ಜನ ಏನ್ ಅಂತಾರೆ ಅಂತ ಚಿಂತೆನಾ? ಹಾಗಾದ್ರೆ ಕತ್ತೆಯ ಈ ಕಥೆಯನ್ನೊಮ್ಮೆ ಓದಿ

Donkey Story: ನಮ್ಮಲ್ಲಿ ಹಲವರು ಪಕ್ಕದವರು ಏನು ಅಂದುಕೊಳ್ಳುತ್ತಾರೆ ಅನ್ನೋ ಚಿಂತೆಯಲ್ಲಿರುತ್ತಾರೆ. ಯಾವಾಗಲೂ ಟೆನ್ಶನ್‌ನಲ್ಲಿರುತ್ತಾರೆ. ಆದರೆ ಈ ಕತ್ತೆ ಕಥೆ ಓದಿದರೆ ನಿಮ್ಮ ಯೋಚನೆ ಬದಲಾಗೋದು ಗ್ಯಾರಂಟಿ. ಕಥೆ ಏನಂದ್ರೆ... 

'ನಮ್ಗೋಸ್ಕರ ಅಲ್ಲ, ಜನಗಳಿಗೋಸ್ಕರ ಬದುಕಬೇಕು' ಅಂತ ಹಲವರು ಹೇಳ್ತಾರೆ. ಆದ್ರೆ ಇದರಲ್ಲಿ ಸ್ವಲ್ಪ ಮಟ್ಟಿಗೆ ಸತ್ಯ ಇದೆ. ಜನ ನಾಲ್ಕು ರೀತಿಯಲ್ಲಿ ಯೋಚನೆ ಮಾಡ್ತಾರೆ ಅಂತ ಬೇಜಾರು ಪಟ್ಟುಕೊಂಡ್ರೆ ಬದುಕಲ್ಲಿ ಮುಂದೆ ಹೋಗೋಕೆ ಆಗಲ್ಲ ಅಂತಾರೆ. ಪಕ್ಕದವರು ಏನೋ ಅಂದುಕೊಳ್ಳುತ್ತಾರೆ ಅಂತ ಬೇಜಾರು ಪಟ್ಟುಕೊಂಡ್ರೆ ನಮ್ಮ ಬದುಕು ಸುಲಭವಾಗಿ ಸಾಗಲ್ಲ. ನೀವು ಕೂಡ ಜನಗಳ ಬಗ್ಗೆ ಬೇಜಾರು ಪಟ್ಟುಕೊಳ್ಳೋರೆ ಆದ್ರೆ ಈ ಕತ್ತೆ ಕಥೆ ಓದಿ, ನಿಮ್ಮ ಯೋಚನೆ ಚೇಂಜ್ ಆಗುತ್ತೆ. 

ಒಂದು ದಿನ ಗಂಡ ಹೆಂಡತಿ ಕತ್ತೆ ಮೇಲೆ ಕೂತು ಬೇರೆ ಊರಿಗೆ ಹೋಗ್ತಿದ್ರು. ಹೋಗ್ತಾ ಇದ್ದಾಗ ಅಲ್ಲಿ ನಾಲ್ಕು ಜನ ಮಾತಾಡ್ತಾ, 'ಇವರಿಗೆ ಬುದ್ದಿ ಇದೆಯಾ.? ಮಾನವೀಯತೆ ಇಲ್ದೆ ಕತ್ತೆ ಮೇಲೆ ಕೂತು ಹೋಗ್ತಿದ್ದಾರೆ. ಕತ್ತೆ ಇಬ್ಬರ ಭಾರ ಹೊತ್ತುಕೊಂಡು ಹೇಗೆ ಹೋಗುತ್ತೆ ಅನ್ನೋ ಯೋಚನೆನೂ ಇಲ್ವಾ? ಒಬ್ಬರಾದ್ರೂ ನಡೆದು ಹೋದ್ರೆ ಏನಾಗುತ್ತೆ' ಅಂತಾರೆ. 

ಇದನ್ನ ಕೇಳಿದ ಗಂಡ ಕೆಳಗೆ ಇಳಿದು ಹೆಂಡತಿಯನ್ನ ಕತ್ತೆ ಮೇಲೆ ಕೂರಿಸಿ ಹೋಗ್ತಾನೆ. ಮತ್ತೊಂದು ಜಾಗಕ್ಕೆ ಹೋದಾಗ ಅಲ್ಲಿನ ಜನ, 'ಇದೇನು ವಿಚಿತ್ರ, ಹೆಂಡತಿಯನ್ನ ಕತ್ತೆ ಮೇಲೆ ಕೂರಿಸಿ ಗಂಡ ನಡೀತಾ ಇದ್ದಾನೆ. ಹೆಂಡತಿ ಅಂದ್ರೆ ಅವನಿಗೆ ಎಷ್ಟು ಭಯ' ಅಂತ ಅಣಕಿಸಿದ್ರು. 

ಇದನ್ನ ಕೇಳಿದ ಗಂಡ, ಹೆಂಡತಿಯನ್ನ ನಡೆಸಿಕೊಂಡು ಹೋಗಿ ತಾನು ಕತ್ತೆ ಮೇಲೆ ಕೂರ್ತಾನೆ. ಸ್ವಲ್ಪ ದೂರ ಹೋದ ಮೇಲೆ ಮತ್ತೊಂದು ಊರಿನ ಜನ ಗಂಡನಿಗೆ ಬೈಯ್ಯೋಕೆ ಶುರು ಮಾಡ್ತಾರೆ. 'ಗಂಡಸಾಗಿ ಹೆಣ್ಣನ್ನ ನಡೆಸಿಕೊಂಡು ಹೋಗ್ತಿದ್ದಾನೆ. ಇವನು ಮನುಷ್ಯನೇ' ಅಂತಾರೆ. ಆಗ ಗಂಡ ಹೆಂಡತಿ ಇಬ್ಬರೂ ಕತ್ತೆಯನ್ನ ನಡೆಸಿಕೊಂಡು ಹೋಗ್ತಾರೆ. 

ಮತ್ತೊಂದು ಊರಿಗೆ ಹೋದಾಗ ಅಲ್ಲಿನ ಜನ, 'ಇವರಿಗೆ ಬುದ್ದಿ ಇದೆಯಾ.? ಕತ್ತೆ ಇದ್ರೂ ನಡೆದುಕೊಂಡು ಹೋಗ್ತಿದ್ದಾರೆ. ಇರೋ ವಸ್ತುವನ್ನ ಹೇಗೆ ಉಪಯೋಗಿಸಬೇಕು ಅಂತ ಗೊತ್ತಿಲ್ದ ಮೂರ್ಖರು' ಅಂತ ಬೈಯ್ಯುತ್ತಾರೆ. 

ನೀತಿ: ಈ ಚಿಕ್ಕ ಕಥೆಯಲ್ಲಿ ಬದುಕಿಗೆ ಒಂದು ಒಳ್ಳೆಯ ಸಂದೇಶ ಇದೆ. ನಾವು ಏನೇ ಮಾಡಿದ್ರೂ ನಾಲ್ಕು ಜನ ಏನೋ ಒಂದು ಮಾತಾಡ್ತಾರೆ. ಹಾಗಾಗಿ ಜನಗಳ ಮಾತು ಕೇಳದೆ ನಿಮಗೆ ಯಾವುದು ಸರಿ ಅನ್ನಿಸುತ್ತೋ ಅದನ್ನ ಮಾಡಿ. ಆದ್ರೆ ಯಾರಿಗೂ ತೊಂದರೆ ಕೊಡದೆ, ಪ್ರಾಮಾಣಿಕವಾಗಿ ಮುಂದೆ ಹೋದ್ರೆ ಯಾರೇನೇ ಅಂದುಕೊಂಡ್ರೂ ಪರವಾಗಿಲ್ಲ ಅನ್ನೋದು.