ಎಷ್ಟು ಸಲ ಸಿಹಿಯನ್ನು ಕಿಡ್ನಾಪ್​ ಮಾಡಿಸ್ತೀರಾ? ಸೀತಾರಾಮ ವಿರುದ್ಧ ರೊಚ್ಚಿಗೆದ್ದ ಸೀರಿಯಲ್​ ಪ್ರೇಮಿಗಳು

ಸಿಹಿಯನ್ನು ಮೂರನೆಯ ಬಾರಿ ಕಿಡ್ನಾಪ್​ ಮಾಡಲಾಗಿದೆ.  ಭಾರ್ಗವಿ ಮತ್ತು ಗಂಡ ಈ ಕೆಲಸ ಮಾಡಿಸಿದ್ದಾರೆ. ಇದಕ್ಕೆ ನೆಟ್ಟಿಗರು ಹೇಳ್ತಿರೋದೇನು?  

ಒಂದು ಹಂತಕ್ಕೆ ಸೀರಿಯಲ್​ ಬಂದಾಗ, ಅದರ ಟಿಆರ್​ಪಿ ನೋಡಿ ಅದನ್ನು ಚ್ಯೂಯಿಂಗ್ ಗಮ್​ನಂತೆ ಎಳೆಯುವುದು ಹೊಸ ವಿಷಯವೇನಲ್ಲ. ಇದೇ ಕಾರಣಕ್ಕೆ ಒಂದು ಸೀರಿಯಲ್​ ಐದಾರು ವರ್ಷಗಳಿಂದ ಹಿಡಿದು 8-10 ವರ್ಷ ಎಳೆಯುವುದೂ ಉಂಟು. ಆರಂಭದಲ್ಲಿ ಒಂದಿಷ್ಟು ಕುತೂಹಲ ಎನಿಸಿಕೊಳ್ಳುವ ಸೀರಿಯಲ್​ಗಳು ಕೊನೆ ಕೊನೆಯಲ್ಲಿ ಏನೇನೋ ಕಥೆಗಳನ್ನು ತುರುಕುವ ಮೂಲಕ ಸಪ್ಪೆಯಾಗಿ ಕೊನೆಗೆ ದಿಢೀರ್​ ಎಂದು ಹೇಗೇಗೋ ಮುಗಿಸುವ ಉದಾಹರಣೆಗಳು ಸಾಕಷ್ಟಿವೆ.  ಆದರೆ ಜಾಹೀರಾತು, ಟಿಆರ್​ಪಿ ರೇಟ್​ ಬರುತ್ತಿರುವ ಸಂದರ್ಭದಲ್ಲಿ ಸೀರಿಯಲ್​ಗಳನ್ನು ಎಳೆಯುವುದು ಅನಿವಾರ್ಯವೂ ಆಗಿರುತ್ತದೆ. ಇದೇ ಕಾರಣಕ್ಕೆ ಎಷ್ಟೋ ಸೀರಿಯಲ್​ಗಳು ಆರಂಭದಲ್ಲಿ ಇರಿಸಿಕೊಂಡಿರುವ ಕುತೂಹಲವನ್ನು ಕೊನೆಯವರೆಗೂ ಉಳಿಸಿಕೊಳ್ಳುವುದೇ ಇಲ್ಲ.

ಇದೀಗ ಸೀತಾರಾಮ ಸೀರಿಯಲ್​ ಕೂಡ ಹೀಗೆಯೇ ಆಗುತ್ತಿದೆ ಎಂದು ಸೋಷಿಯಲ್​  ಮೀಡಿಯಾದಲ್ಲಿ ಬಹಳ ಟೀಕೆ ವ್ಯಕ್ತವಾಗುತ್ತಿದೆ. ಇಲ್ಲಿಯವರೆಗೆ ಸೀತಾ ಮತ್ತು ರಾಮರ ಮದುವೆಗಾಗಿ ಎಲ್ಲರೂ ಕಾಯುತ್ತಿದ್ದರು. ಇವರಿಬ್ಬರ ನವಿರಾದ ಪ್ರೀತಿಗೆ ಸೀರಿಯಲ್​ ಪ್ರೇಮಿಗಳು ಮನಸೋತಿದ್ದರು. ಇವರಿಬ್ಬರ ಮದುವೆ ಯಾವಾಗ ಆಗುತ್ತದೆ ಎಂದು ಕಾದು ಕುಳಿತಿದ್ದರು. ಭಾರ್ಗವಿ, ರುದ್ರ ಪ್ರತಾಪ್​ ಹೀಗೆ ಕೆಲವು ವಿಲನ್​ಗಳು ಇವರ ಮದುವೆಯನ್ನು ಮುರಿಯಲು ಪ್ರಯತ್ನ ಮಾಡಿದ್ದೆಲ್ಲಾ ವಿಫಲವಾದಾಗ ಒಂದು ಹಂತದಲ್ಲಿ ಇವರ ಮದುವೆ ನಿರ್ವಿಘ್ನವಾಗಿ ನಡೆಯುವುದನ್ನು ನೋಡಲು ಖುಷಿ ಪಟ್ಟವರು ಅದೆಷ್ಟೋ ಮಂದಿ. ಇದೊಂದು ಸೀರಿಯಲ್​ ಎನ್ನುವುದನ್ನೂ ಮರೆತು, ಇವರಿಬ್ಬರ ಮದುವೆ ಸಲೀಸಾಗಿ ನಡೆಯಲಿ ಎಂದು ಪ್ರಾರ್ಥಿಸಿದವರೂ ಇದ್ದಾರೆ. ಅದು ಈಡೇರಿದೆ ಕೂಡ.

ಆದರೆ ಇದೀಗ ಯಾಕೋ, ಸಿಹಿಯನ್ನೇ ಮುಂದು ಮಾಡಿಕೊಂಡು ಸೀರಿಯಲ್​ ಅನ್ನು ಅಡ್ಡಾದಿಡ್ಡಿ ಕೊಂಡೊಯ್ಯಲಾಗುತ್ತಿದೆ ಎಂದು ಸೋಷಿಯಲ್​  ಮೀಡಿಯಾದಲ್ಲಿ ಕಮೆಂಟ್​ ಸುರಿಮಳೆ ಆಗ್ತಿದೆ. ಈ ಹಿಂದೆ ಎರಡು ಬಾರಿ ಸಿಹಿಯನ್ನು ಕಿಡ್​ನ್ಯಾಪ್​ ಮಾಡಿಸಲಾಗಿದೆ. ಆಗ ಭಾರ್ಗವಿ ಮತ್ತು ರುದ್ರಪ್ರತಾಪ್​ ಈ ಕೆಲಸ ಮಾಡಿಸಿದ್ದರು. ಇನ್ನೇನು ಇಬ್ಬರೂ ಒಂದಾಗುತ್ತಿದ್ದಾರೆ ಎನ್ನುವಾಗಲೇ, ಸಿಹಿಯನ್ನು ರಾಮ್​ ಎತ್ತಿಕೊಂಡ ಸಂದರ್ಭದಲ್ಲಿ ವ್ಯಕ್ತಿಯೊಬ್ಬ ಬಂದು ರಾಮ್​ನ ಕೈಯನ್ನು ಚಾಕುವಿನಿಂದ ಇರಿದು ಹೋಗಿದ್ದ. ನಂತರ ಬೈಕ್​ ಮೇಲೆ ಹತ್ತಿಕೊಂಡು ಹೋದ. ಚಾಕುವಿನ ಇರಿತಕ್ಕೆ ರಾಮ್​ ವಿಲವಿಲ ಒದ್ದಾಡುತ್ತಿದ್ದರೂ, ಹೆಗಲ ಮೇಲಿದ್ದ ಸಿಹಿಯನ್ನು ಬೀಳಲು ಕೊಡಲಿಲ್ಲ. ಇದಕ್ಕೂ ಮುನ್ನ,  ಸೀತಾ ಮತ್ತು ಸಿಹಿ ಹೋಗುತ್ತಿರುವ ಹೊತ್ತಿಗೆ ಓರ್ವ ಆಗಂತುಕ ಬೈಕ್​ನಲ್ಲಿ ಬಂದು ಗಾಬರಿ ಹುಟ್ಟಿಸಿದ್ದ.  ಸಿಹಿಯ ಅಪಹರಣ ಮಾಡಿಕೊಂಡು ಬೈಕ್​ನಲ್ಲಿ ಹೋಗಲಾಗಿತ್ತು. ಅದಕ್ಕೂ ಮುನ್ನವೂ ಸಿಹಿಯನ್ನು ಅಪಹರಿಸಲಾಗಿತ್ತು.

ಇದೀಗ ಮತ್ತದೇ ಡ್ರಾಮಾ. ಈ ಬಾರಿ ಭಾರ್ಗವಿ ಜೊತೆ ಗಂಡ ಸೇರಿಕೊಂಡಿದ್ದಾನೆ. ಸಿಹಿಯನ್ನು ದೂರ ಮಾಡಿದರಷ್ಟೇ ಸೀತಾ ಮತ್ತು ರಾಮ ವಿಲವಿಲ ಎನ್ನುತ್ತಾರೆ ಎನ್ನುವುದು ಅವರಿಗೆ ಗೊತ್ತು. ಇದೇ ಕಾರಣಕ್ಕೆ ಸಿಹಿಯನ್ನು  ಅಪಹರಿಸಲು ನೋಡಿದ್ದಾರೆ. ಇದಾಗಲೇ ಅಪ್ಪ-ಅಮ್ಮ ಚೆನ್ನಾಗಿ ಇರಬೇಕು ಎಂದರೆ ನೀನು ದೂರವಾಗಬೇಕು ಎಂದು ಸಿಹಿಯ ತಲೆಗೆ  ಭಾರ್ಗವಿ ತುಂಬುತ್ತಲೇ ಬಂದಿದ್ದಾಳೆ. ಸಾಲದು ಎಂಬುದಕ್ಕೆ ಆಕೆಯ ಮಗನೂ ಸಿಹಿಗೆ ಟಾರ್ಚರ್​ ಕೊಡುತ್ತಿದ್ದಾನೆ. ಇದೀಗ ಶಾಲೆಯಿಂದ ಸಿಹಿಯನ್ನು ಕಿಡ್​ನ್ಯಾಪ್​ ಮಾಡಲಾಗಿದೆ. ಇದರ ಪ್ರೊಮೋ ಬಿಡುಗಡೆಯಾಗುತ್ತಿದ್ದಂತೆಯೇ ನೆಟ್ಟಿಗರು ಒಂದೇ ಸಮನೆ ಸೀರಿಯಲ್ ಅನ್ನು ಬೈಯುತ್ತಿದ್ದಾರೆ. ಎಷ್ಟು ಅಂತ ಹೇಳಿದ್ದನ್ನೇ ಹೇಳ್ತೀರಾ, ಬೇರೆ ಕಥೆ ಇಲ್ವಾ? ಡಬ್ಬಾ ಸೀರಿಯಲ್​ ಆಗ್ತಿದೆ ಎಂದೆಲ್ಲಾ ಕಮೆಂಟ್​  ಮಾಡ್ತಿದ್ದಾರೆ. ಮುಂದೇನಾಗುತ್ತೋ ನೋಡಬೇಕಿದೆ.