ನಿಖಿಲ್​ ಎಲ್ಲಿದ್ದೀಯಪ್ಪ... ಡೈಲಾಗ್​ ರೂವಾರಿ ಇವ್ರೇ ನೋಡಿ... ಅಂದು ನಡೆದ ಘಟನೆ ವಿವರಿಸಿದ ನಟಿ ಶಾಲಿನಿ...

ಎಲ್ಲರ ಬಾಯಲ್ಲೂ ನಲಿದಾಡುತ್ತಿರುವ, ಸಾಕಷ್ಟು ಟ್ರೋಲ್​ಗಳಿಗೆ ಬಳಸಿಕೊಳ್ಳುತ್ತಿರುವ ನಿಖಿಲ್​ ಎಲ್ಲಿದ್ದಿಯಪ್ಪಾ ಡೈಲಾಗ್​ ರೂವಾರಿ ಯಾರು ಗೊತ್ತಾ?      

ನಿಖಿಲ್​ ಎಲ್ಲಿದ್ದೀಯಪ್ಪ ಎನ್ನೋ ಡೈಲಾಗ್​ ಎಷ್ಟು ಫೇಮಸ್​ ಎನ್ನೋದು ಬಹುಶಃ ಎಲ್ಲರಿಗೂ ತಿಳಿದದ್ದೇ. 2019ರಲ್ಲಿನ ಈ ಡೈಲಾಗ್​, ಐದು ವರ್ಷ ಆದ್ರೂ ಸಕತ್​ ಫೇಮಸ್​ ಆಗಿಯೇ ಇದೆ. ಅದರಲ್ಲಿಯೂ ಈ ಡೈಲಾಗ್​ ಅನ್ನು ಟ್ರೋಲ್​ಗೆ ಹೆಚ್ಚು ಬಳಸಿಕೊಳ್ಳಲಾಗುತ್ತಿದೆ. ನಿಖಿಲ್​ ಜಾಗದಲ್ಲಿ ಬೇರೆ ಬೇರೆ ಹೆಸರುಗಳು ಸೇರಿಕೊಳ್ಳುತ್ತಿವೆ ಅಷ್ಟೇ. ಎಲ್ಲಿದ್ದೀಯಪ್ಪ ಎನ್ನೋದೇನೂ ಹೊಸ ಶಬ್ದವಲ್ಲ. ದಿನವೂ ಎಲ್ಲರ ಮನೆಯಲ್ಲಿಯೂ ಹೇಳುವುದೇ. ಆದರೆ ಒಂದೊಂದು ಡೈಲಾಗ್​ಗಳು ಹಾಗೇ ಅಲ್ವಾ? ಅದ್ಹೇಗೆ ಅಷ್ಟು ವೈರಲ್​ ಆಗಿ, ಎಲ್ಲರ ಬಾಯಲ್ಲೂ ನಲಿದಾಡಿಬಿಡುತ್ತವೆ ಎಂದು ಹೇಳೋದೇ ಕಷ್ಟ. ಆ ಡೈಲಾಗ್​ ಹೇಳಿದವರು ಕೂಡ ಇದು ಇಷ್ಟೆಲ್ಲಾ ಫೇಮಸ್​ ಆಗುತ್ತೆ ಎಂದು ಕನಸು ಮನಸಿನಲ್ಲಿಯೂ ಅಂದುಕೊಂಡಿರುವುದಿಲ್ಲ. 

ಅಷ್ಟಕ್ಕೂ ನಿಖಿಲ್​ ಎಲ್ಲಿದ್ದೀಯಪ್ಪ ಎನ್ನುವುದು ಕಳೆದ ಲೋಕಸಭೆ ಎಲೆಕ್ಷನ್​ ವೇಳೆ ಆಗಿದ್ದು. ಅಂದರೆ 2019ರಲ್ಲಿ. ಮಂಡ್ಯ ಲೋಕಸಭೆ ಅಭ್ಯರ್ಥಿಯಾಗಿದ್ದ ನಿಖಿಲ್ ಕುಮಾರಸ್ವಾಮಿ ಅವರನ್ನು ಜನರ ಮಧ್ಯೆ ಹುಡುಕಲು ಅಪ್ಪ ಎಚ್​.ಡಿ. ಕುಮಾರಸ್ವಾಮಿ ಅವರು ಇದನ್ನು ಬಳಸಿಕೊಂಡಿದ್ದರು. ನಂತರ ನಿಖಿಲ್​ ಅವರು ಚುನಾವಣೆಯಲ್ಲಿ ಸೋತ ಮೇಲಂತೂ ಈ ಡೈಲಾಗ್​ ಹಿಡಿದು ಟ್ರೋಲ್​  ಮಾಡಿದವರು ಅದೆಷ್ಟೋ ಮಂದಿ. ಸೋಷಿಯಲ್​  ಮೀಡಿಯಾಗಳಲ್ಲಂತೂ ಇದರದ್ದೇ ಹವಾ. ಅಷ್ಟಕ್ಕೂ ನಿಮಗೆ ಈ ಘಟನೆಯೂ ನೆನಪಿರಬಹುದು. ಲೋಕಸಭೆಯ ಎಲೆಕ್ಷನ್​ ಸಮಯದಲ್ಲಿಯೇ ಮಂಡ್ಯದಲ್ಲಿ ನಿಖಿಲ್ ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ 'ಜಾಗ್ವರ್' ಆಡಿಯೋ ಲಾಂಚ್ ನಡೆದಿತ್ತು.  ಆ ಸಮಯದಲ್ಲಿ  ವಿಪರೀತ ಜನ ಜಂಗುಳಿ ಸೇರಿತ್ತು. ಅವರ ಮಧ್ಯೆ ಇದ್ದ ನಿಖಿಲ್​ ಅವರನ್ನು  ವೇದಿಕೆ ಮೇಲೆ ಕರೆಯಲು ಕುಮಾರಸ್ವಾಮಿ ಅವರು ನಿಖಿಲ್​ ಎಲ್ಲಿದ್ದೀಯಪ್ಪ ಎಂದು ಪ್ರಶ್ನಿಸಿದ್ದರು ಅಷ್ಟೇ. 

ಆದರೆ ಈ ಲೋಕಸಭೆ ಚುನಾವಣೆಯ ರಿಲಸ್ಟ್​ ಹೊತ್ತಿನಲ್ಲಿ ಈ ಡೈಲಾಗ್​ ಹಿಂದಿನ ರೂವಾರಿ ಯಾರು ಎಂಬ ಇಂಟರೆಸ್ಟಿಂಗ್​ ವಿಷಯ ರಿವೀಲ್​ ಆಗಿದೆ. ಅಷ್ಟಕ್ಕೂ ಈ ಡೈಲಾಗ್​ ಅನ್ನು ಕುಮಾರಸ್ವಾಮಿ ಅವರಿಗೆ ಹೇಳಿಕೊಟ್ಟಿದ್ದು, 'ಜಾಗ್ವರ್' ಆಡಿಯೋ ಲಾಂಚ್​ ಕಾರ್ಯಕ್ರಮದಲ್ಲಿ ಆ್ಯಂಕರ್​ ಆಗಿದ್ದ ಶಾಲಿನಿ. ಶಾಲಿನಿ ಎಂದರೆ ಬಹುಶಃ ಕೆಲವರಿಗೆ ತಿಳಿಯಲಿಕ್ಕಿಲ್ಲ. ಪಾಪ ಪಾಂಡು ಖ್ಯಾತಿಯ ನಟಿ ಶಾಲಿನಿ ಎಂದರೆ ಅರ್ಥವಾದೀತು. ಈ ವಿಷಯವನ್ನು ಶಾಲಿನಿ ಅವರು, ಸ್ಪೀಡ್ ಪ್ಲಸ್ ಕರ್ನಾಟಕ ಅನ್ನೋ ಯೂಟ್ಯೂಬ್ ಚಾನೆಲ್‌ನಲ್ಲಿ ಕಿರಿಕ್ ಕೀರ್ತಿ ಜೊತೆ ರಿವೀಲ್ ಮಾಡಿದ್ದಾರೆ.

ಎಚ್​.ಡಿ.ಕುಮಾರಸ್ವಾಮಿ ಸರ್​ಗೆ ಎಲ್ಲಿದ್ದೀಯಪ್ಪ ನಿಖಿಲ್ ಅಂತ ನಾನೇ ಹೇಳಿಕೊಟ್ಟಿದ್ದು. ಅದು ಸುಮಾರು ನಾಲ್ಕು ಗಂಟೆ ಕಾರ್ಯಕ್ರಮವಾಗಿತ್ತು. ಆದರೆ, ಅದರಲ್ಲಿ 10-15 ಸೆಕೆಂಡಿನ ಈ ಡೈಲಾಗ್​ ಈ ಪರಿ ಫೇಮಸ್ ಆಗತ್ತೆ ಎಂದು ಕನಸಿನಲ್ಲಿಯೂ ಅಂದುಕೊಂಡಿರಲಿಲ್ಲ ಎಂದು ಶಾಲಿನಿ ಹೇಳಿದ್ದಾರೆ.  ನನ್ನ ಫ್ರೆಂಡ್ ರೋಹಿತ್ ಪದಕಿ ವಿಡಿಯೋ ಕಳಿಸಿಬಿಟ್ಟು. ಯೋ ಅಮ್ಮ.. ಇದ್ಯಾವಾಗ ಮಾಡಿದೆ ನೀನು ಕೇಳಿದ್ರು. ಆಗಲೇ ನನಗೆ ಗೊತ್ತಾಗಿದ್ದು ಇದು ಇಷ್ಟೆಲ್ಲಾ ಫೇಸಮ್​ ಆಗಿದೆ ಎಂದರು.  ಅಷ್ಟಕ್ಕೂ ಆ ದಿನ ಆಗಿದ್ದೇನೆಮದರೆ,  ಮೊದಲೇ ಸ್ಕ್ರಿಪ್ಟ್ ಮಾಡಿದಂತೆ ಜನರ ಮಧ್ಯೆ ನಿಖಿಲ್ ಇರುತ್ತಾರೆ. ಅವರನ್ನು ವೇದಿಕೆ ಮೇಲೆ ಇರುವ  ಕುಮಾರಸ್ವಾಮಿ ಕರೆಯಬೇಕಿತ್ತು. ಆದರೆ ಅವರು ಎಷ್ಟೇ ಕ್ಲೂ ಕೊಟ್ಟರೂ ಕರೆಯಲಿಲ್ಲ. ಆಗ ನಾನು ಸುಮ್ಮನೆ ನಿಖಿಲ್​ ಎಲ್ಲಿದಿಯಪ್ಪಾ ಅಂತ ಹೇಳಿ ಅಂದೆ. ಅದೇನೂ ಮೊದಲೇ ಪ್ಲ್ಯಾನ್​ ಮಾಡಿದ್ದಲ್ಲ. ವೇದಿಕೆ ಮೇಲೆ ಎಷ್ಟು ಹೊತ್ತಾದರೂ ಕುಮಾರಸ್ವಾಮಿ ಅವರು ಕರೆಯದೇ ಇದ್ದಾಗ, ಸುಮ್ಮನೇ ಹೀಗೆ ಹೇಳಿಕೊಟ್ಟೆ. ಅವರು ಹಾಗೆಯೇ ಕರೆದರು. ಅಷ್ಟೇ... ಘಟನೆ ನಡೆದು ಐದು ವರ್ಷವಾದ್ರೂ ಈಗಲೂ ಅದನ್ನೇ ಬಳಸ್ತಾ ಇದ್ದಾರೆ ಜನ ಎಂದ್ರೆ ನಂಬೋಕೆ ಆಗ್ತಿಲ್ಲ ಎಂದಿದ್ದಾರೆ.