ಪಾಕಿಗಳ ನಡುಗಿಸಿದ 'ಬ್ರಹ್ಮೋಸ್'​ ಹಿಂದಿನ ಶಕ್ತಿ ಇವರೇ ನೋಡಿ! ಹೆಸರಿನ ಹಿಂದಿದೆ ರೋಚಕ ಕಥೆ...

ಭಾರತ-ರಷ್ಯಾ ಜಂಟಿಯಾಗಿ ಅಭಿವೃದ್ಧಿಪಡಿಸಿದ ಬ್ರಹ್ಮೋಸ್ ಕ್ಷಿಪಣಿ, ಭಾರತದ ರಕ್ಷಣಾ ಸಾಮರ್ಥ್ಯವನ್ನು ಹೆಚ್ಚಿಸಿದೆ. ಡಾ. ಜೈತೀರ್ಥ ಆರ್. ಜೋಶಿ ಇದರ ಹೊಸ ಮಹಾನಿರ್ದೇಶಕರಾಗಿದ್ದು, ರಕ್ಷಣಾ ತಂತ್ರಜ್ಞಾನದಲ್ಲಿ ಮೂರು ದಶಕಗಳ ಅನುಭವ ಹೊಂದಿದ್ದಾರೆ. ಬ್ರಹ್ಮೋಸ್ ಈಗ ಭಾರತೀಯ ಸೇನೆಯ ಬ್ರಹ್ಮಾಸ್ತ್ರವಾಗಿದ್ದು, ಹಲವು ರಾಷ್ಟ್ರಗಳಿಂದ ಬೇಡಿಕೆ ಪಡೆಯುತ್ತಿದೆ. ಡಾ.ಜೋಶಿಯವರ ಕೊಡುಗೆಗೆ ಹಲವು ಪ್ರಶಸ್ತಿಗಳು ಸಂದಿವೆ.

ಬ್ರಹ್ಮೋಸ್..​. ಈ ಹೆಸರು ಕೇಳಿದರೆ ಉಗ್ರರನ್ನು ಪೋಷಿಸುತ್ತಿರುವ ಪಾಕಿಸ್ತಾನದಂಥ ರಾಷ್ಟ್ರಗಳು ಗಡಗಡ ನಡುಕ ಹುಟ್ಟುತ್ತದೆ. ಇದರ ಸಾಮರ್ಥ್ಯ ಏನು ಎಂದು ಇಡೀ ವಿಶ್ವಕ್ಕೇ ಪರಿಚಯವಾದದ್ದು, ಪಾಕಿಸ್ತಾನದ ಉಗ್ರರ ನೆಲೆಗಳ ಮೇಲೆ ಭಾರತ ದಾಳಿ ಇಟ್ಟಾಗ. ಇಂಥದ್ದೊಂದು ಸಾಮರ್ಥ್ಯ ಇರುವ ಮಿಸೈಲ್​ ಭಾರತದ ಬಳಿ ಇರುವುದು ಕೆಲವು ರಾಷ್ಟ್ರಗಳಿಗೆ ತಿಳಿದಿದ್ದರೂ, ಅದರ ಶಕ್ತಿ ಜಗತ್ತಿಗೆ ಪರಿಚಯವಾದದ್ದು ಈಗಲೇ. ಈ ಹಿನ್ನೆಲೆಯಲ್ಲಿ ಹಲವಾರು ದೇಶಗಳಿಂದ ಬ್ರಹ್ಮೋಸ್​ಗೆ ಭಾರಿ ಬೇಡಿಕೆ ಬರುತ್ತಿದೆ. ರಕ್ಷಣಾ ವಲಯವನ್ನು ಆತ್ಮನಿರ್ಭರ ಮಾಡುವತ್ತ ಇಟ್ಟ ಬಹುದೊಡ್ಡ ಹೆಜ್ಜೆಗೆ ಇದು ಬೃಹತ್​ ಕೊಡುಗೆಯಾಗಿ ಪರಿಣಮಿಸಿದೆ. ಹಾಗೆಂದು ಬ್ರಹ್ಮೋಸ್​  ಭಾರತ ಒಂದರಲ್ಲಿಯೇ ತಯಾರಾದದ್ದಲ್ಲ.  ಭಾರತ ಹಾಗೂ ರಷ್ಯಾ ಇದನ್ನು  ಅಭಿವೃದ್ಧಿಪಡಿಸಿವೆ. ಎರಡು ದೇಶಗಳ  ಸ್ನೇಹದ ಪ್ರತೀಕ ಇದು ಎನ್ನಲಾಗಿದೆ.   ಭಾರತದ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ DRDO ಮತ್ತು ರಷ್ಯಾದ ಎನ್‌ಪಿಒ ಮಶಿನೋಸ್ಟ್ರೋಯೆನಿಯಾ  NPOM ಸಂಸ್ಥೆಗಳು ಜಂಟಿಯಾಗಿ ಬ್ರಹ್ಮೋಸ್‌  ಅಭಿವೃದ್ಧಿಪಡಿಸಿವೆ.

ಇದೇ ಕಾರಣಕ್ಕೆ ಈ ಎರಡೂ ದೇಶಗಳ ನದಿಗಳ ಹೆಸರನ್ನು ಸೇರಿಸಿ ಬ್ರಹ್ಮೋಸ್​  ಮಾಡಲಾಗಿದೆ.  ಭಾರತದ ಬ್ರಹ್ಮಪುತ್ರ ಮತ್ತು ರಷ್ಯಾದ ಮೊಸ್ಕ್ವಾ ಎಂಬ ಎರಡು ನದಿಗಳ ಹೆಸರು ಇದಾಗಿದೆ. ಆದರೆ ಈ ಬ್ರಹ್ಮೋಸ್​ ಎನ್ನುವುದು ಇದೀಗ ಭಾರತೀಯ ಸೇನೆಯ ಬ್ರಹ್ಮಾಸ್ತ್ರವಾಗಿದೆ. ಪಾಕಿಸ್ತಾನದ ವಿರುದ್ಧ ಇದರ ಕಾರ್ಯಾಚರಣೆಯಲ್ಲಿ ತೊಡಗಿಸಿಕೊಂಡು ಪಾಕಿಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ್ದ ಈ ಬ್ರಹ್ಮಾಸ್ತ್ರದ ಹಿಂದಿರುವ ಶಕ್ತಿ ಈ ಮೇಲಿನ ಚಿತ್ರದಲ್ಲಿ ಇರುವ  ಡಾ. ಜೈತೀರ್ಥ ಆರ್. ಜೋಶಿ. ಉತ್ತರಾದಿ ಮಠದ ಭಕ್ತರಾಗಿರುವ ಜೋಶಿ ಅವರು ಶ್ರೀ ಶ್ರೀ 1008 ಶ್ರೀ ಸತ್ಯಾತ್ಮ ತೀರ್ಥ ಮಹಾಸ್ವಾಮಿಗಳವರ  ಶಿಷ್ಯರಾಗಿದ್ದಾರೆ. ಆ ಸಂದರ್ಭದಲ್ಲಿ ಗುರುಗಳ ಸನ್ನಿಧಿಯಲ್ಲಿ ತೆಗೆದಿರುವ ಈ ಫೋಟೋ ಇದೀಗ ಸೋಷಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗುತ್ತಿದೆ. ವಿಜ್ಞಾನಿ ಆಗಿರುವ ಜೋಶಿ ಅವರು.

ಡಿಸೆಂಬರ್ 1, 2024 ರಂದು ಬ್ರಹ್ಮೋಸ್‌ನ ಹೊಸ ಮಹಾನಿರ್ದೇಶಕ (ಡಿಜಿ) ಆಗಿ ಮತ್ತು ಡಿಆರ್‌ಡಿಒದ ಬ್ರಹ್ಮೋಸ್ ಏರೋಸ್ಪೇಸ್‌ನ ಸಿಇಒ ಮತ್ತು ಎಂಡಿ ಆಗಿ ಅಧಿಕಾರ ವಹಿಸಿಕೊಂಡಿದ್ದಾರೆ.   ಈ ಸಂಸ್ಥೆಯು ತನ್ನ ಸೂಪರ್‌ಸಾನಿಕ್ ಕ್ರೂಸ್ ಕ್ಷಿಪಣಿ ವ್ಯವಸ್ಥೆಗೆ ಹೆಸರುವಾಸಿಯಾಗಿದೆ. ಅವರ ನೇಮಕಾತಿಯು ಭಾರತದ ರಕ್ಷಣಾ ಸಾಮರ್ಥ್ಯಗಳನ್ನು ಹೆಚ್ಚಿಸುವ ಮತ್ತು ವಿದೇಶಿ ತಂತ್ರಜ್ಞಾನದ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವ ಗುರಿಯನ್ನು ಹೊಂದಿತ್ತು. ಅದೀಗ ಸಾಬೀತಾಗಿದೆ. ಬ್ರಹ್ಮೋಸ್​ನ ಶಕ್ತಿಯ ಹಿಂದೆ ಇವರ ಸಾಕಷ್ಟು ಪರಿಶ್ರಮವೂ ಇದೆ. ಡಾ. ಜೋಶಿಯವರ ವೃತ್ತಿಜೀವನವು ಮೂರು ದಶಕಗಳಿಗೂ ಹೆಚ್ಚು ಕಾಲದ್ದಾಗಿದ್ದು,  ರಕ್ಷಣಾ ತಂತ್ರಜ್ಞಾನ ನಾವೀನ್ಯತೆಗೆ ಗಮನಾರ್ಹ ಕೊಡುಗೆ ನೀಡಿದ್ದಾರೆ.   ಸ್ಥಳೀಯ ವಿಮಾನವಾಹಕ ನೌಕೆಯ ಯುದ್ಧ ಸನ್ನದ್ಧತೆಯ ಬಗ್ಗೆ ಸಾಕಷ್ಟು ಅಧ್ಯಯನ ನಡೆಸಿದವರು.  ಕಡಲ ಕಾರ್ಯಾಚರಣೆಗಳನ್ನು ಹೆಚ್ಚಿಸಿದ ಕೀರ್ತಿ ಇವರಿಗೆ ಸಲ್ಲುತ್ತದೆ.

ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿಗೆ ನೀಡಿದ ವಿಶಿಷ್ಟ ಕೊಡುಗೆಗಳಿಗಾಗಿ, ಅವರಿಗೆ ISNT ಯಿಂದ ದಶಕದ ವಿಶಿಷ್ಟ NDT'ian, DRDO ನಿಂದ ರಾಷ್ಟ್ರೀಯ ತಂತ್ರಜ್ಞಾನ ದಿನ ಪ್ರಶಸ್ತಿ, ಐಐಎಂ ನಿಂದ ಐಐಎಂ ಸೇಲ್​ ಚಿನ್ನದ ಪದಕ, DRDO ನಿಂದ ವರ್ಷದ ವಿಜ್ಞಾನಿ ಪ್ರಶಸ್ತಿ, ಇನ್​ಸ್ಟಿಟ್ಯೂಟ್​ ಆಫ್​ ಎಂಜಿನಿಯರ್ಸ್ ನಿಂದ ಭಾರತ ರತ್ನ ಸರ್ ಮೋಕ್ಷಗುಂಡಂ ವಿಶ್ವೇಶ್ವರಯ್ಯ ಪ್ರಶಸ್ತಿ, ಎಚ್​ಎಂಎ ಯಿಂದ ವರ್ಷದ ವ್ಯವಸ್ಥಾಪಕ ಪ್ರಶಸ್ತಿ, ISNT ಯಿಂದ ಡಾ. N. ಕೊಂಡಲ್ ರಾವ್ ಸ್ಮಾರಕ ಪ್ರಶಸ್ತಿ, ವಾರಂಗಲ್ ನ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆಯ ವಿಶಿಷ್ಟ ಹಳೆಯ ವಿದ್ಯಾರ್ಥಿ ಪ್ರಶಸ್ತಿ (DAA) ಸೇರಿದಂತೆ ವಿವಿಧ ಸಂಸ್ಥೆಗಳು ಮತ್ತು ವೃತ್ತಿಪರ ಸಂಸ್ಥೆಗಳಿಂದ ಅನೇಕ ಪ್ರಶಸ್ತಿಗಳು ಮತ್ತು ಗೌರವ ನೀಡಲಾಗಿದೆ.