ಸಿನಿಮಾ, ಸೀರಿಯಲ್​ನಲ್ಲಿ ಕಾಣಿಸೋ ಈ ಮಗು ಯಾರದ್ದು? ಕ್ಯಾಮೆರಾಕ್ಕಾಗಿ ಹೀಗೆಲ್ಲಾ ​ ಮಾಡ್ತಾರೆ? ಈ ವಿಡಿಯೋ ನೋಡಿ!

ಸೀರಿಯಲ್ ಮತ್ತು ಸಿನಿಮಾಗಳಲ್ಲಿ ಪದೇ ಪದೇ ಕಾಣಿಸಿಕೊಳ್ಳುವ ಶಿಶುಗಳು ಯಾರು ಎಂಬ ಕುತೂಹಲ ಅನೇಕರಿಗಿದೆ.  ನಿರ್ದೇಶಕರು  ಸಿಲಿಕಾನ್‌ನಿಂದ ಮಾಡಿದ ಕೃತಕ ಮಕ್ಕಳನ್ನು ಬಳಸುತ್ತಾರೆ. ಈ ಕೃತಕ ಶಿಶುಗಳು ಎಷ್ಟು ನೈಜವಾಗಿರುತ್ತವೆ ಎಂದರೆ, ಅವುಗಳನ್ನು ನಿಜವಾದ ಮಕ್ಕಳಿಂದ ಪ್ರತ್ಯೇಕಿಸುವುದು ಕಷ್ಟ.

ಸೀರಿಯಲ್​ಗಳಲ್ಲಿ ಸಾಧಾರಣವಾಗಿ ಸ್ವಲ್ಪ ದೊಡ್ಡ ಮಗುವನ್ನು ತೋರಿಸುವಾಗ ಒಂದೊಂದು ದಿನ ಒಂದೊಂದು ಮಗು ಕಾಣಿಸುವುದನ್ನು ನೋಡಿರಬಹುದು. ಶ್ರೀರಸ್ತು ಶುಭಮಸ್ತು ಸೀರಿಯಲ್​ನಲ್ಲಿ ಈ ಬಗ್ಗೆ ಸೋಷಿಯಲ್​ ಮೀಡಿಯಾದಲ್ಲಿ ಸಾಕಷ್ಟು ಟ್ರೋಲ್​ ಕೂಡ ಆಗಿರುತ್ತಿತ್ತು. ಬಣ್ಣಗಳಲ್ಲಿ ವ್ಯತ್ಯಾಸ, ಕಿವಿ ಚುಚ್ಚುವಿಕೆಯಲ್ಲಿ ವ್ಯತ್ಯಾಸ... ಹೀಗೆ ಒಂದೊಂದು ದಿನ ಒಂದೊಂದು ಮಗುವನ್ನು ತರಲಾಗುತ್ತಿತ್ತು. ಆದರೆ, ಇದೇನು ಟ್ರೋಲ್ ಮಾಡುವ ವಿಷಯವಲ್ಲ. ಏಕೆಂದರೆ ಅಷ್ಟೊಂದು ಪ್ರಖರವಾಗಿರುವ ಕ್ಯಾಮೆರಾಗಳ ಲೈಟ್​ಗೆ ಚಿಕ್ಕ ಮಕ್ಕಳ ಮುಖವನ್ನು ಒಡ್ಡಲು ಬಹುತೇಕ ಅಮ್ಮಂದಿರು ಒಪ್ಪುವುದಿಲ್ಲ. ತಮ್ಮ ಮಕ್ಕಳು ಹೇಗಾದ್ರೂ ಸೈ ಒಂದು ಸಲವಾದ್ರೂ ಟಿವಿಯಲ್ಲಿ ಕಾಣಿಸಿಕೊಂಡರೆ ಸಾಕು, ಮುಂದೆ ಆಗೋದನ್ನು ಆಮೇಲೆ ನೋಡಿಕೊಂಡರಾಯಿತು ಎಂದು ಕೆಲವರು ಮಾತ್ರ ತಮ್ಮ ಶಿಶುಗಳನ್ನು ಒಂದೆರಡು ಸೀನ್​ಗಳಿಗೆ ಕೊಡುತ್ತಾರೆ ಬಿಟ್ಟರೆ, ಮಕ್ಕಳನ್ನು ಕೊಡುವ ಅಪ್ಪ-ಅಮ್ಮಂದಿರು ತುಂಬಾ ವಿರಳ.

ಸಿನಿಮಾ, ಸೀರಿಯಲ್​ಗಳ ಕಂದಮ್ಮ

ಆದರೆ ಹುಟ್ಟಿದ ಮಗುವನ್ನು ಪದೇ ಪದೇ ತೋರಿಸುವ ಸಂದರ್ಭ ಕೆಲವು ಸಿನಿಮಾಗಳಲ್ಲಿಯೂ ಬರುತ್ತದೆ, ಹಲವು ಸೀರಿಯಲ್​ಗಳಲ್ಲಿಯೂ ಬರುತ್ತದೆ. ಆ ಸಂದರ್ಭದಲ್ಲಂತೂ ತಮ್ಮ ಕಂದಮ್ಮಗಳನ್ನು ಯಾರೂ ಕೊಡಲಾರರು. ಆದರೆ ಶಿಶುಗಳು ಅನಿವಾರ್ಯವಾಗಿ ಇರುತ್ತವೆ. ಹಾಗೆಂದು ನಿರ್ದೇಶಕರು ಸುಮ್ಮನೇ ಇರಲು ಆಗುತ್ತದೆಯೆ? ಶಿಶುಗಳ ಬೇಕಾಗಿರೋ, ಅವೇ ಹೈಲೈಟ್​ ಆಗಿರೋ ಸೀರಿಯಲ್​, ಸಿನಿಮಾಗಳಲ್ಲಿ ಶಿಶುಗಳಂತೂ ಕಾಣಿಸುತ್ತವೆ. ಹಾಗಿದ್ರೆ ಅವು ಯಾರ ಮಕ್ಕಳು, ನಿರ್ದೇಶಕರು ಅದನ್ನು ಎಲ್ಲಿಂದ ತರ್ತಾರೆ ಎನ್ನುವುದು ಮಾತ್ರ ತುಂಬಾ ಇಂಟರೆಸ್ಟಿಂಗ್​ ಆಗಿದೆ.

ಎಲ್ಲಿಂದ ಬರುತ್ತೇ ಮಗು?

ಇಲ್ಲಿ ಅದರ ವಿಡಿಯೋ ವೈರಲ್​ ಆಗಿದೆ. ಅಂದಹಾಗೆ ಥೇಟ್​ ಮನುಷ್ಯರಂತೆಯೇ ಕಾಣುವ ಈ ಕಂದಮ್ಮಗಳು ನಿಜವಾದ ಮನುಷ್ಯರು ಅಲ್ಲ, ಬದಲಿಗೆ ಸಿಲಿಕಾನ್​ನಿಂದ ಮಾಡಲಾಗಿರುವ ಕೃತಕ ಶಿಶುಗಳು. ಇವುಗಳನ್ನು ನೈಜ ಶಿಶುವಿನಂತೆಯೇ ಸೃಷ್ಟಿ ಮಾಡಲಾಗುತ್ತದೆ. ಮೃದುವಾದ ಚರ್ಮ, ನಿಜವಾಗಿರುವ ಕೂದಲು ಕಾಣುವಂತೆಯೇ ಇವುಗಳನ್ನು ರಚಿಸಲಾಗುತ್ತದೆ. ನೀವು ಹತ್ತಿರದಿಂದ ನೋಡಿದರೂ ಅದು ಕೃತಕ ಮಗು ಎಂದು ಹೇಳುವುದು ಕಷ್ಟವೇ. ಆ ಮಗುವನ್ನು ತೋರಿಸಿದಾಗ ಅಳುವ ಬ್ಯಾಕ್​ಗ್ರೌಂಡ್​ ಸೌಂಡ್​ ಕೊಟ್ಟರಂತೂ ಅದೇ ಮಗು ಅತ್ತಂತೆ ಕಾಣಿಸುತ್ತಿದೆ. ಕೃತಕ ಮಗುವಾಗಿರುವ ಕಾರಣ, ಅದರ ಮುಖವನ್ನು ಹೇಗೆ ಬೇಕಾದರೂ ಬದಲಿಸಿ ರೆಡಿ ಮಾಡಲಾಗುತ್ತದೆ.

ತಿಳಿಯೋದೇ ಕಷ್ಟ

ಅನಂತ್​ಕುಮಾರ್​ ಎನ್ನುವವರು ತಮ್ಮ ಇನ್​ಸ್ಟಾಗ್ರಾಮ್​ನಲ್ಲಿ ಈ ವಿಡಿಯೋ ಶೇರ್​ ಮಾಡಿದ್ದಾರೆ. ಪ್ಲಾಸ್ಟಿಕ್​ನಲ್ಲಿ ಸುತ್ತಿರೋ ಮಗುವಿನ ಮುಖ ತೋರಿಸಿದರಷ್ಟೇ ಇದು ಕೃತಕ ಮಗು ಎಂದುತಿಳಿಯುತ್ತದೆ. ಆದರೆ ಹಾಗೆಯೇ ಇದನ್ನು ನೋಡಿದರೆ, ಅದರಲ್ಲಿಯೂ ದೂರದಿಂದ ನೋಡಿದರಂತೂ ನೀವು ಹೇಳಲು ಸಾಧ್ಯವೇ ಇಲ್ಲ ಎನ್ನುವ ಹಾಗೆ ನಿಜವಾಗಿ ಇದು ಕಾಣಿಸುತ್ತದೆ. ಇಲ್ಲಿದೆ ನೋಡಿ ವಿಡಿಯೋ.