'ನನ್ನಮ್ಮ ಸೂಪರ್‌ಸ್ಟಾರ್' ಸಮನ್ವಿ: ಮಗಳು ಹೋಗಿ 3 ವರ್ಷದ ಬಳಿಕ ಕರಾಳ ದಿನ ನೆನೆದ ನಟಿ ಅಮೃತಾ ನಾಯ್ಡು

ʼನನ್ನಮ್ಮ ಸೂಪರ್‌ ಸ್ಟಾರ್ʼ‌ ಸಮನ್ವಿ ಈಗ ಇಲ್ಲ. ಇವರ ಮನೆಗೆ ಹರ್ಷ್‌ ಆಗಮನ ಆಗಿದೆ. ಈ ಬಗ್ಗೆ ತಾಯಿ, ನಟಿ ಅಮೃತಾ ನಾಯ್ಡು ಅವರು ಮುಕ್ತವಾಗಿ ಮಾತನಾಡಿದ್ದಾರೆ. 

ಕನ್ನಡದ ಅನೇಕ ಧಾರಾವಾಹಿಗಳಲ್ಲಿ, ಸಿನಿಮಾಗಳಲ್ಲಿ ನಟಿಸಿದ್ದ ಅಮೃತಾ ನಾಯ್ಡು ಒಂದು ಕರಾಳ ಅಧ್ಯಾಯವನ್ನು ಮುಗಿಸಿ, ಹೊಸ ಜೀವನವನ್ನು ಆರಂಭಿಸಿದ್ದಾರೆ. ಮಗಳು ಸಮನ್ವಿ ಜೊತೆಗೆ ʼನನ್ನಮ್ಮ ಸೂಪರ್‌ಸ್ಟಾರ್ʼ‌ ಶೋನಲ್ಲಿ ಭಾಗವಹಿಸಿದ್ದರು. ಕ್ರೂರ ವಿಧಿ, ಮಗಳನ್ನು ಅವರಿಂದ ದೂರ ಮಾಡಿತು. ಅಪಘಾತದಲ್ಲಿ ಸಮನ್ವಿ ನಿಧನಳಾದಳು. 

ಅಮೃತಾ ನಾಯ್ಡು ಹೇಳಿದ್ದೇನು? 
“ಮಗಳು ಹೋದ ದಿನ ಬೆಟ್ಟ ತಲೆ ಮೇಲೆ ಬಿದ್ದ ಹಾಗಾಯ್ತು. ನಮಗೆ ಯಾಕೆ ಹೀಗಾಯ್ತು ಅಂತ ನಾನು, ನನ್ನ ಗಂಡ ಯೋಚನೆ ಮಾಡುತ್ತಿರುತ್ತಿದ್ದೆವು. ಇದಕ್ಕೆಲ್ಲ ಉತ್ತರಗಳೇ ಸಿಗೋದಿಲ್ಲ. ಹತ್ತು ವರ್ಷಗಳ ಮುಂದಿನ ಪ್ಲ್ಯಾನ್‌ ಮಾಡಿರುತ್ತೇವೆ. ಆದರೆ ನಮ್ಮ ಕನಸಿನ ಸೌಧ ಕುಸಿದು ಬೀಳತ್ತೆ. ಎಂದಿಗೂ ನಾವು ಆ ಒಂದ ದಿನಕ್ಕೆ ಸಾಕ್ಷಿಯಾದೆವು. ಸಮನ್ವಿ ಬಾ ಮಗಳೇ ಅಂತ ನಾವೆಲ್ಲ ಪ್ರಾರ್ಥನೆ ಮಾಡುತ್ತಿದ್ದೆವು. ಆಗ ನಾನು ಗರ್ಭಿಣಿಯಾಗಿದ್ದೆ. ನನ್ನ ಮಗನ ಹೆಸರು ಹರ್ಷ್.‌ ನಾನು ಪ್ಲ್ಯಾನ್‌ ಮಾಡದೆ ಮಗು ಆಯ್ತು. ದೇವರೇ ಈ ರೀತಿ ಪ್ಲ್ಯಾನ್‌ ಮಾಡಿದ್ದ ಅಂತ ಅನಿಸತ್ತೆ” ಎಂದು ಅಮೃತಾ ನಾಯ್ಡು ಹೇಳಿದ್ದಾರೆ.

ಹರ್ಷ್‌ ಬಂದಿದ್ದಾನೆ! 
“ನಮಗೆ ಒಂದು ಮಗು ಇರಲಿ ಅಂತ ದೇವರು ಹೀಗೆ ಮಾಡಿದ್ನೋ ಏನೋ! ಸಮನ್ವಿ ಇಲ್ಲ, ಮಗು ಇರಲಿ ಅಂತ ದೇವರು ಹರ್ಷ್‌ನನ್ನು ಕಳಿಸಿಕೊಟ್ಟ ಅಂತ ಅನಿಸತ್ತೆ. ಅಪಘಾತ ಆದ ಬಳಿಕ ನನ್ನನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋದರು. ಎರಡು ಗಂಟೆಗಳ ಕಾಲ ಚೆಕ್‌ ಮಾಡಿದರೂ ಕೂಡ ಮಗು ಹಾರ್ಟ್‌ ಬೀಟ್‌ ಸಿಗ್ತಾ ಇರಲಿಲ್ಲ. ಇನ್ನೇನು ವೈದ್ಯರು ಬಂದು ನಮಗೆ ಮಗು ಹಾರ್ಟ್‌ ಬೀಟ್‌ ನಿಂತು ಹೋಯ್ತು ಅಂತ ಘೋಷಣೆ ಮಾಡಬೇಕು ಎನ್ನುವಷ್ಟರಲ್ಲಿ ಹಾರ್ಟ್‌ ಬೀಟ್‌ ಸಿಗ್ತು. ಎಲ್ಲರೂ ಸಮನ್ವಿಗೆ ಏನೂ ಆಗಬಾರದು ಅಂತ ಪ್ರಾರ್ಥನೆ ಮಾಡುತ್ತಿದ್ದರು ಎಂದು ನನ್ನ ಸ್ನೇಹಿತರು ಆಮೇಲೆ ಹೇಳಿದರು. ಆಮೇಲೆ ದೇವರು ನೇರವಾಗಿ ಹರ್ಷ್‌ ಮೂಲಕ ಉತ್ತರ ಕೊಟ್ಟಿದ್ದಾನೆ” ಎಂದು ಅಮೃತಾ ನಾಯ್ಡು ಹೇಳಿದ್ದಾರೆ.

“ಸಮನ್ವಿಯೇ ಹರ್ಷ್‌ ಆಗಿ ಬಂದಿದ್ದಾನೆ ಅಂತ ಅನಿಸ್ತಿದೆ. She ಇದ್ದವಳು He ಆಗಿದೆ ಅಂತ ಅನಿಸ್ತಿದೆ. ನನ್ನ ಕರ್ಮಫಲದಿಂದ ಈ ರೀತಿ ಆಯ್ತು ಅಂತ ಅನಿಸ್ತು. ನಾನು ಈಗ ಎಲ್ಲ ವಿಚಾರಗಳನ್ನು ಪಾಸಿಟಿವ್‌ ಆಗಿ ತಗೊಂಡು ಹೋಗಲು ಬಯಸುತ್ತೇನೆ. ಯಾವುದೋ ಪುಣ್ಯಕಾರ್ಯದಿಂದ ದೇವರು ನಮ್ಮ ಜೊತೆಗೆ ಇದ್ದಾನೆ ಅಂತ ಅನಿಸ್ತಿದೆ. ಈಗ ನಮ್ಮ ಮನೆಯಲ್ಲಿ ಹರ್ಷ್‌ ಮೂಲಕ ಖುಷಿ ಮನೆಮಾಡಿದೆ” ಎಂದು ಅಮೃತಾ ನಾಯ್ಡು ಹೇಳಿದ್ದಾರೆ.

ಎಲ್ಲರ ಹಾರೈಕೆ ಇರಲಿ! 
“ನನ್ನಮ್ಮ ಸೂಪರ್‌ಸ್ಟಾರ್‌ ಶೋ ಮೂಲಕ ನನ್ನ ಮಗಳು ಸಮನ್ವಿಗೆ ಎಲ್ಲರ ಆಶೀರ್ವಾದ, ಹಾರೈಕೆ ಸಿಕ್ಕಿದೆ. ಇಂದು ಹರ್ಷ್‌ಗೆ ಕೂಡ ಎಲ್ಲರೂ ಆಶೀರ್ವದಿಸಿದ್ದಾರೆ. ನನ್ನ ಕಷ್ಟದ ಸಮಯದಲ್ಲಿ ಜೊತೆಗೆ ನಿಂತ ಎಲ್ಲರೂ ನಮಗೆ ದೇವರೇಗಳು. ನಮ್ಮ ಜೀವನದಲ್ಲಿ ಪ್ರೀತಿ ಮುಖ್ಯ, ಉಳಿದ ಯಾವ ವಿಷಯವೂ ಲೆಕ್ಕಕ್ಕೆ ಬರೋದಿಲ್ಲ. ಸೋಶಿಯಲ್‌ ಮೀಡಿಯಾದಲ್ಲಿ ಎಲ್ಲರೂ ತಮ್ಮ ಖುಷಿ ವಿಷಯಗಳನ್ನು ಹಂಚಿಕೊಳ್ಳುತ್ತಿರುತ್ತಾರೆ. ಅದನ್ನು ನೋಡಿ ಎಲ್ಲರಿಗೂ ತಮ್ಮ ಲೈಫ್‌ನಲ್ಲಿ ಏನೂ ಇಲ್ಲ ಅಂತ ಅನಿಸಬಹುದು. ಹೀಗಾಗಿ ಸೋಶಿಯಲ್‌ ಮೀಡಿಯಾದಲ್ಲಿ ಆಡಂಬರ ತೋರಿಸೋದು ಬೇಡ ಅಂತ ನನಗೆ ಅನಿಸ್ತಿದೆ” ಎಂದು ಅಮೃತಾ ನಾಯ್ಡು ಹೇಳಿದ್ದಾರೆ. 

“ನಾನು ನಟನೆ ಫೀಲ್ಡ್‌ಗೆ ಬಂದಕೂಡಲೇ ಜನರು ಏನು ಹೇಳ್ತಾರೋ ಎನ್ನುವ ಭಯ ಇದೆ. ಇಷ್ಟು ಬೇಗ ಮಗಳ ಸಾವಿನ ನೋವನ್ನು ಮರೆತು ನಟಿಸೋಕೆ ಬಂದ್ರು ಅಂತ ಹೇಳಬಹುದು. ಆದರೆ ಈ ಎಲ್ಲ ಮಾತುಗಳನ್ನು ಮೀರಿ ನಿಂತಿದ್ದೇನೆ. ನನ್ನ ಮಗ ಚಿಕ್ಕವನು, ಅವನಿಗೆ ನಾನೀಗ ಸಮಯ ಕೊಡುತ್ತಿದ್ದೇನೆ” ಎಂದು ಅಮೃತಾ ನಾಯ್ಡು ಹೇಳಿದ್ದಾರೆ.