India-Pakistan Conflict: ಭಾರತ 20 ಅಲ್ಲ, 28 ಪ್ರದೇಶ ನಾಶ ಮಾಡಿದೆ ಎಂದ ಪಾಕ್; 'ಖರ್ಗೆಯವ್ರೇ ಸರಿಯಾಗಿ ಕೇಳಿಸಿಕೊಳ್ಳಿ' ಎಂದ ನೆಟಿಜೆನ್ಸ್!

ಆಪರೇಷನ್ ಸಿಂದೂರ್‌ನಲ್ಲಿ ಭಾರತವು 9ಕ್ಕಿಂತ ಹೆಚ್ಚು ಭಯೋತ್ಪಾದಕ ಅಡಗುತಾಣಗಳನ್ನು ಧ್ವಂಸಗೊಳಿಸಿದೆ ಎಂದು ಪಾಕಿಸ್ತಾನದ ದಾಖಲೆಗಳು ಬಹಿರಂಗಪಡಿಸಿವೆ. ಈ ಕಾರ್ಯಾಚರಣೆಯಲ್ಲಿ 100ಕ್ಕೂ ಹೆಚ್ಚು ಭಯೋತ್ಪಾದಕರು ಹತರಾಗಿದ್ದಾರೆ.

ನವದೆಹಲಿ (ಜೂ.3): ಭಾರತದ ಆಪರೇಷನ್ ಸಿಂದೂರ್, ಭಯೋತ್ಪಾದಕರ ವಿರುದ್ಧ ನಡೆದ ಅತ್ಯಂತ ಯಶಸ್ವಿ ಸೇನಾ ಕಾರ್ಯಾಚರಣೆಯಾಗಿ ಗುರುತಿಸಲ್ಪಟ್ಟಿದೆ. ಈ ಕಾರ್ಯಾಚರಣೆಯಲ್ಲಿ ಭಾರತೀಯ ಸೇನೆಯು ಪಾಕಿಸ್ತಾನ ಮತ್ತು ಪಾಕ್ ಆಕ್ರಮಿತ ಕಾಶ್ಮೀರದಲ್ಲಿ (PoK) 9 ಭಯೋತ್ಪಾದಕ ಅಡಗುತಾಣಗಳನ್ನು ಧ್ವಂಸಗೊಳಿಸಿತು. ಆದರೆ, ಇತ್ತೀಚಿನ ಪಾಕಿಸ್ತಾನದ ದಾಖಲೆಗಳ ಪ್ರಕಾರ, ಭಾರತವು ಒಟ್ಟು 28 ಸ್ಥಳಗಳ ಮೇಲೆ ದಾಳಿ ನಡೆಸಿತ್ತು ಎಂಬ ಆಘಾತಕಾರಿ ಬಹಿರಂಗವಾಗಿದೆ, ಇದು ಭಾರತೀಯ ಸೇನೆಯ ಆರಂಭಿಕ ವರದಿಗಳಿಗಿಂತ ಗಮನಾರ್ಹವಾಗಿ ಹೆಚ್ಚಾಗಿದೆ.

ಭಾರತ 20 ಅಲ್ಲ, 28 ಸ್ಥಾನಗಳನ್ನು ಗುರಿಯಾಗಿಸಿಕೊಂಡಿತ್ತು.

ಆಪರೇಷನ್ ಸಿಂದೂರ್, ಏಪ್ರಿಲ್ 22, 2025 ರಂದು ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಗೆ ಪ್ರತೀಕಾರವಾಗಿ ಭಾರತವು ಮೇ 7 ರಂದು ಆರಂಭಿಸಿತು. ಈ ದಾಳಿಯಲ್ಲಿ 26 ನಾಗರಿಕರು ಕೊಲ್ಲಲ್ಪಟ್ಟಿದ್ದರು. ಭಾರತವು ಲಷ್ಕರ್-ಎ-ತೈಬಾ ಮತ್ತು ಜೈಶ್-ಎ-ಮೊಹಮ್ಮದ್‌ನಂತಹ ಭಯೋತ್ಪಾದಕ ಸಂಘಟನೆಗಳ ಕೇಂದ್ರಗಳಾದ ಮುರಿಡ್ಕೆ ಮತ್ತು ಬಹಾವಲ್ಪುರದಂತಹ 9 ಪ್ರಮುಖ ತಾಣಗಳನ್ನು ಗುರಿಯಾಗಿಸಿತ್ತು. ಆದರೆ, ಪಾಕಿಸ್ತಾನದ ದಾಖಲೆಗಳು ಭಾರತವು ಪೇಶಾವರ್, ಸಿಂಧ್, ಜಾಂಗ್, ಗುಜ್ರಾನ್‌ವಾಲಾ, ಭವಾಲ್‌ನಗರ ಮತ್ತು ಛೋರ್ ಸೇರಿದಂತೆ ಒಟ್ಟು 28 ಸ್ಥಳಗಳ ಮೇಲೆ ದಾಳಿ ನಡೆಸಿತ್ತು ಎಂದು ಬಹಿರಂಗಪಡಿಸಿವೆ.

ಇದರ ಜೊತೆಗೆ, ನೂರ್ ಖಾನ್, ರಫಿಕಿ, ಸುಕ್ರೂರ್, ಸಿಯಾಲ್ಕೋಟ್, ಪಸ್ರೂರ್, ಚುನಿಯನ್, ಮತ್ತು ಸರ್ಗೋಧಾ ಸೇರಿದಂತೆ 11 ಪಾಕಿಸ್ತಾನದ ವಾಯುನೆಲೆಗಳು ಭಾರೀ ಹಾನಿಗೊಳಗಾದವು. ಇವುಗಳನ್ನು ಮ್ಯಾಕ್ಸರ್ ಟೆಕ್ನಾಲಜೀಸ್‌ನ ಉಪಗ್ರಹ ಚಿತ್ರಗಳು ದೃಢಪಡಿಸಿವೆ.

ಪಾಕಿಸ್ತಾನದ ಸುಳ್ಳುಗಳ ಬಹಿರಂಗ:

ಮೊದಲಿಗೆ ಪಾಕಿಸ್ತಾನವು ಆಪರೇಷನ್ ಸಿಂದೂರ್‌ನ ಪರಿಣಾಮವನ್ನು ಕಡಿಮೆ ಮಾಡಲು ಹಲವಾರು ಸುಳ್ಳು ಹೇಳಿಕೆಗಳನ್ನು ನೀಡಿತ್ತು. ಆದರೆ, ಅದರ ಆಂತರಿಕ ದಾಖಲೆಗಳು ಭಾರತದ ದಾಳಿಗಳಿಂದ ಉಂಟಾದ ನಷ್ಟವು ತಾನು ಒಪ್ಪಿಕೊಂಡಿದ್ದಕ್ಕಿಂತ ಹೆಚ್ಚಿನದ್ದಾಗಿದೆ ಎಂದು ತೋರಿಸಿವೆ. ಭಾರತವು ಕೇವಲ ಭಯೋತ್ಪಾದಕ ತಾಣಗಳನ್ನು ಗುರಿಯಾಗಿಸಿತ್ತು, ಆದರೆ ಪಾಕಿಸ್ತಾನಿ ಸೇನೆಯು ಡ್ರೋನ್‌ಗಳು ಮತ್ತು ಕ್ಷಿಪಣಿಗಳ ಮೂಲಕ ಭಾರತದ ನಗರಗಳಾದ ಉಧಮ್‌ಪುರ, ಉರಿ, ಪಠಾಣ್‌ಕೋಟ್ ಮತ್ತು ಭುಜ್‌ನಂತಹ ಸ್ಥಳಗಳ ಮೇಲೆ ದಾಳಿ ನಡೆಸಲು ಪ್ರಯತ್ನಿಸಿತು. ಭಾರತದ ಸುಧಾರಿತ ವಾಯು ರಕ್ಷಣಾ ವ್ಯವಸ್ಥೆ ಈ ದಾಳಿಗಳನ್ನು ಯಶಸ್ವಿಯಾಗಿ ತಡೆಯಿತು.

100ಕ್ಕೂ ಹೆಚ್ಚು ಭಯೋತ್ಪಾದಕರು ಹತ:

ಆಪರೇಷನ್ ಸಿಂದೂರ್ ಸಮಯದಲ್ಲಿ, 100 ಕ್ಕೂ ಹೆಚ್ಚು ಭಯೋತ್ಪಾದಕರನ್ನು ಭಾರತೀಯ ಸೇನೆ ಹತಮಾಡಿತು, ಇದರಲ್ಲಿ 1999 ರ IC-814 ವಿಮಾನ ಅಪಹರಣ ಮತ್ತು 2019 ರ ಪುಲ್ವಾಮಾ ದಾಳಿಯಲ್ಲಿ ಭಾಗಿಯಾಗಿದ್ದ ಪ್ರಮುಖ ಭಯೋತ್ಪಾದಕರು ಸೇರಿದ್ದಾರೆ. ಈ ಕಾರ್ಯಾಚರಣೆಯು ಭಾರತದ ಶೂನ್ಯ-ಸಹಿಷ್ಣುತೆಯ ಭಯೋತ್ಪಾದಕ ನೀತಿಯನ್ನು ಜಗತ್ತಿಗೆ ತೋರಿಸಿತು. ಪಾಕಿಸ್ತಾನದ ಸೇನಾ ಮತ್ತು ಭಯೋತ್ಪಾದಕರ ಸಂಪರ್ಕವನ್ನು ಈ ಕಾರ್ಯಾಚರಣೆ ಬಯಲಿಗೆಳೆದಿದೆ.

ಪಾಕಿಸ್ತಾನಿ ಸೇನೆಯ ಪ್ರವೇಶದ ನಂತರ ಆಪರೇಷನ್ ಸಿಂದೂರ್ ದಾಳಿ ಹೆಚ್ಚಾಯ್ತು

ಬಹಾವಲ್ಪುರದಲ್ಲಿರುವ ಜೈಶ್-ಎ-ಮೊಹಮ್ಮದ್ ಪ್ರಧಾನ ಕಚೇರಿ ಮತ್ತು ಮುರಿಡ್ಕೆಯಲ್ಲಿರುವ ಲಷ್ಕರ್-ಎ-ತೈಬಾ ತರಬೇತಿ ಕೇಂದ್ರ ಸೇರಿದಂತೆ ಒಂಬತ್ತು ಸ್ಥಳಗಳಲ್ಲಿ ಭಾರತ ಕಾರ್ಯಾಚರಣೆ ನಡೆಸಿತ್ತು. ಪಹಲ್ಗಾಮ್‌ನಲ್ಲಿ ನಡೆದ ಭಯೋತ್ಪಾದಕ ದಾಳಿಯ ನಂತರ , ಭಾರತ ಆಪರೇಷನ್ ಸಿಂದೂರ್ ಅನ್ನು ಪ್ರಾರಂಭಿಸಿತ್ತು. ಈ ಸಮಯದಲ್ಲಿ, 100 ಕ್ಕೂ ಹೆಚ್ಚು ಭಯೋತ್ಪಾದಕರು ಕೊಲ್ಲಲ್ಪಟ್ಟರು. ಆದರೆ ಇಷ್ಟೆಲ್ಲ ಸಾಕ್ಷ್ಯಗಳನ್ನ ಸಂಗ್ರಹಿಸಿ ಭಾರತೀಯ ಸೇನೆ ದಾಳಿಯ ಬಗ್ಗೆ ತಕ್ಷಣ ಮಾಹಿತಿ ಕೊಡುತ್ತಿದ್ದರೂ ಸಹ, ಆಪರೇಷನ್ ಸಿಂದೂರ್ ಚುನಾವಣೆ ಗಿಮಿಕ್, ದಾಳಿಯೇ ನಡೆದಿಲ್ಲ. ಚುಟುಪುಟ್ ದಾಳಿ ಎನ್ನುತ್ತಿದ್ದ ಕಾಂಗ್ರೆಸ್ ನಾಯಕರಿಗೆ ನೆಟಿಜೆನ್ಸ್ ತರಾಟೆಗೆ ತೆಗೆದುಕೊಂಡಿದ್ದಾರೆ. ಸ್ವತಃ ಪಾಕಿಸ್ತಾನ ಪ್ರಧಾನಿಯೇ ಭಾರತ ಹೇಳಿದ್ದಕ್ಕೆ ಹೆಚ್ಚು ದಾಳಿಯಾಗಿದೆ ಎಂದು ಒಪ್ಪಿಕೊಂಡಿದ್ದಾರೆ. ಹೀಗಿದ್ದು ಆಪರೇಷನ್ ಸಿಂದೂರ್ ಬಗ್ಗೆ ದಾಖಲೆ ಕೇಳುವವರ ನಿಯತ್ತು ಯಾವ ದೇಶದ ಪರ ಎಂದು ಖಾರವಾಗಿ ಪ್ರಶ್ನಿಸಿದ್ದಾರೆ.