ನಮ್ಮ ಆರೋಗ್ಯ ನಾವು ತಿನ್ನುವ ಆಹಾರದ ಮೇಲೆ ಅವಲಂಬಿತವಾಗಿದೆ. ಆರೋಗ್ಯಕರ ಆಹಾರ ಸೇವಿಸಿದರೆ ಸಾಲದು, ಸರಿಯಾದ ಸಮಯಕ್ಕೆ ಊಟ ಮಾಡಬೇಕು ಅಂತಾರೆ ಆರೋಗ್ಯ ತಜ್ಞರು. ವಿಶೇಷವಾಗಿ ರಾತ್ರಿ ಊಟದ ವಿಷಯದಲ್ಲಿ.
ನಮ್ಮ ಅಜ್ಜ, ಮುತ್ತಜ್ಜರು ಯಾವುದೇ ರೋಗಗಳಿಲ್ಲದೆ 90 ರಿಂದ 100 ವರ್ಷ ಆರೋಗ್ಯವಾಗಿ ಬದುಕಿದ್ದನ್ನು ನಾವು ಕೇಳಿದ್ದೇವೆ. ಆದರೆ ಈಗ 20, 30 ವರ್ಷಕ್ಕೆ ಕಾಲು ನೋವು, ಕೀಲು ನೋವು, ಮಧುಮೇಹ, ಹೃದ್ರೋಗ ಇತ್ಯಾದಿಗಳಿಂದ ಬಳಲುತ್ತಿದ್ದೇವೆ. ಹಿಂದಿನವರು ಆರೋಗ್ಯವಾಗಿರಲು ಕಾರಣವೇನೆಂದು ಯೋಚಿಸಿದ್ದೀರಾ? ಅದರಲ್ಲಿ ಯಾವುದೇ ರಹಸ್ಯವಿಲ್ಲ. ಅವರು ದೈಹಿಕ ಶ್ರಮ ಹೆಚ್ಚು ಮಾಡುತ್ತಿದ್ದರು, ಕಲಬೆರಕೆಯಿಲ್ಲದ ಆಹಾರ ಸೇವಿಸುತ್ತಿದ್ದರು ಮತ್ತು ಸರಿಯಾದ ಸಮಯಕ್ಕೆ ಊಟ ಮಾಡುತ್ತಿದ್ದರು. ಇದೇ ಅವರ ಆರೋಗ್ಯದ ಗುಟ್ಟು ಎನ್ನುತ್ತಾರೆ ಆರೋಗ್ಯ ತಜ್ಞರು.
90 ವರ್ಷದವರೆಗೂ ಆರೋಗ್ಯವಾಗಿರಲು ಅವರು ಪಾಲಿಸಿದ ಆಹಾರ ಪದ್ಧತಿಯೇ ಪ್ರಮುಖ ಕಾರಣ. ಸರಿಯಾದ ಸಮಯಕ್ಕೆ ಊಟ ಮಾಡದಿದ್ದರೆ ಆರೋಗ್ಯ ಹದಗೆಡುತ್ತದೆ. ಇತ್ತೀಚೆಗೆ ಹೊರಗಡೆ ಊಟ ಮಾಡುವುದು ಹೆಚ್ಚಾಗಿದೆ. ಹೀಗಾಗಿ ರಾತ್ರಿ ಯಾವಾಗ ಬೇಕಾದರೂ ಊಟ ಮಾಡುತ್ತಾರೆ. ಸಮಯ ಪಾಲಿಸುವುದಿಲ್ಲ. ರಾತ್ರಿ ಸರಿಯಾದ ಸಮಯಕ್ಕೆ ಊಟ ಮಾಡದಿರುವುದರಿಂದ ಆರೋಗ್ಯ ಸಮಸ್ಯೆಗಳು ಬರುತ್ತವೆ ಎನ್ನುತ್ತಾರೆ ವೈದ್ಯರು. ಹಾಗಾದರೆ ರಾತ್ರಿ ಯಾವಾಗ ಊಟ ಮಾಡಬೇಕು ಎಂದು ತಿಳಿದುಕೊಳ್ಳೋಣ.
ರಾತ್ರಿ ಯಾವಾಗ ಊಟ ಮಾಡಬೇಕು?
ನೀವು ಆರೋಗ್ಯವಾಗಿ ಬದುಕಬೇಕೆಂದರೆ ಪ್ರತಿದಿನ ರಾತ್ರಿ ಮಲಗುವ 2 ರಿಂದ 3 ಗಂಟೆ ಮೊದಲು ಊಟ ಮಾಡಬೇಕು. ಆರೋಗ್ಯ ತಜ್ಞರ ಪ್ರಕಾರ, ಸಂಜೆ 6 ರಿಂದ 8 ರ ನಡುವೆ ಊಟ ಮಾಡಿದರೆ ಒಳ್ಳೆಯದು.
ರಾತ್ರಿ ಮಲಗುವ ಮುನ್ನ ಹಾಲು ಕುಡಿಯುವ ಅಭ್ಯಾಸ ಇದ್ದರೆ, ಮಲಗುವ ಒಂದು ಗಂಟೆ ಮೊದಲು ಕುಡಿಯಿರಿ.
ಎಲ್ಲರಿಗೂ ರಾತ್ರಿ ಒಂದೇ ಸಮಯಕ್ಕೆ ಕೆಲಸ ಮುಗಿಯುವುದಿಲ್ಲ. ರಾತ್ರಿ 10 ಗಂಟೆಯಾದರೂ ಆಫೀಸಿನಲ್ಲಿ ಕೆಲಸ ಮಾಡುವವರಿದ್ದಾರೆ. ಅಂತಹವರಿಗೆ ಹಸಿವು ಆಗುವುದು ಸಹಜ. ಆದರೆ ಈ ಸಮಯದಲ್ಲಿ ಹೆಚ್ಚು ತಿನ್ನಬಾರದು. ಬದಲಾಗಿ ಆರೋಗ್ಯಕರ ತಿಂಡಿಗಳನ್ನು ಸ್ವಲ್ಪ ಸ್ವಲ್ಪ ತಿನ್ನಿ.
ತೂಕ ಇಳಿಸಿಕೊಳ್ಳಲು ಬಯಸುವವರು ರಾತ್ರಿ 7 ಗಂಟೆಯೊಳಗೆ ಊಟ ಮಾಡಬೇಕು. ಹೀಗೆ ಮಾಡಿದರೆ ಚಯಾಪಚಯ ಕ್ರಿಯೆ ಚೆನ್ನಾಗಿರುತ್ತದೆ. ದೇಹದಲ್ಲಿ ಕೊಬ್ಬು ಸಂಗ್ರಹವಾಗುವುದಿಲ್ಲ. ಊಟದಲ್ಲಿ ಕಾರ್ಬೋಹೈಡ್ರೇಟ್‌ಗಳು ಕಡಿಮೆ ಇರಲಿ. ಅನ್ನದಲ್ಲಿ ಕಾರ್ಬೋಹೈಡ್ರೇಟ್‌ಗಳು ಹೆಚ್ಚಿರುತ್ತವೆ. ಹಾಗಾಗಿ ರಾತ್ರಿ ಚಪಾತಿ, ಜೋಳದ ರೊಟ್ಟಿ ತಿನ್ನುವುದು ಒಳ್ಳೆಯದು. ರಾತ್ರಿ ಊಟ ಮಾಡುವಾಗ ಫೋನ್, ಟಿವಿ ನೋಡಬೇಡಿ. ಹೆಚ್ಚು ತಿಂದು ಜೀರ್ಣಕ್ರಿಯೆಗೆ ತೊಂದರೆಯಾಗಬಹುದು.
ರಾತ್ರಿ ತಡವಾಗಿ ಊಟ ಮಾಡುವುದರಿಂದ ಆಗುವ ಸಮಸ್ಯೆಗಳು
ಸರಿಯಾದ ಸಮಯಕ್ಕೆ ಊಟ ಮಾಡಿದರೆ ಚೆನ್ನಾಗಿ ನಿದ್ದೆ ಬರುತ್ತದೆ. ತಡವಾಗಿ ಊಟ ಮಾಡಿದರೆ ಜೀರ್ಣಕ್ರಿಯೆ ಸರಿಯಾಗಿ ಆಗುವುದಿಲ್ಲ, ನಿದ್ದೆ ಬರುವುದಿಲ್ಲ. ನಿದ್ರಾಹೀನತೆ, ಅಜೀರ್ಣ ಸಮಸ್ಯೆಗಳು ಬರುತ್ತವೆ. ಅಜೀರ್ಣದಿಂದಾಗಿ ಆಹಾರದಿಂದ ಪೋಷಕಾಂಶಗಳು ದೇಹಕ್ಕೆ ಸಿಗುವುದಿಲ್ಲ. ಊಟವಾದ ತಕ್ಷಣ ಮಲಗಬಾರದು.