ಮನೆ ಮದ್ದಾಗಿ ಪುದೀನಾ

ಪುದೀನಾ ಎಲ್ಲೆಡೆ ಸುಲಭವಾಗಿ ಸಿಗೋ ಸೊಪ್ಪು. ಇದನ್ನು ಆಗಾಗ ಬಳಸುತ್ತಿದ್ದರೆ ಅನೇಕ ಆರೋಗ್ಯ ಸಮಸ್ಯೆಗಳನ್ನು ಸುಲಭವಾಗಿ ಹೋಗಲಾಡಿಸಬಹುದು. ಮನೆ ಮದ್ದಾಗಿಯೂ ಇದನ್ನು ಬಳಸಬಹುದು. ಯಾವ ಆರೋಗ್ಯ ಸಮಸ್ಯೆಗೆ, ಇದನ್ನು ಬಳಸುವುದು ಹೇಗೆ?

- ಪುದೀನಾ ಸೊಪ್ಪಿನಲ್ಲಿ ಅಕ್ರ್ಯಾಲಿಕ್‌ ಆ್ಯಸಿಡ್‌, ಕಬ್ಬಿಣ, ವಿಟಮಿನ್‌ ಎ, ಬಿ, ಸಿ ಮತ್ತು ರಂಜಕ ಅಧಿಕವಾಗಿರುವುದರಿಂದ ಇದು ಮನೆ ಮದ್ದಾಗಿ ಬಹಳ ರೀತಿಯಲ್ಲಿ ಬಳಕೆಗೆ ಬರುತ್ತದೆ.

-ಪುದೀನಾ ಜ್ಯೂಸ್‌ ಕೆಮ್ಮು, ನೆಗಡಿ, ಹೊಟ್ಟೆ ಉರಿ, ಅಜೀರ್ಣ, ಜಂತುಹುಳು ಮತ್ತು ಗ್ಯಾಸ್ಟ್ರಿಕ್‌ಗೆ ರಾಮಬಾಣ. ಅಸ್ತಮಾಕ್ಕೆ ಇದರ ಹಸಿ ಸೊಪ್ಪು ಒಳ್ಳೆಯದು.

-ನಿತ್ಯವೂ 4 ರಿಂದ 5 ಪುದೀನಾ ಎಲೆ ಅಗಿದು ತಿಂದರೆ, ಜೀರ್ಣಶಕ್ತಿ ಹೆಚ್ಚುತ್ತದೆ. ಹಲ್ಲುಗಳ ಆರೋಗ್ಯಕ್ಕೂ ಒಳ್ಳೆಯದು.

-ಇದರ ಕಷಾಯದಿಂದ ಕೆಲವರಿಗೆ ಗಂಟಲು ಒಡೆಯುತ್ತದೆ. ಹಾಗಾಗದಿದ್ದಲ್ಲಿ, ಆಗಾಗ ಕುಡಿದರೆ, ಆರೋಗ್ಯಕ್ಕೆ ಒಳ್ಳೆಯದು. 

-ಚರ್ಮದ ಕಾಯಿಲೆಗಳಾದ ತುರಿಕೆ, ಕಜ್ಜಿ ಸಮಸ್ಯೆಯಿದ್ದರೆ ಪುದೀನಾ ರಸಕ್ಕೆ ತುಳಸಿ ರಸ, ಅರಿಶಿಣ ಸೇರಿಸಿ ಹಚ್ಚಿ, ಸ್ವಲ್ಪ ಸಮಯದ ನಂತರ ತೊಳೆದರೆ ನಿವಾರಣೆಯಾಗುವುದು.

-ಮೊಡವೆ ಸಮಸ್ಯೆಯಿದ್ದರೆ ಪುದೀನಾ ರಸಕ್ಕೆ ನಿಂಬೆ ರಸ, ಅರಿಶಿಣ ಮಿಶ್ರಣ ಮಾಡಿ ಪ್ರತಿದಿನ ರಾತ್ರಿ ಮಲಗುವ ಮುಂಚೆ ಹಚ್ಚಬೇಕು.

-ಮುಖದಲ್ಲಿರುವ ಕಪ್ಪು ಕಲೆ, ಬ್ಲಾಕ್‌ಹೆಡ್ಸ್‌ ಹೋಗಲು ಪುದೀನಾ ರಸಕ್ಕೆ ಕಡ್ಲೆ ಪುಡಿ ಬೆರಸಿದ ಪೇಸ್ಟನ್ನು ವಾರಕ್ಕೊಮ್ಮೆ ಚರ್ಮಕ್ಕೆ ಲೇಪಿಸುತ್ತಿದ್ದರೆ, ಮೊಡವ ನಿವಾರಣೆಯಾಗಿ, ಕಾಂತಿ ಹೆಚ್ಚಾಗುತ್ತದೆ.

- ಪುದೀನಾದಲ್ಲಿ ಆ್ಯಂಟಿ ಬ್ಯಾಕ್ಟಿರಿಯಾ ಅಂಶಗಳು ಹೆಚ್ಚಿದ್ದು, ಶ್ವಾಸಕೋಶದ ಆರೋಗ್ಯಕ್ಕೂ ಒಳ್ಳೆಯದು. ಶ್ವಾಸಕೋಶಕ್ಕೆ ಅಗತ್ಯ ಪೋಷಕಾಂಶಗಳನ್ನು ಒದಿಗಿಸಿ,  ಪ್ರತಿಕೂಲ ಪರಿಣಾಮಗಳನ್ನು ತಡೆಯುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

- ಒಂದು ಲೋಟ ನೀರಿಗೆ ಚಹಾ ಪುಡಿಯೊಂದಿಗೆ, ಪುದೀನಾ ಸೊಪ್ಪು ಹಾಕಿ ಕುದಿಸಿ, ಕುಡಿದರೆ ಆಗಾಗ ಕಾಡುವ ತಲೆ ನೋವಿಗೆ ಉತ್ತಮ ಮದ್ದು.