Party Rounds: ವಿಶ್ವನಾಥ್‌ ಕಾಂಗ್ರೆಸ್‌ ಸೇರ್ಪಡೆ, ಸಿದ್ದು- ನಾನು ವೈರಿಯಲ್ಲ ಎಂದ ಹಳ್ಳಿಹಕ್ಕಿ

ಬೆಂಗಳೂರು (ಜ.11): ಸಿದ್ದರಾಮಯ್ಯ ನಾನು ವೈರಿಗಳು ಅಲ್ಲ. ಕೆಲವು ಭಿನ್ನಾಭಿಪ್ರಾಯಗಳು ಇರುವುದು ನಿಜ. ರಾಜಕಾರಣದಲ್ಲಿ ವಿರೋಧ ಬೇರೆ..ವೈರಿ ಬೇರೆ. ಅದನ್ನ ಒಂದು ಮಾಡಿ ಬಿಡುತ್ತಿದ್ದಿವಿ. ಸಿದ್ದರಾಮಯ್ಯ ಪರ ಪ್ರಚಾರಕ್ಕೆ ಹೋದ್ರೆ ತಪ್ಪೇನು?  ನಾನು ಸಿದ್ದರಾಮಯ್ಯ ಪರ ಪ್ರಚಾರ ಮಾಡುವೆ ಎಂದು ರಾಯಚೂರಿನಲ್ಲಿ ವಿಧಾನ ಪರಿಷತ್ ಸದಸ್ಯ ಎಚ್. ವಿಶ್ವನಾಥ ‌ಅಚ್ಚರಿಯ ಹೇಳಿಕೆ ನೀಡಿದ್ದಾರೆ.  ಸಿದ್ದರಾಮಯ್ಯ ರಾಜ್ಯದ ಸಿಎಂ ಆಗಿ ಕೆಲಸ ಮಾಡಿದವರು. ಸಿದ್ದರಾಮಯ್ಯ ನಾನು ವೈರಿಗಳು ಅಲ್ಲ. ಕೆಲವು ಭಿನ್ನಾಭಿಪ್ರಾಯಗಳು ಇರುವುದು ನಿಜ. ಅವರ ಪರವಾಗಿ ಪ್ರಚಾರಕ್ಕೆ ಹೋಗುತ್ತೇನೆ. ಚುನಾವಣೆ ಸಮೀಪ ಬರಲಿ ನನ್ನ ‌ನಿರ್ಧಾರ ತಿಳಿಸುವೆನು ಎಂದರು.

ಸ್ಯಾಂಟ್ರೋ ರವಿ ಬಾಂಬೆ ಬಾಯ್ಸ್ ಜೊತೆಗೆ ‌ಒಡನಾಟ ವಿಚಾರವಾಗಿ ಮಾತನಾಡಿ, ಬಾಂಬೆ ಬಾಯ್ಸ್ ಜೊತೆಗೆ ಸ್ಯಾಂಟ್ರೋ ರವಿ ಇದ್ದ  ಕುಮಾರಸ್ವಾಮಿ ಮಾತು ಸತ್ಯಕ್ಕೆ ದೂರವಾದ ಮಾತು. ಸುಳ್ಳಿನ ಕಂತೆ, ಬುರೆಡೆ ಇದು. ಯಾರದೋ ಮೇಲೆ ಮಸಿ ಎರೆಚಿ ಹೋಗುವುದು ಕುಮಾರಸ್ವಾಮಿಗೆ ಶೋಭಾಮಾನವಲ್ಲ. ನಿಮಗೆ ಏನಾದರೂ ಗೊತ್ತಿದ್ರೇ ಸರಿಯಾಗಿ ಹೇಳಿ.. ಯಾವ ತಾರೀಖು, ಎಲ್ಲಿ ಏನು, ಹೇಗೆ, ಯಾರ ಜೊತೆಗೆ ಇದ್ರು ಹೇಳಿ. ಅದುಬಿಟ್ಟು ಸಂದರ್ಭದ ಬಂದಾಗ.. ಏನು ಸಂದರ್ಭ ಈ ಸಂದರ್ಭದಲ್ಲಿಯೇ ಹೇಳಿ. ಯಾಕೆ ಸುಮ್ಮನೇ ಸುಳ್ಳು ಹೇಳಿ  ಓಡಿ ಹೋಗುತ್ತೀರಿ. ಎರಡು ಬಾರಿ ಸಿಎಂ ಆದವರಿಗೆ ಇದು ಶೋಭಾಯಮಾನವಲ್ಲ. ನಿಮ್ಮ ಬಾಯಿಯಲ್ಲಿ ಇಂಥ ಮಾತು ಬರಬಾರದು ಎಂದರು.

2023ರ ಚುನಾವಣೆ ಸ್ಪರ್ಧೆ ವಿಚಾರ ನಾನು ಯಾವುದೇ ತೀರ್ಮಾನ ‌ಮಾಡಿಲ್ಲ. 2023ರ ಚುನಾವಣೆ ಏನೇನು ಆಗುತ್ತೋ ಏನೋ ಗೊತ್ತಿಲ್ಲ. ಎಲ್ಲಾ ರಿಯಲ್ ಎಸ್ಟೇಟ್ ನವರು, ದುಡ್ಡು ಇದ್ದ ಗಿರಾಕಿಗಳು ನುಗ್ಗುತ್ತಿದ್ದಾರೆ. ಇದರಲ್ಲಿ ನಾವು ಎಲ್ಲಿ ನೋಡೋಣ ಎಂದು ವಿಶ್ವನಾಥ ಹೇಳಿದರು.