ಗಾಜಿನ ಬಾಟಲಿ, ಕೋಲ್ಡ್ ಡ್ರಿಂಕ್ಸ್ , ಜ್ಯೂಸ್ ಬಾಟಲಿಯಲ್ಲಿ ಸೂಪರ್‌ ಫಾಸ್ಟ್ ಆಗಿ ಬೆಳೆಸ್ಬೋದು ಮನಿ ಪ್ಲಾಂಟ್

Money plant care: ಕಡಿಮೆ ಆರೈಕೆಯಲ್ಲಿ, ಕೇವಲ ನೀರಿನ ಸಹಾಯದಿಂದ ಮನೆಯ ಒಳಾಂಗಣಕ್ಕೆ ಹಸಿರು ಕಳೆಯನ್ನು ನೀಡುವ ಮನಿ ಪ್ಲಾಂಟ್ ಅನ್ನು ಬಾಟಲಿಯಲ್ಲಿ ಬೆಳೆಸುವುದು ಮತ್ತು ಪೋಷಿಸುವುದು ಹೇಗೆ ಎಂಬುದರ ಸರಳ ಮಾಹಿತಿ ಇಲ್ಲಿದೆ.

ಮನೆಯಲ್ಲಿರುವ ಹಳೆಯ ಗಾಜಿನ ಬಾಟಲಿಗಳಲ್ಲಿ ನೀವು ಮನಿ ಪ್ಲಾಂಟ್ ಅನ್ನು ಸುಲಭವಾಗಿ ಬೆಳೆಸಬಹುದು. ಕಡಿಮೆ ಖರ್ಚಿನಲ್ಲಿ ಮನೆಯನ್ನು ಸುಂದರಗೊಳಿಸಲು ಇದು ಉತ್ತಮ ಮಾರ್ಗವಾಗಿದೆ. ಈ ಗಿಡವನ್ನು ಬಾಟಲಿಯಲ್ಲಿ ವೇಗವಾಗಿ ಬೆಳೆಸುವುದು ಹೇಗೆ ಮತ್ತು ಗಿಡದ ಆರೈಕೆ ಬಗ್ಗೆ ಮಾಹಿತಿ ಇಲ್ಲಿದೆ.

ಮನಿ ಪ್ಲಾಂಟ್ ಬೆಳೆಸಲು ಸರಿಯಾದ ಕ್ರಮ

ಹೀಗೆ ಆಯ್ಕೆ ಮಾಡಿ
ಯಾವಾಗಲೂ ಆರೋಗ್ಯಕರವಾದ ಮತ್ತು ಹಸಿರಾಗಿರುವ ಬಳ್ಳಿಯ ಕಟಿಂಗ್ ಅನ್ನು ಆಯ್ದುಕೊಳ್ಳಿ. ಕಟಿಂಗ್‌ನಲ್ಲಿ ಕನಿಷ್ಠ 2 ರಿಂದ 4 'ನೋಡ್ಸ್' (ಎಲೆಗಳು ಹೊರಬರುವ ಸಂಧಿ) ಇರಬೇಕು. ತುಂಬಾ ಹಳೆಯ ಅಥವಾ ಒಣಗಿದ ಬಳ್ಳಿಯನ್ನು ಬಳಸಿದರೆ ಗಿಡ ನಿಧಾನವಾಗಿ ಬೆಳೆಯುತ್ತದೆ.

ಸರಿಯಾದ ಬಾಟಲಿ ಆರಿಸಿ
ಮನಿ ಪ್ಲಾಂಟ್ ಬೆಳೆಸಲು ಪಾರದರ್ಶಕವಾದ ಗಾಜಿನ ಬಾಟಲಿ ಉತ್ತಮ, ಏಕೆಂದರೆ ಇದರಲ್ಲಿ ಬೇರುಗಳ ಬೆಳವಣಿಗೆಯನ್ನು ಗಮನಿಸಬಹುದು. ಉದ್ದವಾದ ಕುತ್ತಿಗೆ ಇರುವ ಬಾಟಲಿಗಳು ಬಳ್ಳಿಗೆ ಉತ್ತಮ ಆಧಾರ ನೀಡುತ್ತವೆ. ಗಾಜಿನ ಬಾಟಲಿ ಇಲ್ಲದಿದ್ದರೆ ಹಳೆಯ ಕೋಲ್ಡ್ ಡ್ರಿಂಕ್ಸ್ ಅಥವಾ ಜ್ಯೂಸ್ ಬಾಟಲಿಗಳನ್ನೂ ಬಳಸಬಹುದು.

ನೀರಿನ ಪ್ರಮಾಣ
ಬಾಟಲಿಯಲ್ಲಿ ಕೇವಲ ನೋಡ್ಸ್ ಇರುವ ಭಾಗ ಮಾತ್ರ ನೀರಿನಲ್ಲಿ ಮುಳುಗಿರಲಿ. ಇಡೀ ಕಾಂಡವನ್ನು ನೀರಿನಲ್ಲಿ ಮುಳುಗಿಸಿದರೆ ಅದು ಕೊಳೆಯಬಹುದು. ಫಿಲ್ಟರ್ ಮಾಡಿದ ಅಥವಾ ಸಾಮಾನ್ಯ ಶುದ್ಧ ನೀರನ್ನು ಬಳಸುವುದು ಉತ್ತಮ.

ಬೇರುಗಳು ಬರಲು ತಗಲುವ ಸಮಯ
ಬೇಸಿಗೆಯಲ್ಲಿ ಸಾಮಾನ್ಯವಾಗಿ 7 ರಿಂದ 15 ದಿನಗಳೊಳಗೆ ಸಣ್ಣ ಬೇರುಗಳು ಬರಲಾರಂಭಿಸುತ್ತವೆ. ಅತಿಯಾದ ಶಾಖವಿದ್ದರೆ ನೀರು ಬೇಗನೆ ಕೆಡಬಹುದು, ಆದ್ದರಿಂದ ಆಗಾಗ್ಗೆ ನೀರನ್ನು ಬದಲಾಯಿಸಬೇಕು.

ನೀರು ಯಾವಾಗ ಬದಲಾಯಿಸಬೇಕು?
ಬೇಸಿಗೆಯಲ್ಲಿ ಪ್ರತಿ 4 ರಿಂದ 7 ದಿನಗಳಿಗೊಮ್ಮೆ ನೀರು ಬದಲಾಯಿಸುವುದು ಒಳ್ಳೆಯದು. ನೀರು ಮಸುಕಾಗಿದ್ದರೆ ಅಥವಾ ವಾಸನೆ ಬರುತ್ತಿದ್ದರೆ ತಕ್ಷಣ ಬದಲಾಯಿಸಿ. ಪಾಚಿ ಕಟ್ಟದಂತೆ ತಡೆಯಲು ಬಾಟಲಿಯನ್ನು ಆಗಾಗ್ಗೆ ಸ್ವಚ್ಛಗೊಳಿಸಿ.

ಗಿಡವನ್ನು ಎಲ್ಲಿ ಇಡಬೇಕು?
ಮನಿ ಪ್ಲಾಂಟ್ ನೇರ ಸೂರ್ಯನ ಬಿಸಿಲಿಗಿಂತ ಪರೋಕ್ಷ ಬೆಳಕನ್ನು (Indirect Sunlight) ಇಷ್ಟಪಡುತ್ತದೆ. ಕಿಟಕಿ ಹತ್ತಿರ ಅಥವಾ ಬಾಲ್ಕನಿಯ ನೆರಳಿನ ಭಾಗದಲ್ಲಿ ಇಡುವುದು ಸೂಕ್ತ. ಎಸಿ (AC) ಗಾಳಿ ಬೀಸುವ ಅಥವಾ ಅತಿಯಾದ ಶಾಖವಿರುವ ಜಾಗದಲ್ಲಿ ಇಡಬೇಡಿ.

ಬೆಳವಣಿಗೆ ಹೆಚ್ಚಿಸಲು ಟಿಪ್ಸ್
ತಿಂಗಳಿಗೆ 1-2 ಬಾರಿ ನೀರಿಗೆ ಕೆಲವು ಹನಿ ಲಿಕ್ವಿಡ್ ಫರ್ಟಿಲೈಸರ್ ಸೇರಿಸಬಹುದು.
ಹಳದಿ ಮತ್ತು ಒಣಗಿದ ಎಲೆಗಳನ್ನು ಕತ್ತರಿಸುತ್ತಿದ್ದರೆ ಗಿಡ ತಾಜಾವಾಗಿ ಕಾಣುತ್ತದೆ.
ಬಳ್ಳಿ ತುಂಬಾ ಉದ್ದವಾದರೆ ಅದನ್ನು ಟ್ರಿಮ್ ಮಾಡಿ ಹೊಸ ಕಟಿಂಗ್‌ಗಳನ್ನು ತಯಾರಿಸಬಹುದು.

ಮನೆ ಅಲಂಕಾರಕ್ಕೆ ಐಡಿಯಾಗಳು

ಬಣ್ಣದ ಗಾಜಿನ ಬಾಟಲಿಗಳು
ಗಾಜಿನ ಬಾಟಲಿಗಳಿಗೆ ನೀಲಿ, ಹಸಿರು ಅಥವಾ ಕಂದು ಬಣ್ಣ ಬಳಿಯಬಹುದು. ಬೇರೆ ಬೇರೆ ಗಾತ್ರದ ಬಾಟಲಿಗಳನ್ನು ಒಟ್ಟಿಗೆ ಇಟ್ಟು ಒಂದು ಸುಂದರವಾದ ಕಾರ್ನರ್ ತಯಾರಿಸಬಹುದು.

ಫೇರಿ ಲೈಟ್ಸ್‌ಗಳ ಬಳಕೆ
ಪಾರದರ್ಶಕ ಬಾಟಲಿಯಲ್ಲಿ ಮನಿ ಪ್ಲಾಂಟ್ ಇಟ್ಟು ಅದರ ಸುತ್ತ ಸಣ್ಣ ಎಲ್ಇಡಿ (LED) ಫೇರಿ ಲೈಟ್ಸ್‌ಗಳನ್ನು ಸುತ್ತಬಹುದು. ಇದು ರಾತ್ರಿಯ ಸಮಯದಲ್ಲಿ ಮನೆಗೆ ಅದ್ಭುತ ಲುಕ್ ನೀಡುತ್ತದೆ.

ಕಲ್ಲು ಮತ್ತು ಮಾರ್ಬಲ್ಸ್
ಬಾಟಲಿಯ ಒಳಗೆ ಬಿಳಿ ಕಲ್ಲುಗಳು, ಬಣ್ಣಬಣ್ಣದ ಸ್ಟೋನ್‌ಗಳು ಅಥವಾ ಮಾರ್ಬಲ್ಸ್ ಹಾಕುವುದರಿಂದ ಅಲಂಕಾರ ಆಕರ್ಷಕವಾಗಿ ಕಾಣುತ್ತದೆ. ಬಾಟಲಿಯನ್ನು ಮ್ಯಾಕ್ರಮೆ ಹೋಲ್ಡರ್ ಮೂಲಕ ಬಾಲ್ಕನಿ ಅಥವಾ ಕಿಟಕಿಗಳಿಗೆ ನೇತು ಹಾಕಬಹುದು.

ಟೇಬಲ್ ಡೆಕೋರ್
ಸಣ್ಣ ಬಾಟಲಿಗಳಲ್ಲಿ ಬೆಳೆಸಿದ ಮನಿ ಪ್ಲಾಂಟ್ ಅನ್ನು ಸ್ಟಡಿ ಟೇಬಲ್, ಆಫೀಸ್ ಡೆಸ್ಕ್ ಅಥವಾ ಸೆಂಟರ್ ಟೇಬಲ್ ಮೇಲೆ ಇಡುವುದರಿಂದ ಆ ಜಾಗಕ್ಕೆ ತಾಜಾತನ ಬರುತ್ತದೆ.