Covid case ಕರ್ನಾಟಕದಲ್ಲಿ 97 ಕೊರೋನಾ ಕೇಸ್‌ ಪತ್ತೆ, 20 ತಿಂಗಳ ಕನಿಷ್ಠ!

ಕರ್ನಾಟಕದಲ್ಲಿ ಮೂವರು ಸಾವು, 169 ಮಂದಿ ಚೇತರಿಕೆ  ಶೇ.0.92 ಪಾಸಿಟಿವಿಟಿ ದರ ದಾಖಲಾಗಿದೆ ಬೆಂಗಳೂರು ನಗರದಲ್ಲಿ 5 ಕಂಟೈನ್ಮೆಂಟ್‌ ವಲಯ

ಬೆಂಗಳೂರು(ಮಾ.08): ನಗರದಲ್ಲಿ ಕೋವಿಡ್‌-19 ಪ್ರಕರಣಗಳ ಸಂಖ್ಯೆ ಗಣನೀಯವಾಗಿ ಕಡಿಮೆಯಾಗಿದ್ದು, 97 ಪ್ರಕರಣ ವರದಿಯಾಗಿದ್ದು(Covid Cases) ಸುಮಾರು 20 ತಿಂಗಳ ಕನಿಷ್ಠ ಪ್ರಕರಣವಾಗಿದೆ. ಮೂವರು ಮರಣವನ್ನಪ್ಪಿದ್ದಾರೆ. 169 ಮಂದಿ ಚೇತರಿಸಿಕೊಂಡಿದ್ದಾರೆ. ಕಳೆದ 2020ರ ಜೂನ್‌ ತನಕ ಬೆಂಗಳೂರು ನಗರದಲ್ಲಿ(Bengaluru karnataka) ದೈನಂದಿನ ಸೋಂಕಿತರ ಸಂಖ್ಯೆ ನೂರರ ಒಳಗೆಯೇ ವರದಿ ಆಗುತ್ತಿತ್ತು. ಆದರೆ ಜೂನ್‌ ಅಂತ್ಯಕ್ಕೆ ಮೊದಲ ಅಲೆ ಪ್ರಾರಂಭಗೊಂಡ ಬಳಿಕ ನೂರರ ಒಳಗೆ ದೈನಂದಿನ ಸೋಂಕಿನ ಪ್ರಕರಣ ಕುಸಿದಿರಲಿಲ್ಲ.

ಸೋಮವಾರ 11,223 ಕೋವಿಡ್‌ ಪರೀಕ್ಷೆ ನಡೆದಿದ್ದು ಶೇ.0.92 ಪಾಸಿಟಿವಿಟಿ ದರ ದಾಖಲಾಗಿದೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ 2,350ಕ್ಕೆ ಇಳಿದಿದೆ. ಈ ಪೈಕಿ 82 ಮಂದಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ವೆಂಟಿಲೇಟರ್‌ ಸಹಿತ ಐಸಿಯುನಲ್ಲಿ 9 ಮಂದಿ, ಐಸಿಯುನಲ್ಲಿ 20 ಮಂದಿ, ಎಚ್‌ಡಿಯುನಲ್ಲಿ 9 ಮಂದಿ ಮತ್ತು ಜನರಲ್‌ ವಾರ್ಡ್‌ನಲ್ಲಿ 44 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಸದ್ಯ ನಗರದಲ್ಲಿ 5 ಕಂಟೈನ್ಮೆಂಟ್‌ ವಲಯವಿದೆ. ಬೊಮ್ಮನಹಳ್ಳಿ. ದಾಸರಹಳ್ಳಿ, ಬೆಂಗಳೂರು ಪೂರ್ವ, ಬೆಂಗಳೂರು ದಕ್ಷಿಣ ಮತ್ತು ಯಲಹಂಕದಲ್ಲಿ ತಲಾ ಒಂದು ಕಂಟೈನ್ಮೆಂಟ್‌ ವಲಯವನ್ನು ಗುರುತಿಸಲಾಗಿದೆ.

ಲಸಿಕೆ ಅಭಿಯಾನ
ಸೋಮವಾರ 11,740 ಮಂದಿ ಲಸಿಕೆ ಪಡೆದಿದ್ದಾರೆ. 445 ಮಂದಿ ಮೊದಲ ಡೋಸ್‌, 10,721 ಮಂದಿ ಎರಡನೇ ಡೋಸ್‌ ಮತ್ತು 574 ಮಂದಿ ಮುನ್ನೆಚ್ಚರಿಕೆ ಡೋಸ್‌ ಸ್ವೀಕರಿಸಿದ್ದಾರೆ.

ದ.ಕ.ದಲ್ಲಿ ನಾಲ್ವರಿಗೆ ಕೊರೋನಾ 
ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಸೋಮವಾರ 4 ಮಂದಿಗೆ ಕೊರೋನಾ ಪಾಸಿಟಿವ್‌ ದೃಢಪಟ್ಟಿದ್ದು, 6 ಮಂದಿ ಗುಣಮುಖರಾಗಿದ್ದಾರೆ. ಜಿಲ್ಲೆಯ ಪಾಸಿಟಿವಿಟಿ ದರ ಶೇ.0.25ರಷ್ಟಿದೆ.ಜಿಲ್ಲೆಯಲ್ಲಿ ಇದುವರೆಗಿನ ಒಟ್ಟು ಸೋಂಕಿತರ ಸಂಖ್ಯೆ 1,35,431ಕ್ಕೆ ಏರಿಕೆಯಾಗಿದ್ದು, ಅವರಲ್ಲಿ 1,33,559 ಮಂದಿ ಗುಣಮುಖರಾಗಿದ್ದಾರೆ. ಒಟ್ಟು 1847 ಮಂದಿ ಮೃತಪಟ್ಟಿದ್ದಾರೆ. ಪ್ರಸ್ತುತ ಕೇವಲ 25 ಮಂದಿ ಮಾತ್ರ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ದ.ಕ. ಜಿಲ್ಲೆಯಲ್ಲಿ ಬುಧವಾರ ಕೇವಲ 2 ಕೊರೋನಾ ಪ್ರಕರಣ ಪತ್ತೆಯಾಗಿದ್ದು, 16 ಮಂದಿ ಗುಣಮುಖರಾಗಿದ್ದಾರೆ. ಜಿಲ್ಲೆಯ ಪಾಸಿಟಿವಿಟಿ ದರ ಶೇ.0.07ರಷ್ಟಿದೆ. ಜಿಲ್ಲೆಯಲ್ಲಿ ಇದುವರೆಗಿನ ಒಟ್ಟು ಸೋಂಕಿತರ ಸಂಖ್ಯೆ 1,35,409ಕ್ಕೆ ಏರಿಕೆಯಾಗಿದ್ದು, ಅವರಲ್ಲಿ ಈವರೆಗೆ 1,33,484 ಮಂದಿ ಗುಣಮುಖರಾಗಿದ್ದಾರೆ. ಸಾವಿನ ಒಟ್ಟು ಸಂಖ್ಯೆ 1,847 ತಲುಪಿದೆ. ಪ್ರಸ್ತುತ 78 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

2 ತಿಂಗಳ ಬಳಿಕ ಸಕ್ರಿಯ ಕೇಸು ಲಕ್ಷಕ್ಕಿಂತ ಕಡಿಮೆ
ದೇಶದಲ್ಲಿ ದೈನಂದಿನ ಕೋವಿಡ್‌ ಪ್ರಕರಣಗಳು ಮತ್ತಷ್ಟುಕಡಿಮೆಯಾಗಿದ್ದು ಮಂಗಳವಾರ ಮುಂಜಾನೆ 8 ಗಂಟೆಗೆ ಮುಕ್ತಾಯವಾದ 24 ಗಂಟೆಗಳ ಅವಧಿಯಲ್ಲಿ 6,915 ಪ್ರಕರಣಗಳು ದಾಖಲಾಗಿವೆ. ಇದು ಕಳೆದ 68 ದಿನಗಳಲ್ಲೇ ಕನಿಷ್ಠ ಪ್ರಮಾಣವಾಗಿದೆ. ಇನ್ನು ಇದೇ ಅವಧಿಯಲ್ಲಿ 180 ಸೋಂಕಿತರು ಸಾವನ್ನಪ್ಪಿದ್ದಾರೆ. ಇದರೊಂದಿಗೆ ಒಟ್ಟು ಸೋಂಕಿತರ ಸಂಖ್ಯೆ 4.29 ಕೋಟಿಗೆ ಮತ್ತು ಸಾವಿನ ಸಂಖ್ಯೆ 5.14 ಲಕ್ಷಕ್ಕೆ ತಲುಪಿದೆ. ಹೊಸ ಸೋಂಕಿತರ ಪ್ರಮಾಣ ಕಡಿಮೆಯಾಗಿ, ಚೇತರಿಕೆ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಸಕ್ರಿಯ ಸೋಂಕಿತರ ಪ್ರಮಾಣ 2 ತಿಂಗಳ ಬಳಿಕ ಲಕ್ಷಕ್ಕಿಂತ ಕೆಳಗೆ ಅಂದರೆ 92472ಕ್ಕೆ ಇಳಿದಿದೆ. ಇನ್ನು ದೈನಂದಿನ ಪಾಸಿಟಿವಿಟಿ ದರವು ಶೇ. 0.77ಕ್ಕೆ ಕುಸಿದಿದ್ದು, ವಾರದ ಪಾಸಿಟಿವಿಟಿ ದರವು ಶೇ. 1.11ರಷ್ಟಿದೆ. ದೇಶದಲ್ಲಿ ಈವರೆಗೆ 177.70 ಕೋಟಿ ಡೋಸು ಲಸಿಕೆಯನ್ನು ವಿತರಿಸಲಾಗಿದೆ.