Annayya Serial ಶಿವುಗೆ ಹಿಂದಿವಾಲಿಯ ಮೇಲೆ ಲವ್​? ಯಾರೀಕೆ? ಹೀಗೆ ಪ್ರಪೋಸ್​ ಮಾಡಿ ಗುಟ್ಟ ರಟ್ಟು ಮಾಡಿದ್ರಾ ನಟ?

ಜೀ ಕನ್ನಡದ 'ಅಣ್ಣಯ್ಯ' ಧಾರಾವಾಹಿ ಖ್ಯಾತಿಯ ನಟ ವಿಕಾಶ್ ಉತ್ತಯ್ಯ ಅವರು ಪ್ರೇಮಿಗಳ ದಿನದಂದು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಪ್ರಪೋಸಲ್ ವಿಡಿಯೋ ಹಂಚಿಕೊಂಡಿದ್ದಾರೆ. ಹಿಂದಿಯಲ್ಲಿ ಪ್ರೇಮ ನಿವೇದನೆ ಮಾಡಿಕೊಂಡಿರುವ ಅವರು, 'ನೀನು ನನ್ನವಳಾಗುತ್ತೀಯಾ' ಎಂದು ಕೇಳಿದ್ದು, ಕುತೂಹಲ ಮೂಡಿಸಿದ್ದಾರೆ.

ಮಾಕಾಳಮ್ಮನ ಭಕ್ತ

ಅಣ್ಣಯ್ಯ ಎಂದ್ರೆ ಸದ್ಯ ಸೀರಿಯಲ್​ ಪ್ರೇಮಿಗಳ ಗಮನ ಹರಿಯುವುದು ಜೀ ಕನ್ನಡದ ಸೀರಿಯಲ್​ ಮೇಲೆ. ಮಾಕಾಳಮ್ಮನ ಪರಮ ಭಕ್ತ ಈ ಅಣ್ಣಯ್ಯ. ತನ್ನ ನಾಲ್ವರು ತಂಗಿಯರು ಈತನಿಗೆ ಪಂಚ ಪ್ರಾಣ. ನೋವು ನುಂಗಿ ನಗು ಹಂಚುವ ಕ್ಯಾರೆಕ್ಟರ್​ ಇವನದ್ದು.

ವಕೀಲರಾಗಿರೋ ವಿಕಾಶ್​

ಶಿವು ಪಾತ್ರದಲ್ಲಿ ನಟ ವಿಕಾಶ್ ಉತ್ತಯ್ಯ. ಅಪಾಯವಿದೆ ಎಚ್ಚರಿಕೆ ಸಿನಿಮಾದಿಂದ ಪರಿಚಿತರಾಗಿರುವ ವಿಕಾಶ್​ ಅವರು, ಮೂಲತಃ ಕೊಡಗಿನವರು. ಅವರು ಬಣ್ಣದ ಲೋಕಕ್ಕೆ ಕಾಲಿಡುವ ಮುನ್ನ ವಕೀಲರಾಗಿ ಕೆಲಸ ಮಾಡುತ್ತಿದ್ದರು. ನಟನೆ ಮೇಲಿನ ಆಸಕ್ತಿಯಿಂದ ಕೆಲಸ ಬಿಟ್ಟು ನಟರಾಗಿದ್ದಾರೆ.

ಸಿನಿಮಾಗಳಲ್ಲಿ ನಟನೆ

ವಿಕಾಶ್ ಉತ್ತಯ್ಯ ಅವರು ಸೀರಿಯಲ್ ಗೆ ಬರುವ ಮುನ್ನ ಕೆಲ ಸಿನಿಮಾಗಳಲ್ಲಿ ಅಭಿನಯಿದ್ದಾರೆ. ಈ ಹಿಂದೆ ಮೇರಿ ಎಂಬ ಸಿನಿಮಾದಲ್ಲಿ ನಟಿಸಿದ್ದ ಇವರು, ಇತ್ತೀಚೆಗೆ 2023ರಲ್ಲಿ ದ್ವಂದ್ವ ದ್ವಯಂ, ಆನೆ ಸಿನಿಮಾಗಳಿಗೆ ಬಣ್ಣ ಹಚ್ಚಿದ್ದಾರೆ. ಅಲ್ಲದೇ, ಕನಸಿನ ಮಳೆಯಾದವರು ಎಂಬ ಶಾರ್ಟ್ ಫಿಲ್ಮನಲ್ಲೂ ನಟಿಸಿದ್ದಾರೆ.

ಸಿಂಗಲ್​ ನಟ

ಇಂತಿಪ್ಪ ವಿಕಾಶ್​, ಸದ್ಯ ಸಿಂಗಲ್​ ಆಗಿದ್ದಾರೆ. ಆದರೆ ಇದೀಗ ಅವರು ತಮ್ಮ ಇನ್​ಸ್ಟಾಗ್ರಾಮ್​ ಖಾತೆಯಲ್ಲಿ ಪ್ರೇಮಿಗಳ ದಿನಕ್ಕೆ ಹಿಂದಿಯಲ್ಲಿ ಪ್ರಪೋಸ್​ ಮಾಡುವ ಮೂಲಕ ಕೆಲವೊಂದು ಪ್ರಶ್ನೆಗಳನ್ನು ಅಭಿಮಾನಿಗಳಲ್ಲಿ ಹುಟ್ಟುಹಾಕಿದ್ದಾರೆ. 90ರ ದಶಕದ ಪ್ರೀತಿಯನ್ನು ಹೀಗೆ ಮಾಡುವುದು ಎಂದು ಕ್ಯಾಪ್ಷನ್ ಕೊಟ್ಟಿರುವ ಅವರು, ಈ ವಿಡಿಯೋ ಮಾಡಿದ್ದೇಕೆ ಎನ್ನುವ ಬಗ್ಗೆ ಅಭಿಮಾನಿಗಳ ತಲೆಗೆ ಹುಳು ಬಿಟ್ಟಿದ್ದಾರೆ.

ಶಾಯರಿ ಬರಲ್ಲ

ಅಂದಹಾಗೆ ಈ ವಿಡಿಯೋದಲ್ಲಿ ವಿಕಾಶ್​ ಅವರು, 'ನನಗೆ ಶಾಯರಿ, ಡೈಲಾಗ್​ ಎಲ್ಲಾ ಬರಲ್ಲ. ಆದರೆ ನೀನು ಎದುರಿಗೆ ಇದ್ದಾಗ ಎಲ್ಲವೂ ನನಗೆ ಸಿಂಪಲ್​ ಎನ್ನಿಸಿಬಿಡುತ್ತದೆ. ನೋಡು ಈಗ ನಾನು ಹೇಗೆ ಸಲೀಸಾಗಿ ಹಿಂದಿಯಲ್ಲಿ ಮಾತನಾಡುತ್ತಿರುವೆನಲ್ಲಾ ಹಾಗೆ, ಎಲ್ಲವೂ ಸಿಂಪಲ್​ ಆಗಿ ಬಿಡುತ್ತದೆ' ಎಂದಿದ್ದಾರೆ.

ಸತ್ಯ ಹೇಳುತ್ತೇನೆ

'ನಮ್ಮ ಪ್ರತಿದಿನವೂ ಸ್ಪೆಷಲ್​ ಆಗಿರುತ್ತದೆ ಎಂದು ನಾನು ಹೇಳುವುದಿಲ್ಲ. ಆದರೆ, ಪ್ರತಿದಿನವೂ ನಿನ್ನನ್ನು ತುಂಬಾ ಖುಷಿಯಾಗಿ ಇಡಲು ಪ್ರಯತ್ನ ಅಂತೂ ಪಡುತ್ತೇನೆ' ಎಂದಿದ್ದಾರೆ. 'ಇವತ್ತು ನಾನು ಒಂದು ಸತ್ಯ, ಅದು ನನ್ನ ಜೀವನದ ಅತ್ಯಂತ ಸುಂದರವಾದ ಸತ್ಯವನ್ನು ಹೇಳುತ್ತಿದ್ದೇನೆ. ನೀನು ನನ್ನವಳು ಆಗುತ್ತಿಯಾ' ಎಂದು ಕೇಳಿದ್ದಾರೆ.