ಆ್ಯಷಸ್‌ ಕದನ: ಆಸೀಸ್‌ ಮೇಲೆ ಆರ್ಚರ್‌ ಸವಾ​ರಿ

ಆ್ಯಷಸ್ ಸರಣಿಯ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಪ್ರವಾಸಿ ಆಸ್ಟ್ರೇಲಿಯಾ ತಂಡಕ್ಕೆ ತಿರುಗೇಟು ನೀಡುವಲ್ಲಿ ಇಂಗ್ಲೆಂಡ್ ಯಶಸ್ವಿಯಾಗಿದೆ. ಜೋಫ್ರಾ ಆರ್ಚರ್ ದಾಳಿಗೆ ತತ್ತರಿಸಿದ ಆಸೀಸ್ ಕೇವಲ 225 ರನ್‌ಗಳಿಗೆ ಸರ್ವಪತನ ಕಂಡಿದೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...

ಲಂಡನ್‌[ಸೆ.14]: ಆಸ್ಪ್ರೇ​ಲಿಯಾ ವಿರುದ್ಧ ಆ್ಯಷಸ್‌ ಸರ​ಣಿ​ಯ 5ನೇ ಹಾಗೂ ಅಂತಿಮ ಟೆಸ್ಟ್‌ನಲ್ಲಿ ಇಂಗ್ಲೆಂಡ್‌ ಮೇಲುಗೈ ಸಾಧಿ​ಸಿದೆ. ಮೊದಲ ಇನ್ನಿಂಗ್ಸ್‌ನಲ್ಲಿ 294 ರನ್‌ಗಳಿಗೆ ಆಲೌಟ್‌ ಆದ ಇಂಗ್ಲೆಂಡ್‌, 2ನೇ ದಿನ​ವಾದ ಶುಕ್ರ​ವಾರ ಆಸ್ಪ್ರೇ​ಲಿ​ಯಾ​ವನ್ನು 225 ರನ್‌ಗಳಿಗೆ ಆಲೌಟ್‌ ಮಾಡಿ 69 ರನ್‌ಗಳ ಮುನ್ನಡೆ ಪಡೆ​ಯಿತು. ಜೋಫ್ರಾ ಆರ್ಚರ್‌ 6 ವಿಕೆಟ್‌ ಕಬ​ಳಿಸಿ ಮಿಂಚಿದರು. ಮೊದಲ ದಿನ 8 ವಿಕೆಟ್‌ ಕಳೆ​ದು​ಕೊಂಡಿದ್ದ ಇಂಗ್ಲೆಂಡ್‌, ಜೋಸ್‌ ಬಟ್ಲರ್‌ ಅರ್ಧ​ಶ​ತ​ಕದ ನೆರ​ವಿ​ನಿಂದ 294 ರನ್‌ ಗಳಿ​ಸಿತು.

ಮೊದಲ ಇನ್ನಿಂಗ್ಸ್‌ ಆರಂಭಿ​ಸಿದ ಆಸೀಸ್‌ 14 ರನ್‌ಗೆ 2 ವಿಕೆಟ್‌ ಕಳೆ​ದು​ಕೊಂಡು ಆರಂಭಿಕ ಆಘಾತ ಅನು​ಭ​ವಿ​ಸಿತು. ಆರಂಭಿಕರಾದ ಡೇವಿಡ್‌ ವಾರ್ನರ್‌ (5) ಹಾಗೂ ಮಾರ್ಕಸ್‌ ಹ್ಯಾರಿಸ್‌ (3) ಇಬ್ಬ​ರೂ ಜೋಫ್ರಾ ಆರ್ಚರ್‌ಗೆ ಬಲಿ​ಯಾ​ದರು.

ಸ್ಮಿತ್‌ ಆಸರೆ: ತಂಡಕ್ಕೆ ಮತ್ತೊಮ್ಮೆ ಸ್ಟೀವ್‌ ಸ್ಮಿತ್‌ ಆಸರೆಯಾದರು. 3ನೇ ವಿಕೆಟ್‌ಗೆ ಮಾರ್ನಸ್‌ ಲಬು​ಶೇನ್‌ ಜತೆ ಅರ್ಧ​ಶ​ತ​ಕದ ಜೊತೆ​ಯಾಟವಾಡಿದ ಸ್ಮಿತ್‌, 5ನೇ ವಿಕೆಟ್‌ಗೆ ಮಾರ್ಷ್ ಜತೆ 42 ರನ್‌ ಸೇರಿ​ಸಿ​ದರು. ಚಹಾ ವಿರಾ​ಮಕ್ಕೆ 147 ರನ್‌ಗೆ 4 ವಿಕೆಟ್‌ ಕಳೆ​ದು​ಕೊಂಡಿದ್ದ ಆಸೀಸ್‌, 3ನೇ ಅವ​ಧಿ​ಯಲ್ಲಿ ದಿಢೀರ್‌ ಕುಸಿ​ಯಿತು. ಸ್ಮಿತ್‌ 80 ರನ್‌ ಗಳಿಸಿ ಔಟಾ​ದರು.

2ನೇ ಇನ್ನಿಂಗ್ಸ್‌ ಆರಂಭಿ​ಸಿ​ರುವ ಇಂಗ್ಲೆಂಡ್‌ 2ನೇ ದಿನ​ದಂತ್ಯ​ಕ್ಕೆ ವಿಕೆಟ್‌ ನಷ್ಟ​ವಿ​ಲ್ಲದೆ 9 ರನ್‌ ಗಳಿ​ಸಿದ್ದು ಒಟ್ಟು 78 ರನ್‌ ಮುನ್ನಡೆ ಪಡೆ​ದಿದೆ.

ಸತತ 10 ಇನ್ನಿಂಗ್ಸ್‌ನಲ್ಲಿ 50+ ರನ್‌: ಸ್ಮಿತ್‌ ದಾಖ​ಲೆ!

ಸ್ಟೀವ್‌ ಸ್ಮಿತ್‌ ಕಳೆದ 10 ಆ್ಯಷಸ್‌ ಇನ್ನಿಂಗ್ಸ್‌ನಲ್ಲಿ 50ಕ್ಕೂ ಹೆಚ್ಚು ರನ್‌ ಗಳಿ​ಸಿದ್ದು, ಒಂದು ಎದು​ರಾಳಿ ವಿರುದ್ಧ ಬ್ಯಾಟ್ಸ್‌ಮನ್‌ವೊಬ್ಬ ಈ ರೀತಿ ಸಾಧನೆ ಮಾಡಿದ್ದು ಇದೇ ಮೊದಲು. ಸ್ಮಿತ್‌, ಇಂಗ್ಲೆಂಡ್‌ ವಿರುದ್ಧ ಕಳೆದ 10 ಇನ್ನಿಂಗ್ಸ್‌ಗಳಲ್ಲಿ 5 ಶತಕ, 5 ಅರ್ಧ​ಶ​ತಕ ಸಿಡಿ​ಸಿ​ದ್ದಾರೆ. ಅಲ್ಲದೇ ಈ ಆ್ಯಷಸ್‌ ಸರ​ಣಿ​ಯಲ್ಲಿ ಅವರು 700ಕ್ಕೂ ಹೆಚ್ಚು ರನ್‌ ಕಲೆಹಾಕಿದ ಸಾಧನೆ ಮಾಡಿ​ದ್ದಾರೆ.

ಸ್ಕೋರ್‌:

ಇಂಗ್ಲೆಂಡ್‌ 294 ಹಾಗೂ 9/0

ಆಸ್ಪ್ರೇಲಿಯಾ 225