ಇನ್ಮುಂದೆ ನಡೆಯಲ್ಲ ನಕಲಿ ದಾಖಲೆ ಆಟ! ಐಟಿ ಇಲಾಖೆಗೆ ಸಿಕ್ಕಿದೆ ಬ್ರಹ್ಮಾಸ್ತ್ರ!

ಆದಾಯ ತೆರಿಗೆ ಮಾಹಿತಿ ಸಲ್ಲಿಕೆ ವೇಳೆ ನಕಲಿ ದಾಖಲೆಗಳನ್ನು ಸಲ್ಲಿಸಿ, ಹೆಚ್ಚಿನ ವಿನಾಯ್ತಿ ಪಡೆಯುತ್ತಿರುವವರನ್ನು ಪತ್ತೆ ಹಚ್ಚುತ್ತಿರುವ ಆದಾಯ ತೆರಿಗೆ ಇಲಾಖೆ ಅವರಿಗೆಲ್ಲಾ ನೋಟಿಸ್‌ ಜಾರಿ ಮಾಡಿದೆ ಎನ್ನಲಾಗಿದೆ.

ನವದೆಹಲಿ: ಆದಾಯ ತೆರಿಗೆ ಮಾಹಿತಿ ಸಲ್ಲಿಕೆ ವೇಳೆ ನಕಲಿ ದಾಖಲೆಗಳನ್ನು ಸಲ್ಲಿಸಿ, ಹೆಚ್ಚಿನ ವಿನಾಯ್ತಿ ಪಡೆಯುತ್ತಿರುವವರನ್ನು ಪತ್ತೆ ಹಚ್ಚುತ್ತಿರುವ ಆದಾಯ ತೆರಿಗೆ ಇಲಾಖೆ ಅವರಿಗೆಲ್ಲಾ ನೋಟಿಸ್‌ ಜಾರಿ ಮಾಡಿದೆ ಎನ್ನಲಾಗಿದೆ. ವೇತನ ವರ್ಗದ ಆದಾಯ ತೆರಿಗೆ ಪಾವತಿದಾರರು ಈ ಹಿಂದೆ ಆದಾಯ ತೆರಿಗೆ ಇಲಾಖೆಯನ್ನು ಸುಲಭವಾಗಿ ವಂಚಿಸಬಹುದಿತ್ತು. ಆದರೆ ತೆರಿಗೆ ಇಲಾಖೆ ಇದೀಗ ಸುಧಾರಿತ ತಂತ್ರಜ್ಞಾನ ಬಳಕೆ ಮಾಡುತ್ತಿರುವ ಕಾರಣ, ತೆರಿಗೆ ವಂಚಕರನ್ನು ಸುಲಭವಾಗಿ ಪತ್ತೆ ಮಾಡಿ ಅಂಥವರಿಗೆ ನೋಟಿಸ್‌ ರವಾನಿಸುತ್ತಿದೆ ಎಂದು ವರದಿಗಳು ತಿಳಿಸಿವೆ.

ತೆರಿಗೆ ತಜ್ಞರ ಹೆಚ್ಚಿನ ರೀಫಂಡ್‌ ಭರವಸೆ ಹಿನ್ನೆಲೆಯಲ್ಲಿ ವೇತನ ವರ್ಗದ ತೆರಿಗೆದಾರರು ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಸಲ್ಲಿಕೆ ಮಾಡುತ್ತಿದ್ದರು. ಉದಾಹರಣೆಗೆ ಗೃಹ ಸಾಲ, ಬಂಧುಗಳಿಂದ ನಕಲಿ ಪಾವತಿ ರಸೀದಿ, ನಕಲಿ ದೇಣಿಗೆ ದಾಖಲೆಗಳನ್ನು ಸಲ್ಲಿಸುತ್ತಿದ್ದರು.

ಪತ್ತೆ ಹೇಗೆ?:

ಆದರೆ ಹೊಸ ಹೊಸ ತಂತ್ರಜ್ಞಾನಗಳ ಬಳಕೆ ಕಾರಣ, ಕಳೆದ 10 ವರ್ಷದಲ್ಲಿ 50 ಲಕ್ಷಕ್ಕಿಂತ ಹೆಚ್ಚಿನ ಆದಾಯ ಹೊಂದಿದವರ ಎಲ್ಲಾ ದಾಖಲೆಗಳನ್ನು ಸುಲಭವಾಗಿ ತಾಳೆ ಹಾಕುವುದು ಆದಾಯ ತೆರಿಗೆ ಇಲಾಖೆಗೆ ಸಾಧ್ಯ. ಅದೇ ರೀತಿ 50 ಲಕ್ಷಕ್ಕಿಂತ ಕಡಿಮೆ ವೇತನದವರ ಹಿಂದಿನ 8 ವರ್ಷಗಳ ದಾಖಲೆ ತಾಳೆ ಕೂಡಾ ಸುಲಭ. ಇದಲ್ಲದೇ, ರಾಜಕೀಯ ಪಕ್ಷಗಳಿಗೆ ನೀಡಿದ ದೇಣಿಗೆ ಮಾಹಿತಿ ಕೂಡಾ ಆದಾಯ ತೆರಿಗೆ ಇಲಾಖೆಗೆ ಲಭ್ಯವಿರುವ ಕಾರಣ, ಯಾವುದೇ ಸಣ್ಣ ಸುಳ್ಳು ಮಾಹಿತಿ ಕೂಡಾ ಅವರನ್ನು ಸಿಕ್ಕಿಹಾಕಿಸಬಲ್ಲದು. ಈ ಕಾರಣಕ್ಕಾಗಿಯೇ ಈ ವರ್ಷ ಸಾಕಷ್ಟು ಪ್ರಮಾಣದ ವೇತನ ವರ್ಗದ ತೆರಿಗೆದಾರರಿಗೆ ಆದಾಯ ತೆರಿಗೆ ಇಲಾಖೆಯು, ಸೂಕ್ತ ದಾಖಲೆಗಳನ್ನು ಕೇಳಿ ನೋಟಿಸ್‌ ಜಾರಿ ಮಾಡಿದೆ ಎಂದು ವರದಿಗಳು ತಿಳಿಸಿವೆ.