ಎನ್‌ಪಿಆರ್ ಜಾರಿಗೆ ಸಿದ್ಧಗೊಂಡ ಮೊದಲ ರಾಜ್ಯ: ಶುರುವಾಗಲಿದೆಯಾ ವ್ಯಾಜ್ಯ?

ಒಂದು ಕಡೆ ಸಿಎಎ, ಎನ್‌ಪಿಆರ್ ಎನ್ ಆರ್ ಸಿಗೆ ವಿರೋಧ| ಮತ್ತೊಂದು ಕಡೆ ಎನ್‌ಪಿಆರ್ ಜಾರಿಗೆ ನಡೆದಿದೆ ಸಿದ್ಧತೆ| ಎನ್‌ಪಿಆರ್ ದಾಖಲೆ ತಯಾರಿಗೆ ಸಿದ್ಧಗೊಂಡ ಮೊದಲ ರಾಜ್ಯ| ಬಿಜೆಪಿ ಆಡಳಿತವಿರುವ ಈಶಾನ್ಯ ರಾಜ್ಯ ತ್ರಿಪುರಾದಲ್ಲಿ ಎನ್‌ಪಿಆರ್ ಜಾರಿಗೆ ಸಿದ್ಧತೆ| ಮೇ.16 ರಿಂದ ಮೊದಲ ಹಂತದ ಪ್ರಕ್ರಿಯೆಗೆ ತ್ರಿಪುರಾ ಸರ್ಕಾರ ಸಿದ್ಧತೆ| ಜೂನ್ 30 ರಂದು ಕೊನೆಗೊಳ್ಳಲಿರುವ ಮೊದಲ ಹಂತದ ಪ್ರಕ್ರಿಯೆ| ಮಾಹಿತಿ ಸಂಗ್ರಹಕ್ಕೆ  11,000 ಅಧಿಕಾರಿಗಳನ್ನು ನಿಯೋಜಿಸಲಿರುವ ತ್ರಿಪುರಾ ಸರ್ಕಾರ|

ಅಗರ್ತಲಾ(ಫೆ.16): ಬಿಜೆಪಿ ಆಡಳಿತವಿರುವ ಈಶಾನ್ಯ ರಾಜ್ಯ ತ್ರಿಪುರಾ, ದೇಶದಲ್ಲೇ ಮೊದಲ ಬಾರಿಗೆ ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (ಎನ್‌ಪಿಆರ್) ಜಾರಿಗೊಳಿಸಲು ಸಿದ್ದವಾಗಿದೆ. 

ಈಗಾಗಲೇ ಎನ್‌ಪಿಆರ್ ಜಾರಿಗೊಳಿಸಲು ಅಗತ್ಯವಾದ ದತ್ತಾಂಶ ಸಂಗ್ರಹಕ್ಕೆ ತ್ರಿಪುರಾ ಅಗತ್ಯ ಸಿದ್ದತೆ ನಡೆಸಿದೆ. ಮುಂಬರುವ ಮೇ.16 ರಿಂದ ಮೊದಲ ಹಂತದ ಪ್ರಕ್ರಿಯೆಗೆ ತ್ರಿಪುರಾ ಸರ್ಕಾರ ಮುಂದಡಿ ಇಡಲಿದೆ.

ಮೇ.16 ರಿಂದ ಆರಂಭಗೊಳ್ಳುವ ಮೊದಲ ಹಂತದ ಪ್ರಕ್ರಿಯೆ ಜೂನ್ 30 ರಂದು ಮುಕ್ತಾಯಗೊಳ್ಳಲಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ಈ ಮೂಲಕ ತ್ರಿಪುರಾ ಈಶಾನ್ಯ ಭಾರತದಲ್ಲಿ ಎನ್‌ಪಿಆರ್ ದಾಖಲೆಯ ತಯಾರಿ ಪ್ರಕ್ರಿಯೆಯನ್ನು ಘೋಷಿಸಿದ ಮೊದಲ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಮೊಬೈಲ್ ಆ್ಯಪ್ ಬಳಕೆಯ ಮೂಲಕ ಡೇಟಾವನ್ನು ಸಂಗ್ರಹಿಸಲು ರಾಜ್ಯಾದ್ಯಂತ 11,000 ಅಧಿಕಾರಿಗಳನ್ನು ನಿಯೋಜಿಸಲಾಗುವುದು. ಜನಸಂಖ್ಯೆ ಹಾಗೂ  ಬಯೋಮೆಟ್ರಿಕ್ ವಿವರಗಳೊಂದಿಗೆ ಪ್ರತಿ ನಿವಾಸಿಗಳ ಡೇಟಾಬೇಸ್ ಅನ್ನು ಈ ಅಧಿಕಾರಿಗಳು ಸಿದ್ಧಪಡಿಸಲಿದ್ದಾರೆ ಎಂದು ತ್ರಿಪುರಾ ಸರ್ಕಾರ ಸ್ಪಷ್ಟಪಡಿಸಿದೆ.