ರಾಕಿಂಗ್ ಸ್ಟಾರ್‌ಗೆ ಆರೋಗ್ಯ ಇಲಾಖೆ ನೋಟಿಸ್

ಕೆಜಿಎಫ್ 2 ಟೀಸರ್ ಮೂಲಕ ಹವಾ ಎಬ್ಬಿಸಿರೋ ರಾಕಿಂಗ್ ಸ್ಟಾರ್‌ಗೆ ಈಗ ಅರೋಗ್ಯ ಇಲಾಖೆ ಆರೋಗ್ಯದ ಪಾಠ ಮಾಡಿದೆ. ನಟ ಯಶ್‌ಗೆ ಇಲಾಖೆ ಹೇಳಿದ್ದೇನು..? ಇಲ್ಲಿ ಓದಿ

ರಾಕಿಂಗ್ ಸ್ಟಾರ್ ಯಶ್‌ಗೆ ಆರೋಗ್ಯ ಇಲಾಖೆ ಆರೋಗ್ಯದ ಪಾಠ ಮಾಡಿದೆ. ಕೆಜಿಎಫ್ ನಟ ಯಶ್‌ಗೆ ಆರೋಗ್ಯ ಇಲಾಖೆ ನೋಟಿಸ್ ಕಳುಹಿಸಿದೆ. ಕೆಜಿಎಫ್ 2 ಟೀಸರ್‌ನಲ್ಲಿ ಸಿಗರೇಟ್ ಸೇದುವ ದೃಶ್ಯಕ್ಕೆ ಕತ್ತರಿ ಹಾಕಲು ಸೂಚನೆ ನೀಡಲಾಗಿದೆ.

ಇದು ಯುವ ಸಮುದಾವನ್ನ ಸಿಗರೇಟ್ ಸೇದುವಂತೆ ಪ್ರಚೋದಿಸುತ್ತದೆ. ಅಲ್ಲದೇ ಸಿಗರೇಟ್ ಮತ್ತು ತಂಬಾಕು ಉತ್ಪನ್ನಗಳ ಕಾಯ್ದೆ 2003, ಸೆಕ್ಷನ್ 5 ರ ಪ್ರಕಾರ ನಿಬಂಧನೆಗಳ ಉಲ್ಲಂಘನೆಯಾಗಿದೆ ಎಂದು ಇಲಾಖೆ ತಿಳಿಸಿದೆ.

ಲಕ್ಷಾಂತರ ಜನ ಯುವ ಅಭಿಮಾನಿಗಳನ್ನ ನೀವು ಹೊಂದಿದ್ದೀರಿ. ಹಾಗೂ ಆ ಯುವ ಸಮುದಾಯ ನಿಮ್ಮನ್ನ ಅನುಸರಿಸುತ್ತದೆ. ಯುವ ಸಮುದಾಯ ಸಿಗರೇಟ್ ಸೇದುವ ಪ್ರಚೋದನೆಗೆ ಒಳಗಾಗುವ ಸಾಧ್ಯತೆ ಇರುತ್ತದೆ ಎಂದು ನೋಟಿಸ್‌ನಲ್ಲಿ ಹೇಳಲಾಗಿದೆ.

ಹಾಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಇರುವ ಟೀಸರ್ ನಲ್ಲಿ ಸಿಗರೇಟ್ ಸೇದುವ ದೃಶ್ಯ ತೆಗೆಯಿರಿ ಎಂದು ಆರೋಗ್ಯ ಇಲಾಖೆ ಸೂಚನೆ ನೀಡಿದೆ. ಟೀಸರ್ ಭಾರೀ ಸೌಂಡ್ ಮಾಡಿದ್ದು, ಈಗಾಗಲೇ 100ಮಿಲಿಯನ್ ವೀಕ್ಷಣೆ ದಾಟಿದೆ.