Congress Membership ಕರ್ನಾಟಕ ಕಾಂಗ್ರೆಸ್‌ಗೆ 78 ಲಕ್ಷ ಸದಸ್ಯರು, ಡಿಕೆಶಿ ಮೆಚ್ಚುಗೆ!

ಸದಸ್ಯತ್ವದಲ್ಲಿ ದೇಶದಲ್ಲೇ ಮೊದಲ ಸ್ಥಾನ ಪ್ರಶಾಂತ್‌ ಕಿಶೋರ್‌ ಸಲಹೆ ಸ್ವೀಕಾರ ಎಂದ ಡಿಕೆಶಿ ಪಕ್ಷದ ಕಾರ್ಯಕರ್ತರಿಗೆ ಅಭಿನಂದನೆ

ಬೆಂಗಳೂರು(ಏ.27):  ರಾಜ್ಯ ಕಾಂಗ್ರೆಸ್‌ ಬರೋಬ್ಬರಿ 78 ಲಕ್ಷ ಸದಸ್ಯರನ್ನು ಹೊಂದಿದ್ದು, ಪಕ್ಷದ ಸದಸ್ಯತ್ವದಲ್ಲಿ ದೇಶದಲ್ಲೇ ಮೊದಲ ಸ್ಥಾನ ಪಡೆದಿದೆ. ಈ ಸದಸ್ಯತ್ವ ಪಟ್ಟಿಆಧರಿಸಿಯೇ ಮುಂದಿನ ದಿನಗಳಲ್ಲಿ ತಳ ಹಂತದಿಂದ ಕೆಪಿಸಿಸಿ, ಎಐಸಿಸಿಗೆ ಅಧ್ಯಕ್ಷರ ಆಯ್ಕೆಯಾಗಲಿದೆ.’

ಕೆಪಿಸಿಸಿ ಕಚೇರಿಯಲ್ಲಿ ಏರ್ಪಡಿಸಿದ್ದ ಸಭೆಯಲ್ಲಿ ರಾಜ್ಯ ಕಾಂಗ್ರೆಸ್‌ ಡಿಜಿಟಲ್‌ ಸದಸ್ಯತ್ವ ಪಟ್ಟಿಯನ್ನು ಸದಸ್ಯತ್ವ ನೋಂದಣಿ ಮುಖ್ಯಸ್ಥ ರಘುನಂದನ್‌ ರಾಮಣ್ಣ ಅವರಿಂದ ಎಐಸಿಸಿ ಪಿಆರ್‌ಒ ಸುದರ್ಶನ್‌ ನಾಚಿಯಪ್ಪನ್‌ ಜತೆ ಸ್ವೀಕರಿಸಿದ ನಂತರ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಈ ವಿಷಯ ತಿಳಿಸಿದರು.

ರಾಜ್ಯದಲ್ಲಿ 78 ಲಕ್ಷ ಸದಸ್ಯರ ನೋಂದಣಿಯಾಗಿದೆ. ಮತ್ತೆ ಕೆಲವರು ಬುಕ್‌ ಮೂಲಕ ಸದಸ್ಯತ್ವ ಪಡೆದಿದ್ದು, ಅದನ್ನು ಬಳಿಕ ಸೇರಿಸಲಾಗುವುದು. ಸದಸ್ಯತ್ವದಲ್ಲಿ ದೇಶದಲ್ಲೇ ನಾವು ಮೊದಲ ಸ್ಥಾನದಲ್ಲಿದ್ದೇವೆ. ಸದಸ್ಯತ್ವದಲ್ಲಿ ತೊಡಗಿದ್ದವರಿಗೆ ರಾಷ್ಟ್ರೀಯ ಮುಖಂಡರಾದ ಸೋನಿಯಾ ಗಾಂಧಿ, ರಾಹುಲ… ಗಾಂಧಿ ಅಭಿನಂದನೆ ಸಲ್ಲಿಸಿದ್ದಾರೆ. ನಾನೂ ಸಹ ಅಭಿನಂದನೆ ತಿಳಿಸುತ್ತೇನೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ನೋಂದಣಿದಾರರು ಮೂರ್ನಾಲ್ಕು ದಿನದಲ್ಲಿ ಸದಸ್ಯತ್ವ ನೋಂದಣಿ ಶುಲ್ಕ 5 ರು., ಗುರುತಿನ ಚೀಟಿಯ ಸ್ಮಾರ್ಚ್‌ ಕಾರ್ಡ್‌ ಬೇಕಾದರೆ 10 ರು. ಶುಲ್ಕವನ್ನು ಕೆಪಿಸಿಸಿ ಕಚೇರಿಗೆ ರವಾನಿಸಬೇಕು. ಬಳಿಕ ಸದಸ್ಯತ್ವ ಪಡೆದ ಮತದಾರರ ಪಟ್ಟಿಯನ್ನು ಬ್ಲಾಕ್‌ ಕಾಂಗ್ರೆಸ್‌ ಕಚೇರಿಯಲ್ಲಿ ಪ್ರಕಟಿಸಲಾಗುವುದು. ಬೂತ್‌ ಮಟ್ಟದಲ್ಲಿ ನಾಯಕರಿಗೆ ವಾಟ್ಸಾಪ್‌, ಫೇಸ್‌ಬುಕ್‌ ಮೂಲಕ ರವಾನಿಸಲಾಗುವುದು. ಸದಸ್ಯತ್ವದ ಬಗ್ಗೆ ದೂರು ಅಥವಾ ಅಹವಾಲು ಇದ್ದರೆ ಸಲ್ಲಿಸಲು 15 ದಿನ ಕಾಲಾವಕಾಶ ನೀಡಲಾಗುವುದು ಎಂದು ಹೇಳಿದರು.

ಬ್ಲಾಕ್‌ ಅಧ್ಯಕ್ಷರ ನೇಮಕ:
ನಂತರ ಜಿಲ್ಲಾ ಮಟ್ಟದಲ್ಲಿ ಸಮಿತಿ ರಚನೆ ಮಾಡಿ ಅಹವಾಲು ಸ್ವೀಕರಿಸುತ್ತೇವೆ. ಬಳಿಕ ಅಂತಿಮ ಪಟ್ಟಿಪ್ರಕಟ ಮಾಡಿ ಬೂತ್‌ ಮಟ್ಟದ ಸಮಿತಿ ರಚನೆಯಾಗಲಿದ್ದು, ಪದಾಧಿಕಾರಿಗಳು ಬ್ಲಾಕ್‌ ಪ್ರತಿನಿಧಿಗಳಾಗಲು ಅರ್ಹರಾಗುತ್ತಾರೆ. ಎಲ್ಲೆಲ್ಲಿ ನೂತನ ಬ್ಲಾಕ್‌ ಅಧ್ಯಕ್ಷರ ನೇಮಕ ಮಾಡಬೇಕೋ ಅಲ್ಲಿ ಮೇ 29 ರಿಂದ ಜೂ.10 ರ ಒಳಗೆ ಚುನಾವಣೆ ನಡೆಸಲಾಗುವುದು ಎಂದು ವಿವರಿಸಿದರು.

ಪ್ರಶಾಂತ್‌ ಕಿಶೋರ್‌ ಸಲಹೆ ಸ್ವೀಕಾರ:
ಚುನಾವಣಾ ಚತುರ ಪ್ರಶಾಂತ್‌ ಕಿಶೋರ್‌ ಅವರು ಕಾಂಗ್ರೆಸ್‌ಗೆ ಒಳ್ಳೆಯದಾಗಲಿ ಎಂದು ರಾಷ್ಟ್ರೀಯ ನಾಯಕರಿಗೆ ಅನೇಕ ಸಲಹೆ ನೀಡಿದ್ದಾರೆ. ಇದನ್ನು ಸಂತೋಷದಿಂದ ಸ್ವೀಕಾರ ಮಾಡಲಾಗಿದೆ. ಪಕ್ಷವನ್ನು ಕಾರ್ಪೊರೆಟ್‌ ಆಫೀಸ್‌ನಂತೆ ನಡೆಸಲು ಆಗುವುದಿಲ್ಲ. ರಾಷ್ಟ್ರ ಮಟ್ಟದಲ್ಲಿ ಚರ್ಚೆ ಮಾಡಿರುವುದರಿಂದ ಈ ಬಗ್ಗೆ ಹೆಚ್ಚು ಪ್ರತಿಕ್ರಿಯೆ ನೀಡುವುದಿಲ್ಲ. ರಾಷ್ಟ್ರೀಯ ನಾಯಕರ ತೀರ್ಮಾನವನ್ನು ನಾವು ಪಾಲಿಸುತ್ತೇವೆ ಎಂದು ತಿಳಿಸಿದರು.

ರಾಜ್ಯ ಕಾಂಗ್ರೆಸ್‌ ಡಿಜಿಟಲ್‌ ಸದಸ್ಯತ್ವ ಪಟ್ಟಿಯನ್ನು ಸದಸ್ಯತ್ವ ನೋಂದಣಿ ಮುಖ್ಯಸ್ಥ ರಘುನಂದನ್‌ ರಾಮಣ್ಣ ಅವರು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌, ಎಐಸಿಸಿ ಪಿಆರ್‌ಒ ಸುದರ್ಶನ್‌ ನಾಚಿಯಪ್ಪನ್‌ ಅವರಿಗೆ ಹಸ್ತಾಂತರಿಸಿದರು. ಕೆಪಿಸಿಸಿ ಕಾರ್ಯಾಧ್ಯಕ್ಷ ಸಲೀಂ ಅಹ್ಮದ್‌, ಎಪಿಆರ್‌ಒ ಅಬ್ರಹಾಂ ಜೋಸೆಫ್‌, ಮೋತಿಲಾಲ… ದೇವಂಗಿ, ರಾಜ್ಯ ಸದಸ್ಯತ್ವ ನೋಂದಣಿ ಸಮಿತಿ ಅಧ್ಯಕ್ಷ ಆರ್‌.ವಿ.ವೆಂಕಟೇಶ್‌, ಸಂಚಾಲಕ ಸೂರಜ್‌ ಹೆಗ್ಡೆ, ವಿಜಯ… ಮುಳಗುಂದ್‌ ಮತ್ತಿತರರು ಹಾಜರಿದ್ದರು.