ಹೆಣ್ಣು ‘ದುರ್ಬಲೆಯಾಗೋದು' ಐದರಿಂದ ಏಳನೇ ವಯಸ್ಸಿನಲ್ಲಿ!

ಶಾಲೆಯ ಮೊದಲ ಹಂತದಲ್ಲಿ ಗಂಡುಮಕ್ಕಳೇ ಹೆಚ್ಚು ಕ್ರಿಯಾಶೀಲರು ಮತ್ತು ಪ್ರತಿಭಾವಂತರು ಎಂಬ ಭ್ರಮೆ ಬೇರೂರುವುದ­ರಿಂದಲೇ ಹೆಣ್ಣುಮಕ್ಕಳು ತಮಗೆ ಎರಡನೇ ದರ್ಜೆಯ ಸ್ಥಾನ ಕೊಟ್ಟುಕೊಂಡು ಕೀಳರಿಮೆಗೆ ಸಿಲುಕಿ ನರಳುತ್ತಾರೆ.

ಸಮೀಕ್ಷೆ ಸಂಗತಿ

ಗಂಡು ಬಲಶಾಲಿ, ಪ್ರತಿಭಾಶಾಲಿ ಮುಂತಾದ ಶೋಷ­ಣೆಯ ತಪ್ಪು ಅಂದಾಜುಗಳು ಹೆಣ್ಣುಮಕ್ಕಳ ಮನದಲ್ಲಿ ಯಾವ ಸಮಯದಲ್ಲಿ ರೂಪುಗೊಳ್ಳುತ್ತದೆ ಎಂಬ ಬಗ್ಗೆ ಇದುವರೆಗೂ ಸರಿಯಾದ ಅಧ್ಯಯನಗಳು ನಡೆದಿರಲಿಲ್ಲ. ಹಾಗಾಗಿಯೇ, ಗಂಡಿನ ಪ್ರತಿಭೆ ತನಗಿಂತ ಯಾವ­ತ್ತಿಗೂ ಹೆಚ್ಚು ಎಂಬ ತಪ್ಪು ಅಂದಾಜು ಹೆಣ್ಣು ಹುಟ್ಟಿದಂದಿನಿಂ­ದಲೇ ಆಕೆಯ ಮನದಲ್ಲಿ ಬೇರೂರಿ ಕ್ರಮೇಣ ಗಟ್ಟಿಯಾಗುತ್ತ ಹೋಗು­ತ್ತದೆ ಎಂದೇ ಸಮಾಜವಿಜ್ಞಾನಿಗಳು ಭಾವಿಸಿದ್ದರು. ಆದರೆ ಅಧಿಕೃತ­ವಾಗಿ ಯಾವ ಹಂತದಲ್ಲಿ ಈ ತಪ್ಪು ಅಂದಾಜು ಹೆಣ್ಣುಮಕ್ಕಳ ಮನ­ದಲ್ಲಿ ಗಾಢ ಪರಿಣಾಮ ಬೀರಲು ಶುರುಮಾಡುತ್ತದೆ ಎಂಬ, ಇದುವರೆಗೂ ಬೆಳಕಿಗೆ ಬಾರದ ಸಂಗತಿಯನ್ನು ಹಲವು ಸಮೀಕ್ಷೆ ಮತ್ತು ಸರಣಿ ಅಧ್ಯಯನದ ಮೂಲಕ ಅಮೆರಿಕದ ಸಂಶೋಧಕರ ತಂಡವೊಂದು ಬಯಲು ಮಾಡಿದೆ. ಆ ಪ್ರಕಾರ, ಶಾಲೆಗೆ ಸೇರಿಕೊಂಡ ಹೊಸತರಲ್ಲಿ, ಅಂದರೆ, ಐದರಿಂದ ಏಳನೇ ವಯಸ್ಸಿನಲ್ಲಿ ಇಂಥದ್ದೊಂದು ನಂಬಿಕೆ ಹೆಣ್ಣುಮಕ್ಕಳ ಮನದಲ್ಲಿ ಗಟ್ಟಿಯಾಗತೊಡಗಿ, ತಾನು ದುರ್ಬಲಳು ಎಂಬ ಭ್ರಮೆಗೆ ಜಾರುವಂತೆ ಮಾಡುತ್ತದೆ ಎಂದಿದೆ ಅಧ್ಯಯನ.

ನ್ಯೂಯಾರ್ಕ್ ವಿಶ್ವವಿದ್ಯಾಲಯ, ಇಲಿನಾಯ್ಸ್ ವಿಶ್ವ­ವಿದ್ಯಾಲಯ ಮತ್ತು ಪ್ರಿನ್ಸ್‌'ಟನ್‌ ವಿಶ್ವವಿದ್ಯಾಲಯಗಳ ಸಂಶೋಧಕರನ್ನು ಒಳಗೊಂಡ ತಂಡ ಇಂಥದ್ದೊಂದು ಮಹತ್ವದ ಸಂಗತಿಯನ್ನು ಬೆಳಕಿಗೆ ತಂದಿದೆ. ಶಾಲೆಯ ಮೊದಲ ಹಂತದಲ್ಲಿ ಗಂಡುಮಕ್ಕಳೇ ಹೆಚ್ಚು ಕ್ರಿಯಾಶೀಲರು ಮತ್ತು ಪ್ರತಿಭಾವಂತರು ಎಂಬ ಭ್ರಮೆ ಬೇರೂರುವುದ­ರಿಂದಲೇ ಹೆಣ್ಣುಮಕ್ಕಳು ತಮಗೆ ಎರಡನೇ ದರ್ಜೆಯ ಸ್ಥಾನ ಕೊಟ್ಟುಕೊಂಡು ಕೀಳರಿಮೆಗೆ ಸಿಲುಕಿ ನರಳುತ್ತಾರೆ ಎಂದು ಷರಾ ಬರೆದಿದೆ ಅಧ್ಯಯನ ವರದಿ.

(epaper.kannadaprabha.in)