ಅಬ್ಬಬ್ಬಾ... ರಾತ್ರಿ 10 ನಿಮಿಷ ವಾಕಿಂಗ್‌ ಮಾಡೋದ್ರಿಂದ ಇಷ್ಟೆಲ್ಲಾ ರೋಗ ಓಡಿಸಬಹುದಾ?

ರಾತ್ರಿ ವಾಕಿಂಗ್‌ನಿಂದಾಗುವ ಲಾಭಗಳು: ರಾತ್ರಿ ವಾಕಿಂಗ್ ಮಾಡುವುದರಿಂದ ದೇಹಕ್ಕೆ ಆರೋಗ್ಯ ಸಿಗುವುದಲ್ಲದೆ ಅನೇಕ ರೋಗಗಳನ್ನು ಓಡಿಸಬಹುದು. 

ಇಂದಿನ ಆಧುನಿಕ ಯುಗದಲ್ಲಿ ಆಹಾರ ಪದ್ಧತಿಗಳು ವೇಗವಾಗಿ ಬದಲಾಗುತ್ತಿವೆ. ಆರೋಗ್ಯಕರ ಆಹಾರಕ್ಕಿಂತ ಬೇಗನೆ ತಯಾರಾಗುವ ಆಹಾರಗಳನ್ನೇ ಜನರು ಹೆಚ್ಚಾಗಿ ಇಷ್ಟಪಡುತ್ತಾರೆ. ಇಂತಹ ಅನಾರೋಗ್ಯಕರ ಆಹಾರ ಪದ್ಧತಿಯಿಂದ ಬೊಜ್ಜು, ಮಧುಮೇಹ, ಥೈರಾಯ್ಡ್‌ನಂತಹ ರೋಗಗಳು ಮನುಷ್ಯರನ್ನು ಕಾಡಲು ಪ್ರಾರಂಭಿಸಿವೆ. ಇದಕ್ಕೆ ಮುಖ್ಯ ಕಾರಣವೆಂದರೆ ತಿಂದ ತಕ್ಷಣ ಮಲಗುವುದು, ತಿಂದ ತಕ್ಷಣ ಒಂದೇ ಕಡೆ ಕುಳಿತುಕೊಳ್ಳುವುದು. ತಿಂದ ನಂತರ ಚೆನ್ನಾಗಿ ದೇಹವನ್ನು ಚಟುವಟಿಕೆಯಲ್ಲಿ ತೊಡಗಿಸಿಕೊಂಡರೆ ಮಾತ್ರ ಆರೋಗ್ಯವಾಗಿರಲು ಸಾಧ್ಯ. ಈ ಲೇಖನದಲ್ಲಿ ರಾತ್ರಿ ಊಟವಾದ ನಂತರ ವಾಕಿಂಗ್ ಮಾಡುವುದರಿಂದ ಏನೆಲ್ಲಾ ಲಾಭಗಳಿವೆ ಎಂದು ತಿಳಿಯೋಣ. 

ಎಷ್ಟು ಹೊತ್ತು ನಡೆಯಬೇಕು?: ರಾತ್ರಿ ಜೀರ್ಣಿಸಿಕೊಳ್ಳಲು ಸುಲಭವಾದ ಆಹಾರವನ್ನು ತಿನ್ನಬೇಕು. ರಾತ್ರಿ 8 ಗಂಟೆಯ ಮೊದಲು ತಿಂದರೆ ಒಳ್ಳೆಯದು. ಇದನ್ನು ಪಾಲಿಸಲು ಸಾಧ್ಯವಾಗದವರು ಮಲಗುವ ಮುನ್ನ ಮೂರು ಗಂಟೆಗಳ ಮೊದಲು ತಿನ್ನುವುದನ್ನು ಅಭ್ಯಾಸ ಮಾಡಿಕೊಳ್ಳಿ. ತಿಂದ ನಂತರ 10 ರಿಂದ 30 ನಿಮಿಷಗಳ ಕಾಲ ವಾಕಿಂಗ್ ಮಾಡುವುದು ಪ್ರಯೋಜನಕಾರಿಯಾಗಿದೆ. ಆಯುರ್ವೇದದ ಪ್ರಕಾರ ಊಟದ ನಂತರ ಸ್ವಲ್ಪ ಸಮಯ ನಡೆಯುವುದು ಆರೋಗ್ಯವನ್ನು ಸುಧಾರಿಸುತ್ತದೆ, ಜೊತೆಗೆ ವಿವಿಧ ರೋಗಗಳಿಂದ ನಿಮ್ಮನ್ನು ರಕ್ಷಿಸುತ್ತದೆ. 

ಊಟದ ನಂತರ ವಾಕಿಂಗ್: ರಾತ್ರಿ ಊಟದ ನಂತರ ವಾಕಿಂಗ್ ಮಾಡುವುದು ದೇಹಕ್ಕೆ ಆರೋಗ್ಯವನ್ನು ನೀಡುತ್ತದೆ. ಈಗಾಗಲೇ ಮಧುಮೇಹ, ರಕ್ತದೊತ್ತಡ, ಬೊಜ್ಜು, ನಿದ್ರಾಹೀನತೆಯಂತಹ ವಿವಿಧ ಸಮಸ್ಯೆಗಳಿಂದ ಬಳಲುತ್ತಿರುವವರಿಗೆ ರಾತ್ರಿ ವಾಕಿಂಗ್ ತುಂಬಾ ಸಹಾಯಕವಾಗಿದೆ. ಚೆನ್ನಾಗಿ ನಿದ್ರೆ ಬರುತ್ತದೆ. ಇದು ಮಾತ್ರವಲ್ಲದೆ ನೀವು ತಿಂದ ನಂತರ ನಡೆಯುವುದರಿಂದ ನಿಮ್ಮ ಜೀರ್ಣಕ್ರಿಯೆ ಸುಧಾರಿಸುತ್ತದೆ ಮತ್ತು ಮಲಬದ್ಧತೆ, ಗ್ಯಾಸ್ ಸಮಸ್ಯೆ, ಜೀರ್ಣಕಾರಿ ಸಮಸ್ಯೆಗಳು ಕಡಿಮೆಯಾಗುತ್ತವೆ. 

ತೂಕ ಕಡಿಮೆಯಾಗುತ್ತದೆ: ರಾತ್ರಿ ನಡೆಯುವುದರಿಂದ ನಿಮ್ಮ ಕ್ಯಾಲೊರಿಗಳು ಹೆಚ್ಚಾಗಿ ಕರಗುತ್ತವೆ. ತೂಕ ಇಳಿಸೋಕೆ ಸಹಾಯಕವಾಗುತ್ತದೆ. ಚಯಾಪಚಯ ಕ್ರಿಯೆ ಸುಧಾರಿಸುವುದರಿಂದ ಹೆಚ್ಚು ಶಕ್ತಿಯನ್ನು ಬಳಸಿಕೊಂಡು ತೂಕ ಕಡಿಮೆಯಾಗುತ್ತದೆ. ತೂಕ ಇಳಿಸಲು ಬಯಸುವವರು ರಾತ್ರಿ ವಾಕಿಂಗ್ ಮಾಡಬಹುದು. 

ಹೃದಯದ ಆರೋಗ್ಯ: ಊಟದ ನಂತರ ನಡೆಯುವುದು ನಿಮ್ಮ ಹೃದಯದ ಆರೋಗ್ಯವನ್ನು ಸುಧಾರಿಸುತ್ತದೆ. ಹೃದಯ ರೋಗಗಳನ್ನು ಉಂಟುಮಾಡುವ ಕೆಟ್ಟ ಕೊಲೆಸ್ಟ್ರಾಲ್, ರಕ್ತದೊತ್ತಡ ಕಡಿಮೆಯಾಗಿ ಸರಿಯಾಗುವುದರಿಂದ ರೋಗ ಬರುವ ಅಪಾಯ ಕಡಿಮೆಯಾಗುತ್ತದೆ. ಹೃದಯವನ್ನು ಬಲಪಡಿಸಲು ರಾತ್ರಿ ವಾಕಿಂಗ್ ಸಹಾಯ ಮಾಡುತ್ತದೆ. 

ಚೆನ್ನಾಗಿ ನಿದ್ರೆ ಬರುತ್ತದೆ: ನಿದ್ರಾಹೀನತೆ ಅನೇಕ ಸಮಸ್ಯೆಗಳಿಗೆ ಮೂಲ ಕಾರಣವಾಗಿದೆ. ನೀವು ರಾತ್ರಿ ನಡೆಯುವುದರಿಂದ ನಿಮ್ಮ ಮನಸ್ಥಿತಿ ಸುಧಾರಿಸಿ ಗಾಢ ನಿದ್ರೆ ಬರುತ್ತದೆ. ಹೊಟ್ಟೆ ಉಬ್ಬುವುದು, ಮಲಬದ್ಧತೆ, ಗ್ಯಾಸ್ ಸಮಸ್ಯೆ, ಜೀರ್ಣಕಾರಿ ಸಮಸ್ಯೆಗಳಂತಹ ತೊಂದರೆಗಳು ನಿವಾರಣೆಯಾಗಿ ನೆಮ್ಮದಿಯ ನಿದ್ರೆ ಬರುತ್ತದೆ. 

ಯಾವಾಗ ನಡೆಯಬೇಕು?: ರಾತ್ರಿ ಊಟವಾದ ನಂತರ ವಾಕಿಂಗ್ ಮಾಡಲು ಕೆಲವು ನಿಯಮಗಳಿವೆ. ನೀವು ತುಂಬಾ ಹೊತ್ತು ನಡೆಯುವ ಅಗತ್ಯವಿಲ್ಲ. ಸುಮಾರು 20 ರಿಂದ 30 ನಿಮಿಷ ನಡೆದರೆ ಸಾಕು. ತಿಂದ ತಕ್ಷಣ ನಡೆಯದೆ ಹತ್ತು ನಿಮಿಷಗಳ ನಂತರ ನಡೆಯಲು ಪ್ರಾರಂಭಿಸಬಹುದು.