ಮಹಾತ್ಮ ಗಾಂಧಿ ಕನ್ನಡಕ 2.55 ಕೋಟಿಗೆ ಹರಾಜು!

ಮಹಾತ್ಮ ಗಾಂಧಿ ಕನ್ನಡಕ 2.55 ಕೋಟಿಗೆ ಹರಾಜು| ಗಾಂಧೀಜಿ ದಕ್ಷಿಣ ಆಫ್ರಿಕಾದಲ್ಲಿ ವಕೀಲಿಕೆ ಮಾಡುತ್ತಿದ್ದಾಗ ಬಳಕೆ ಮಾಡುತ್ತಿದ್ದ ಎರಡು ಬಂಗಾರ ಲೇಪಿತ ಕನ್ನಡಕಗಳು 

ಲಂಡನ್‌(ಆ.23): ರಾಷ್ಟ್ರಪಿತ ಮಹಾತ್ಮ ಗಾಂಧಿ ಅವರು ದಕ್ಷಿಣ ಆಫ್ರಿಕಾದಲ್ಲಿ ವಕೀಲಿಕೆ ಮಾಡುತ್ತಿದ್ದಾಗ ಬಳಕೆ ಮಾಡುತ್ತಿದ್ದ ಎರಡು ಬಂಗಾರ ಲೇಪಿತ ಕನ್ನಡಕಗಳು ಬರೋಬ್ಬರಿ 2.55 ಕೋಟಿ ರು.ಗೆ ಹರಾಜಾಗಿದೆ. ಇಂಗ್ಲೆಂಡ್‌ನ ಈಸ್ಟ್‌ ಬ್ರಿಸ್ಟಲ್‌ ಆಕ್ಷನ್‌ ಸಂಸ್ಥೆಯಲ್ಲಿದ್ದ ಈ ಕನ್ನಡಕಗಳನ್ನು ಶುಕ್ರವಾರ ಹರಾಜು ಹಾಕಲಾಗಿದೆ.

ಆನ್‌ಲೈನ್‌ ಮೂಲಕ ಹರಾಜು ಪ್ರಕ್ರಿಯೆ ನಡೆದಿದ್ದು, 2.55 ಕೋಟಿ ರು.ಬಿಡ್‌ ಸಲ್ಲಿಸುವ ಮೂಲಕ ವ್ಯಕ್ತಿಯೊಬ್ಬರು ಗಾಂಧೀಜಿಯವರ ಕನ್ನಡಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಕೆಲ ದಿನಗಳ ಹಿಂದೆ ಈ ಕನ್ನಡಕಗಳನ್ನು ಕೆಲ ದಿನಗಳ ಹಿಂದೆ ಅನಾಮಿಕ ವ್ಯಕ್ತಿಯೊಬ್ಬರು, ಖ್ಯಾತ ಹರಾಜುಗಾರ ಆ್ಯಂಡ್ರ್ಯೂ ಸ್ಟೋವ್‌ ಅವರ ಕಚೇರಿಯ ಟಪಾಲು ಬಾಕ್ಸ್‌ಗೆ ಹಾಕಿ ಹೋಗಿದ್ದರು. ಅದರಲ್ಲಿ ‘ಇದು ಮಹಾತ್ಮ ಗಾಂಧಿಯವರಿಗೆ ಸೇರಿದ ಕನ್ನಡಕ’ ಎಂದು ಒಕ್ಕಣೆ ಬರೆದು ಹಾಕಿದ್ದರು.

ಬಳಿಕ ಈ ಬಗ್ಗೆ ಆ್ಯಂಡ್ರ್ಯೂ ನಡೆಸಿದ ಸಂಶೋಧನೆಯಲ್ಲಿ ಇದು ಗಾಂಧಿಯದ್ದೇ ಎಂದು ಗೊತ್ತಾಗಿತ್ತು. 1920ರ ಆಸುಪಾಸಿನಲ್ಲಿ ಗಾಂಧಿ ಈ ಕನ್ನಡಕಗಳನ್ನು ಬಳಸಿದ್ದಾಗಿ ಆ್ಯಂಡ್ರ್ಯೂ ಹೇಳಿದ್ದಾರೆ. ಹಾಗಾಗಿ ಇದನ್ನು ಹರಾಜಿಗೆ ನಿರ್ಧರಿಸಿದ 14 ಲಕ್ಷ ಮೂಲ ಬೆಲೆ ನಿಗದಿ ಪಡಿಸಿದ್ದರು.