ಬಾಗ್ದಾದಿ ಕೊನೆ ಕ್ಷಣಗಳು: ಪೆಂಟಗನ್ ಬಿಡುಗಡೆ ಮಾಡಿದ ವಿಡಿಯೋ ತುಣುಕುಗಳು!

ಐಸಿಸ್ ಮುಖ್ಯಸ್ಥನ ಕೊನೆಯ ಕ್ಷಣದ ವಿಡಿಯೋ ಬಿಡುಗಡೆ| ಬಾಗ್ದಾದಿ ಅಡಗುತಾಣದ ಮೇಲಿನ ದಾಳಿಯ ವಿಡಿಯೋ ಬಿಡುಗಡೆ| ಬಾಗ್ದಾದಿ ಮತ್ತು ಆತನ ಸಹಚರರ ಕೊನೆಯ ಕ್ಷಣದ ಹೋರಾಟದ ದೃಶ್ಯ ಸೆರೆ| ಯುಎಸ್ ಸೆಂಟ್ರಲ್ ಕಮಾಂಡ್‌ನ ಕಮಾಂಡರ್, ಮರೈನ್ ಕಾರ್ಪ್ಸ್ ಜನರಲ್ ಕೆನೆತ್ ಮೆಕೆಂಜಿ ಮಾಹಿತಿ| ತನ್ನಿಬ್ಬರು ಮಕ್ಕಳೊಂದಿಗೆ ಆತ್ಮಹತ್ಯೆಗೆ ಶರಣಾದ ಐಸಿಸ್ ಮುಖ್ಯಸ್ಥ| ಕಂಪೌಂಡ್ ಹೊರಗಿದ್ದ ಎಲ್ಲ ಉಗ್ರರನ್ನೂ ಒಂದೇ ಹೊಡೆತಕ್ಕೆ ಉಡೀಸ್ ಮಾಡಿದ ಅಮೆರಿಕ ಸೇನೆ|

ವಾಷಿಂಗ್ಟನ್(ಅ.31): ಐಸಿಸ್ ಮುಖ್ಯಸ್ಥ ಅಬುಲ್ ಬಕರ್ ಅಲ್ ಬಾಗ್ದಾದಿ ಅಡಗುತಾಣದ ಮೇಲಿನ ದಾಳಿಯ ವಿಡಿಯೋವನ್ನು ಪೆಂಟಗನ್ ಬಿಡುಗಡೆ ಮಾಡಿದೆ.

ಉತ್ತರ ಸಿರಿಯಾದ ಬಾಗ್ದಾದಿ ಅಡಗುತಾಣದ ಮೇಲೆ ಅಮೆರಿಕ-ಖುರ್ದಿಷ್ ಸೇನೆ ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ಐಸಿಸ್ ಮುಖ್ಯಸ್ಥ ಅಬುಲ್ ಬಕರ್ ಅಲ್ ಬಾಗ್ದಾದಿಯನ್ನು ಕೊನೆಗಾಣಿಸಲಾಗಿತ್ತು.

ಇದೀಗ ಬಾಗ್ದಾದಿ ಹತ್ಯೆಯ ಕೊನೆಯ ಕ್ಷಣದ ವಿಡಿಯೋ ಬಿಡುಗಡೆ ಮಾಡಿರುವ ಪೆಂಟಗನ್, ದಾಳಿಯ ಸಂಪೂರ್ಣ ವಿವರವನ್ನು ಹೊರ ಹಾಕಿದೆ. ಕಪ್ಪು ಬಿಳುಪಿನ ಈ ವಿಡಿಯೋದಲ್ಲಿ ಬಾಗ್ದಾದಿ ಮತ್ತು ಆತನ ಸಹಚರರ ಕೊನೆಯ ಕ್ಷಣದ ಹೋರಾಟದ ದೃಶ್ಯ ಸೆರೆಯಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಯುಎಸ್ ಸೆಂಟ್ರಲ್ ಕಮಾಂಡ್‌ನ ಕಮಾಂಡರ್, ಮರೈನ್ ಕಾರ್ಪ್ಸ್ ಜನರಲ್ ಕೆನೆತ್ ಮೆಕೆಂಜಿ, ಸಾವು ಕಟ್ಟಿಟ್ಟ ಬುತ್ತಿ ಎಂದು ಅರಿತ ಬಾಗ್ದಾದಿ ತನ್ನಿಬ್ಬರು ಮಕ್ಕಳೊಂದಿಗೆ ಸೂಸೈಡ್ ಬಾಂಬ್ ಸ್ಫೋಟಿಸಿಕೊಂಡು ಆತ್ಮಹತ್ಯೆಗೆ ಶರಣಾದ ಎಂದು ತಿಳಿಸಿದ್ದಾರೆ.

ಬಾಗ್ದಾದಿ ಅವಿತಿದ್ದ ಅಡಗುತಾಣದ ಕಂಪೌಂಡ್ ಒಳಗೆ ಬಾಗ್ದಾದಿ, ಆತನ ಇಬ್ಬರು ಮಕ್ಕಳು, ಓರ್ವ ಮಹಿಳೆ ಹಾಗೂ ಇಬ್ಬರು ಐಸಿಸ್ ಕಮಾಂಡರ್‌ಗಳನ್ನು ಹತ್ಯೆ ಮಾಡಲಾಗಿದ್ದು, ಕಂಪೌಂಡ್ ಹೊರಗೆ ಬಾಗ್ದಾದಿ ಸಹಾಯಕ್ಕೆ ಧಾವಿಸಿದ್ದ ಉಗ್ರರನ್ನೂ ಹೊಡೆದುರುಳಿಸಲಾಗಿದೆ.

ದಾಳಿಯಾಗುತ್ತಿದ್ದಂತೇ ಮಕ್ಕಳ ಸಮೇತ ಸುರಂಗದೊಳಕ್ಕೆ ಓಡಿದ ಬಾಗ್ದಾದಿ, ಅಲ್ಲಿಂದಲೇ ಅಮೆರಿಕದ ಸೈನಿಕರ ಮೇಲೆ ಗುಂಡು ಹಾರಿಸುತ್ತಿದ್ದ. ಆದರೆ ಸಾವು ಸಮೀಪಿಸಿದಾಗ ಕೂಡಲೇ ಸೂಸೈಡ್ ಬಾಂಬ್ ಸ್ಫೋಟಿಸಿ ಆತ್ಮಹತ್ಯೆಗೆ ಶರಣಾದ ಎಂದು  ಕೆನೆತ್ ಮೆಕೆಂಜಿ ತಿಳಿಸಿದ್ದಾರೆ.

ಬಳಿಕ ಬಾಗ್ದಾದಿ ಶವವನ್ನು ಅಂತಾರಾಷ್ಟ್ರೀಯ ಯುದ್ಧ ನೀತಿಗೆ ಅನುಗುಣವಾಗಿ ಸಮುದ್ರದಲ್ಲಿ ಅಂತ್ಯ ಸಂಸ್ಕಾರ ನೆರವೇರಿಸಲಾಯಿತು ಎಂದು ಪೆಂಟಗನ್ ಸ್ಪಷ್ಟಪಡಿಸಿದೆ.