ನಟ ವಿಕ್ರಮ್, ನಿರ್ದೇಶಕ ಅರುಣ್ ಕುಮಾರ್ ನಿರ್ದೇಶನದಲ್ಲಿ ನಟಿಸಿರುವ 'ವೀರ ಧೀರ ಸೂರನ್' ಚಿತ್ರದ ಬಿಡುಗಡೆಗೆ 4 ವಾರಗಳ ಕಾಲ ತಡೆ ವಿಧಿಸಲಾಗಿತ್ತು. ಸದ್ಯಕ್ಕೆ ಮಾತುಕತೆ ಯಶಸ್ವಿಯಾದ ಹಿನ್ನೆಲೆಯಲ್ಲಿ ಚಿತ್ರದ ಮೇಲಿನ ತಡೆಯನ್ನು ನ್ಯಾಯಾಲಯ ರದ್ದುಪಡಿಸಿದೆ.
ನಟ ವಿಕ್ರಮ್ ನಟನೆಯಲ್ಲಿ, ಇಂದು (27.03.2025) ಬಿಡುಗಡೆಯಾಗಬೇಕಿದ್ದ ಸಿನಿಮಾ 'ವೀರ ಧೀರ ಸೂರನ್'. ಚಿಯಾನ್ ವಿಕ್ರಮ್ ಹೀರೋ ಆಗಿ ನಟಿಸಿರುವ ಈ ಚಿತ್ರದಲ್ಲಿ, ತುಷಾರಾ ವಿಜಯನ್ ನಾಯಕಿಯಾಗಿ ನಟಿಸಿದ್ದಾರೆ. 'ಸಿದ್ದ' ಚಿತ್ರದ ನಂತರ, ನಿರ್ದೇಶಕ ಎಸ್.ಯು.ಅರುಣ್ ಕುಮಾರ್ ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಕಳೆದ ಎರಡು ವಾರಗಳಿಂದ ಈ ಚಿತ್ರದ ಪ್ರಚಾರ ಕಾರ್ಯಗಳು ಭರದಿಂದ ಸಾಗಿದ್ದವು. ಚಿತ್ರದ ಪ್ರಿ ಬುಕ್ಕಿಂಗ್ ಕೂಡಾ ಭರದಿಂದ ಸಾಗಿತ್ತು.
ವೀರ ಧೀರ ಸೂರನ್ ರಿಲೀಸ್‌ನಲ್ಲಿ ಬಂದ ಸಮಸ್ಯೆ ಏನು?
ಆದರೆ ನ್ಯಾಯಾಲಯದ ಆದೇಶದಿಂದಾಗಿ, ಚಿತ್ರದ ಬಿಡುಗಡೆಯಲ್ಲಿ ಕೊನೆಯ ಕ್ಷಣದಲ್ಲಿ ಸಮಸ್ಯೆ ಉಂಟಾಯಿತು. ಈ ಚಿತ್ರದ ಡಿಜಿಟಲ್ ಮತ್ತು ಸ್ಯಾಟಲೈಟ್ ಹಕ್ಕುಗಳನ್ನು ಹೊಂದಿರುವ ಬಿ4ಯು ಎಂಟರ್‌ಟೈನ್‌ಮೆಂಟ್ , ನ್ಯಾಯಾಲಯವನ್ನು ಸಂಪರ್ಕಿಸಿದ್ದರಿಂದ 'ವೀರ ಧೀರ ಸೂರನ್' ಚಿತ್ರವನ್ನು, 4 ವಾರಗಳ ಕಾಲ ಬಿಡುಗಡೆ ಮಾಡದಂತೆ ದೆಹಲಿ ಹೈಕೋರ್ಟ್ ತಡೆ ವಿಧಿಸಿತ್ತು.
ನ್ಯಾಯಾಲಯ ಹಾಕಿದ ಆದೇಶ:
ಈ ಸಮಸ್ಯೆಯನ್ನು ಬಗೆಹರಿಸಲು ತಯಾರಕರಿಂದ, ಬಿ4ಯು ಕಂಪೆನಿಯಿಂದ ದಾಖಲಾದ ಮೊಕದ್ದಮೆಯಲ್ಲಿ 7 ಕೋಟಿ ರೂಪಾಯಿಗಳನ್ನು 24 ಗಂಟೆಗಳಲ್ಲಿ ಠೇವಣಿ ಇಡಬೇಕೆಂದು ಐವಿವೈ ಕಂಪೆನಿಗೆ ನ್ಯಾಯಾಲಯ ಆದೇಶಿಸಿತು.
ಸಂಜೆ 6 ಗಂಟೆಗೆ ಸಿನಿಮಾ ರಿಲೀಸ್:
ಇದಕ್ಕಾಗಿ ವಕೀಲ ಆದಿತ್ಯ ಗುಪ್ತಾ ಅವರನ್ನು ಆಯುಕ್ತರನ್ನಾಗಿ ದೆಹಲಿ ಹೈಕೋರ್ಟ್ ನೇಮಿಸಿತು. ಈ ಬಗ್ಗೆ ಎರಡೂ ಕಡೆಯವರೂ ಸೌಹಾರ್ದಯುತ ಪರಿಹಾರ ಕಂಡುಕೊಳ್ಳಲು ಮಾತುಕತೆ ನಡೆಸುತ್ತಿದ್ದು, ಇಂದು ಸಂಜೆ 3 ಗಂಟೆಯೊಳಗೆ ಎರಡೂ ಕಡೆಯವರೂ ಒಪ್ಪಂದಕ್ಕೆ ಬಂದರೆ, ಈ ಬಗ್ಗೆ ನ್ಯಾಯಾಲಯಕ್ಕೆ ತಿಳಿಸಲಾಗುವುದು ಎಂದು ಹೇಳಲಾಗಿತ್ತು. ಸದ್ಯಕ್ಕೆ ಎರಡೂ ಕಡೆಯವರೂ ಒಪ್ಪಂದಕ್ಕೆ ಬಂದಿರುವುದಾಗಿ 3 ಗಂಟೆಗೆ, ನ್ಯಾಯಾಧೀಶರಿಗೆ ತಿಳಿಸಿದ ನಂತರ, 4 ವಾರಗಳ ಕಾಲ ಚಿತ್ರ ಬಿಡುಗಡೆಗೆ ಹಾಕಿದ್ದ ತಡೆಯನ್ನು ದೆಹಲಿ ಹೈಕೋರ್ಟ್ ತೆರವುಗೊಳಿಸಿದೆ. ತಡೆ ನಿವಾರಣೆಯಾದ್ದರಿಂದ ಇಂದು ಸಂಜೆ 6 ಗಂಟೆಗೆ ಈ ಚಿತ್ರ ಜಗತ್ತಿನಾದ್ಯಂತ ಬಿಡುಗಡೆಯಾಗಲಿದೆ ಎಂದು ಹೇಳಲಾಗುತ್ತಿದೆ. ಇದರಿಂದ ಚಿತ್ರತಂಡ ನಿಟ್ಟುಸಿರು ಬಿಟ್ಟಿದೆ.
