ಚೆನ್ನೈ ಹೋಟೆಲ್‌ಗಳಲ್ಲಿ ಈಗ ಬಾಳೆ ಎಲೆ ಊಟ!

ಚೆನ್ನೈನಲ್ಲಿ ಜಲಕ್ಷಾಮ ಮಿತಿಮೀರಿದ್ದು, ಚೆನ್ನೈನ ಹೋಟೆಲ್‌ಗಳು ಮತ್ತು ರೆಸ್ಟೋರೆಂಟ್‌ಗಳು ಈಗ ವೈವಿಧ್ಯಮಯ ಪ್ಲೇಟ್‌ಗಳನ್ನು ಬಳಕೆ ಮಾಡುವ ಬದಲು ಬಾಳೆ ಎಲೆಯನ್ನು ಬಳಸಲು ಶುರು ಮಾಡಿವೆ. ಈ ಕುರಿತಾದ ಒಂದು ವರದಿ ಇಲ್ಲಿದೆ ನೋಡಿ...

ಚೆನ್ನೈ(ಜೂ.30): ಜಲಕ್ಷಾಮಕ್ಕೆ ತತ್ತರಿಸಿರುವ ಚೆನ್ನೈನಲ್ಲಿ ಈಗ ಹೋಟೆಲ್‌ ಉದ್ಯಮಿಗಳು ನೀರು ಉಳಿಸಲು ಬೇರೆ ಬೇರೆ ಮಾರ್ಗೋಪಾಯ ಹುಡುಕಿಕೊಳ್ಳಲು ಆರಂಭಿಸಿದ್ದಾರೆ.

ನೀರು ಬಳಕೆ ಕಡಿಮೆ ಮಾಡುವುದೊಂದೇ ಪರಿಹಾರ ಎಂಬ ನಿರ್ಧಾರಕ್ಕೆ ಬಂದಿರುವ ಚೆನ್ನೈನ ಹೋಟೆಲ್‌ಗಳು ಮತ್ತು ರೆಸ್ಟೋರೆಂಟ್‌ಗಳು ಈಗ ವೈವಿಧ್ಯಮಯ ಪ್ಲೇಟ್‌ಗಳನ್ನು ಬಳಕೆ ಮಾಡುವ ಬದಲು ಬಾಳೆ ಎಲೆಯನ್ನು ಬಳಸಲು ಶುರು ಮಾಡಿವೆ. ದರ್ಶಿನಿಗಳಂಥ ಸಣ್ಣ-ಪುಟ್ಟಹೋಟೆಲ್‌ಗಳಿಂದ ಸ್ಟಾರ್‌ ಹೋಟೆಲ್‌ಗಳಲ್ಲೂ ಬಾಲೆ ಎಲೆಯನ್ನೇ ಬಳಸುತ್ತಿವೆ. ಗ್ರಾಹಕರ ಮನವೊಲಿಸಲು ಹೋಟೆಲ್‌ ಮಾಲೀಕರು, ಆಡಳಿತ ಮಂಡಳಿ ‘ನೀರು ಉಳಿತಾಯಕ್ಕಾಗಿ ಬಾಳೆ ಎಲೆ ಬಳಕೆ ಮಾಡಲಾಗುತ್ತಿದೆ, ಗ್ರಾಹಕರು ಸಹಕರಿಸಬೇಕು’ ಎಂದು ಫಲಕಗಳನ್ನು ಹಾಕಿದ್ದಾರೆ.

ತಮಿಳುನಾಡು, ಕೇರಳ ಸೇರಿದಂತೆ ದಕ್ಷಿಣ ಭಾರತದ ಬಹುತೇಕ ರಾಜ್ಯಗಳಲ್ಲಿ ಬಾಳೆ ಎಲೆ ಊಟ ಸಂಪ್ರದಾಯವಾಗಿದ್ದು, ಅದೇ ಮಾದರಿಯಲ್ಲಿ ಸೇವೆ ಒದಗಿಸಲಾಗುತ್ತಿದೆ ಎಂದು ಹೋಟೆಲ್‌ ಉದ್ಯಮಿಗಳು ಹೇಳಿಕೊಂಡಿದ್ದಾರೆ.