ದೀಪಾವಳಿ ಮುಹೂರ್ತ ಟ್ರೇಡಿಂಗ್; ಅ.24ರಂದು ರಜೆಯಿದ್ರೂ ಒಂದು ಗಂಟೆ ತೆರೆದಿರಲಿವೆ ಷೇರು ಮಾರುಕಟ್ಟೆಗಳು

*ಅ.24ರಂದು ಮುಹೂರ್ತ ಟ್ರೇಡಿಂಗ್ ಪ್ರಯುಕ್ತ ಒಂದು ಗಂಟೆ ತೆರೆದಿರುವ  ಎನ್ ಎಸ್ ಇ ಹಾಗೂ ಬಿಎಸ್ ಇ  *ಸಂಜೆ 6:15ರಿಂದ  7:15ರ ತನಕ ನಡೆಯಲಿದೆ ಟ್ರೇಡಿಂಗ್ *ಅನುಭವಿ ಹೂಡಿಕೆದಾರರು ಈ ದಿನ ಹೂಡಿಕೆ ಮಾಡೋದು ಪಕ್ಕಾ

ಮುಂಬೈ (ಅ.13): ದೀಪಾವಳಿ ಹಬ್ಬದಂದು ಅಂದರೆ ಅ.24ರಂದು  ಷೇರು ಮಾರುಕಟ್ಟೆಗಳಾದ ಎನ್ ಎಸ್ ಇ ಹಾಗೂ ಬಿಎಸ್ ಇ 50 ವರ್ಷಗಳ ಹಳೆಯ 'ಮುಹೂರ್ತ ಟ್ರೇಡಿಂಗ್' ಸಂಪ್ರದಾಯದ ಭಾಗವಾಗಿ ಒಂದು ಗಂಟೆ ತೆರೆದಿರುತ್ತದೆ. ಮುಹೂರ್ತ ಟ್ರೇಡಿಂಗ್ ಅನ್ನು ಹೊಸ ಸಂವತ್ಸರ 2079ರ ಪ್ರಾರಂಭದ ದ್ಯೋತಕವಾಗಿ ಆಚರಿಸಲಾಗುತ್ತದೆ. ಹಿಂದೂ ಕ್ಯಾಲೆಂಡರ್ ಪ್ರಕಾರ ಈ ದಿನ ಷೇರು ಮಾರುಕಟ್ಟೆ ಟ್ರೇಡಿಂಗ್ ಗೆ ಶುಭ ದಿನ ಎಂದು ಪರಿಗಣಿಸಲಾಗಿದೆ. ಹೀಗಾಗಿ ಸಾಂಪ್ರದಾಯಿಕ ಉದ್ಯಮ ಸಮುದಾಯವು ಈ ದಿನ ಟ್ರೇಡಿಂಗ್ ಮಾಡುತ್ತಾರೆ. ಬಿಎಸ್ ಇ ಹಾಗೂ ಎನ್ ಎಸ್ ಇಯಲ್ಲಿ ಲಭ್ಯವಿರುವ ನೋಟಿಸ್ ಪ್ರಕಾರ ಈಕ್ವಿಟೀಸ್, ಈಕ್ವಿಟಿ ಎಫ್ ಆಂಡ್ ಒ, ಕರೆನ್ಸಿ ಎಫ್ ಆಂಡ್ ಒ ಸಂಜೆ 6:15ಕ್ಕೆ ಪ್ರಾರಂಭವಾಗಲಿದ್ದು, ಒಂದು ಗಂಟೆ ಬಳಿಕ ಅಂದರೆ 7:15ಕ್ಕೆ ಅಂತ್ಯವಾಗಲಿದೆ. ಪ್ರೀ ಒಪನ್ ಸೆಷನ್ ಸಂಜೆ 6ಕ್ಕೆ ಪ್ರಾರಂಭವಾಗಿ 6.08ಕ್ಕೆ ಮುಕ್ತಾಯವಾಗಲಿದೆ. ಕಾಮಡಿಟಿ ಡಿರೈವೇಟಿವ್ ವಲಯದಲ್ಲಿ ಕೂಡ ಟ್ರೇಡಿಂಗ್ ಸಂಜೆ  6:15ಕ್ಕೆ ಪ್ರಾರಂಭವಾಗಿ 7:15ಕ್ಕೆ ಮುಕ್ತಾಯವಾಗಲಿದೆ. ಆದರೆ, ಟ್ರೇಡ್ ಮಾರ್ಪಾಡಿಗೆ ಸಂಜೆ 7:25ರ ತನಕ ಸಮಯಾವಕಾಶವಿದೆ. ಇನ್ನು ಕರೆನ್ಸಿ ಡೆರೈವೇಟಿವ್ ಸೆಗ್ಮೆಂಟ್ ನಲ್ಲಿ ಸಂಜೆ 6:15ರಿಂದ 7:15ರ ತನಕ ಸಮಯಾವಕಾಶವಿದೆ. ಸಂಜೆ 7:25ರ ತನಕ ಕ್ರಾಸ್ ಕರೆನ್ಸಿ ಡಿರೈವೇಟಿವ್ಸ್ ಟ್ರೇಡ್ ಮಾರ್ಪಾಡಿಗೆ ಸಂಜೆ  7:25ರ ತನಕ ಅವಕಾಶವಿದೆ. ಇನ್ನು ಟ್ರೇಡ್ ಆನುಲ್ಮೆಂಟ್ ಮನವಿಗಳನ್ನು ಸಂಜೆ 7:30ರ ತನಕ ಸಲ್ಲಿಸಲು ಅವಕಾಶವಿದೆ.

ಈ ಕುರಿತ ಯಾವುದೇ ಪ್ರಶ್ನೆಗಳು ಅಥವಾ ಅನುಮಾನಗಳಿಗೆ ಬಿಎಸ್ ಇ ಸಹಾಯವಾಣಿ ಸಂಖ್ಯೆ 022-45720400/600 ಸಂಪರ್ಕಿಸಬಹುದು. ಅಥವಾ bsehelp@bseindia.com ಇ-ಮೇಲ್ ಮಾಡಬಹುದು. 

ಏನಿದು ಮುಹೂರ್ತ ಟ್ರೇಡಿಂಗ್?
ಮುಹೂರ್ತ ಟ್ರೇಡಿಂಗ್ ಅನ್ನು ಮೊದಲಿಗೆ ಪರಿಚಯಿಸಿದ್ದು ಬಾಂಬೆ ಸ್ಟಾಕ್ ಎಕ್ಸ್ ಚೇಂಜ್ (BSE).1957ರಲ್ಲಿ ದೀಪಾವಳಿಯಂದು ಷೇರುಗಳ ಟ್ರೇಡಿಂಗ್ ಗೆ ಒಂದು ಗಂಟೆ ಮೀಸಲಿಡುವ ಮೂಲಕ ಈ ಪರಂಪರೆಗೆ ಬಿಎಸ್ ಇ ನಾಂದಿ ಹಾಡಿತು. ದೀಪಾವಳಿ ದಿನ ಇತರ ಸಮಯದಲ್ಲಿ ಷೇರು ಮಾರುಕಟ್ಟೆ ಕ್ಲೋಸ್ ಆಗಿರುತ್ತದೆ. ಆದರೆ, ಈ ಶುಭ ಮುಹೂರ್ತದ ಸಮಯದಲ್ಲಿ ಕೇವಲ ಒಂದು ಗಂಟೆ ತೆರೆದಿರುತ್ತದೆ. ಈ ಸಮಯದಲ್ಲಿ ಟ್ರೇಡಿಂಗ್ ನಡೆಸುವುದು ಶುಭದಾಯಕ ಎಂಬ ನಂಬಿಕೆ ಕೂಡ ಇದೆ. ಅಲ್ಲದೆ, ಈ ಸಂಪ್ರದಾಯದಲ್ಲಿ ಧರ್ಮ ಹಾಗೂ ಸಂಸ್ಕೃತಿ ಸಮ್ಮಿಲನವಾಗಿರುವ ಕಾರಣ ಇದನ್ನು ಆಸಕ್ತಿದಾಯಕ ಆಚರಣೆಯನ್ನಾಗಿ ಪರಿಗಣಿಸಲಾಗುತ್ತದೆ. ಹಿಂದು ಸಂಪ್ರದಾಯದ ಪ್ರಕಾರ ಈ ವರ್ಷದ ದೀಪಾವಳಿ 2079ನೇ ಸಂವತ್ಸರದ ಪ್ರಾರಂಭವಾಗಿದ್ದು, ಹೊಸ ಆರ್ಥಿಕ ಸಾಲಿನ ಪ್ರಾರಂಭವಾಗಿದೆ. ಟ್ರೇಡರ್ಸ್ ಕೇವಲ ಒಂದು ಗಂಟೆಯಲ್ಲಿ ಷೇರ್ ಟ್ರೇಡಿಂಗ್ ನಡೆಸುತ್ತಾರೆ. ಹೀಗಾಗಿ ಇದನ್ನು ಮುಹೂರ್ತ ಟ್ರೇಡಿಂಗ್ ಎನ್ನುತ್ತಾರೆ. ಮುಹೂರ್ತ ಟ್ರೇಡಿಂಗ್ 2022 ಸಂಜೆ  6:15 ಹಾಗೂ 7:15ರ ನಡುವೆ ನಡೆಯಲಿದೆ. 

ಮುಹೂರ್ತ ಟ್ರೇಡಿಂಗ್ ಮಹತ್ವ
1957ರಲ್ಲಿ ಬಿಎಸ್ ಇ ಪ್ರಾರಂಭಿಸಿದ ಈ ಒಂದು ಗಂಟೆ ಅವಧಿಯ ದೀಪಾವಳಿ ಷೇರು ಟ್ರೇಡಿಂಗ್ ಸಂಪ್ರದಾಯವನ್ನು1992ರಲ್ಲಿ ಎನ್ ಎಸ್ ಇ ಕೂಡ ಆರಂಭಿಸಿತು. ಅಲ್ಲಿಂದ ಮುಂದೆ ಮುಹೂರ್ತ ಟ್ರೇಡಿಂಗ್ ಸಮಯದಲ್ಲಿ ಯಾವುದೇ ಒಪ್ಪಂದ ನಡೆಸಿದರೂ ಅದನ್ನು ಶುಭಕಾರಕ ಎಂದು ಪರಿಗಣಿಸಲಾಗುತ್ತದೆ. ಅದರಲ್ಲೂ ಅನುಭವಿ ಹೂಡಿಕೆದಾರರು ಈ ದಿನದಂದು ಖಂಡಿತವಾಗಿಯೂ ಷೇರುಗಳ ಮೇಲೆ ಹೂಡಿಕೆ ಮಾಡಿಯೇ ಮಾಡುತ್ತಾರೆ. ಆ ಮೂಲಕ ಹೂಡಿಕೆದಾರರು ಹೊಸ ಆರ್ಥಿಕ ವರ್ಷವನ್ನು ದೀಪಾವಳಿ ಶುಭ ಮುಹೂರ್ತದ ದಿನ ಟ್ರೇಡಿಂಗ್ ನಡೆಸುವ ಮೂಲಕ ಸ್ವಾಗತಿಸುತ್ತಾರೆ. ಮುಹೂರ್ತ ಟ್ರೇಡಿಂಗ್ ಸಂಪೂರ್ಣವಾಗಿ ಸಂಪ್ರದಾಯಕ್ಕೆ ಸಂಬಂಧಿಸಿದ್ದಾಗಿದೆ ಎಂದು ತಜ್ಞರು ಹೇಳುತ್ತಾರೆ. ಬಹುತೇಕ ಜನರು ಈ ದಿನದಂದು ಷೇರುಗಳನ್ನು ಖರೀದಿಸುತ್ತಾರೆ. ಈ ಹೂಡಿಕೆ ಅತ್ಯಂತ ಚಿಕ್ಕ ಪ್ರಮಾಣದಾಗಿದ್ದು, ಸಾಂಕೇತಿಕವಾಗಿದೆ.