ನಿರೀಕ್ಷಿತ ವಹಿವಾಟು ಇಲ್ಲ, ಭಾರತಕ್ಕೆ ಹಾರ್ಲೆ ಡೇವಿಡ್‌ಸನ್‌ ಗುಡ್‌ಬೈ!

ನಿರೀಕ್ಷಿತ ವಹಿವಾಟು ಇಲ್ಲದಕ್ಕೆ ಭಾರತಕ್ಕೆ ಹಾರ್ಲೆ ಡೇವಿಡ್‌ಸನ್‌ ಗುಡ್‌ಬೈ| ಲಾಭ ಕುಂಠಿತವಾಗಿರುವ ಹಾಗೂ ಮುಂದಿನ ಕಾರ್ಯಾಚರಣೆಗೆ ಸುಗಮವಲ್ಲದ ದೇಶಗಳಲ್ಲಿ ಕಾರ್ಯಾಚರಣೆ ಸ್ಥಗಿತ ಮಾಡಲು ನಿರ್ಧಾರ

ನವದೆಹಲಿ(ಆ.21): ದುಬಾರಿ ಬೈಕ್‌ಗಳ ಉತ್ಪಾದಕ ಕಂಪನಿ, ಶೀಘ್ರವೇ ಭಾರತಕ್ಕೆ ವಿದಾಯ ಹೇಳುವ ಸಾಧ್ಯತೆ ಇದೆ. ಭಾರತದಲ್ಲಿ ನಿರೀಕ್ಷಿತ ಪ್ರಮಾಣದಲ್ಲಿ ವಾಹನ ಮಾರಾಟ ಆಗದೇ ಇರುವುದರಿಂದ ಕಂಪನಿ ಈ ನಿರ್ಧಾರಕ್ಕೆ ಬಂದಿದೆ ಎನ್ನಲಾಗಿದೆ.

ಈ ವರ್ಷದ ಎರಡನೇ ತ್ರೈಮಾಸಿಕದ ವಹಿವಾಟುಗನ್ನು ಪರಿಶೀಲನೆ ನಡೆಸಿದ ಬಳಿಕ, ಲಾಭ ಕುಂಠಿತವಾಗಿರುವ ಹಾಗೂ ಮುಂದಿನ ಕಾರ್ಯಾಚರಣೆಗೆ ಸುಗಮವಲ್ಲದ ದೇಶಗಳಲ್ಲಿ ಕಾರ್ಯಾಚರಣೆ ಸ್ಥಗಿತ ಮಾಡಲು ನಿರ್ಧರಿಸಲಾಗಿದೆ ಎಂದು ಹಾರ್ಲೆ ಡೇವಿಡ್‌ಸನ್‌ ಹೇಳಿದೆ.

ಕಳೆದ ಹಣಕಾಸು ವರ್ಷದಲ್ಲಿ ಭಾರತದಲ್ಲಿ 2500 ಕ್ಕೂ ಕಡಿಮೆ ಬೈಕ್‌ಗಳು ಬಿಕರಿಯಾಗಿದ್ದು, 2020ರ ಏಪ್ರಿಲ್‌-ಜೂನ್‌ನಲ್ಲಿ ಕೇವಲ 100 ಬೈಕುಗಳು ಮಾರಾಟವಾಗಿದೆ. ಇದು ಯೋಜಿತ ವಹಿವಾಟಿಗಿಂತ ಕಡಿಮೆಯಾಗಿದ್ದು, ಹಾಗಾಗಿ ಭಾರತದಲ್ಲಿ ಕಾರ್ಯಾಚರಣೆ ಸ್ಥಗಿತಗೊಳಿಸುವುದು ನಿಕ್ಕಿಯಾಗಿದೆ.