ಕೆನಡಾ ಟಿ20: ವೇತನ ಸಿಗದ್ದಕ್ಕೆ ಪಂದ್ಯ ವಿಳಂಬ!

ಕೆನಡಾದಲ್ಲಿ ನಡೆಯುತ್ತಿರುವ ಗ್ಲೋಬಲ್ ಟಿ20 ಲೀಗ್ ಟೂರ್ನಿಗೆ ಹಣಕಾಸಿನ ಸಮಸ್ಯೆ ಎದುರಾಗಿದೆಯಾ..? ಹೌದು ಎನ್ನುತ್ತಿವೆ ಕೆಲವೊಂದು ವರದಿಗಳು, ಪರಿಣಾಮ ಕೆಲ ಆಟಗಾರರು ಪಂದ್ಯದಲ್ಲಿ ಕಣಕ್ಕಿಳಿಯಲು ಹಿಂದೇಟು ಹಾಕಿದರು ಎನ್ನುತ್ತಿವೆ ಸುದ್ದಿ ಮೂಲಗಳು. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...

"

ಕೆನಡಾ(ಆ.09): ಫ್ರಾಂಚೈಸಿ ಟಿ20 ಲೀಗ್‌ಗಳನ್ನು ನಡೆಸುವ ಭರದಲ್ಲಿ ಕ್ರಿಕೆಟ್‌ ಸಂಸ್ಥೆಗಳು ಎಡವಟ್ಟು ಮಾಡುತ್ತಿವೆ ಎನ್ನುವುದಕ್ಕೆ ಮತ್ತೊಂದು ಉದಾಹರಣೆ ಸಿಕ್ಕಿದೆ. 

ಕೆನಡಾದ ಗ್ಲೋಬಲ್‌ ಟಿ20 ಲೀಗ್‌ನಲ್ಲಿ ಬುಧವಾರ, ತಂಡದ ಮಾಲೀಕರು ಬಾಕಿ ಇರುವ ವೇತನ ಪಾವತಿಸದ ಕಾರಣ, ಯುವರಾಜ್‌ ಸಿಂಗ್‌ ನೇತೃತ್ವದ ಟೊರೊಂಟೋ ನ್ಯಾಷನಲ್ಸ್‌ ಹಾಗೂ ಜಾರ್ಜ್ ಬೈಲಿ ನೇತೃತ್ವದ ಮಾಂಟ್ರಿಯಲ್‌ ಟೈಗ​ರ್ಸ್ ತಂಡದ ಆಟಗಾರರು ಪ್ರತಿಭಟಿಸಿದರು. ಹೋಟೆಲ್‌ನಿಂದ ಕ್ರೀಡಾಂಗಣಕ್ಕೆ ತೆರಳಲು ಆಟಗಾರರು ನಿರಾಕರಿಸಿದ ಕಾರಣ ಪಂದ್ಯ 2 ಗಂಟೆ ತಡವಾಯಿತು. 

ಆಯೋಜಕರು, ಮಾಲೀಕರು ಸೇರಿದಂತೆ ಸಂಬಂಧಪಟ್ಟವರು ಸಭೆ ಸೇರಿ ಚರ್ಚಿಸಿ ವೇತನ ಸಮಸ್ಯೆ ಬಗೆಹರಿಸುವ ಭರವಸೆ ನೀಡಿದ ಬಳಿಕ ಆಟಗಾರರು ಮೈದಾನಕ್ಕೆ ತೆರಳಿದರು. ಯುವರಾಜ್‌ ಪಂದ್ಯದಿಂದ ಹೊರಗುಳಿದರು.