಡ್ದಿದರು. ಈ ಕುರಿತಾದ ವರದಿ ಇಲ್ಲಿದೆ ನೋಡಿ....

ಬೆಂಗಳೂರು[ಸೆ.27]: ಭಾರತದ ತಾರಾ ಈಜುಪಟು ಕುಶಾಗ್ರ ರಾವತ್‌, ಇಲ್ಲಿ ನಡೆಯುತ್ತಿರುವ 10ನೇ ಏಷ್ಯನ್‌ ವಯೋ ವರ್ಗ ಈಜು ಚಾಂಪಿಯನ್‌ಶಿಪ್‌ನಲ್ಲಿ ಗುರು​ವಾರ 4ನೇ ಚಿನ್ನದ ಪದಕಕ್ಕೆ ಮುತ್ತಿಟ್ಟರು. 3ನೇ ದಿನವೂ ಭಾರತದ ಈಜುಪಟುಗಳ ಪದಕ ಬೇಟೆ ಮುಂದುವರಿಯಿತು. 

ರಾಜ್ಯದ ಶ್ರೀಹರಿ ನಟರಾಜ್‌ ಅವರ ರಾಷ್ಟ್ರೀಯ ಕೂಟ ದಾಖಲೆಯೊಂದಿಗೆ ಭಾರತದ ಸ್ಪರ್ಧಿಗಳು 4 ಚಿನ್ನ, 4 ಬೆಳ್ಳಿ, 4 ಕಂಚಿನೊಂದಿಗೆ 12 ಪದಕ ಜಯಿಸಿದರು. ಮೊದಲ ದಿನ 18, 2ನೇ ದಿನ 10 ಸೇರಿದಂತೆ ಒಟ್ಟಾರೆ 40 ಪದಕ ಗೆದ್ದಿರುವ ಭಾರತ ಪಟ್ಟಿಯಲ್ಲಿ 4ನೇ ಸ್ಥಾನ ಪಡೆ​ದಿದೆ.

ಪುರುಷರ 400 ಮೀ. ಫ್ರೀಸ್ಟೈಲ್‌ನಲ್ಲಿ ಕುಶಾಗ್ರ ರಾವತ್‌ 3 ನಿಮಿಷ 55.81 ಸೆ.ಗಳಲ್ಲಿ ಗುರಿ ಮುಟ್ಟಿ ಚಿನ್ನ ಗೆದ್ದರು. 200 ಮೀ. ಬಟರ್‌ಫ್ಲೈನಲ್ಲಿ ಸಾಜನ್‌ ಪ್ರಕಾಶ್‌ 2 ನಿಮಿಷ 00.38ಸೆ.ಗಳಲ್ಲಿ ಗುರಿ ಮುಟ್ಟಿ ಚಿನ್ನ ಜಯಿಸಿದರೆ, 100 ಮೀ. ಬ್ಯಾಕ್‌’ಸ್ಟ್ರೋಕ್’ನಲ್ಲಿ ಶ್ರೀಹರಿ ನಟರಾಜ್‌ 55.06 ಸೆ.ಗಳಲ್ಲಿ ಗುರಿ ಮುಟ್ಟಿ ದಾಖಲೆಯೊಂದಿಗೆ ಚಿನ್ನ ಗೆದ್ದರು. ಪುರು​ಷರ 4*100 ಮೀ. ಮೆಡ್ಲೆ ಸ್ಪರ್ಧೆ​ಯಲ್ಲಿ ಶ್ರೀಹರಿ, ಲಿಖಿತ್‌, ಸಾಜನ್‌ ಹಾಗೂ ವೀರ್‌ಧವಳ್‌ ಅವ​ರ​ನ್ನೊ​ಳ​ಗೊಂಡ ಭಾರತ ತಂಡ ಮೊದಲ ಸ್ಥಾನ ಪಡೆ​ಯಿತು. 100 ಮೀ. ಫ್ರೀಸ್ಟೈಲ್‌ನಲ್ಲಿ ವೀರ್‌ಧವಳ್‌ ಖಾಡೆ 50.68 ಸೆ. ಹಾಗೂ ಶ್ರೀಹರಿ ನಟರಾಜ್‌ 50.91 ಸೆ.ಗಳಲ್ಲಿ ಗುರಿ ತಲುಪಿ ಕ್ರಮವಾಗಿ ಬೆಳ್ಳಿ ಮತ್ತು ಕಂಚು ಗೆದ್ದರು.

ಮಹಿಳೆಯರ 400 ಮೀ. ಫ್ರೀಸ್ಟೈಲ್‌ನಲ್ಲಿ ಶಿವಾನಿ ಕಟಾರಿಯ 4 ನಿಮಿಷ 27.16 ಸೆ.ಗಳಲ್ಲಿ ಗುರಿ ತಲುಪಿ ಕಂಚು ಗೆದ್ದರೆ, 100 ಮೀ. ಬ್ಯಾಕ್‌’ಸ್ಟ್ರೋಕ್‌ನಲ್ಲಿ ಮಾನಾ ಪಟೇಲ್‌ 1 ನಿಮಿಷ 05.08 ಸೆ.ಗಳಲ್ಲಿ ಗುರಿ ತಲುಪಿ ಬೆಳ್ಳಿ ಜಯಿಸಿದರು. ಅಂಡರ್‌ 15-17 ಬಾಲಕರ 200 ಮೀ. ಬಟರ್‌ಫ್ಲೈನಲ್ಲಿ ಮ್ಯಾಥ್ಯೂ ತನೀಶ್‌ ಜಾಜ್‌ರ್‍ ಬೆಳ್ಳಿ, ಅಂಡರ್‌ 12-14 ಬಾಲಕರ 200 ಮೀ. ಬ್ಯಾಕ್‌’ಸ್ಟ್ರೋಕ್‌ನಲ್ಲಿ ದೇವನಾಶ್‌ ಪಾರ್ಮರ್‌ ಕಂಚು ಗಳಿ​ಸಿ​ದರು. ಬಾಲಕಿಯರ 200 ಮೀ. ಬ್ರೆಸ್ಟ್‌’ಸ್ಟ್ರೋಕ್‌ನಲ್ಲಿ ಅಪೇಕ್ಷಾ ಫರ್ನಾಂಡೀಸ್‌ ಕಂಚು ಗೆದ್ದರು.