ಧರ್ಮಸ್ಥಳ ಕೇಸ್‌ ನಡುವೆ ನೀವು ನೋಡಲೇಬೇಕಾದ ಸಿನಿಮಾ 'ರೇಖಾಚಿತ್ರಂ'!

ಧರ್ಮಸ್ಥಳದಲ್ಲಿ ನಡೆದ ಶವಗಳ ಹೂಳುವಿಕೆ ಪ್ರಕರಣದ ತನಿಖೆ ನಡೆಯುತ್ತಿರುವ ಹೊತ್ತಿನಲ್ಲಿ, ಮಲಯಾಳಂ ಸಿನಿಮಾ 'ರೇಖಾಚಿತ್ರಂ' ನೈಜ ಘಟನೆಗಳನ್ನು ನೆನಪಿಸುತ್ತದೆ. ಈ ಚಿತ್ರವು ಹಳೆಯ ಕೊಲೆ ಪ್ರಕರಣವೊಂದರ ತನಿಖೆ, ಸಾಕ್ಷ್ಯ ಸಂಗ್ರಹಣೆ, ನ್ಯಾಯದಾನದ ಹೋರಾಟವನ್ನು ಒಳಗೊಂಡಿದೆ.

ಬೆಂಗಳೂರು (ಜು.29): ಕರ್ನಾಟಕದಲ್ಲಿ ಧರ್ಮಸ್ಥಳದಲ್ಲಿ ನೂರಾರು ಶವಗಳನ್ನು ಹೂತಿಟ್ಟ ಪ್ರಕರಣ ಈಗ ವ್ಯಾಪಕ ಚರ್ಚೆಯಲ್ಲಿದೆ. ಹಲವು ವರ್ಷಗಳ ಹಿಂದೆ ನಡೆದ ಈ ಘಟನೆಯ ತನಿಖೆಯನ್ನು ವಿಶೇಷ ತನಿಖಾ ತಂಡ (SIT) ನಡೆಸುತ್ತಿದ್ದು, ಹೂತಿಟ್ಟ ಶವಗಳನ್ನು ಪತ್ತೆ ಹಚ್ಚಿ, ಅವುಗಳ ಹಿಂದಿನ ಸತ್ಯವನ್ನು ಬಯಲು ಗುರಿಯಲ್ಲಿದ್ದಾರೆ. ದೂರುದಾರ ಗುರುತಿಸಿದ ಪ್ರದೇಶದಲ್ಲಿ ಜೆಸಿಬಿ ಬಳಸಿ ಅಗೆಯುವ ಕೆಲಸ ಸಾಗುತ್ತಿದೆ. ಈ ಹಂತದಲ್ಲಿ, 2025ರಲ್ಲಿ ಬಿಡುಗಡೆಯಾದ ಮಲಯಾಳಂ ಚಲನಚಿತ್ರ 'ರೇಖಾಚಿತ್ರಂ' ಸಿನಿಮಾವನ್ನು ನೀವು ನೋಡಲೇಬೇಕು. ಬಹುಶಃ ಧರ್ಮಸ್ಥಳದಲ್ಲಿ ನಿಜವಾಗಿ ಆಗುತ್ತಿರುವುದನ್ನೇ ಆ ಸಿನಿಮಾದಲ್ಲಿ ತೋರಿಸಲಾಗಿದೆಯೇನೋ ಎನ್ನುವಷ್ಟರ ಮಟ್ಟಿಗೆ ಸಾಮ್ಯತೆ ಹೊಂದಿರುವ ಸಿನಿಮಾ ಇದು.

ನೈಜ ಘಟನೆಗಳೊಂದಿಗೆ ಬೆಸೆಯುವ ಸಸ್ಪೆನ್ಸ್ ಥ್ರಿಲ್ಲರ್ ಸಿನಿಮಾ ರೇಖಾಚಿತ್ರಂ. ಧರ್ಮಸ್ಥಳ ಪ್ರಕರಣದ ಸುದ್ದಿಗಳು ಮುನ್ನಲೆಗೆ ಬಂದಿರುವಾಗ, 'ರೇಖಾಚಿತ್ರಂ' ಸಿನಿಮಾ ಏಕೆ ಮಿಸ್‌ ಮಾಡದೇ ನೋಡಲೇಬೇಕಾದ ಸಿನಿಮಾ ಎಂಬುದನ್ನು ನೋಡೋಣ.

'ರೇಖಾಚಿತ್ರಂ' - ಕಾಲದ ಮರೆಯಲ್ಲಿ ಅಡಗಿದ ಸತ್ಯದ ಹುಡುಕಾಟ

'ರೇಖಾಚಿತ್ರಂ' ಸಿನಿಮಾ ಸಸ್ಪೆನ್ಸ್‌ ಥ್ರಿಲ್ಲರ್‌ ಕಥಾಹಂದರವನ್ನು ಹೊಂದಿದೆ. ಸಿನಿಮಾದ ನಾಯಕ ವಿವೇಕ್‌ ಗೋಪಿನಾಥ್‌, ಅಕ್ಷರಶಃ ಕಾಲದ ಧೂಳಿನಲ್ಲಿ ಅಡಗಿರುವ ಸತ್ಯವನ್ನು ಹೊರತೆಗೆಯುವ ಸಾಹಸಕ್ಕೆ ಮುಂದಾಗುತ್ತಾರೆ. 1985ರಲ್ಲಿ ರೇಖಾ ಎಂಬ ಅನಾಮಿಕ ಹುಡುಗಿಯ ಸಾವಿನ ತನಿಖೆಗೆ ಮುಂದಾಗುತ್ತಾರೆ. ತಮ್ಮ ಮಧ್ಯವಯಸ್ಸಿನಲ್ಲಿ ಇಬ್ಬರು ಮಾಡಿದ್ದ ಕೊಲೆಯೊಂದನ್ನು ನಾಲ್ವರು ಸೇರಿ ಮುಚ್ಚಿ ಹಾಕಿರುತ್ತಾರೆ. ಪ್ರಸ್ತುತ ಈ ನಾಲ್ವರದ್ದು ಒಂದೊಂದು ದಿಕ್ಕು. ಇದರಲ್ಲಿ ಒಬ್ಬ ವ್ಯಕ್ತಿ, 30 ವರ್ಷಗಳ ಹಿಂದೆ ತಾವು ಹೂತುಹಾಕಿದ್ದ ಯುವತಿಯ ಸಮಾಧಿಯ ಮೇಲೆ ಕೂತು ಫೇಸ್‌ಬುಕ್‌ ಲೈವ್‌ ಮಾಡಿ ಸಾವಿಗೆ ಶರಣಾಗುತ್ತಾನೆ. ಅಲ್ಲಿಂದ ಕಥೆಯಲ್ಲಿ ನಾಯಕ ವಿವೇಕ್‌ ಗೋಪಿನಾಥ್‌ ಎಂಟ್ರಿಯಾಗಿ ಕುತೂಹಲ ಆರಂಭವಾಗುತ್ತದೆ. ಹಲವು ವರ್ಷಗಳ ಹಿಂದೆ ನಡೆದ, ಸಮಾಜ ಮರೆತುಹೋಗಿದ್ದ ಒಂದು ಕೊಲೆ ಪ್ರಕರಣವನ್ನು ಬೇಧಿಸಿ, ಕೊಲೆ ಮಾಡಿದ ವ್ಯಕ್ತಿಗೆ ಶಿಕ್ಷೆ ಕೊಡಿಸುತ್ತಾರಾ? ಇಲ್ಲವಾ ಅನ್ನೋದೇ ಇಡೀ ಸಿನಿಮಾದ ಜೀವಾಳ.

ಸಿನಿಮಾವು, ಕೇವಲ ಒಂದು ಕೊಲೆಯ ತನಿಖೆಯಲ್ಲದೆ, ಆ ಕಾಲಘಟ್ಟದ ಸಾಮಾಜಿಕ ಪರಿಸ್ಥಿತಿಗಳು, ನ್ಯಾಯ ವ್ಯವಸ್ಥೆಯ ಸವಾಲುಗಳು ಮತ್ತು ಕಾಲ ಕಳೆದಂತೆ ಸಾಕ್ಷ್ಯಗಳು ಹೇಗೆ ಮಾಯವಾಗಬಹುದು ಎಂಬುದನ್ನು ಸೂಕ್ಷ್ಮವಾಗಿ ಕಟ್ಟಿಕೊಡುತ್ತದೆ. ವಿವೇಕ್‌ ಪಾತ್ರವು, ಹಳೆಯ ದಾಖಲೆಗಳನ್ನು ಕೆದಕಿ, ಮೌನವಾದ ಸಾಕ್ಷಿಗಳನ್ನು ಮಾತನಾಡಿಸಿ, ಮರೆತುಹೋಗಿದ್ದ ವ್ಯಕ್ತಿಗಳನ್ನು ಹುಡುಕಿ ಸತ್ಯವನ್ನು ಜೋಡಿಸುವ ಪ್ರಯತ್ನ ಮಾಡುತ್ತದೆ. ತನಿಖೆಯ ಹಾದಿಯಲ್ಲಿ ಎದುರಾಗುವ ಅಡೆತಡೆಗಳು, ಬೆದರಿಕೆಗಳು ಮತ್ತು ಭಾವನಾತ್ಮಕ ಕ್ಷಣಗಳು ಪ್ರೇಕ್ಷಕರನ್ನು ಕುರ್ಚಿಯ ತುದಿಯಲ್ಲಿ ಕೂರಿಸುತ್ತವೆ.

ಇನ್ನು ಧರ್ಮಸ್ಥಳ ಪ್ರಕರಣದಲ್ಲಿ SIT ಕೂಡ ಹಲವು ವರ್ಷಗಳ ಹಿಂದಿನ ಶವಗಳನ್ನು ಪತ್ತೆ ಹಚ್ಚುವ ಸವಾಲನ್ನು ಎದುರಿಸುತ್ತಿದೆ. ಮೃತದೇಹಗಳು ಸಿಕ್ಕರೆ, ಅವುಗಳ DNA ಪರೀಕ್ಷೆ, ವಯಸ್ಸು, ಲಿಂಗ ನಿರ್ಧಾರ ಮತ್ತು ಫೇಸ್ ರೀಕನ್‌ಸ್ಟ್ರಕ್ಷನ್‌ನಂತಹ ಫೋರೆನ್ಸಿಕ್ ಪ್ರಕ್ರಿಯೆಗಳು ನಡೆಯಲಿವೆ. ಇದು 'ರೇಖಾಚಿತ್ರಂ' ಸಿನಿಮಾದಲ್ಲಿ ನಾಯಕ ಎದುರಿಸುವ ಸವಾಲುಗಳಿಗೆ ಹೋಲುತ್ತದೆ. ಸಿನಿಮಾವು ಫೋರೆನ್ಸಿಕ್ ವಿಜ್ಞಾನ, ಸುಳಿವುಗಳ ಸಂಗ್ರಹಣೆ ಮತ್ತು ಹಳೆಯ ಪ್ರಕರಣಗಳನ್ನು ಭೇದಿಸುವಲ್ಲಿ ತಂತ್ರಜ್ಞಾನದ ಪಾತ್ರವನ್ನು ವಾಸ್ತವಿಕವಾಗಿ ಚಿತ್ರಿಸುತ್ತದೆ.

ಧರ್ಮಸ್ಥಳ ಪ್ರಕರಣದಲ್ಲಿ 'ಅನಾಮಿಕ' ದೂರುದಾರನ ಹೇಳಿಕೆಗಳು, ಆತ ತಂದುಕೊಟ್ಟ ಬುರುಡೆಯ ಸುತ್ತ ಎಸ್‌ಐಟಿ ತನಿಖೆ ಸುತ್ತಿರುವುದು, ಮತ್ತು 1983, 2010ರಂತಹ ಹಳೆಯ ಘಟನೆಗಳನ್ನು ಕೆದಕುತ್ತಿರುವುದು, 'ರೇಖಾಚಿತ್ರಂ' ಕಥಾಹಂದರಕ್ಕೆ ಇನ್ನಷ್ಟು ನಿಕಟ ಸಂಬಂಧವನ್ನು ಕಲ್ಪಿಸುತ್ತದೆ. ನ್ಯಾಯಕ್ಕಾಗಿ ಹೋರಾಡುವ ಮನೋಭಾವ, ಸತ್ಯವನ್ನು ಹೊರತರಲು ಇರುವ ಛಲ, ಮತ್ತು ಕಾಲ ಕಳೆದರೂ ನ್ಯಾಯ ಸಿಗಲೇಬೇಕು ಎಂಬ ಧ್ಯೇಯ - ಇವೆಲ್ಲವೂ ಎರಡರಲ್ಲೂ ಸಾಮಾನ್ಯ ಅಂಶಗಳಾಗಿವೆ.

'ರೇಖಾಚಿತ್ರಂ' ಕೇವಲ ಒಂದು ಥ್ರಿಲ್ಲರ್ ಸಿನಿಮಾವಲ್ಲ. ಇದು ಸತ್ಯದ ಹುಡುಕಾಟದ ಬಗ್ಗೆ, ನ್ಯಾಯಕ್ಕಾಗಿ ನಡೆಸುವ ಅಚಲ ಹೋರಾಟದ ಬಗ್ಗೆ, ಮತ್ತು ಕಾಲದ ಪರೀಕ್ಷೆಯನ್ನು ಎದುರಿಸಿ ಗೆಲ್ಲುವ ಮಾನವ ಸಂಕಲ್ಪದ ಬಗ್ಗೆ ಹೇಳುತ್ತದೆ. ಧರ್ಮಸ್ಥಳ ಪ್ರಕರಣದಂತಹ ಸೂಕ್ಷ್ಮ ವಿಷಯಗಳು ಚರ್ಚೆಯಲ್ಲಿರುವಾಗ, 'ರೇಖಾಚಿತ್ರಂ' ಸಿನಿಮಾವು ಇಂತಹ ಪ್ರಕರಣಗಳ ಜಟಿಲತೆ, ತನಿಖೆಯ ಸವಾಲುಗಳು ಮತ್ತು ನ್ಯಾಯದ ಮಹತ್ವವನ್ನು ಪ್ರೇಕ್ಷಕರಿಗೆ ಅರ್ಥಮಾಡಿಸುತ್ತದೆ.

ಅದ್ಭುತ ನಟನೆ, ಬಿಗಿಯಾದ ಚಿತ್ರಕಥೆ, ಮತ್ತು ಭಾವನಾತ್ಮಕವಾಗಿ ಕನೆಕ್ಟ್ ಆಗುವ ನಿರೂಪಣೆಯಿಂದ 'ರೇಖಾಚಿತ್ರಂ' ಒಂದು ಪರಿಪೂರ್ಣ ಸಿನಿಮಾವಾಗಿದೆ. ಇದು ಕೇವಲ ಮನರಂಜನೆ ನೀಡದೆ, ಪ್ರೇಕ್ಷಕರಿಗೆ ನೈಜ-ಜೀವನದ ಪ್ರಕರಣಗಳ ಬಗ್ಗೆ ಆಲೋಚಿಸುವಂತೆ ಪ್ರೇರೇಪಿಸುತ್ತದೆ. ಧರ್ಮಸ್ಥಳ ಪ್ರಕರಣದ ಬೆಳವಣಿಗೆಗಳನ್ನು ಗಮನಿಸುತ್ತಿರುವ ಪ್ರತಿಯೊಬ್ಬರೂ, ಇಂತಹ ಪ್ರಕರಣಗಳ ಹಿಂದಿರುವ ಕಠಿಣ ಪರಿಶ್ರಮ ಮತ್ತು ಮಾನವೀಯ ಆಯಾಮಗಳನ್ನು ಅರ್ಥಮಾಡಿಕೊಳ್ಳಲು 'ರೇಖಾಚಿತ್ರಂ' ಅನ್ನು ಖಂಡಿತಾ ನೋಡಲೇಬೇಕು.

ಜೋಫಿನ್‌ ಟಿ ಚಾಕ್ಕೋ ನಿರ್ದೇಶನದ ಸಿನಿಮಾದಲ್ಲಿ ಆಸಿಫ್‌ ಅಲಿ ನಾಯಕ ವಿವೇಕ್‌ ಗೋಪಿನಾಥ್‌ ಪಾತ್ರದಲ್ಲಿ ನಟಿಸಿದ್ದರೆ, ಅನ್ಸ್ವರಾ ರಾಜನ್‌ ಮುಖ್ಯಪಾತ್ರದಲ್ಲಿದ್ದಾರೆ. ಸೋನಿ ಲಿವ್‌ (Sony LIV) ಒಟಿಟಿಯಲ್ಲಿ ಈ ಸಿನಿಮಾ ನೋಡಬಹುದಾಗಿದೆ.