ಸೋಮಾರಿಗಳಿಗೊಂದು ಸಿಹಿ ಸುದ್ದಿ, ಹಾಗಂತ ಶುದ್ಧ ಸೋಮಾರಿಗಳಾಗಬೇಡಿ!

ಅಬ್ಬಾ, ಒಮ್ಮೊಮ್ಮೆ ಸುಖಾ ಸುಮ್ಮನೆ ಕೂತು ಬಿಡಬೇಕು ಎನಿಸುತ್ತದೆ. ಬಿದ್ದುಕೊಂಡೇ ಇರೋಣವೆಂದು ಯೋಚಿಸುತ್ತೇವೆ. ಯಾವುದೇ ಕೆಲಸ ಮಾಡಲೂ ಮನಸ್ಸೇ ಬರುವುದಿಲ್ಲ. ಈ ರೀತಿ ಒಮ್ಮೊಮ್ಮೆ ಸೋಂಬೇರಿಗಳಾಗುವುದು ಒಳ್ಳೆಯದು, ಎಂದು ಸಂಶೋಧನೆಗಳು ದೃಢಪಟ್ಟಿವೆ.

ಫ್ಲೋರಿಡಾ ಗಲ್ಫ್ ಕೋಸ್ಟ್ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಈ ವಿಷಯದ ಬಗ್ಗೆ ಸಂಶೋಧನೆ ನಡೆಸಿದ್ದು, ಯಾರು ಹೆಚ್ಚು ಸೋಮಾರಿಗಳಾಗಿರುತ್ತಾರೋ, ಅವರು ಹೆಚ್ಚು ಹೆಚ್ಚು ಸಮಯವನ್ನು ಗಂಭೀರ ಚಿಂತನೆಯಲ್ಲಿ ಕಳೆಯುತ್ತಾರೆಂಬುದಾಗಿ ಹೇಳಿದೆ.  ಅವರ ಬುದ್ಧಿ ಶಕ್ತಿ ಸಾಮರ್ಥ್ಯ ಹೆಚ್ಚಿನ ಮಟ್ಟದಲ್ಲಿರುತ್ತದೆ. ಈ ವರದಿ ಹೇಳುವಂತೆ ದೈಹಿಕವಾಗಿ ಚಟುವಟಿಕೆಯಿಂದ ಇರುವವರು ಬುದ್ಧಿವಂತಿಕೆಯಲ್ಲಿ ಹಿಂದುಳಿದಿರುತ್ತಾರೆ. ಅವರು ಬಹು ಬೇಗನೇ ಬೇಸರಕ್ಕೆ ತುತ್ತಾಗುತ್ತಾರೆನ್ನಲಾಗಿದೆ.

ಸೋಮಾರಿಗಳಾಗಿ, ಟೆನ್ಷನ್ ಬಿಟ್ಹಾಕಿ...!

-ಸೋಮಾರಿಯಾಗಿರುವುದರಿಂದ ಆತಂಕ ದೂರವಾಗುತ್ತದೆ, ಸುಖಾಸುಮ್ಮನೆ ಕಾಡುವ ಚಿಂತೆ ದೂರವಾಗುತ್ತದೆ.

- ದೊಡ್ಡ ಕೆಲಸಗಳು ನಮ್ಮನ್ನು ಸೋಮಾರಿಗಳನ್ನಾಗಿ ಮಾಡುತ್ತದೆ. ಹಾಗಂತೆ ಕೆಲಸ ಮಾಡದೇ ಇರುವುದಿಲ್ಲ. ಅದೇ ಸಮಯದಲ್ಲಿ ಸಣ್ಣಪುಟ್ಟ ಕೆಲಸಗಳೂ ಆಗಿರುತ್ತವೆ.

-ಕೆಲ ಸಮಯಗಳಲ್ಲಿ ನಮ್ಮನ್ನು ನಾವು  ಆಳವಾದ ಸಮಸ್ಯೆಗಳ ಬಗ್ಗೆ ಚಿಂತಿಸುವಂತೆ ಈ ಸೋಮಾರಿತನ ಪ್ರೇರೆಪಿಸುತ್ತದೆ.

- ಕಡೇ ಕ್ಷಣದಲ್ಲಿ ಕೆಲಸ ಪೂರೈಸಲು ಮುಂದಾಗುವುದರಿಂದ, ಕೆಲವೊಮ್ಮೆ ಈಸಿ ಪರಿಹಾರವೂ ಹೊಳೆಯುವ ಸಾಧ್ಯತೆ ಇರುತ್ತದೆ.

- ಸೋಮಾರಿಗಳಿಗೆ ತಾಳ್ಮೆ ಹೆಚ್ಚು. 

- ತಲೆ ಬಿಸಿ ಇಲ್ಲದೆ ಸೋಮಾರಿಗಳು ಕೂಲ್ ಆಗಿರುವುದರಿಂದ ರಕ್ತದೊತ್ತಡದ ಸಮಸ್ಯೆ ಕಾಡುವುದಿಲ್ಲ. ಮಧುಮೇಹದಿಂದಲೂ ದೂರವಿರುತ್ತಾರೆ.

- ತಮ್ಮ ಕೆಲಸದಿಂದ ತಪ್ಪಿಸಿಕೊಳ್ಳಲು ಸದಾ ಕಾರಣಗಳನ್ನು ಹುಡುಕುತ್ತಿರುತ್ತಾರೆ. ಒಮ್ಮೊಮ್ಮೆ ರಚನಾತ್ಮಕ ಕಾರಣಗಳು ಅವರಿಗೆ ಹೊಳೆಯುತ್ತದೆ. ಇದರಿಂದ ಬೇಸರವೆಂದೂ ಸೋಂಬೇರಿಗಳಿಗೆ ಕಾಡುವುದಿಲ್ಲ.

ಹಾಗಂತ ಇದು ಆಗೊಮ್ಮೆ, ಈಗೊಮ್ಮೆ ಸೋಮಾರಿತನ ತೋರುವವರಿಗೆ ಮಾತ್ರ. ಸದಾ ಸೋಂಬೇರಿಗಳಾದವರಿಗೆ ಜೀವನದಲ್ಲಿ ಯಾವುದೇ ಯಶಸ್ಸೂ ಸಿಗುವುದಿಲ್ಲವೆಂಬುವುದು ನೆನಪಿರಲಿ.